الرجلُ ذو العطر المميز 🤍

الجزء 6️⃣

الجزء / 6

هنا اني حسيت شي وكتم على نفسي سجاد ابدآ مو الشخص الي اتمنى ولا حتى امفكرة بي

ضليت اسبوع اني افكاري مشتته بشكل مو طبيعي مرات اتمنى اشرد وارح بعالم ثاني يختلف نهائيآ عن الي اني عايشه بي ما احب الحياة التقليدية ولا روتينها
اريد اقدم شي مهم ايخليني مهمه ومعروفه والناس كلها تحترمني وتقدرني واصير صاحبه بصمه بالمجتمع

واذا وافقت على سجاد يعني حياتي راح اصير حالي حال بنات عمامي هم بس زواج واطفال وهاي زعلانه وهاي راضية وهاي زوجها مدري شبي وماعرف شنو ملل بملل

بوكتها الدنيا ليل والساعه تقريبآ ب11 ونص وباجر ابوية يجي من السفر ولازم احضرله اما موافقه او سبب مقنع لرفضي
بعد ماحسيت عقلي راح يوكف كمت من الجرباية ورحت بأتجاه الشباك جانت الاضوية مال غرفه طافية وخواتي كلهن نايمات وكفت اكبال الشباك وضليت اباول على الاشجار من فوك اول مرة احس كلشي متوتر كل مرة من اضوج اكعد نفس هاي الكعده واضل اتأمل المكان والسمه واضل اسولف بيني وبين نفسي وبعده ما افرغ كل الي بكلبي اروح انام

بس هالمرة حجيت كلشي بس هم ما اجاني نوم من بعيد شفت اضوية مشتغله هاي مال مكتبه عمو ابو وسام لان المكان مو بعيد صاير ابداية المزرعه مالتنه سألت نفسي معقوله بعده كاعد لحد هذا الوكت شيسوي بهذا الليل

خطر على بالي اروح بس شلون اطلع بهذا الليل خاف واحد من عمامي او ولدهم ايشوفني شيكولون عليه بس ماعرف بوكتها شلون اجتني الجراءة وحضرت نفسي حتى اطلع بالسكته

لبست ملابس ثخينه لأن شته وقبوط من مالات ابوية ولفيت وجهي باللفاف حيل بحيث بس عيوني طالعه ونزلت من الدرج احنه بالعادة من 10 الكل بمكانه ونايم بس تبقى ولد عمي كل اسبوع ايسوون سهرة اذا صادف جمعه اما اليوم هو الأحد فما اعتقد احد بيهم برة

فتحت الباب الخارجي بالنسخه الثانية الاحتياط وسديته على كيف طبعآ مكاني خليت بي مخاد ورتبتهن مثل ما اقرة بالروليات
وطلعت اتمشى بس كلبي من كد ما ايدك سريع كمت اسمع الصوت بأذني قوي ونفسي سريع بس على كد ما الموضوع صعب حسيت اكو متعه اول مرة اجربها

واكتفيت بالاضوية الموجودة بالمزرعه همزين المكان مو بعيد مال مكتبة مسافه عشر دقايق مشي وعلى هذا الحال لحد ما وصلت للمكتبة

شفت عمو ابو وسام كاعد على مكتبة وايدور بسجلات اكباله وخرت اللفاف من وجهي هو من شافني انصدم

ابو وسام / نورس ؟ بنتي شنو الي مطلعج بهذا الوكت ؟ ماخفتي احد ايشوفج ؟

نورس / عمو اني ..اني ..ب..

الكلام ما يطلع مني الهث وخايفه وما شوف نفسي الا كمت ابجي بشكل مو طبيعي وارجف اريد اوكف البجي ما كدرت ابو وسام من شافني هيج خذاني من ايدي وكعدني على الكرسي الجان كاعد علي وجابلي مي بس اني اعيوني من كد البجي كمت ما اشوف ضل يسأل بيه شنو السبب الوصلني لهاي الحاله وشنو صاير

نورس/ يردون ايزوجوني لشخص اني ما اريدة

ابو وسام / ليش هو مو خوش انسان ؟

نورس / زين بس اني ما اريد هيج شخص

ابو وسام / اهدي واحجيلي بصراحه السبب الحقيقي لرفضج هاي اذا ردتي تحجين واذا لا فأنتي ما مجبورة

نورس / ماعرف شنو السبب بس كل الي اعرفه ماجاي اتقبله لا هو ولا غيرة صارلي اسبوع افكر بالموضوع بس ما جاي اقتنع

ابو وسام / الي اعرفه انتم هنا تربية عشائر ومحافضين والبنيه عدكم مقتنعه بالزواج التقليدي

نورس / بس اني ما اريد

ابو وسام / وشنو الي انتي تردي ؟ اكو شخص معين ؟

من بعد ما سمعت شؤاله حسيته وكع على الجرح بس احتاريت شنو اجاوبه وشلون فتحت كلبي لو وسام بهاي السرعه وأمنت بي معقوله هو امان مثل ما جاي احس بي لو اني ضعيفه لدرجه ما جاي افرق بين الصح والغلط

هنا ابو وسام عاد سؤاله عليه مرة ثانيه وبهاي الأثناء شميت عطر هذا العطر مو غريب وين شامته من قبل ؟ هذا مو هو نفسه ؟ وضلت اعيوني ادور بالمكان

وماشوف الا نفس الرجال الغريب كاعد على وحدة من الطاولات وصايرة على مسافه مو كلش بعيدة عني بس لأن جنت متوترة فما انتبهت على المكان وكل نظري جان على ابو وسام

من شفته هيج كاعد ومركز نظرة علي وعلى كلامي

كام من مكانه واتقرب عليه...........