الرجلُ ذو العطر المميز 🤍

الجزء 1️⃣5️⃣

الجزء /١٥

اني من سمعت هيج ضليت ابجي اكيد كتلوا عائلتي بس ماعندي قابلية حتى اسئلة

طلعوا كلهم وسدوا الباب وعافوني وحدي ارجف من البرد لو من الخوف مادري

رجع انفتح الباب بسرعه فزيت منه دخل واحد منهم جابلي بطانية وبيدة عصير ولفه حاطهن بصينيه حطهن يمي وكال اكلي وما اريد اسمع منج اي صوت افتهمتي منريد مشاكل وي القائد

من شفت عيونه شلون مخنزره ولابس لثام ما حجيت اي شي وضليت بس اباوع بعيوني

طلع وقفل الباب ضليت وحدي وما اجاني نفس اكل اي شي لفيت روحي بالبطانية وضليت اصفن بالمكان رجعت ضليت اندب حضي بس ماكو فايدة من هذا الحجي الضاهر موضوعي راح ايطول يمهم

مسحت دموعي وجريت الصينية عليه كليت شوية من اللفه وشربت مي بس كلي ارجف ولازم اسايرهم واعرف شنو الموضوع واكشف الحقيقه

ورى ساعه تقريبآ رجع انفتح الباب اني سويت روحي نايمه وضليت على جطلتي ولافه روحي بالبطانية وما طالع مني بس وجهي جان اسمع واحد ايكول همزين امبين عليها مطيعه بس عرفته من الصوت هو نفسه الرجال الجابلي الأكل الضاهر هو الحارس على الباب بعدها طلع

ضليت على هذا الحال والمكان شوية شوية ايصير اضلم لحد ما صارت كلش ضلمه عرفت انو الليل اجه ومحد طب عليه عاد هنا اني ايست ونمت من تعب التفكير والانتضار

وضليت طول الليل احلام وكوابيس انام وافز وتعبت نفسيتي تعب ماصاير منا لحد الصبح عود توني غفيت جان اشوف واحد واكف على راسي هم جايبلي اكل

وكال يله كومي اكلي وهاي ملابس لبسيها راح نطلع منا
باوعت على روحي اني شلابسه تراك عريض وطويل مال بيت ومبهذله انوب لبست بنطرون وبلوز وقبوط طويل طبعآ اني ابدل بسرعه وعيني تتلفت هنا وهنا خاف احد ايباوع علية لفيت شعري باللفاف الجايبي رجعت وكفت ورة الباب واول ما دكيته انفتح القفل والباب وجان اشوفه بوجهي

الملثم / شلونج اليوم ؟

نورس / شتتوقع ايكون حالي واني ماعرف منو انتم وليش جبتوني لهنا وشنو صار بعائلتي

الملثم / مادام انتي ساكته واتنفذين الأوامر ماراح ايصير شي

نورس / وشنو الي يضمن كلامك اني سمعتكم تحجون عن الجثث الي خلفتوها بعشيرتي

الملثم / لتسألين اسئله انتي مو كد سماع احوبتها وكل الي عليج هو تنفيذ الاوامر وبس

صاح بذاك الرجال وطلب منه ياخذني لمكان سما مقر العمل بس ما فهمت ياعمل هذا اليقصد بي

صعدنه بسيارة تشبه السيارات العسكرية وشفتهم كلهم لابسين عسكري بس قبل ليصعدوني بالسيارة شدوا اعيوني وجتفوا ادية وحتى حلكي خلوا علي شريط لاصق وطول الطريق اسمعهم يحجون على موضوع بضاعه واغلب حجيهم عبارة عن الغاز

ورى فترة طويله مليت بيها حتى من الكعدة وكفت السيارة ونزلوني منها فتحوا بس اعيوني شفت مكان يشبه البناية مال مدرسه بس متروسه حرس مشدد والمكان داير ما دايرها عبارة عن صحراء اتقرب مني القائد الملثم

الملثم / لحد الأن انتي ضيفتنه وراح اشرفينه بهذا المكان لفترة ماعرف اذا اطول او تكصر هذا يعتمد على شطارت عشيرتج لذلك ماريد منج اي كلمه او فعل غلط ولتحاولين اشردين حتى لو بالحلم لأن هذا الشي اشبه بالمستحيل

بعدها طلعت بنية لابسه ملابس رجاليه وخذتني وياها لداخل البناية اما القائد وجماعته ضلوا برة اباوع عليهم من الجام مال الباب حجة وي الحرس الموجودين بالمكان وبعدها راحوا

دخلتني بنص غرفه بيها اربع جرابي وبيها بنات كاعدات من شافني رجعن ليورة وحالتهن ووجوهن مثل اشخاص متانين الموت بأي لحظه

سلوى / اني سلوى المسؤوله عن البنات هنا راح تبقين وياهن بهاي الغرفه وحدج للحمام وترجعين حالج من حالهن والأكل وجبات وي كل وجبه من يجي موعدها تجي النسؤوله عن الأكل اجيبلكم الأكل لهنا داخل الغرفه هذا الوضع لحد ما انشوف شنو يأمر القائد بيجن

طلعت وسدت الباب علينه رجت على وحدة من الجرابي ما جان عليها احد فعرفت هاي مخصصينها اليه نزعت القبوط واللثام ولفيت روحي بالغطه وضليت اباوع على البنات كل وحدة بيهن راحت على جربايتها ودارت وجهه ولا وحدة بيهن تحجي وي وحدة كل وحدة متكأبه وي نفسها

اني هم من حالهن نمت على الجرباية وافكر بالي جاي ايصير معقوله هاي رواية من الروايات الي قريتهن وبالنسبة لأهلي شنو وضعهم وشنو راح ايصير او صار بيهم عدلين لو ميتين وضليت ابجي وابجي لحد ما غفيت.........