زهري فبنت خالتي🌼مكتملة🌼

🌼الجزء 19🌼

زهري في بنت خالتي
~~✒️بقلم :رفيقات الدرب
~~الجزء :19

في الصباح فايقة سويمية بكري باغا تخمل الدار فيقات جمرة بستة وستين كشيفة تعاونها ..اما ربيع غير سمع القضية فيها التخمال طلع لبيت السطح يكمل نعاسو ..

جمرة فين ما جيتيها كاينة الا التخمال والشقى متعرف منين تجيهم ما هي موالفة بالخدامة ونعام لالة ....فقصات سويمية بالمزيان وهي تقول معصبة

سويمية : هذا لله معاك فقصتيني اختي وصعرتيني سيري عطي على فطيطيم تجي تعاونا هي بعدا تعرف تحك القنات وبلا متفرحي يدك بيديها

جمعات جمرة الضحكة فاش عرفات بلي الشقى واحل واحل فيها ....من بعد نص ساعة رجعات هي وبنت قصيرة ورقيقة سمراء البشرة ومسرارة

سويمية : زيدي افطيطيم زيدي هادي عندي ركبات فيا الصعر

بالحداقة دبنات العروبية تقدمات فطيطيم كتخمل وشقاها متقون خلات سويمية غير كتفرنس ...اما جمرة غير واقفة كتشوف امها كتحنا تبدا تسوس في المخاد غير تمشي امها تجبد التيلي من صدرها ...

دخلات سويمية للكوزينة توجد ليهم الغداء من بعد معوناتهم على الصالون والمراح...والبنات دخلو لبيت جمرة سيقوه وخملوه عاد دازو لبيت ربيع ....

عند ربيع لي ولا كلو ملصق بالعرق وبيت السطح سخوون عليه ..مصبرش وهبط جار ليزارو لبيتو حتا تصدم وهو كيشوف في فطيطيم هازة الوردة في يديها ..ولكن لي صادم ان الوردة متفتحة ولونها احمر يسر الناظرين ....طلع راسو بالعرض البطيئ باش يشوف بلي فطيطيم لي حيات الوردة ؟...هاد البنت لي قدامو هي سعدو وفين مخبي زهرو ؟

تقدم جيهتها كيفرنس وهي غير شافتو وشافت نظراتو تخلعات رمات الوردة فوق السرير وقالت :ش..ششكون انت ؟

جا صوت من لور كيقول :هذا ولد اختي وليدي ربيع

فطيطيم : ااه سمحليا معرفتكش

خرجات فطيطيم كتجري مخلية ربيع متبع ليها العين ...دار بالزربة عند سويمية وقال كيتفتف : هي هي والله حتا هي ...حيات الوردة ...هي فين مخبي زهري ..هي مولات السعد

سويمية : تا اش كتقول ...فطيطيم هي لي وراوني فيها العلامة ؟ وهادي مكانت على بال ..