الرجلُ ذو العطر المميز 🤍

الجزء 7️⃣

الجزء / 7

وكف اكبالي وكال بصوت خشن
شنو الي جاي اسوينه اكو وحدة عاقله تطلع من بيت اهلها بهذا الوضع وبهذا الوكت من الليل ما خفتي احد من اهلج ايشوفج ؟ شنو ردج عليهم ؟ مع احترامي الج هاي سوالف مال غبيات وما ايعرفن الأصول

من شفته حجه هيج حسيت بالأهانه معقوله شخص مثقف مثله ايفكر نفس تفكير بقيه الناس الي ما ايهمهم غير التقاليد والحياة الممله وما ينطون للبنيه حريتها

وكفت على طولي ورديت علي بعصبيه

نورس / اي ما ايهمني ولا اخاف ومستعدة اموت ولا اعيش مثل ما ايريد غيري وبعدين انت شنو تعرف عن الي ايدور ابالي او عن شخصيتي حتى اتقلل من قدري وسويتني بلا احترام وتربية واني الي كنت ماخذة عنك نظره تختلف عبالي مثقف وعقليتك منفتحه

ودفعته من كدامي بكل قوة حتى اطلع من المكان من وصلت للباب صاح عليه بصوت هادىء

الرجال / الأنفتاح يختلف عن الأنحلال الضاهر بعدج اصغيرة حتى تفهمين الفرق بينهم

اني هنا رجعت وكفت اكباله ورديت علي بنفس نبرت الهدوء مالته

نورس / واني برأيك منحله ؟ اني بنت عشاير والي جاي اسوي ما اله علاقه بالانحلال اني اريد اعيش حياة تختلف عن الي ايعيشونها

الرجال / مهما ايكون عندج من مشاكل ميصير اتورطين غيرج بيهن ابو وسام لو ما شايف المكان هادىء ما جان اجه هنا المفروض اتفكرين الف مرة قبل لا تخطين هاي الخطوة

نورس / الخيميائي سافر دول ومر بهواي امور حتى يوصل لمبتغاء ما وكف بنفس المكان واستمر على الواقع الي عاش بي

الرجال / وبالنهاية وين لكه مبتغاء ؟

نورس / ها ؟

الرجال / لكا بنفس المكان الي هو ساكن بي قبل لا ينتقل لأي مكان ثاني
لا اتعيشين دور كل رواية تقرينها كل واحد بينه الله خلقله الحياة الي اتناسبه طريقتج هاي انتي جاي اتعقدين امورج اكثر واذا عندج هدف تردين توصلينه تكدرين بالذكاء اتحققينه مو بتصرف طفوله ايضرج وايضر غيرج

من حجه عليه هيج ارتاحيت حسيت اريد اسمعه اكثر واكثر وبنفس الوكت ضجت لأن  اني صدك غلطانه واله حق بالحجي الكاله عني هنا ابو وسام كاعد وضل يسمع اني والرجال الغريب شلون نتناقش وما حجه اي شي اما الرجال فطلب مني انتظرة شوية الضاهر ايريد ينطيني شي 

راح للطاوله الي هو جان كاعد عليها طلع ورقه وضل يكتب بيها رجع طبكها وانطانياها

الرجال / خلي هاي الورقه عندج ولا اتفتحيها هسه انتظري لباجر بليل لحد ما تهدين وتهده نفسيتج وبعدين اقريها بس اهم شي قبل لا اترجعين خبر لأهلج بموضوع زواجج اسفه لأن حجيت وياج بهاي الطريقه وعلى تدخلي بحياتج بس اني اشوف نفسي بيج لذلك ماريدج تغلطين غلطتي روحي للبيت الوكت اتأخر هواي

هنا ما كدرت احجي اي شي خذيت الورقه وطلعت بسرعه من المكان امشي واتلفت خاف واحد ايشوفني وكلما اسمع صوت روحي اتروح لحد ما وصلت للبيت سديت الباب وراي بهدوء حتى لا اطلع صوت وصعدت للغرفه غيرت ملابسي ورجعت كلشي المكانه بس اني ارجف من فوك ليجوة احس روحي بحلم مو حقيقه خليت الورقه بيدي و طبيت جوة اللحاف وبجيت بجي ما صاير شنو الي جاي ايصير بيه ما ادري وشنو الي اريدة هم ما ادري ابوية باجر يجي وين اروح

ثاني يوم الصبح فزيت اسمع صوت هوسه رفعت راسي ولا واحد بالغرفه بس اني خفت لا اهلي حسوا بيه وبالي صار البارحه

اذكرت الورقه دورت عليها بسرعه الحمد لله لكيتها جوة الفراش محد شافها

كمت بسرعه ضميتها وطلعت غسلت وجهي ونزلت جوة بس الخوف متملكني

نورس / صباح الخير . شنو صاير ؟

ام نورس / صباح النور بعد وكت يله اليوم عدنه هواي شغل انريد انظف البيت ونعزم بيت عمج ابو مروان وابوج اليوم بليل يجي

رونق / اي وسجاد يجي هههه

ام نورس / شلون بيج انتي متبطلين سوالفج

رونق / مشوفيها ما ردت معناها راضيه بي وراح ايصير عندي اول نسيب ومحامي شكد حلوو

اني ما اهتميت سويت روحي الموضوع مو يمي اتريكنه وكمنه نشتغل بالبيت وانعزل وحضرنه كل غراض العزيمه

من صارت الساعه ب 7 بليل اجوو بيت عمي كلهم وحتى سجاد اجه الكل راح سلم عليهم بس اني ما طلعت رجلية ما ايشيلني واول مرة اسويها وما اطلع عليهم اسلم الى ان امي صاحتني ونزلت عليهم

سلمت على الكل وشفت سجاد عينه عليه بس حسيت من نظرته عنده حجي هواي بس متردد نزلت عيني ورحت للمطبخ اساعدهم  بالعشه البنات كلهن ايسولفن وايضحكن والزلم بغرفه الضيوف كاعدين ورى نص ساعه اجه ابوية هنا اني ردت ابجي الا اشويه وضل بالي كله يم موضوع الزواج خاف ابوية يطلب مني الموافقه اليوم شنو راح ارد علي ؟ خاف ارفض وخاف افشله كدام الكل واطلع مو خوش ابنيه وخاف اوافق وتبدي الحياة الروتينيه الي اكرها

ورى ما اتعشينه رحت للمطبخ وكلت الخواتي انتن روحن يمهن واني راح اغسل المواعين وارتب المطبخ

وامي سوت الجاي وخذته الهم

واني جاي اغسل بالمواعين وبالي كله يم عمي وابوية ضليت على هذا الوضع الى ان كملت كلشي شو محد صاحني رجعت رحت كعدت يم البنات وخذانه الواهس انسولف وهم محد صاحني الى ان طلعوا واني مستغربه

صعدنه انام وجان رونق اتفاجأني........