زهري فبنت خالتي🌼مكتملة🌼

🌼الجزء 18🌼

زهري في بنت خالتي
~~✒️بقلم :رفيقات الدرب
~~الجزء :18

سويمية : دير النظااظر  الجواد كيقولو ليك زهرك قدامك صباح وعشية وعلى مولات السالف الكحل متلف ولا تجلى ..

ربيع : وكيف ندير نشوفها فين هي فين ؟

سويمية : هاااك شد وخبيها مزياان ؟

بقا ربيع مصدوم كيشوق في الوردة الذابلة والكحلة قدامو شاف في سويمية وقال : اش ندير بهادي كحلة اكتر من سعدي

سويمية : خبييها ونهار تقيسها مولات السعد غتحيا الوردة ويحيا قلبك ويطيح عليك الخير من السماء

شد ربيع الوردة ومتايقش بشنو قالت خالتو دارها بجيب للداخل ديال التجاكيطة ووقف باغي غير امتى يخرج وداكشي لي كان خرجو من البيت وجمرة تابعاهم زي الاطرش في الزفة مفاهمة تا وزة ...خلاتهم في الدار وخرجات تسارى....

وربيع ديريكت للبيتو الصغير لي ولا ينعس فيه خبا الوردة تحت المخدة وتكا يتساراح ويفكر فين غيلقا هاد مولات السعد  وكيفاش يخليها تقيس الوردة بقا كيفكر حتا غفى ...فيقاتو خالتو تغدى ورجع نعس ....

في الليل مربع ربيع رجليه في الصالون وكيفكر في حريرتو... طننن دارت ليه فكرة في ذماغو ..مولات السعد شعرها كحل وقدام عينيه وحتا بنت خالتو شعرها كحل ..زعما تكون هي مولات السعد لي غتحيي الوردة وتحيي قلبو ....قلبو دق على هاد الفكرة وشكون يكرهها عروسة ليه ...

تقاد في الجلسة فاش شافها داخلة ببيجامة دالنعاس كتجر بانطوفة والتيلي في يديها كيف العادة ..جلسات جنبو من بعد ملقات السلام ...وهو كيفكر كيفاش يقنعها تقيس الوردة باش يجربها ...بقا يفكر ويعاود حتى لقى حل انه يجيب الوردة ويرميها عليها هي ديك الساعة غادي تخلع وتشدها بيدها  ..ياله غادي يوقف وهو يصوني تيليفونو..غير شاف رقم الشاف لي كيصوني جاوب كيتفتف

ربيع : سلام سيدي

الشاف : سي ربيع هذا

ربيع : ايه نعام اسيدي ؟

الشاف : الكونجي عندك طول والى مبقيتيش باغي تخدم كاين لي يخدم راك مطرود من الخدمة

قطع الشاف الخط مخلي ربيع مصدوم ...رجع جلس في بلاصتو شاف في جمرة معوج فمو هادي مولات السعد ؟ هادي مولات النحس لي غير جلسات حداه جراو عليه من الخدمة ....نفى فكرة جمرة مولات السعد ورجع يخطط شكون تكون.؟