الجزء / 9
( مرحبا نورس ...
طلبتي احجيلج عن غلطتي الي ما انفغرت على الرغم من مرور تسع سنوات
الموضوع طويل لكن راح احجيلج بأختصار واتمنى تتعلمين من اخطاء غيرج وايكون عبرة الج
قبل 15 سنه من جان عمري 26 سنه اتعرفت على ابنية بنفس المنطقه وحبيتها حب شريف من طرف واحد وطلبتها من اهلها بس كالوا انو البنية ما اتريدني بس اني ضليت مصر على الموضوع وطلبت من اختي تتقرب منها واتوصللها مشاعري تجاها وبعد فترة البنية صارحت اختي وطلعت هي هم عدها مشاعر تجاهي والي رفضوا همه اهلها مو هي لأن يردوها لأبن عمها والموضوع بي عشاير
ومرة من المرات اتواصلت وياها عن طريق رساله كتبتها الها ودزيتها بيد اختي وكل كلامي محترم وما بي اي شي غلط اني بذاك الوكت استاذ بمدرسه ولد اعدادية واهلي ناس معروفين وبعدها دزيت رساله وهي هم كامت ادزلي وقوت العلاقه بينه ......)
الموضوع طويل ما يخلص برساله وحدة مرة ثانية عود اكملج
انتبهي على نفسج .............استاذ سلام
هنا اني ضليت اكمز شيصير لو كاتب بأكثر من ورقه هذا عود الاستاذ شنو نقص ورق مثلآ
رونق / ها شو كاعدة من وكت شنو هذا الكتاب البيدج ؟ بله خلي اشوف
نورس / ماكو شي هذا عمو ابو وسام دزه اليه
رونق / ها يعني مو احد منا منا ؟
نورس / ولج نصي صوتج تردين اصير مشاكل
رونق / هو منو الجايب المشاكل اني لو انتي
نورس / لتلحين وياي وكعدي البقيه امي مسوية الريوك ومتانيتنه
ضميت كلشي زين ونزلنه كلنه يم امي ولكينه ابوية كاعد
واحنه جاي نتريك جان ايفتحون موضوع زواجي اني وسجاد
ابو نورس / نورس بنتي اني علمتكم على الصراحه وما اريد اجبر احد بيكم على شي هو ميريدة بس بنفس الوكت انتم بعدكم اصغار وما تفهمون بأمور الحياة بكد ما فهمناها اني وامكم
لذلك يا بنتي اكيد امج حجتلج على موضوع الزواج على عمج ابو مروان
طلبج لأبنه سجاد وهذا مو لأن ابن اخوية واحمد بي وانما الكل يعرف بي ولد مرتب وشخصيه وشاطر حتى بمهنته وعمرة مناسب العمرج احنه ردنه نستعجل بالموضوع والولد قابل بس ايريدج انتي تقتنعين وانطاج مجال اتفكرين براحتج
هاي الفتره عنده شغل وان شاء الله تتوفقون بحياتكم
من ابوية حجه هيج ماضافلي شي جديد لان رونق حجتلي كلشي بس سويت روحي اول مرة اسمع الحجي وبنفس الوكت ماحجيت شي
مر يومين اقرة بالكتاب الدزه عمو ابو وسام بس جان روايه عادية فما حسيت اكو قصد منها وانما الرساله هي الي مقصودة لذلك ما كملتها على النص وعفتها وضليت انتظر الطفل يجيني حتى استلم منه رساله جديدة وفعلآ اجه ومن فتحتها لكيتها عبارة عن تكمله لقصه استاذ سلام
( مرحبا نورس....
اكيد انتي منتظرة مني اكمل قصتي الج وهذا شي اني متأكد منه لأن لاحضتج عبارة عن انسانه لحوحه بموقفها
بعد ما استمرينه بالتواصل لمدة اشهر طلبت منها التقي بيها لأول مرة واختي هي الي اترتب الموضوع وفعلآ صار الي ردته والتقينه بس يومها انكتبت صفحه سودة بحياتنه لأن اخوها طلع مراقبها وكشفنه واتعارك وياي وهي انحبست بالبيت وجرموا بيها وغصبوها على ابن عمها
اما اني فصارت افصول وعشائر وبيوم زواجها ودت مرسال لأختي بيد صديقتها وطلبت مني اما نشرد سوة او تنتحر
اني ما هان علي اشوفها اتموت ولا ايهود علي ازيد المشاكل بس ذاك الوكت شفت ان المشكله بعد طلعت عن ايدي ومال اقنعهم انو حبي الها شريف وما عندي وياها اي شي غلط اكيد مراح يقتنعون لان حجيت وحجيت لأكثر من مرة بس ما فاد مصرين على رأيهم
فلكيت الحل الأول هو انسب النه وبليله العرس شردت واتفقنه على مكان ومناك طلعنه وبعد ما درينه شنو صار ورانه وعشنه بمنطقه محد يعرفنه بيها بس الغلط يبقى غلط
لهنا بعد غير مرة اكملج ......... سلام )
كل مرة ايشوقني اكثر واكثر ليش هيج ايسوي شيصبرني
انجطلت على الجربايه ياترى اني الي جاي اسوي صح لو غلط خاف احد يدري بية وبعد شيخلصني منهم وتقريبآ اني واستاذ سلام قصتنه تشابه هم اني بنص عشاير وكلشي محسوب علية بس هو لكه الي ايحبها اني بعدني
لهنا وانفتح باب الغرفه حيل بسرعه طفرت وضميت الرساله وراي وجان تطلع ...........
أنت تقرأ
الرجلُ ذو العطر المميز 🤍
Romanceقضت اجمل ايام حياتها تبحث بين طيات الكتب عن تلك الشخصية التي تشكل معها اجمل ثنائي ليصبحان شخصيات رواية حقيقية تترجم على صفحات ذهبية اجمل المواقف والمشاعر التي يتمناها الجميع ان تحصل معه . وكما قيل لكل مجتهد نصيب وها هي نورس تصارع المصائب التي حلت ع...
