الجزء/ ١٢
شفت بالحلم استاذ سلام يمشي بنص بستان وكايد بيدة طفله صغيرة تطلع تقريبآ بعمر 4 سنوات وتشبها بالشكل بالحلم عرفت هاي بنته ضليت امشي وياهم بس همه ما شافوني وكأني ما موجودة وياهم لحد ما وصلنه يم بحر ماله نهاية من كد ما جبير
شفت بنته فلتت ايدها من ايدة وركضت طبت بالمي وضلت تمشي الى ان اختفت بس هو ضل بمكانه يتفرج وما سوة اي شي وكأنما الموضوع شي طبيعي
اما اني بالحلم ضليت اعيط على الطفله واصيح عليها بس هي ما ردت عليه وما سمعتني ولا هو سمع صياحي
وما اشوف الا رونق فوك راسي اتكعد بيه
رونق / نورس نورس اسم الله شبيج توج نمتي
نورس / رونق تعبانه حيل تعبانه
رونق / حبيبتي سلامتج من التعب شنو الصاير وياج صارحيني
نورس / خاف اتلوميني ؟
رونق / اذا الومج من خوفي عليج انتي اختي
وحضنتني رونق حيل بس اني بعدني بأثر الحلم فضليت ابجي بحضنها وهي اتهدي بيه الى ان هديت وطلبت منها تنطيني مي شربت وجريت نفسي
رجعت كمت رحت على الكنتور وطلعت من عنده الرسائل مال استاذ سلام كلهن وخليتهن كدام رونق
نورس / هاج اقريهن وكليلي اذا اني غلطانه بشي او لا
بعد ما قرتهن رونق كلهن جمعتهن بين اديها ورجعتهن بالضرف
رونق / لا مابيهن شي بس ليش انتي جاي تبجين
نورس/ عمو ابو وسام ميريدني اتواصل ويا بعد وايكلي الي بي مكفي لا اسببيله مشاكل وازيدينها علي
رونق / وهذا من ذاته يحجي لو هو موصي ايوصلج هذا الكلام ؟
نورس / سألته بس مارد علي بجواب مقنع
رونق / زين لنفرض استاذ سلام هو الي طلب هذا الطلب منه انتي ليش ضايجه ومقهورة وحالتج حاله ؟ ليكون الي ابالي صح ؟
نورس / ماعرف رونق ماعرف
رونق / لا انتي لازم تعرفين كلشي واتعرفين شنو موقعج من الجمله شلون اتورطين نفسج بمشاعر مو حقيقيه وهاي انتي جبيرتنه المفروض انتي الي اتوعينه مو احنه
نورس / لا مو صحيح كل الي ابالي هو التواصل ويا
رونق /لا انتي المو صحيح الضاهر خلص الروايات ضربت دماغج ولضلين اتبررين لخطئج ولازم تكطعين علاقتج بي نهائيآ منريد مشاكل ولضيعين سجاد من ايدج
نورس / وشلون اطلعه من بالي ؟
رونق / وافقي على خطوبتج من سجاد وموضوع استاذ سلام اعتبري تجربه طايشه وعدت على خير بدون خساير
نورس / بس اني ما عندي اي مشاعر تجاه سجاد شلون راح اتقبله ؟
رونق / انتي اتعرفتي علي ؟ انطيتي مجال ؟ سألتي وهو ما جاوبج ؟ نورس لتخبليني
نورس / تمام اذا هذا الحل يرضي الجميع وما يضر احد فأعتبروني موافقه
رونق / صدكيني ما راح تلكين احسن من عنده وانتي واعيه وراح اتكونون احسن عائله واني متأكدة من هذا الشي
مسحت ادموعي ورحت غسلت بعدها رجعت على الرسائل وشككتهن كلهن بحيث ما خليت حرف واحد وذبيتهن
ورى شويه خواتي كلهن صعدن فأني مالي خلك لأي شي لفيت روحي بالغطه ونمت بفراشي وخواتي هم صعدن نعسانات فنامن بسرعه
اما اني ساعه انام وساعه افز واذكر كلام رونق وعلى هذا الوضع لحد ما اجه الصبح
نزلنه كلنه حتى نتريك وسويت روحي كلشي ماكو
واحنه كاعدين على السفر جان ابويه يفتح موضوع
ابو نورس / اليوم بما انو جمعه فأني عزمت عمكم ابو مروان وعائلته على الغدة بس احتمال نفتح موضوع زواج نورس من سجاد
فيا بنتي اتمنه اعرف ردت اذا موافقه او لا
نورس / نعم بابا موافقه
حجيتها بكل ثقه وبدون اي تردد بعد ما جريت نفس والكل ضل صافن عليه
ابو نورس / بنتي اني ما فد يوم غصبتكم على شي لذلك ما اريد اجبرج على شي
نورس / واني متأكدة من قراري
مثل كل مرة رتبنه البيت وحضرنه الاكل
للضهر اندك الجرس مال باب رحت فتحت الباب وسلمت على عمي وزوجته وراهم مباشرة طب سجاد
سجاد / مرحبا
نورس /اهلآ اتفضل ........
أنت تقرأ
الرجلُ ذو العطر المميز 🤍
Romanceقضت اجمل ايام حياتها تبحث بين طيات الكتب عن تلك الشخصية التي تشكل معها اجمل ثنائي ليصبحان شخصيات رواية حقيقية تترجم على صفحات ذهبية اجمل المواقف والمشاعر التي يتمناها الجميع ان تحصل معه . وكما قيل لكل مجتهد نصيب وها هي نورس تصارع المصائب التي حلت ع...
