(((((((مفيش رحمه ))))))
#لولو_محمد
الحلقه العشرون
رحيم / و انتى ايه رايك
رحمه / انت عارف رايى
رحيم / مش هيضر لو سمعتوا تانى
رحمه / انا مش هيفرق معايا كتب الكتاب فى حاجه انا عاوزه الفرح الكبير علاطول
عماد يدخل
عماد / بابا عاوزك
رحيم / حاضر
..........
رحيم يروح بيته
الكل قاعد محمد و محمود و عفاف و زينب و حياه
رحيم / متجمعين عند النبى باذن الله خير
محمد / اقعد يا رحيم
رحيم يقعد
محمد / انت عاوز تتجوز رحمه دلوقت صحيح
رحيم / انا قولت نكتب الكتاب و ناجل الفرح شويه بس لو عاوزين الفرح حد يقول للفرح لا
محمود / احنا اتكلمنا مع بعض و فكرنا
رحيم / هاه؟؟؟
زينب / شوفوا الواد مستعجل على ايه
محمد / احنا اتفقنا معكوا اتفاق زمان و قولنا انكوا لو جبتوا مجموع فى الثانوى هنقرا الفاتحه و انت صيعت و جبت الدبله و احنا سكتنا و قلعتوها و لبستوها و سكتنا بس احنا المرادى لينا شروط
رحيم / ايه الدخله دى يا بابا متوقعش قلبى
محمود / احنا موافقين بس لينا شروط
رحيم يقف / يس .... اللى تقولوا عليه
محمود / احنا هنعمل خطوبتك انت و رحمه فى اجازه نص السنه مع عماد و عبير
زينب / دا طبعا لو عبير وافقت
محمد / عماد هيكلمها و هتوافق باذن الله
رحيم / و كتب الكتاب
محمود/ ههههههههههههههه فى الصيف بعد النتيجه لو جبتوا تقدير عالى
رحيم / دا اخركوا يعنى
محمد / دا اسرع معاد فى السوق حتى اسال بره ههههههههههه
رحيم /ماشى يا حج ادحك ادحك
محمود / احنا لينا كمان شرط
رحيم / خير
عفاف / انت معدتش بتروح التمرين زى زمان و ريحت
رحيم / اريح ازاى بس يا تيته مانتى شايفه الكليه و الدراسه هعمل ايه بس
عفاف / ملناش فيه نظم وقتك المهم انك تاخد البطوله السنادى زى السنه اللى فاتت بالظبط
رحيم / ماشى موافق
محمد / تعجبنى بس شوف انت و عروستك فاضين امتى تنزلوا تنقوا شبكتكوا
رحيم / ماشى هروح بقى ابلغ رحمه
محمود / استنى يا رحيم انا عاوز اقولك حاجه قدام ابوك و امك
رحيم / خير
محمود / انا مش قصدى اجرحك بكلامى ده بس عاوزك تعرف النعمه اللى انت فيها
رحيم / مش فاهم
محمود / انت عارف كويس ان اى اب فى الدنيا خصوصا لو زيى محلتوش غير بنت واحده و جت بعد شوقه سنين اكيد مش هيكون عاوزلها غير احسن حاجه
رحيم / اكيد
محمود / عشان كدا انت لازم تكون احسن حاجه لازم تفهم كويس انى مش مبسوط ان جوز بنتى ابوه و امه هما اللى جهزوه و جابوله الشقه و الشبكه و هو متعبش فى حاجه و انا مؤمن ان اللى بيجى بسهوله بيروح بسهوله
رحيم / بس ....
محمود / اسمعنى للاخر انا عارف انك راجل و انك قد المسؤليه و بتحبها و هى بتحبك و عارف و متاكد انى لو لفيت الدنيا مش هلاقى احسن منك لبنتى بس اهو اعتبر الشروط دى مهر رحمه ايه خساره فيها
رحيم / ابدا رحمه تستاهل اكتر بكتير و انا على فكره مكنتش ناوى اعيش انا و هى على مصروفى انا ناوى اشتغل فى الصيف
زينب / تشتغل ... جديد الكلام ده تشتغل ايه بقى ان شاء الله
محمد / اكيد هيشتغل معانا فى المعرض يعنى امال هيشتغل فين
رحيم / لا يا بابا انا متفق مع دكتور عندنا فى الكليه اتمرنت فى شركته السنه اللى فاتت و لما شاف مشاريعى الترم ده عجبته و هيشغلنى معاه فى الاجازه
محمود / انت بتتكلم جد
رحيم / طبعا
محمد / عالبركه هنقول ايه تانى روح فرح عروستك يلا روح
...............
فى اوضه رحمه
رحمه / انت عارف انهم بيعجزوك على فكره
رحيم / هما فاكرين كدا ماشى خلينا وراهم
رحمه / انت مروحتش التمرين من اكتر من اسبوعين و الامتحانات الاسبوع الجاى و يادوب نزاكر يعنى اسبوعين كمان منغير تمرين هتعمل ايه
رحيم / ياربى عليكى متجيبى لترين جاز و تولعى فيا احسن
رحمه / بعد الشر يا متخلف انا بقولك هتعمل ايه
رحيم / هعمل ايه يعنى الاهم فالمهم هركز فى الامتحانات و لما اخد الاجازه هضاعف ساعات التمرين عشان اعوض
رحمه / انا هروح اتكلم مع تيته هقولها ان كدا كتير عليك
رحيم / لا استنى عموا محمود قال ان ده مهرك و انا مش هقلل منك
رحمه / مهر ايه و هبل ايه
رحيم / بصى خلى كل حاجه بوقتها نركز الاول فى الترم ده و نسيب اى حاجه تانيه لوقتها
رحمه / انت ...
رحيم / هششششش رغى رغى رغى افصلى التلاجه بتفصل
رحمه / انت بتقارنى بالتلاجه
رحيم / ايه هتتخانقى احنا لسه فيها
رحمه / لا و على ايه الطيب احسن
.................
فى كافيه
عبير / لا يا عماد ميصحش كدا
عماد / طب اهدى محدش هيجبرك لو مش عاوزه خلاص
عبير / انت عارف ان رحمه و رحيم زى اخواتى بس ده يومى انا و ليلتى انا و انا بصراحه عاوزه اكون انا العروسه و الاهتمام يكون كلو ليا انا مش هتخطب كل يوم
عماد / و دا حقك طبعا و انا هبلغهم
عبير / تبلغهم ايه انت عاوز تروح تقول ان عبير وحشه و مش عاوزه تشارك رحمه فى خطوبتها صح
عماد / يا بنتى دا حقك و محدش يقدر يجبرك على حاجه مش عوزاها
عبير / لا كان المفروض ترفض انت من الاساس مش تورطنى و تحطنى فى الموقف ده انت عارف رحمه ممكن تزعل
عماد / لا طبعا ايه اللى هيزعلها بالعكس كدا هيبقى ليها يوم لوحدها اكيد كل البنات بيفكروا زى بعض يعنى هى كمان اكيد عاوزه يوم يكون كل الاهتمام بيها هى بس و محدش تانى يشاركها فيه و لا ايه
عبير / معرفش بس انت غلطت
عماد / خلاص متشيليش هم هقولهم انى اتكلمت معاكى و انتى وافقتى بس انا اللى مش مرتاح
عبير / لا طبعا محدش هيصدقك عشان انت قولتلهم من الاول ماشى هسال عبير
عماد / يا ستى انتى مكبره الموضوع ليه انا هقولهم انى احرجت و كنت فاكر ان عبير هترفض فتيجى منها و ابقى بعيد عن الصوره و لما لقيتها موافقه قولت مبدهاش بقى متخافيش هتبقى بعيد خالص عن الصوره حلو كدا
عبير / هى هتحجز نفس القاعه اللى احنا حاجزينها و نفس البروجرام
عماد / معرفش بقى دى مشكلتها هى و رحيم بقى احنا مالنا
عبير / لا عادى مفيش انا بسال بس
عماد / بصى متشغليش بالك باى حاجه غير انك تجهزى نفسك عشان ننزل تنقى شبكتك و فستانك و تخلصى البلاوى اللى وراكى
عبير / بجد مش هيحصل مشكله
عماد / اكيد يا بنتى
........
فى البيت
زينب / هى موافقتش و لا ايه
عماد / يا ماما انا قولتلك انى انا اللى مكنتش راضى مالاول و قولت اشوف هى هتعمل ايه
زينب / واد يا عماد انا امك لو كدبت عالدنيا كلها انا فقساك
عماد / عاوزه ايه يا ماما
زينب / انا قولتلك مالاول انها هترفض و لا لا احنا ستات زى بعض و كلنا بنفكر زى بعض انا عمرى مكنت هقبل ان حياه تشاركنى فى يوم زى ده
عماد / ماشى يا ستى انتى بتعرفى فى كل حاجه بس هنعمل ايه دلوقت
زينب / ولا حاجه اخوك بقى ينزل هو و سنيورته و يلفوا لفتك انت و عبير على قاعه ليهم
عماد / هتقولى لرحيم ايه
زينب / عادى هقوله يدبر نفسه
عماد / طب و مزاكرته و امتحاناته
زينب / الله مش هو عاوز يتجوز و اللى بيشيل قربه مخرومه ...
عماد / هو انتى مش عجباكى الجوازه دى و لا ايه يا ماما
زينب / بص يا عماد انت و اخوك كل واحد فيكوا له راس و اللى ليه راس ما يحتاس
عماد / مش فاهم
زينب / هو انت و لا اخوك بتفكروا تشرونى فى اى حاجه فى حياتكوا انا على راى المثل فى الفرح منسيه و فى الغم مدعيه
عماد / مش صح على فكره
زينب / انا مفيش دماغ اجادل انا يادوب اجهز نفسى و انزل اشترى قماش تانى و ابعته للخياطه عشان تفصلى فستان تانى لخطوبه اخوك و لا انت فاكرنى هحضر الاتنين بنفس الطقم
محمد يدخل
محمد / فى ايه
زينب / انا هدخل ادخل الغسيل الدولاب عن اذنكوا
محمد / فى ايه يا عماد فى مشكله و لا ايه
عماد / احنا مش هينفع نخلى خطوبتى انا و رحيم فى يوم واحد
محمد / امممم و احنا مش هينفع نعزم الناس مرتين كل واحد فى اسبوع لوحده
عماد / طب هنعمل ايه
..........
محمد / مش عارف سبها لله انا هفكر فيها و اشوف مع عمك و نفكرلها فى تصريفه
عماد/ هتقول لرحيم حاجه
محمد / اوعى و انا هنبه على امك كمان متجيبش سيره هو دلوقت مركز عشان الامتحانات مش عاوز حاجه تشغل تفكيره
عماد / ماشى حاضر عن اذنك
........
بعد كدا يوم فى اوضه رحيم
رحيم نايم على سريره ال120 سم و رحمه تدخل فجاه
رحمه / رحيم رحيم قوم قوم
رحيم يصحى / صحيت فى ايه
رحمه تقعد جنبه / سمعت اللى حصل
رحيم / خير فى ايه
رحمه / عبير مرضيتش نعمل خطوبتنا معاهم
رحيم / عارف احسن
رحمه / عارف و ساكت و مقولتليش ليه طب هنعمل ايه
رحيم يقوم يقعد / انتى ليه شايله هم الدنيا كلها سيبيها لله لما نخلص امتحانات هنشوف
رحمه / طب انت مين اللى قالك
رحيم / هههههههههههه انتى اللى بتسالى السؤال ده ماما طبعا
رحمه/ طب عماد رايه ايه
رحيم / يا بنتى تصدقى و تؤمنى بايه
رحمه / لا اله الا الله
رحيم / انا فرحان كدا احسن
رحمه / بجد
رحيم / طبعا انا و انتى ناقصنا ايه عشان ميكونلناش يوم يخصنا هى ليها خيالها و احنا لينا خيالنا دا هما الخسرانين والله
رحمه تبتسم
رحيم / ايوه بقى خلى الشمس تطلع
رحمه / انا سمعت بابا و تيته بيتكلموا عن اننا ناجل كتب الكتاب ترم و نعمل الخطوبه فى اجازه اخر السنه
رحيم / بصى هى على عينى بس هعمل ايه انا اتكلمت مع عماد على فكره هو مينفعش هو اللى يارجل عبير هى اللى نقت القاعه و حجزت الفقرات و رتبت نفسها و مينفعش فجاه نقولها احنا هناخد اللى اخترتيه ده ميمكن اصلا ميعجبناش نعمل ايه ساعتها
رحمه / ايوه بس احنا اترمينا اربع شهور بحالهم
رحيم / انا والله بفكر منعملش خطوبه و نعمل كتب كتاب على طول او خطوبه و كتب كتاب مره واحده لو وافقوا تمام
رحمه / مش هيوافقوا هما اصلا قالوا حوار اننا نعمل مع بعض و هما عارفين انها هترفض عشان ناجل كتب الكتاب على قد ميقدروا
رحيم / بينى و بينك و من ورا قلبى
رحمه / قول
رحيم / هما معاهم حق
رحمه / انت بتقول ايه بس
رحيم / احنا فى اولى و هنكتب الكتاب و لسه قدامنا تلت سنين كاملين على الفرح و انتى مزه و الشيطان شاطر و الانسان دعيييف
رحيم يقوم يقرب من رحمه و رحمه تزقه بعيد
رحمه / بطل هزارك ده
رحيم / ايه هو انتى هتتلككى انا رجلى كانت منمله فبعدلها
رحمه / يا سلام
رحيم / وحياه عبد السلام ياختى
رحمه / طب هما كسبوا ايه يعنى ترم هى هياها برده هيبقى فاضل سنتين و نص عالجواز و حتى لو اتحايلنا نتجوز فى الدراسه عمرهم مهيوافقوا على اكتر من ترم يعنى لسه فى سنتين فى النص واقعين
رحيم / تيجى نتخانق و نفسخ الخطوبه سنه كمان
رحمه / تصدق فكره صبرنى يا رب انا غلطانه انى جايه اكلمك اصلا
رحمه تقوم و رحيم يقوم وراها و يلحقها
رحيم / ههههههههههههه طب بس بس استنى انا بهزر معاكى بصى اى كان نوع العلاقه اللى بتربطنى بيكى انا مبسوط بيها و بحمد ربنا ليل نهار عليها فبلاش تضيعى اجمل ايام حياتنا فى التوتر و القلق
رحمه / انهى احلى ايام دى معلش ضهرى اللى اتقطم فى النوم عاللوحه بالتمن ساعات متواصل عشان اتمرن عالفاينال و لا توترى ان لو انا او انت مجبناش تقدير كل احلامنا هتبقى بخ و لا توترى الاكبر على بطولتك اللى يا عالم هتعرف تلحق اللى فاتك و تعوض و لا لا
رحيم / بصى انتى مش مسؤله عنى و لعلمك انتى بتغنى و تردى على نفسك انتى من شويه قولتى انهم كدا كدا مش هيجوزونا غير بعد سنتين عالاقل و مع كدا بتقولى لازم نجيب تقدير عشان نتجوز ايه يعنى لو جبت جيد و لا مقبول هيفسخوا خطوبتنا يعنى لا
رحمه / يا سلام
رحيم / ايوه يا بنتى احنا بس بنعمل اللى علينا عشان نثبت لنفسنا قبلهم اننا نستاهل بعض
رحمه / بس انا بجد خايفه
رحيم / اخص عليا تخافى و انا جنبك دانا اروح اولع فى نفسى اسهل
...........
اول يوم فى الاجازه بالليل
رحمه / عماد هو انت وراك حاجه بكره
عماد / انا رايح اجيب بدلتى ليه عاوزه حاجه
رحمه / ممكن اتقل عليك تاخدنى بكره او بعده اللف على فستان انت عارف ان رحيم طول الوقت فى التمرين دا حتى امبارح طلع مالامتحان على النادى و رجع نام للصبح و صحى نزل و انا خايفه الوقت يزنقنى
عماد / اممم والله مش عارف سيبيها لله هحاول اظبط اللى ورايا بدرى بدرى بكره و افضيلك نفسى مش الساعه 6 يناسبك
رحمه / ربنا يخليك ليا يا احلى اخ فى الدنيا والله لو مكنش بابا و عموا فى اسكندريه مشغولين فى المعرض الجديد كنت خليت السواق يوصلنى بس هعمل ايه
عماد / يا ستى انتى تؤمرى هو انا اطول اسوق للهانم
.............
تانى يوم بالليل
تليفون البيت يرن و زينب ترد
زينب / الو مين معايا
عبير / ازيك يا طنط انا عبير اخبار حضرتك ايه
زينب / كويسه الحمد لله انتى عامله ايه
عبير / كويسه بحس حضرتك هو عماد عند حضرتك
زينب / اه شوف و انا اللى كنت فكراكى بتتصلى تسالى عنى يلا لا يا حبيبتى خرج مع رحمه هو مقالكيش و لا ايه
عبير / لا مقاليش انه خارج انا اصلى اتصلت بيه كتير و هو غير متاح
زينب / يمكن قافله مش عاوز ازعاج
عبير / ايه ؟؟؟
زينب / مهو لولا انى متاكده انه كان حاطه فى الشاحن طول الليل كنت قولت انه فصل بس يمكن يعنى المكان اللى هو فيه مفيهوش شبكه
عبير / يمكن
زينب / اخبار فستانك ايه صحيح طمنينى
عبير / اه جبته الحمد لله
زينب / اصل عماد خد رحمه يفسحها و يجيبلها فستان تحضر بيه خطوبتكوا بس انا مستغربه هو مقالكيش ليه انتى يا حبيبتى كبيره على انك تغيرى انه واخد خطيبه اخوه يفسحها و بعدين اكيد يعنى معيده زيك عمرها مهتتخانق و لا تعمل مشكله عشان هو يعنى خرج و هى معرفتش توصله اصله مش عيل صغير عشان ياخد منك الاذن يعنى و لا ايه يا حبيبتى
عبير / اكيد يا طنط على العموم ياريت لما يجى يبقى يكلمنى
زينب / والله لو افتكرت هبقى اقوله اصلك عارفه السن بقى
عبير / متقوليش كدا يا طنط دانتى لسه صغيره
زينب / ماشى ياختى حاجه تانى
عبير / مع السلامه يا طنط
زينب تقفل السكه
.................
عماد نايم فى السرير و بيتكلم فى التليفون
عماد / ممكن اعرف انتى ايه اللى منرفزك
عبير / انا اتصلت بيك اكتر من عشر مرات حضرتك غير متاح
عماد / للمره المليون قولتلك المحل مكنش فيه شبكه
عبير / انا مالى انا ان رحمه عاوزه تشترى فستان تحضر بيه خطوبتنا هو انت خلفتها و نسيتها هو مش رحيم عنده عربيه
عماد / يا حبيبتى رحيم احنا معدناش بنشوفه بقاله شهر مراحش التمرين و الكابتن نافخه دا بيجى يترمى عالسرير و ينام
عبير / و انا مالى يعنى انا مقولتلكش تيجى معايا تنقى فستانى و الاقيك رايح تنقى مع رحمه
عماد / دى اختى يا عبير انتى هتقارنى نفسك باختى
عبير / تصدق معاك حق اجى ايه انا فى الست هانم
عماد / انا مش قصدى كدا على فكره انا قصدى انك حاجه و هى حاجه تانيه خالص و مينفعش ابدا تقارنى حبيبتى و روح قلبى باختى يعنى
عبير / طب ليه مقولتليش انك خارج معاها
عماد / هو انا من يوم معرفتك قولتلك انا رايح فين و لا جاى منين و لا حتى انتى عمرك سالتى
عبير / ايوه بس كنت بعرف الاقيك
عماد / انا والله مكنتش اعرف ان موبايلى فاصل شبكه بس اختى و طلبت منى خدمه ينفع ارفض
عبير / يا بختها خطيبها شايلها من عالارض و خطيبى كمان شايلها و انا ياعينى منسيه
عماد / انتى عارفه يا عبير انا عرفت بنات بعدد شعر راسى و ماما كانت بتجيبلى كل يوم عروسه عمرك سالتى نفسك اشمعن انتى اللى اخترتك و صممت عليكى
عبير / والله لو ندمان احنا لسه فيها تقدر تروح لملكات الجمال اللى كانوا محاوطينك
عماد / محدش منهم يملى عينى غيرك انتى يا بيرو
عبير / كل بعقلى حلاوه يا خويا
عماد / ليه انتى عيش فينو ههههههههه
عبير / بايخه
عماد / لا والله حلوه بصى انا اخترتك عشان انتى بت جدعه و بتحبى اخواتى و عمرك مهتبعدينى عنهم و هتساندينى لما اتعب مش هتحطى احمال و هموم فوق كتافى
عبير / يعنى انت شايف انى حمل و هم كمان
عماد / انت كدا هتخلينى اخاف منك و افكر فى كل كلمه بقولهالك لتفهميها غلط
عبير / فى فرق انك تخاف منى و انك تخاف على زعلى يا عماد
عماد / حبيبك يبلعلك الزلط يا عبير و انا بحبك
عبير / انا عاوزه احس انك بتاعى لوحدى يا عماد
عماد / انتى عارفه يا بت انا قضيت نص عمرى سهران برغى مع بنات فى ام المخروب ده من يوم مخنرعوه و نزل مصر بس عمرى مكان يهمنى زعل حد فيهم كانت اللى تقفش بسيبها تولع بس انتى لا انتى غاليه عندى و يصعب عليا تنامى و انتى شايله منى عارفه ليه
عبير / ليه
عماد / عشان انتى مراتى بتاعتى
عبير / انا كمان عوزاك تبقى بتاعى انا لوحدى
عماد / منا بتاعك لوحدك يا هبله هو اكمن اختى طلبت خدمه ابقى خلاص هتجوزها يابت دانا ياما هدومى غرقت منها هى و الكلب رحيم الله يرحمها الكوافيل مكنتش بتستر
عبير/هههههههههههههههههههههههههههه
عماد / اه والله مكنتش اشيل حد فيهم الا لما يبهدلنى رياله بقى ترجيع حمام مكنوش مخلين فى نفسى حاجه الصراحه
عبير / ههههههههه بحاول اتخيلك شكلك فظيع
عماد / نفسى اوى اشوف وشك دلوقت
عبير / ليه
عماد / اصلى بحب دحكتك اوى
عبير تسكت
عماد / و بحب خجلك لما وشك و منخيرك يحمروا
عبير تقوم تجرى تقف قدام المرايه تلاقى وشها و مناخيرها حمر
عماد / ها اتاكدتى
عبير / اتاكدت من ايه
عماد / مش انتى دلوقت قدام المرايه
عبير / عرفت منين
عماد / عشان شايفك فى خيالى شكلك زى القمر
عبير / انت عارف انا عاوزه اقولك ايه دلوقت
عماد / انا عاوز اقولك انى بحب كل ذره فيكى
عبير / و انا كمان بحبك اوى
عماد / يلا تصبحى على خير انا دلوقت اقدر انام بقى و انا مبسوط
عبير / ربنا يخليك ليا
............
