الرجلُ ذو العطر المميز 🤍

الجزء 1️⃣

الجزء / 1

في عام / 2007 /

اني نورس من محافظه السماوة عمري 16 سنه
شكلي رشيقه وبيضه وطولي وسط وشعري لونه بني طويل ملامحي عادية بس حلوة

اجدادي صاحبين مزاراع من مات جدي اتوزعت المزارع على عمامي الستة وابوية سابعهم اصغر واحد بيهم
احنه المزرعه مالتنه بنينه بيت بنصها بيت كلش حلوو وجبير وداير ماداير المزرعه كلشي بيها بحيث ابويه دائما ايكول احلى شي بالدنيا الطبيعه واحنه طالعين علي انحب الطبيعه ونعشق المكان

بحيث الصبح من نفتح الباب وانشون المكان نحية من جديد

امي وابوية ناس اصلهم صح ولد عم واهلهم صاحبين خير بس ما متعلمين ميعرفون لا يقرون ولا ايكتبون فضلت الدراسه حسرة بكلبهم وحلفوا على نفسهم الا انكمل ونوصل اني واخواني

احنه اربع بنات واخ واحد عمامنه من نوع متشددين ودائمآ ايحثون ابوية على انو يحرص على طبتنه وطلعتنه لان كلش محافظين وحتى على بناتهم نفس الشي ايسوون

اما مراحلنه الدراسيه اني نجحت من الثالث بس مدرسه الاعدادية بغير منطقه وحيل بعيدة فأبوية كال للثالث كلش زين وما اريد اصير مشاكل بيني وبين عمامكم لذلك اني راح اكافح في سبيل توصلون لهاي المرحله الدراسية وما اريد احرمكم مثل ما اني وامكم انحرمنه من الدراسه

لذلك جانت شهادة الثالث متوسط بوكتها اتعادل شهادات عليا بالنسبه النه والبنات عمامنه

اما الولد فالي ايحب ايكمل ماعدهم مشكله ويا والي ميحب هم ما ايقصرون ويا وبالنهاية الفلاحه هي مهنتهم الاصلية لذلك اكثرهم ما كمل واكتفوا بشهادة الأبتدائية واختصروا الطريق النفسهم

واكو بيهم طمحوا للأفضل وكافحوا والي صار مدرس والي خذة شهادة قانون والي اتعين بشهادة والي احتفظ بيها وما راد التعيين اكتفه بأسمه خريج

خواتي الاصغر مني وحدة ثاني متوسط اسمها رونق والاصغر منها سمر سادس ابتدائي والأصغر ميساء رابع ابتدائي وحسن اخونه الوحيد والاصغر واحد ثاني ابتدائي اما احنه شكولنه نوعآ ما مرتبة وبينه الابيض والحنطاوي لان امي بيضه وابويه حنطاوي وحتى عمامي هم نفس الشي

اما اني فيعتبر صارلي سنه من كملت الثالث متوسط بس بقيت احب الدراسه ومن ناحية ثانية احب اهلي وما اريد اكسر كلمتهم ولا اسوي شي يخليهم حجاية بحلك عمامي

لذلك جنت دائمآ احب اقرة كتب وكلما ابوية ايروح لبغداد وتدرون بغداد بذاك الزمن بيها مكاتب عظيمه فجنت اوصي وايجيبلي كتب بس هو لان ميقرة ويكتب فمرة ايجيبلي حلوات ومرات مافهم منهن شي بس المهم جنت هواي احب الكتب ودائمآ اتمنى اصير كاتبة واصفن واكول شيسويج ينورس كاتبة وانتي بنص هذا الجمع الغفير من عمامج وقوانينهم العصيبه

لذلك احنه مقررين اتكون علاقتنه بالبيت علاقه صداقه وكلنه ننجمع سوة كل يوم بعد العشه انسولف ونضحك ونشكي وكلشي انسولف سوة ومحد ايضم على الثاني وهذا الشي ساعدنه هواني حتى انطور من نفسنه حتى لو جنه نادرآ ما نطلع خارج البيت بس نعرف شلون انعيش الي انريدة واحنه بداخله

قبل شهر اشتريت دفتر مذكرات الي ولرونق من ابويه خذانه للسوك علمود نشتري ملابس لان جان عدنه نقوصات على عرس ابن عمي الوسطاني مروان

وعود صرت من ذوله المثقفين الي ايكتبون مذكراتهم ويحتفضون بيها طبعآ اني واختي سوينه نفس الشي بس اتفقنه محد تفتح دفتر الثانيه لان يعتبر سر هذا الحجي اني ورونق والباقين اصغار ميفهمون هيج شي

لذلك جنت دائمآ قبل لا انام اكتب بس الاحداث المهمه حتى لا ايصير ملل بالموضوع وبعدها اضمه وانام

وقبل عرس ابن عمي مروان بيومين.............