الرجلُ ذو العطر المميز 🤍

الجزء 1️⃣4️⃣

الجزء / ١٤

رجع ابوية بس بيا حال انباوع علي مصوب بجتفه والدم ينزف وعمي لازمه اول ما طب اتخربط بالباب ووكع احنه من شفنا هيج وشفنه الدم ضلينه انعيط ونلطم اول مرة انشوف هيج شي

بس بوكتها ماعرف شلون اجتني القوة ركضت على ابوية وخواتي واني جانن خايفات وميعرفن شيسون بس اني ساندت عمي وكومنه ابوية من الكاع نومنا على القنفه وعمي خذه قطغه اقماش جابتها امي وضل يضغط على الجرح حتى ايوكف الدم

نورس / عمو ليش هيج منو صوبه؟ خاف الطلقه بعدها ؟

العم / لتخافون هسه اني اطلع الطلقه

ام نورس / خلي انودي للمستشفى خاف ايصير بي شي

العم / متسمعون الدنيا مكلوبة برة وين نكدر نطلع جيبولي شعدكم من شاش ومعقم واحمولي سجينه  ولتنسون اني شنو اشتغل يله بسرعه

جبناله كلشي ايريد واني واكفه على راسه ولازمه ابوية بس ادية ترجف ضليت اباوع على عمي شلون ضل يفتح الجرح لحد ما طلع الطلقه وكوه الجرح رجع وكف النزيف وشد الجرح زين طبعآ عمي جان يشتغل معاون طبي وي دكتور بس بعدين صارت مشاكل بين الدكتور وبين اهل واحد من المرضه ومات المريض وتهمو الدكتور بالموضوع وسمعه عمي انلطخت ويا ومن يومها خذة قرار على نفسه وترك هاي المهنه

ورى ما كمل كام عمي ورجع خذه السلاح وراد يطلع هنا اني جلبت بأيدة وسألته منو ذول وشيريدون من عدنه

العم / الضاهر ذوله عصابه ويردون يتعدون علينه وعرفوا احنه صاحبين املاك وهجموا علينه

بهذا الاثناء اندفر الباب الرأيسي وطبوا اشخاص مسلحين وما شوف الا صاروا اكبالنه كلهم جانوا مقنعين ما مبين اي شي من وجهم ضلوا ايغلطون على عمي وحجوا هواي حجي اول مرة اسمعه وسألوا على موضوع اسلحه وعلى مكانها بس عمي مارد عليهم وضل ينكر الا ان كل خواتي صارن ورا بس اني ضليت جامدة بمكاني يم ابوية

اجه واحد من يمهم وسحلني من شعري ضليت اعيط وابجي حط المسدس على راسي وكال هاي رهينه عدنه لحد ما ترجعون البضاعه
عمي رفع السلاح حتى يرمي بس ما لحك عليهم وصوبوا برجله امي وخواتي ضلن ايعيطن بس محد اهتم منهم وطلعوا وخذوني وياهم سحل

شدوا عيوني وجتفوني بعدها صعدوني بسيارة بس كلشي ماشفت منها بعدها واحد منهم خله وصله على خشمي بيها عطر غريب من شميته بعد ما دريت بالدنيا شنو صار

بعدها فتحت عيوني لكيت نفسي بغرفه فارغه مابيها اي شخص مثل السجن بيها بس شباك واحد بس اني بهذا الاثناء جسمي كله يوجعني وشعري من كد ما جروني من يمه كطعوا مابيه حيل اكوم ضليت بالكاع واباوع على المكان شوية شوية كمت من مكاني وضليت اضرب بالباب واصيح عليهم اريد واحد يجي

المكان بارد وضلام حيل خفت ورى شويه سمعت خطوات احد اجه فتح الباب بسرعه ودفرني اني وكعت على الكاع وضليت ابجي ضل يصيح عليه وايهدد بيه يكتلني اذا سمع صوتي بس اني ما اهتميت  رجعت على وجلبت برجله اتوسل بي حتى ايكلي شنو صار بأهلي لان لأخر لحظه من طلعت جنت اسمع صوت الطلق والصياح

ما اهتم اليه وسحب نفسه من عندي ورجع سد الباب

وين اروح وين انطي وجهي ؟ شنو صار بأهلي ؟ ميتين عدلين ؟ شنو موضوع الاسلحه والبضاعه الي حجوا عليها ؟ ليكون ابوية وعمامي ايتاجرون بالاسلحه بس لا ما اعتقد اكو هيج شي مستحيل المبادىء الي اتعلمناها منهم ايكون هيج تاليتها اكيد هاي عصابه وهي الي مستهدفتنه بدون ذنب

ضليت على هالوضع ابرر لنفسي ولعائلتي وابجي وانوح واندب حضي الي جاي ايصير وياي ولا مرة خطر على بالي ما شفته بس قريته بالروايات والضاهر صار وياي

تعبت من كلشي اريد بس واحد يجي يطمن كلبي ولا واحد اجه لحد ما تعبت وعيوني غوشت بعد ما شفت شي نمت عالكاع وبعد ما دريت بنفسي

ورة فتره ماعرف شكد بس حسيتها سنوات واني مغمضه عيوني حسيت اكو شخص فوك راسي واكف وشميت عطر ما عليه قبل فتحت عيوني على كيف وشفت شخص مغطي وجها بلثام حاله حال البقيه كلب وجهي وكام يضرب بي بس اني ماعندي قابليه اضل مفتحه عيوني رجع جاب مي وذبه عليه شهكت شهكه وفتحت عيوني بسرعه وكلبي كام ايدك بسرعه مو طبيعيه ونفسي حيل سريع جرني من ايدي وكعدني

رجع على الي ويا وصاح بيهم وضل يغلط عليهم لان مسوين بيه هيج

الملثم / اذا اسمع اي شي صاير بيها امحيكم من على وجه الدنيا هاي رهينه عدنه اي موضوع دم ما اريد يكفي الجثث الي خلفتوها بهاي العشيرة

اني من سمعت هيج ..........