قصة الشيخ نور التميمي

بارت 33

عاف ابنه نور وطلع وراهم ويصيحلهم ويكلهم بويه رجعو تعالو ماعليكم بأبوكم معصب تعرفونه يحبكم ويريد مصلحتكم...وهيثم طلع وراهم...

هالحجي ابو ادريس هم يهدي بي وادريس واكف وماحجه ولا حرف..ويكول لو ابوي مثل نور ومحاسبني جان ما وصلت لهيج مكان وصرت اقلد الاجانب...

ونورسين عالدرج واكفة وجانت تراقب العاصفة الي هبت فجأة وطلع حركة كلبه بأبنه..تحس هذا الغضب عليها مو على نواف...

ونكسر كلبها عليه ضربه واهانه كدام البنات واخوانه وجده وابوها واخوها..وتذكر ضحكة نواف وشقاه ومن يشاقيها عن ابوه...وشكثر يفكر بأبوه لأن وحيد من شبابه....

شافته دخل للصالة وجهه احمر كله وانكلب لونه من الابيض الى احمر من كد العصبية وعاقد حواجبه...ويريد يصعد الدرج شافها بنهايته...

باوعلها بنظرة خلتها تضوج..هاي النظرة حست بيها غضب عليها مو طبيعي..ونظرته هاي حسته يريد يقتلها بيها...

مشه وعبر عليها..وهي كلتله نور حرام ضربته...ماكملت سكتها بصيحة وكلها سكتي انتي الثانية لا ومحمد يجيج السره...وكلها كلام وجع كلبها...كلها تعرفين الحرام انتي...وعافها وراح لغرفته...

نواف وخالد راحو بيت جدهم ابو امهم..هو كلش يحبهم كلهم ومايقبل عليهم لأنهم من ريحة بنته..كلوله ابوي طردنه...
كللهم شصاير..وخالهم نصر كاعد يم ابوه..وسولفوله السالفة ونصر هم استلمهم بالرزايل وكلهم ابوكم يريد مصلحتكم وانته نواف غلطت ورفعت صوتك بوجه ابوك ولا مكسر جامات سيارته...

بقو 3 ايام نواف وخالد بيت جدهم..وبالبيت الكل افتقدوهم حتى من يكعدون عالوجبة يضوجون محد يضحكهم ولا احد يشاقه ويضحك...

ونور كله كاعد بحده بالديوان وحتى من يكعد يمه ابوه وعمه..يظل ساكت..وجم مرة كله ابوه روح راضي نواف ورجعه....

نور يكله خل يتحمل نتيجة غلطه شلون يدخل هيج امكنة.. وعمه ابو ادريس حاجاه وكله ولدك خوش ولد شتكول انه ابني مايطيع ولا حجاية مني...

ونورسين تتجنب نور وهو من تكون كباله حتى ميباوع عليها وهالشي اموتها..وهي تهواه وهو ماهامه..رجعت لقصة الملك تلهي نفسها بيها بس داخلها يحترك...

وزهراء تخاف تروح يم ادريس بالسطح بسبب هذاك اليوم شافت غضب ابوها على نواف وهو رجال.. وتكول وانه بنية لو يعرف ابوي اكعد يم ادريس واحبه والله يموتني لو مو يحبني ومدللة عنده....

وهو هل الايام من تكعد يمه يكلها هل ايام هاملة ابوج وماشوفج يمي..تكله يابه نورسين جاي تنطيني دروس انكليزي..ومن يسمع اسمها يعبس وجهه...

ويكلها لا تكعدين يمها ولا تختلطين بيها وانه اخليلج مدرسة خاصة وتدرسج..وهي ضاجت مافهمت ليش هيج يكول ابوها...