الفصل العاشر
بعد اللي حصل في موضوع زنوبة والخلاف اللي حصل بين أفراد عصابتنا وقفوا ق تل ورجعوا لنشاطهم القديم من تاني، المحششة وبيت الد عارة واستمروا موقفين ق تل شهرين لحد ما ظهرت اللي رجعتهم للق تل تاني وبالصدفة البحتة
الضحية التاسعة "أنيسة بنت محمد رضوان" تعالوا الأول نعرف مين هي أنيسة.
أنيسة في الوقت ده اللي هو سنة ١٩٢٠م كانت شابة جميلة جدًا عندها ٢٥سنة طويلة وبيضة بعيون عسلي واسعة ديما مكحلاهم علشان تبين جمالهم وشعر أشقر ذهبي طويل كانت بتحب تعمله ضفيرتين وتلفه على دماغها على شكل تاج، من الآخر كانت ست الحسن والجمال.
(للأسف مالهاش صورة علشان أوريكوا شكلها كان عامل إزاي)
اتجوزت وهي عندها ١٨ سنة من ابن عمها "أحمد عزب" الكلام ده سنة ١٩١٤م وبعد الجواز بكام شهر وأنيسة حامل قامت الحرب العالمية الأولى وطبعا كلنا عارفين الكساد اللي حصل في اسكندرية في الوقت ده فقرر أحمد عزب يرجع بلده في المنيا ويشتغل هناك بس أنيسة رفضت تسافر معاه كانت مولودة ومتربية في اسكندرية ومكانش عندها استعداد تسافر الصعيد.
اتطلقت وراحت عاشت مع أخوها الكبير سيد اللي كان شغال شيال في المينا بس مرتاحتش مع مراته وحصلت خناقات بينهم.
سابت أنيسة بيت سيد وراحت لأخوها التاني عزب اللي كان شغال مع أخوه في نفس المهنة ونفس اللي حصل مع مرات سيد حصل مع مرات عزب، ومكانتش تقدر تروح تعيش مع اختها نميسة علشان أمها كانت قاعدة معاها وهي عندها أولاد كتير.
بعد سنة من طلاقها رجع طليقها من الصعيد بس معاه مراته الجديدة اللي اتجوزها هناك من بلده ولما رجع رفض يرجع أنيسة لعصمته لأنه اعتبرها متمردة مبتمشيش طوع جوزها وكانت أنيسة فى الوقت ده ولدت بنتها هانم.
علشان صلة القرابة اللي بينها وبين طليقها عملها نفقة ٨ ريال في الشهر وكمان دفعلها النفقة المتأخرة فقررت تستقل بحياتها وتأجر شقة لواحدها طبعا اخواتها ما صدقوا بس اشترطوا عليها تاخد أمها تعيش معاها وابن أخوهم اللي مات واهو كدا يبقوا ضر بوا ٣ عصافير بحجر واحد خلصوا من مشاكل أنيسة وحِمل أمهم وابن أخوهم.
أنيسة اشترت بالنفقة المتأخرة ماكينة خياطة وأجرت شقة في عمود السواري وكانت ماشية كويس جدا ظبطت لبسها وشالت الجلاجل من الخلخال بتاعها وكانت ملتزمة بالفروض الدينية وكانت خياطة شاطرة وفي ظرف سنتين كانت اتنقلت من الشغل القطاعي للزباين للشغل بالجملة كانت بتعمل هدوم للترزية الكبار ومحلات الهدوم لحد ما حصل واتغيرت ١٨٠ درجة.
حياة أنيسة اتبدلت من اليمين للشمال لما اتصاحبت على عديلة الكحكية اللي سبق واتكلمنا عنها قبل كدا أكيد فاكرينها طبعا ولو مش فاكرينها ارجعوا للفصل الرابع هتلاقوها منورة هناك.
أنت تقرأ
خبايا وأسرار ريا وسكينة
Ficción históricaسنتحدث عن أشهر سفاحتان في القرن العشرين "ريا وسكينة" سنرى معا ما هي قصتهم الحقيقية وهل هما مجرمتان بالفعل أم أن ما حدث لهما هو محض افتراء ولا يمت للحقيقة بصلة
