تدبروا

٩ : القران هديه حافظوا عليها علشان ماتروحش

الموقف ده كان السبب إن علاقتي بالقرآن ظبطت من جديد 💙

أنا بدأت حفظ قرآن في نهاية ٢٠١٩ واستمريت سنة تقريباً، ولكن بعدت عن الحفظ والمقرأة لمدة سنتين وأكتر، وخلال الفترة دي كنت أحفظ شوية وأوقف وهكذا، ويدوب لسه راجعة من شهر كدة. 😓

طب ايه اللي حصل بقى؟!
كنت رايحة مشوار وركبت جنب واحدة منتقبة، وجالها مكالمة وكانت بتتكلم إنها رايحة تشوف معلمة أنا أعرف اسمها، واستنيت لما نزلنا الموقف وسألتها، هل كانت بتتكلم عن نفس المعلمة اللي أعرفها ولا مجرد تشابه أسماء، وفعلاً كانت هي نفسها، وطبعاً اعتذرت لها عن تطفلي. ❤️

وحكيتلها عن حفظي وعن المعلمات اللي بيعلموني وكانت عارفاهم كلهم، وبتتقابل معاهم لكن في مسجد تاني، وقالتلي كلام كان السبب إني حافظت على علاقتي بالقرآن من جديد، قالتلي: "حفظ القرآن ده بيكون هدية ربنا بيديها لشخص بيختاره ولو محافظش عليها بياخدها منه ويديها لشخص تاني يحافظ عليها فأنتي حافظي على الهدية عشان متروحش لحد تاني".

أنا كنت أعرف إن حفظ القرآن ده مش اجتهاد شخصي، وإن الله عز وجل بيختار من عباده ناس تحفظ القرآن، ولكن هل فعلاً كلنا نستحق المكانة دي؟ وهل كلنا نقدر نحافظ عليها؟

المهم إني رجعت علاقتي بالقرآن الحمد لله وأتمنى استمر على كدة، وأتمنى يجي اليوم اللي أختم فيه القرآن حفظ، وأكون حافظت على الهدية، ادعوا الله بالهداية والثبات، وإن ربنا دائماً يسخرلنا ناس تساعدنا وترشدنا.🤲🏻💚

والنصيحة اللي أقدر أقدمها، هي إنك لما تحس بفتور في العبادة، بلاش تطنش وتسيب نفسك لحد ما تزهق، ولكن دور على حد يعينك ويساعدك وخلي ليك صحبة صالحة ترجعلها، وأنت عارف ومتأكد إنها مش هتخذلك ولا تقلل منك. 🩷🩵

والأهم إنك متستناش النفسية أو الوضع يتحسنوا عشان تستقيم، لأنهم مش هيتحسنوا غير لما تستقيم. 🧡

#منقول