زهري فبنت خالتي🌼مكتملة🌼

🌼الجزء 16🌼

~زهري في بنت خالتي
~~✒️بقلم :رفيقات الدرب
~~الجزء :16

مورا الفطور  خارج ربيع كيضور مع الدروبة حتا بانت ليه قوقة تيتيزة ولاطاي حوتة واقفة كتعاير مع واحد الولد ...وسي ربيع بالروح الطيبة لي فيه ومحاربو للعنف ضد النساء شمر على دراعو وقصدهم وقف وسطهم وقال :حشووومة عليك اخويا حشوومة عليك تحكر عليها حيت هي بنت تحكرها عييب

محس غير بكتفو تنصل ضار لقا ديك البنت مخرجا فيه عينيها : حاكر عليا ! ونعام اخويا انت اش حرق شطاتك بيني وبينو وانت مالك يضربني ولا يقتلني كااع اش دخل حمارك لاسبوع الفرس ؟

نفس الدورة دار ليه الولد لي قال : سمعتيها اش قالت اوا دي معاك هادي باش تعلم تدخل سوق راسك

ربيع موعا على راسو حتى تطفاو عليه الضواو كانو زوج لكامت قاصحين عطاهم ليه الولد ...محس براسو امتى سخف وامتى فاق ولقى راسو مجبد فوق السداري في دار سويمية وجمرة كتدير ليه الثلج على عينو ..
شد من راسو دايخ وقال : شنو واقع ايي راسي

حطات ليه جمرة ثلجة على عينو حتا غوت وقالت : ملي مقادش على الصداع اش داك ليه ..كون ملقاوكش  شي دراري  عرفوكمن طرفنا هزوك مرابع وجابوك كون راك باقي منشور في الزنقة

بدا ينين ربيع وقال : ايي ولد الحرام  يدو قاصحة دكدكني ...عيني شعلو الضو

جمرة : ماشي شي حاجة ضربة صغيرة ان شاء الله دغيا تبرا

تقاد ربيع في الجلسة وقال: ايي فايت فيك طبيبة ولا ! انا عارف راسي معندي زهر واليوم زهري دكدكني

جمرة : اييه عاود ليا على هاد الزهر عندك لي قالو معدبك  ومجرجرك

ربيع : والو غير عرست  عريمت المرات وتا عرس ماكمل

جمرة : وايلي علاش ؟
ربيع : العروسة كتجي حتال العرس ومكتبقاش باغا تزوج

طلقات جمرة ضحكة عالية وقالت : انت هو المنحوس لي ما مطلق ما هو عريس هههههه

ربيع : انا كنهضر معاك من نيتي وانت كتضحكي