((((((مفيش رحمه ))))))
#لولو_محمد
الحلقه السادسه
رحمه / انت عارف لو خنتنى هعمل فيك ايه
رحيم / مش هيحصل
رحمه / انا بقول لو
رحيم / متبقيش رخمه بقى مفيش لو
حياه تدخل
حياه / الغدى جاهز ايه مش جعانين
رحيم / واقع مالجوع و شامم ريحه تهبل
حياه / ههههههههه طب يلا يا بكاش
......
عالاكل
عفاف / ايه اخبار اول يوم كليه
رحمه / والله هو كان حلو فى اوله
حياه / فى اوله ؟؟؟
رحمه / الا قوليلى يا ماما هو طبيعى الكليه تبقى مليانه ناس و بنات و شباب و تلاقى واحده تسيب كل دول و تيجى تسال رحيم الجدول فين
حياه / ههههههههههههههههه ابتدينا
رحيم / والله كانت بتكلم رامى مبتكلمنيش انا
عفاف / صادق يا حبيبى هههههههههههه
رحيم / تيته
محمود / متزعلش يا رحيم انا كمان ياما حصل معايا كدا مش ذنبنا يابنى اننا حلوين و البنات بتموت فينا
عفاف / على يدى دانا كانوا بيجوا يخطبوهم لبناتهم
رحمه / بقى كدا
حياه / ايوه بس شوفى فى الاخر ساب كل دول و جرى و را مين
رحيم / ايوه بقى
محمود / دانا قعدت شهور يابنى لازقلها قبل متقدم انها تعبرنى بكلمه ببصه باى حاجه ابدا قولت مبدهاش بقى و روحت لابوها الله يرحمه و طلبتها
عفاف / كان راجل طيب اوى الله يرحمه
حياه / الله يرحمه
رحيم / شوفتى يعنى المفروض تبقى فرحانه مش زعلانه
رحمه / و مين قالك انى زعلانه
حياه / انتوا عارفين احلى حاجه فيكوا ايه
رحمه / ايه يا ماما
حياه / انكوا عارفين انكوا ملكوش غير بعض بتعملوا كل حاجه مع بعض و حتى اختلافاتكوا بتكمل بعض انا مش عاوزه اى حاجه فى الدنيا تفرق بينكوا
رحيم / مفيش حاجه تقدر اصلا
رحمه / انا شبعت
عفاف / طب كملى طبقك على الاقل
رحمه / والله شبعت خالص انا هقوم اغسل فاكهه
رحمه تقوم
رحيم / انا كمان شبعت هقوم اغسل ايدى
رحيم يقوم
محمود ينادى على رحيم / ابقى اغسل ايدك فى حوض اللى فى الحمام مش فى المطبخ فاهمنى هاه
عفاف / بطل غتاته
...........
فى المطبخ
رحيم ينط يقعد عالرخامه
رحيم / اغسلى التفاح كويس
رحمه تحدفه بتفاحه يمسكلها و ياكل منها
رحيم / انا مليش مزاج اروح التمرين النهرده متيجى نخرج
رحمه / تمرين ايه اللى انت مش عاوز تروحه لا هتروح طبعا البطوله فاضل عليها تلت شهور و لازم تكسب
رحيم / مش عاوز اسيبك النهرده
رحمه / طب بص انا هخلص اللوح بتاعتى عشان كورس الرسم بكره و هحصلك عالنادى ايه رايك
رحيم / لا مدام وراكى واجب خلصيه
محمود يدخل المطبخ
محمود / ايه يا رحيم هو الميه قطعت فى الحمام و لا ايه
رحيم / اصل التفاح هنا حلو اوى يا عمو
رحيم ينزل من عالرخامه
محمود / طب ايه مش هندوق يا ست رحمه و لا التفاح ده لسى رحيم بس
رحمه / بجد يا بابا انا كنت بقشرهولك و بقطعه اهو
محمود / ههههههههههههههه انا بمسى بس
.........
تانى يوم فى الكليه فى المدرج
ريهام / مش فاهمه هو احنا فى مدرسه عشان يعملوا محاضره الساعه 8 الصبح
رحيم / رامى بيتصل عن اذنكوا
رحيم يطلع
ريهام / انا مش شايفه روقيه
رحمه / و بتدورى عليها ليه
ريهام / هى مش صاحبتنا
رحمه / لو معاكى رقمها كلميها
رنا / مفيش لزوم جايه اهى مع رحيم
رحيم يرجع مع روقيه و تسلم عليهم
روقيه / مش هتصدقوا بقالى يجى ربع ساعه بدور عالمدرج بس الحمد لله رحيم انقذى و قالى اننا هنا
رحمه / امال ايه اخبار رامى يا رحيم
رامى / بيقولى انه فى التاكس و زمانه جاى
رحمه / طب تعال اقعد هتفضل واقف
روقيه / هو مفيش مكان ليا جنبكوا اخص عليكوا محجزتوليش
رحيم / ممكن تقعدى مكانى و انا هقعد ورا مش مشكله
روقيه / لا مش عاوزه ابقى بتقل عليك
رحيم / لا مفيش مشكله انا هقعد ورا هناك و هحجز لرامى كمان معلش فاتتنا دى
رحمه تنفخ / حد فيكوا يقعد عشان الناس بتيجى و اخرتكوا انكوا هتقضوا المحاضره واقفين
روقيه تقعد جنب رحمه و رحمه على اخرها
.........
بعد فتره
ريهام / يعنى ايه كويز كل اسبوع و غياب و شيتات احنا فى معتقل
رامى / على رايك الله يرحم زمن الكليات الجميل
رحمه / بطلوا افوره هو انتوا داخلين اى كليه دى كليه عمليه و انتوا عارفين ده كويس
روقيه / يعنى انا عاوزه افهم انتوا بتجيبوا وقت بعد مبنروح تزاكروا و تحلوا الشيتات منين
رحيم / رحمه دايما تقول عقلين اسرع من واحد
روقيه / و انت دايما بتسمع كلام رحمه
رحمه / مستحيل طبعا دا ابن سبعه
رحيم / بجد
رحمه / فاكر لما قعدت اتحايل عليك اشترى الفستان الاحمر و انت راسك و الف سيف ابدا
رحيم / لا انا قولتلك اشتريه بس متخرجيش بيه مالبيت
روقيه / و تبقى اشترته ليه بقى ان شاء الله
رحيم / ليا
ريهام / على فكره رحمه شيك جدا فى البيت
رحمه / الواحده لازم تكون حلوه فى بيتها و بره
روقيه / اساسى
رحيم / فاضل ساعتين عالسيكشن هتروحوا فين
رحمه / انا عاوزه اقعد قدام لما بقعد وره مبشوفش كويس
رحيم / قبل معاد السيشكن بربع ساعه هتروح نقف قدام القاعه تمام
رحمه / اوك اللى تشوفه
.........
بعد فتره فى البيت فى بيت رحيم
رحيم / ماما .... ماما
زينب / ايه يا حبيبى خير
رحيم / انتى بوظتى قميصى كدا
زينب / بنطلونك الاسود بهت عليه معلش ابقى اشترى غيره
رحيم / اشترى غيره انتى عارفه كويس ان القميص ده غالى عندى اوى و بعدين من امتى بتحطى حاجه مع الغسيل الاسود
زينب / غلطت و نسيت و حطيت ايه هتعلقلى المشنقه و لا عشان هو هديه من ست الحسن تبهدل امك بالشكل ده
رحيم / انا مش ببهدلك يا ماما انا بعاتبك عشان زعلان
زينب / انت تقدر تقف للغندوره كدا و تقولها عملتى و معملتيش مهو الحق مش عليها الحق عليا انا انى سبتك ليهم يربوك انا اصلا مخلفتش الا عماد انا مبعرفكش و لا بشوفك الا صدفه من و انت صغير زى القرع تمد لبره طول الوقت لازق للهانم و متعرفنيش غير وقت الحموم و كنت بفتكرك لما بلاقى هدومك فى الغسيل ياخويا مدام الهانم غاليه اوى كدا و زعلها بيوقفك لامك كدا متخليها تغسلك خليها تروق اوضتك خليها تشيل مسؤليتك اللى انا طافحه الدم بسببها
عماد يدخل
عماد / فى ايه يا ماما بتزعقى ليه
رحيم / بتهزقنى عشان عاتبتها عشان بوظت قميصى الابيض فى الغسيل
عماد / ياخبر اسود مش دا اللى رحمه جيباهولك
زينب ترفع حاجبها لعماد
عماد / بتحصل بتحصل ياما غسيل بيبوظ فى الغساله مانت عارف عادى عادى انزل اشترى واحد غيره اكيد هتلاقى زيه فى كل حته عادى يعنى بتحصل
رحيم / ماشى هنزل اشترى غيره بس على فكره يا ماما انا مزعقتش خالص و لا رحمه سحرالى و بحبك و انتى عارفه و زعلك غالى عندى و لو انا تقيل عليكى انا ممكن اودى هدومى المغسله و اشيل من عليكى همى و مسؤليتى و لا تزعلى نفسك
عماد / ايه يا رحيم الكلام ده
رحيم / عادى يا عماد انا كبرت و اقدر اشيل مسؤليتى دلوقت و لازم برده نريح ماما شويه
عماد / ياعم امك و بتدلع عليك هو انت ليك غيرها
زينب / ليه طبعا الست هانم
رحيم/ انتى ليه كرهاها كدا عملتلك ايه هى
.........
زينب / و انا اكرهها ليه و اصلا احطها فى دماغى ليه هو انا صغيره للعب العيال ده
رحيم / لا طبعا يا امى مانتش صغيره بس علاطول بتقللى منها بتبقى عارفه انى بدايق و برده بتتكلمى عنها وحش دى هتكون مرات ابنك و ام احفادك
زينب / و هو انا اعترضت ربنا يهنى سعيد بسعيده
عماد / ياعم امك بتحبك و بتغير عليك
زينب / اخرس ياوله انا اغير من المفعوصه دى
عماد / اه تغيرى اذا كنت انا بجلاله قدرى بغير منها مش سارقه قلب اخويا و عقله و وخداه مننا طول الوقت لازم نغير منها و بعدين يا ست الكل مبكره انا كمان اشوفلى مفعوصه كدا على قدى تاخدنى منك هتدايقى منها برده لو هتدايقى بناقص
زينب / انتوا هتدايقونى بالعافيه و خلاص و بناقص ياخويا اللى بيشيل قربه مخرومه هو اللى بيغرق فيها و بعدين هو انا يعنى هفضل شايله همكوا طول العمر بكره اموت و ترتاحوا كلكوا منى
رحيم / بعد الشر عليكى يا ست الكل هو احنا لينا بركه غيرك
زينب / كل بعقلى حلاوه يا وله
رحيم / حلاوه ايه يا ست الحلوين طب والله وانتى عارفه انا قد ايه بحبك
زينب / طب يلا ياخويا روحوا شوفوا وراكوا ايه انا مش فضيالكوا
زينب تقوم و تمشى
عماد / انت عبيط يا رحيم مانت عارف انها هتبوظه ليه مديتهوش لرحمه تغسله زى كل مره
رحيم / نسيت و قلعته فى الغسيل رجعت مالكليه تعبان قلعته و نمت
عماد / ياعم كبر مخك و انزل اشتريلك واحد زيه و متقولش لرحمه
رحيم / هتعرف يا فالح
عماد / خلاص روح قولها ان امك بوظت القميص التالت اللى رحمه شرياهولك
رحيم / هى بتعمل كدا ليه بس
عماد / هما الحموات كلهم كدا سيبك مش كل حاجه تحطها فى دماغك
رحيم / انا نازل
................
رحيم يفتح الباب و القميص فى ايده يقابل رحمه عالسلم يدارى القميص و را ضهره
رحمه / رحيم بتعمل ايه رايح فى حته
رحيم / انا كنت نازل رايح مشوار علاطول وراجع
رحمه / رايح فين مش هتيجى تحل معايا شيت الميكانيكا انا المتجهات طلعت عينى
رحيم / مش هتاخر هاجى علاطول انا حليت نصه امبارح بالليل
رحمه / ايه اللى فى ايدك ده
رحيم / دا ... دا ولا حاجه دا قميص كنت هتبرع بيه لواحد غلبان عارفه كدا
رحمه تمد ايدها و تمسك القميص
رحمه / تانى تانى و انت رايح فين بقى ان شاء الله
رحيم / انا حطيته فى الغسيل بالغلط كنت تعبان و ....
رحمه / ليه بتكدب يا رحيم انت عارف انى بزعل لما بتكدب عليا اكتر من الموقف نفسه ليه بتكدب
رحيم/ يعنى اقولك ايه بس مهى غلطتى انا اللى مسبتهولكيش زى كل مره
رحمه / عادى على العموم و انا بشتريه كنت عامله حسابى تعال معايا
رحيم / على فين
رحمه/ تعال بس فوق
....
فى اوضه رحمه
رحمه تفتح الدولاب و تطلع تلت قمصان نفس الشكل
رحيم / ايه ده
رحمه / مهو لما اول قميصين باظوا و مكنتش بلاقى زيهم و بزعل قولت مبدهاش انا اشترى بزياده اضمن
رحيم / ههههههههههههههه يابنت اللعيبه
رحمه/ اتفضل يا سيدى و لا تزعل نفسك و متبقاش تكدب تانى عشان المره الجايه هزعل بجد
رحيم / لا خلاص حرمت عمرى مهكدب عليكى تانى
............
فى الكليه بعد فتره
روقيه / ايه رايكوا نطلع الرحله اللى طالعه تبع الكليه
ريهام / ايوه بس دى قبل الميدتيرم بيومين و يادوب لازم نزاكر
روقيه / دا الفلانتين يا جدعان هنقضيه فى البيت يعنى
رامى / انا عن نفسى طالع وش انا ناقص نكد مش كفايه الحرته اللى احنا فيها
روقيه / و بعدين احنا لازم نفصل عشان نعرف نكمل مزاكره و لا ايه يا رحيم و لا صحيح تلاقيك كنت مجهز حاجه معتبره عشان تحتفل بيه مع رحمه
رحيم / احنا مبنحتفلش بالفلانتين احنا ايامنا كلها فلانتين
رامى / امال مين اللى كان بيحوش الفتره اللى فاتت عشان يجيب هديه
رحيم / تصدق انك عيل زباله و لا تسوى
رحمه /ههههههههههههه دا على اساس انى مكنتش واخده بالى يعنى
رحيم / انتى مفيش حاجه بتفوتك كدا
رحمه / لا مفيش
روقيه / ربنا يخليكوا لبعض كنت ناوى على ايه بقى يا رحيم
رحيم / والله مفيش انا كان فى خاتم عاجبنى و كنت بحوش عشان اجيبهولها بس كنت ناوى اعملهالها مفاجاه و البيه حرقها
روقيه / و تبقى برده مبتحتفلش بالفلانتين
رحمه / على فكره انا و رحيم مش محتاجين مناسبه عشان نهادى بعض اللى بيلاقى حاجه حلوه للتانى بيهاديه بيها مره ادانى هديه عيد ميلادى قبل العيد ميلاد بشهر بيقولى مانا كدا كدا مش هعرف اخبيها فخديها بقى احسن ههههههههههههههههه
ريهام / فاكره لما عملك اسوره عليها اسمك حروف
رحمه / زعلت اوى لما اتقطعت بس كل الخرز و الحروف اللى لقيتها منها عنتها عندى على فكره
رنا / دى كانت بتعيط بالدموع و قلبنا الفصل كلوا على الحروف ملقناش حرف اتش كان ناقص
رحيم / قولتلها هعملها واحده تانيه بس هى مرضيتش
رحمه / بطلوا نكد بقى فكرتونى و الله زعلت
روقيه / خلاص يبقى هنطلع الرحله انا بكره هدفع الاشتراك اتفقنا و لا ايه
ريهام / انا هقول لبابا لو وافق تمام
رامى / انا كمان طالع
رنا / زى ريهام لازم اسالهم فى البيت الاول
روقيه / و طبعا رحمه كمان لازم تاخد الاذن فهنعدى و نسال رحيم
رحيم / لا الحقيقه انا اللى لازم اخد الاذن مش رحمه
روقيه / بتهزر
رحمه / لا والله ابدا تيته من زمان مخليه رحيم هو ولى امرى يقول اه او لا من و احنا صغيرين ممكن اروح اللعب يا تيته تقولى روحى اسالى جوزى روحى اسالى جوزك بابا بقى عشان يحل الموضوع ده فرض هو رقابته على رحيم
رحيم / يعنى لو انا رايح فى اى حته فرحمه مش محتاجه تاخد الاذن لانها معايا لكن انا بقى اللى لازم اروح لعموا محمود و اقوله انا رايح الحته الفلانيه فى مشاكل و اتحايل عليه شويه بس فى الاخر بيوافق يعنى
رحمه / او بنسلط عليه تيته هى بتعرف تقنعه ههههههههههههههههههههه
روقيه / ربنا يخليهالكوا
...............
فى الرحله
رامى و ريهام و رنا و روقيه يقعدوا فى الكنبه اللى ورا و رحيم و رحمه يقعدوا جنب بعض فى الكرسين اللى قدامهم رحمه جنب الشباك و رحيم عالحرف و يقعدوا يتكلموا
رامى / ايه ياعم الحبيب متديرلنا شويه و لا احنا مش قد المقام
رحيم / بقى بزمتك ينفع اسيب الخلقه دى و ابص للخلقه دى
روقيه / طب ايه رايكوا نلعب
رحيم يبص لرحمه توافق / و ماله هتلعبوا ايه
رحمه / انا معايا ورقه و قلم تعالوا نلعب اكس او
روقيه / احنا سته يا ماما اكس او ايه احنا نلعب اوتوبيس كومبليت
رحمه / ماشى فرق و لا فردى
روقيه / فرق بس هنصعبها انا شريره هنخلى رحيم منافس ليكى
رحيم / انتى بتكرهينى كدا ليه كدا هخسر دى محترفه
رامى / يبقى هدخل فريقها وش
ريهام / و انا كمان
روقيه /خلاص يبقى انا و رنا و رحيم فريق يلا نلعب نبدا بحرف الره اكيد ده سهل بما اننا كلنا حرف الره يلا ولد بنت نبات جماد حيوان
ثوانى و الكل يخلص
روقيه /ابدئى يا بطله
رحمه / رياض رضوى رجله رمل رنه
روقيه / ايه رجله دى
رحمه / حشيشه بتبقى مع الملوخيه متعرفيهاش
روقيه / عمرى متعاملت مع الملوخيه على العموم حد فيكوا مختار اى حاجه زى رحمه
الكل يهز راسه لا
روقيه/ رحمه خمسين يلا يا رحيم قولنا
رحيم / رحيم رحمه رز رمح رنجه
روقيه / حرام عليك دا نفس اللى انا عملاه بالظبط
رحيم / ههههههههههههههههه انا قولتلك بلاش يبقى انا و انتى 25
رامى / انا الولد رامى انا طبعا و البنت روقيه و النبات رمان و الجماد رمح برضه و الحيوان رنجه برضه
ريهام / انا زيك فى كلو ماعدا البنت
رنا / و انا كمان زيكوا
رحمه / يبقى انا اللى كسبت شكرا شكرا تحبوا تخسروا دور كمان و لا نشوف لعبه تانيه
رامى / مدام فى فريقك يبقى دايس
رحيم / انسوا انا راجع فريقى مع رحمه اكيد انا كسبان
رحمه / افلام ايه ريكوا
روقيه / انا لعيبه فى اللعبه دى حد يبقى فى فريقى
رحيم / لا كل واحد مسؤل عن نفسه
رامى / موافق مين هيمثل
ريهام / انا هبدا
ريهام تقوم و تبدا تمثل بتفتح حاجه
رامى / مسرحيه
ريهام تشاور اتنين
رحيم / كلمتين
ريهام / تشاور تحت و فوق
روقيه / بين السما و الارض
رامى / و دول كلمتين
رنا / يعنى هو ده مسرحيه
رحيم يوشوش رحمه
رحمه / العيال كبرت
ريهام / صح
روقيه / انتوا نصابين رحيم غشش رحمه
رحمه / حصل فعلا ههههههههههههه
رامى / متيجوا نغنى
رحيم / وفر صوتك وصلنا
الاوتوبيس يوقف و الكل يبدا ينزل
روقيه / انتوا مش هتنزلوا
رحيم / و ليه نتزاحم خلى الكل ينزل و براحتنا هنفضل واقفين لحد مكل دول ينزلوا ليه يعنى
روقيه / خلاص براحتكوا
رامى / احساس زباله لما تلاقى الباص كلو كبلات و انا قاعد كدا زى خيبتها
ريهام / هههههههه بصلها من ناحيه ايجابيه
رنا / ههههههههههههههه
رامى / لا بجد مش فاهم
رحيم / كل واحد قاعد جنبه واحده و انت جنبك تلت قمرات
رامى / ههههههههههههههههههه معاك حق تصدق
الكل ينزل مالباص
رحمه/ و انت بقى كفايه عليك واحده و لا نفسك فى تلت قمرات
رحيم / و يجوا ايه تلت قمرات جنب نجمه عاليه منوره فى السما
رحمه / ثبتنى
رحيم / ههههههههههه
روقيه ترجعلهم
روقيه / مش ناوين تيجوا و لا ايه
رحمه / جايين
................
