الرجلُ ذو العطر المميز 🤍

الجزء 1️⃣3️⃣

الجزء / ١٣

دخلوا ورحبنه بيهم ومشت الامور طبيعي بالنسبه للكل اما اني كل شوية اذكر احلامي الي بنيتها على استاذ سلام وعمو ابو وسام وشلون كسروا بي

اي كسروا بيه اتمنيت علاقتي تقوة بيهم اكثر واكثر وما اتوقعت عمو ابو وسام يمنعني من التواصل وياهم

حسيتها جبيرة على كرامتي ومو مال اصغر نفسي وانزلها الناس اول وتالي همه غريبين عليه

واني سرحانه بهذا التفكير وجنت كاعدة وي البنات بغرفه الضيوف مال نساء وصايرة مقابيل غرفه الرجال احنه هيج مرتبين البيت رفعت راسي وجان اشوف سجاد كاعد مقابيلي وايباوع عليه بس شكد ما هو محامي والسان بس الحقيقه شريف وما فد يوم سمعت منه كلمه مو حلوة لا بحقي ولا بحق اي وحدة من بنات اقاربي

من شفته هيج خجلت وكمت رحت بالمطبخ جان تلحكني مرت اخو اسمها وسن وضلت تحجي وياي وتشاقه بعدين فاجأتني بكلامها

وسن / نورس انتي بنيه هادئة وذكية صح اني ما شفتج هواي ولا اتواصلت وياج بصورة شخصيه بس بصراحه عجبتني شخصيتج لعد شلون بسجاد الله ايساعدة حقه ايصر على الموضوع

نورس / ليش هو سجاد حاجي وياج ؟

وسن / بصراحه اي حاجي وياي لان من يوم دخلت بيتهم اتعاملت ويا مثل اخته الجبيرة وهو هم ومن قرر يتقدم الج رسمي فاتحني بالموضوع وحجالي كلشي عنج وشلون هو معجب بيج

نورس / معحب ؟

وسن / اي ليش مستغربه

نورس / اريد اكلج شي بس ما اريد سجاد يعرف
حاولت هواي اتقبله بس احس شي صادني عنه

وسن / نورس اعتبريني اختج الجبيرة او صديقتج بكيفج فأذا اكو احد ابالج كولي واني اقنع سجاد يصرف نظر عن الموضوع

نورس / لا انتي فاهمه غلط
اني رافضة لان ماريد الزواج بصورة عامه والمشكله لا بسجاد ولا غيرة اريد اعيش حياة مختلفه عن الزواج اريد اطلع للعالم ماريد اعيش حياة روتينية

لهذا السبب اتجهت من صغري للكتب والروايات وكل مرة اقرة بيها رواية اعيشها من كل كلبي واتمناها اصير حقيقه

وسن / هذا شي طبيعي كل انسان يقرة كتب ايعيش هذا الشي بس الذكي الي يفصل بين الحقيقه والخيال ويستفاد من الحانب الايجابي من الكتب ويطبقه على ارض الواقع مو يغرس نفسه بالكتب وينفصل عن العالم الحقيقي

نورس / تتوقعين بيوم من الايام اكد اكون كاتبه ؟

وسن / وليش لا تكدرين وتكدرين ومو بعيدة اول رواية راح تكتبينها هي روايتج

نورس / ما اتوقعت هاي شخصيتج وهذا تفكيرج

وسن / اني مثلج هم احب هذا المجال بس ما صارتلي فرصه لان بحياتي مريت بضروف منعتني بس مروان هو بطلي وافتخر اني ارتبطت بواحد مثله

نورس / الله يحفظكم البعض

وسن / ويحفظج حبيبتي واتمنى انو تتقربين من سجاد اكثر وتنطي فرصه وصدكيني ماراح تندمين

نورس / ان شاء الله احاول

طول الليل ضليت افكر بكلام وسن وعتني على شي مهم انو مو ضروري احقق الشي الي اريدة وايكون بعيد ايجوز السعادة هي بنفس المكان الي اني بي

وهذا الكلام ذكرني برواية الخيميائي وكلام استاذ سلام من نصحني بعدم التهور ولازم اتحكم بتصرفاتي وما اضر لا نفسي ولا غيري

وبهذا الاثناء وجان نسمع صوت هوسه واصياح برة ورمي كل الي بالبيت كعدوا على هذا الاصياح طلع ابوية يركض وخذه الرشاشه وسد علينه الباب الخارجي كال اي شي ايصير لحد تطلع ولد عمامي هم نسمع هوستهم 

احنه ضلينه بالبيت قلق مو طبيعي وننتضر بس واحد ايطمنه .

ورى ساعه دخل ابوية .............