لن ابقى على الهامش

البارت ١٣

#بسم الله الرحمن الرحيم
#لا اله الا انت سبحانك اني كنت من الظالمين استغفرك اللهم واتوب اليك
#لن ابقى على الهامش
#نداء_علي

الفصل_الثالث_عشر

بكاؤنا ليس ضعفاً لكنه حياة لصحراء الروح المقفرة، مخرج لتلك الآهات التي بُترت أجنحتها بيدي العادات وقيود التقاليد.

لم تكن تلك المرة الأولى التي تقول فيها والدتها كلماتها المعتادة، عليك بالصبر، المرأة خُلقت للتحمل، لا تتركِ بيتك وزوجك، سيرجع مهما فعل، زواجه مجرد نزوة ليس إلا، كلمات باتت محفوظة تستمع إليها رضوى في كل مرة في صمت إلى أن انتهى صمتها وأعلنت عن انهيارها قائلة:

خلاص كفاية، ايه كل مرة نفس الكلام، مفيش مرة تاخديني في حضنك وتقوليلي بالكدب اقعدي يابنتي وسيبك منه، مفيش مرة اشوف في عنيكي نظرة حزن علشاني، ياستي عارفه ان الحال على الأد وانكم مش حمل رضوى وبناتها بس أنا تعبت، تعبت أمثل اني قادرة اتحمل، مبقتش عارفه اتنفس من كتر الوجع

لم تعقب والدتها، ليس قسوةً منها ولكن بعض النساء نشأن في تربة فاسدة، فسادها يرجع إلى مبادئ ومورثات بالية تقتضي بأن يفعل الرجل ما يشاء ومهما حدث على المرأة الصمود.

أرض قاحلة تقتل أزهارها اليانعة ولا يصمد ويبقى داخلها سوى النباتات الصلبة شديدة القوة

اقتربت زوجة أخيها قائلة بتعاطف:

متزعليش يا ابلة رضوى، والله أمك ما تقصد تزعلك، وبعدين مين قالك اننا مش عاوزينك ده انتي تقعدي علي دماغنا

ابتسمت رضوى بانكسار قائلة:

ربنا يكرم أصلك يا هناء، معلش وجعت دماغكم، انا قايمة مروحة

هناء بإصرار : والله ما انتي ماشية، تعالي نطلع الشقة فوق ريحي شوية وسيبي البنات جوة مع ولاد خالهم

رضوى بخفوت : معلش، مرة تانية

اقسمت هناء قائلة : أنا حلفت بالله، هتخليني أصوم وأنا مبحبش في حياتي أد الأكل، تعالي بس ده أنا زارعة نعناع اخضر في البلكونة هنشرب شاي ونظبط دماغنا.

تحدثت والدتها بلوم قائلة:

اقعدي يا بنتي، أنا مش هتكلم تاني طالما بتزعلي، اقعدي اتغدي معانا.

رضوى بهدوء:

أنا شبعانة يا ماما، بالصحة والعافية.

هناء : خلاص يا ماما، أبلة رضوى مش هتكسر بخاطري، صح يا أبله؟

ابتسمت رضوى ابتسامة باهته، لكنها بالفعل تحتاج إلى عائلتها، ولو لساعات قليلة، صعدت مع زوجة شقيقها وتمتمت والدتها قائلة برجاء:

ربنا يهديكي يابنتي ويريح قلبك، انت عالم بحالها يارب وعالم بحالنا.

💬💬💬💬💬💬💬💬💬💬💬💬💬💬