قصة ريدنا

2

*#قصة_ريدنا《02》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
قلت ل أروى بصوت واطي خلينا نمشي من هنا ، قالت لي ليييه !بعد ما طلبنا ؟؟!
قلت ليها ما مرتاحه هنا ...الضابط داك من قبيل بعاين لي و صراحة نظراتو خوفتني ، براك عارفاني بخاف كيف من العساكر ديل أو أي زول بالشكل دا !!
إتلفتت عليهو و قالت لي مش قلت ليك معجب بيك ! قلت ليها ياخ انتي متخلفه ولا شنو ؟! الإعجاب ذاتو عندو حد بس الكائن دا نظراتو غريبه و ما مفهومه عامله لي قلق والله ، قالت لي خليهو يعاين كدا لمن يفتر ما تركزي معاهو ، هو شكلو فهم نحنا بنتكلم في شنو عشان كدا إحترم نفسو و ما عاين لي تاني ، المهم قعدنا بمزاج و ما ركزت معاهو تاني ، أروى قالت لي بصراحة لمن يكون لابس لبس الضباط دا بكون عندو هيبه كدا! قلت ليها منو ؟
قالت لي منو يعني ! قصدي جنابو منيب ، ضربتها في يدها و قلت ليها بعد انساهو تقومي تجيبي لي سيرتو ! يختي لو عاجبك و مالي عينك أمشي إعترفي ليهو و أطلبيهو من أهلو ... قالت لي هييي كمان ما للدرجه دي ، ايوه نعم هو وسيم و عندو كاريزما و هيبه بس مع ذلك في ملاح جديه في وشو و أنا بحب الراجل الحنين و دا ظاهر عليهو حبة غرور و طبع مزاجي ! قلت ليها بالعكس والله ! ما حسيتو كدا ! غرور شنو دا الظاهر عليهو ؟!
قالت لي ما تغالطيني أنا عندي نظره تفحصيه دقيقه ما بتخيب خالص ، أجل نعم هو اتكلم معانا عادي و شبه كان لطيف بس دا ما بمحي حقيقة شخصيتو و بعدين يعني معروف إنو الضباط أو العساكر طبعهم بكون حاد و مزاجي ، قلت ليها اهاااا عشان كدا انتي عايزا تلصقيهو فيني صح !...يا حسووووده !؟
ضحكت و قالت لي أبداً ياخ  لكن نظراتو ليك و جيتو الكتيره للمشتل أوحت لي انو مركز معاك و مهتم بشوفتك ، يعني شكلك خطفتي قلبو من أول مره ، قلت ليها متمنياك بس و لو لمره وحده تبطلي سيناريو الدراما الهنديه دي !!
المهم أكلنا و حاسبنا و طلعنا من المطعم ، المطره خفت شويه ، قطعنا الظلط و بقينا واقفين للمواصلات لحد ما جات مواصلات ماشه على إفريقيا ، المهم ركبنا و أول ما وصلنا افريقيا اشتريت 3 شوكلاتات ، أديت أروى وحده و الإتنين خليتهم ل حماده ، قلت لأروى نركب ركشه ولا نمشي برجلينا ؟؟؟
قالت لي أكيد الخيار التاني ، طبعاً نحنا ساكنين في حي المدينه يعني قريب من جامعة افريقيا و المدينه الرياضيه ، المهم و نحنا ماشين كدا كان في مشتل صغير كدا فاتح على جامعة افريقيا ، أصريت على أروى عشان ندخل و نشوف الشتلات العندهم و فعلاً دخلنا و إتفرجنا على شتلاتهم و بعد ما خلصنا قطعنا الظلط ، جنب بوابة جامعة افريقيا بالظبط كان في راجل ببيع إكسسوارات و طواقي و حاجات ظريفه شديد ، أنا إشتريت كاب و أروى اشتريت سلاسل و خواتم ليها و لأخواتها ، بعدها اتمشينا في الجو الرهيب داك لحد ما وصلنا البيت ،  طبعاً طول الطريق أروى ما خلت زول و ما إنبرشت فيهو ، المهم لمن وصلت البيت لقيت الأسره الكريمه كلها متلمه في الصالون و بحضرو ، سلمت عليهم و مشيت غرفتي ، شويه كدا جاني محمد ولد ماهر أخوي ، قال لي ما جبتي لي حلاوه ؟؟
قلت ليهو نسيييت ! قال لي أمبارح برضو قلتي لي كدا ، لو بكرا برضو ما جبتي لي بكلم جدو إنو إنتي الكسرتي ليهو تلفونو 😊
قلت ليهو بتهددني يا حماده !! بتهدد عمتك الزي صحبتك !؟ قال لي المهم ما تقولي إني ما كلمتك ، قلت ليهو حيييا أنا منك ياخ و طوالي طلعت ليهو الشوكلاتات من شنطتي و أديتهم ليهو ، قال لي ايوه خليك كدا يا شاطره ، قلت ليهو شيلها و أقطع وشك ، شالها و قال لي ما تنسي تشتري لي تاني بكرا ، قلت ليهو و لو ما اشتريت ليك ؟!!
قال لي ح أكلم جدو إنك......قاطعتو و قلت ليهو هسي أمشي و قول ليهو عشان نخلص من الموضوع دا ، قال لي لا لا عشان انتي عمتي ما بكلمو ليك لكن بشرط و انتي عارفاهو كويس ، قلت ليهو و أنا بقول ليك أعمل البريحك و تاني شوفني لو جبت ليك شوكلاته أو شيبس نشوفك بتهدد منو تاني ...فجأه كدا ماهر جا داخل و قال ل محمد ياخ أنا من قبيل بفتش عليك و بناديك ما سامع يعني ؟؟ قال ليهو ما سمعتك يا بابا ، قال ليهو المهم تعال شوف الشنطه الجديده الإشتريتها ليك ، طبعاً حماده في الروضه سنه أولى بس لئيم و لسانو طويل ، المهم هم مشوا و أنا أخدت لي نومه ما صحيت إلا العصر ، صليتو و مشيت المطبخ لقيت أمي بتعمل في الجبنه و مرام زوجة ماهر أخوي بتعمل في كيك أصلاً هي بتحب تعمل الحاجات الزي دي و تزينها بطريقتها المميزه و صراحة الكيك حقها تحفه ، قلت ليهم ما عاملين شاي ؟؟
مرام قالت لي عملتو ، قلت ليها خلاص ما ح أكب هسي ح انتظر لحد ما الكيك يجهز عشان أشربو بيهو ، أمي قالت لي شاي طوالي كدا ؟؟ ما عايزا تاكلي ؟
قلت ليها ما جعانه ، قالت لي يا بت هوي بتموتي بجنس طريقتك دي ، قلت ليها الكيك برضو أكل ! قالت لي على كيفك يا زوله ، المهم بعد ما الكيك جهز قعدت آكل فيهو بمزاج مع الشاي لحد ما فجأه كدا جاني صوت أروى و هي بتتشاكل مع حماده أصلاً دا حالهم ، جات داخله لي في المطبخ و محمد جاريها من يدها و شغال ليها الليله ما بتدخلي يا زوله إلا تديني مصاصه ، قالت ليهو شايفني فاتحه دكان هنا ، زح ياخ ، قال ليها أبيت يا زوله ... طبعاً أنا شغاله أضحك ساي ، قالت لي بدل ما تقعدي تاكلي كيك و تضحكي علي تعالي فكي مني ولد أخوك دا ! أمي قالت ليهو عيب يا حمودي فكها ! قال ليها ابيييت البت دي لئيمه إلا أعاملها كدا ، قلت ليهو حماده خلاص بطل قلة أدب ! قال لي مام إلا تديني حلاوه ، قلت ليهو لكن هي ما عندها ! قال لي عندها والله ، شنطتها بتكون مليانه حاجات كتيره ، أروى طلعت لبان من شنطتها و قالت ليهو اتحشي بيها و ان شاء الله تملى ليك كرشك ، أول ما شالها كدا مرام مشت و خطفتها منو و رمتها على الأرض ، قالت ليهو نحنا مقصرين منك في شنو عشان تشحد الناس و يذلوك كمان ؟ و بعدين ذاتو في لبان بتملى كرش ؟؟
طبعاً كلنا إتخلعنا مع إنو مرام دائماً كدا مع أروى و على طول شايلاها معاها ، أمي قالت ليها ما فيها حاجه يا مرام ، أروى بتهظر معاهو و هي ذاتا ما غريبه ، بتنا و صحبة بتنا و بت جيرانا عشان كدا حمودي بتعابط معاها كدا ، قالت ليها برضو يا عمتي دا ما معناهو إنو يقعد يشحد الناس كدا ، طبعاً أروى خشمها ما فكتو ، مرام ساقت ولدها و طلعت من المطبخ ، أمي قالت ل أروى ما تزعلي منها ، مرام و كلنا بنعرفها ، قالت ليها ما زعلت يا خالتو و أساساً ما مركزه معاها ، جاتني طوالي و خطفت مني صحن الكيك و قالت لي الزمن كلو شغاله لهط لهط و بعد دا كلو ما ظاهر فيك الباقي دا خليهو لي ، أمي ضحكت على كلامها و قالت ليها قاشره كدا ماشه وين ؟؟
قالت ليها ماشه ناس خالتي مناسك الليله جايبين شيلة بتها ، أمي قالت ليها كويس والله ربنا يتم ليها على خير و عقبالكم ، أروى ختت الصحن و رفعت يدينها فوق و قالت آمين كبييييره يا خالتو انتي بس كتري الدعوات ، قلت ليها والله يا أروى أنا شايله همك يا صحبتي !....ختت يدينها في نصها و قالت لي ماااالي عيبيني في سطر !....ضحكت و قلت ليها عينك زايغه ، يعني اتخيلي بس لو بعد ما عرستي لقيتي واحد أسمح من راجلك ح تعملي شنو !...ختت يدها على خشمها و قالت لي بالجد والله ح اعمل شنو ! دي مصيبة شنو يخوانا !!....أمي قعدت تضحك و قالت ليها والله انتي يا أروى يا بتي الله يخليك للجنتره و التمثيل 😂
قالت ليها بري يا خالتو ما قاعده أمثل و بتك سؤالها وجيه والله ، اعمل شنو أنا لو لقيت واحد أسمح من راجلي ! أخونو يعني ؟!.....لا لا أحسن شي ارفع قضيه عليهو و أتطلق منو ....قلت ليها و بعدين لمن القاضي يسألك ليه عايزا تطلقي منو ح تقولي ليهو لقيت الأسمح منو يا مولانا !؟😂
قالت لي باااااس كدا بالجد حليتي لي مشكلتي ، أمي قالت ليها اها و تاني لو لقيتي واحد أسمح من العرستيهو دا ؟! قالت لينا يا جماعه مالكم انتوا اليوم دوشتوني والله و شيلتوني هم ! غيتو العرس دا طلع صعب صعب شديد ....قلت ليها عشان كدا بقول ليك المظهر الخارجي ما أهم شي و ما بالضروره تعرسي أسمح واحد لأنك لو قلتي تتابعي السماحه المبالغه ديك حتتوهي والله .... طبعاً لمن قلت كدا لقيتها هي و أمي بعاينوا لي ساي ، قلت ليهم قلت حاجه غلط 😅
أروى قالت لأمي بتك بقت تقول كلام معقول و موزون و دي حاجه ما بتعجبني ، طبعاً ضحكنا على كلامها ، قلت ليها يا بت أمشي بعد دا و بعدين أساساً جايه بيتنا ليه و انتي ماشه ل ناس خالتك ؟؟
قالت لي ح أقعد معاهم تلات أيام فقلت أغشاك أديك مني شوية أوكسجين تعدي بيهم التلات أيام دي لأني عارفاك ما بتقدري من دوني ، قلت ليها ربنا يشفيك ، أمي ضحكت و قالت ليها خلاص سوقيها معاك ما معروف يمكن الأوكسجين يكون غير كافي و تتعب لينا ، أروى قالت ليها طوالي ، قومي أجهزي يا بت ، قلت ليها بقى واضح منو الما بقدر بدون التاني 💁
المهم أروى مشت و انا قعدت أتونس مع أمي و أساعدها في تجهيز الغدا ، طبعاً لمن الله يلمني معاها في المطبخ بحكي ليها الفات و الحاضر 😂يعني كأنو المطبخ دا فيهو شي عجيب بخلي الواحد يحكي حاجات ما كان ناوي يحكيها ، و نحنا بنتكلم كدا ماهر جا داخل و جراني من شعري و قال لي من قبيل في المطبخ و لسه ما عملتي حاجه ! قلت ليهو واااي أنا منك انت و من ولدك ! ياخ قايل جر الشعر دا بارد !قربت تمعطو لي ، قال لي مدياني إحساس إنو شعر رابونظا ، قلت ليهو اسمها ربونزل و ليس رابونظا ، قال لي أعجمي إلعب به ، قلت ليهو المهم ما شفت ولدك الغياظ دا عمل شنو مع أروى لمن جات! قال لي عمل شنو ! حكيت ليهو الحصل و قلت ليهو حماده بقى قليل أدب والله و عنيد و ما بسمع كلام أي زول ، قال لي خليهو علي و طوالي ناداهو بأعلى حس لمن أنا إنخلعت ! لمن ناداهو أكتر من مره محمد جا جاري و قال ليهو آي يا بابا ، ماهر قال ليهو تعال هنا ، حماده خاف و أتردد بس لمن ماهر نهرو جا عليهو و قال ليهو أمشي جيب لي خرطوش و تعال ، حمودي أبى يمشي ، قلت ليهو ماهر !! عايز تعمل شنو بالخرطوش! أنا ما كلمتك عشان تضربو والله ! قايلاك حتتكلم معاهو عادي لأنو مرات كتيره حماده بسمع منك إنت بس ! أمي قالت ليهو اي خليهو الولد لسه صغير ، قال ليها عشان لسه صغير لازم يتعلم الصح من الغلط ، قلت ليهو ماهر ما تندمني لأني فتحت خشمي و حكيت ليك ! قال لي ما ح أضربو بسبب الحكيتيهو محمد دا قبل الموقف دا عامل مصايب كتيره و أنا ساكت ليهو....إتلفت على حماده و قال ليهو بنبره عاليه واقف تعمل شنو أمشي جيب الخرطوش ، خوفه ساي حماده مشى جاب خرطوش لأبوهو و جا ، ماهر مسكو منو و كان حيضربو بس وقفت ليهو في النص و خليت محمد وراي ، قلت ليهو ما حتضربو والله ، قال لي مها أنا ما عايز كلام كتير معاك ، الولد ولدي و أنا بعرف أربيهو كيف ، أمي قالت ليهو بري والله ولدنا كلنا ، ماهر قال لي ما أعيد الكلام ...زحي من قدامي ، و نحنا واقفين كدا مرام جات داخله ! جات جرت حمودي عليها و قالت ليهو مالك ؟؟
قال ليها أبوي عايز يدقني ، عاينت ل ماهر و قالت ليهو عايز تضربو ليه فهمني ؟؟
قال ليها لأنو بقى قليل أدب و عايز ليهو تربيه ، قالت ليهو و حتربيهو بالطريقه دي ؟؟؟ عمل شنو بس قول لي ؟! قال ليها زي ما قلت ليك بقى قليل أدب ! قالت ليهو و قلة أدبو دي ظهرت ليك فجأه كدا ! قول لي انت عمل شنو هو بالظبط عشان تضربو ! أمي قالت ليهو خلاص يا ماهر الموضوع بسيط و ذاتو حماده كان بهظر مع أروى و هي متعوده على حركاتو دي  ، مرام قالت ليهو ايواااا يعني القومه و القعده دي كلها عشان أروى !؟؟
عايز تضرب ولدك عشان وحده جدعت ليهو لبانه و قالت ليهو خليها تملى ليك كرشك و أدتني إحساس إننا مقصرين منو !! قال ليها دا ما السبب الرئيسي ، إتلفتت علي و قالت لي انتي الشكيتي ليهو صح ؟!! أصلاً ولدي دا كما عذبتو ما بترتاحوا ، ساقت حماده و مشت بيهو غرفتها ، ماهر رمى الخرطوش بزهج كدا و اتأفأف ، أمي قالت ليها اعذرها شكلو الحمل متعبها ، بعد ما هو مشى أمي قالت لي الله يعينو على المره دي ، قلت ليها بالجد والله ، الله يعينو !!
المهم في اليوم البعدو مشيت المشتل ، طبعاً بقى لي مسيخ من دون أروى ، إتصلت عليها و قلت ليها حترجعي متين من ناس خالتك ؟ضحكت و قالت لي الأوكسجين نقص ولا شنو! قلت ليها شبه كدا ، المشتل بقى لي مسيخ من دونك والله ، قالت لي الله الله ! قدامي ليه ما بتقولي لي كلام حلو زي دا ، قلت ليها اقول ليك كيف و نحنا 24 ساعه لاصقين في بعض ، قالت لي حقيقه والله ، أنا ذاتي فقدتك ، قلت ليها تعالي طيب ، اقعدي معاي باقي اليوم دا و أرجعي ، قالت لي ما بقدر والله ، المسافه بعيده ياخ و ذاتي لسه نعسانه ، قلت ليها خلاص ....قالت لي لكن لو جنابو داك جا تاني ممكن أجي عشانو 🙈
قلت ليها حيوانه ....المهم اتكلمت معاها مسافه بعدها قفلت منها ، جوا كم نفر كدا اشتروا شتلات و مشوا ، لمن زهجت مشيت لخالتو إخلاص جنب مشتلنا و شربت عندها الجبنه و إتونست معاها ، بعدها رجعت المشتل و إتصلت على أروى ، أول ما فتحت الخط قالت لي واااي ما قايلاك حتشتاقي لي كدا ، قلت ليها اتصلت عليك عشان اقول ليك إنو جنابو بتاعك داك جا ، قالت لي واااي ما بصدق هسي دي بجيك ، قولي ليهو ما يمشي مسافة الطريق بس و طوالي قفلت الخط ، قلت بالجد أروى دي مجنونه ، المهم عدت حكاية بتاعة ساعه كدا جوا فيها كذا ناس و اشتروا مني ، لمن وصلت الحد من الزهج قررت اقفل المشتل و أمشي البيت بس قلت قبل كل شي اسقي الشجر و أرتب الشتلات ، أثناء ما أنا بعمل كدا حسيت بزول واقف وراي و قبل ما أتلفت في يدين إنختوا على عيوني ، هبشت اليدين و قلت : أروى ، عرفتك ...
نزلت يدينها و قالت لي عرفتيني كيف ؟؟! قلت ليها من خاتمك يا بايره ، حضنتني شديد و قالت لي مشتاااااقيييين والله ، قلت ليها يا معفنه مشتاقه لي أنا ولا جنابو حقك داك و على فكره كذبت عليك و هو ما جا هنا خالص يعني كأنو حس انك اليوم ما موجوده في المشتل عشان كدا 😉
ضحكت و قالت لي يا هبله أصلاً أنا عارفاك بتكذبي والله و جيت عشانك انتي ما عشانو هو ، و بعدين هو منو أساساً عشان أقطع ليهو المسافه دي كلها ! أنا العساكر ديل بشوفهم كلاب كلاب بس ما تشوفي انبراشي فيهو و تقولي خلاص البت مكسره فيهو ،  قلت ليها على فكره هو واقف وراك ، قالت لي عارفاك بتكذبي ، سكته بس و بقيت أعاين وراها ، قالت لي جاده إنتي ؟؟
هزيت ليها راسي بس ، نططت عيونها و إتلفتت وراها و أول ما هي عملت كدا أنا قعدت اضحك و جريت منها و هي بقت ساكاني و بقينا نلف و ندور في نص الحته حولين الشتلات لأنو المشتل ما كبير شديد ، لمن تعبنا من الجرى وقفنا و قلت ليها خلاص آسفه شديد ، تعبت ياخ ، قالت لي و أنا كمان ، شلنا كرسيين و قعدنا بيهم برا جنب باب المشتل و بقينا نعاين في الغاشي و الماشي و العربات و كل ما تجي عربيه سمحه كل وحده بتقول دي حقتها ...
المهم بعد أسبوع من الكلام دا مشيت ل أروى في بيتهم لقيتها زهجانه و مهمومه ، قلت ليها بسم الله مالك يا أروى ؟؟
قالت لي زهج بس ، قلت ليها زهجانه من شنو !!؟ اتنهدت و قالت لي زهجانه و قرفانه من نفسي ، حاسه اني مكتفه و ما قادره اعمل حاجه ، دي أول مره أحس نفسي عاجزه للدرجه دي و ما قادره أساعد أمي و أبوي و أخفف عنهم ، قلت ليها لا لا ما تقولي كدا يا أروى! من متين و انتي بتستسلمي بالسرعه دي ! قالت لي إستسلمت بعد محاولات كتيره في إني ألقى شغل يقدر يغطي احتياجات أخواني و البيت و علاجات أبوي و الإيجار بس فشلت 💔
قلت ليها حتلقي شغل بإذن الله انتي بس ما تشيلي هم ! و بعدين الزعل ذاتو ما جاي فيك و مخلي منظرك شين ، إبتسمت و قالت لي يا زوله أنا حلوه في كل حالاتي ، قلت ليها خليك مبتسمه كدا على طول يا أروى ، والله ما بحب اشوفك زعلانه و مهمومه ، بتشيليني هم معاك و بعدين ما تخافي أنا معاك و الإتنين ح نفتش شغل ليك ، ضمتني و قالت لي ياااا قلبي انتي ربنا يخليك لي ، فجأه خالتو ثريا جات داخله و هي شايله كبايتين عصير ، قالت لي كويس انك جيتيها والله من أمبارح وشها دا قالباهو و متضايقه على الفاضي مع اني كلمتها ما تشيل هم لأني شغاله و ح اشتغل شغل إضافي بس هي ما بتقتنع بكلامي ، قلت ليها ح أفتش معاها شغل و بإذن الله حتتسهل ، قالت لي ان شاء الله و أنا أصلي ما شايله هم بس أروى بتي دي هميمه و بتضغط نفسها أكتر من اللازم ....المهم خالتو ثريا إتكلمت معانا شويه كدا و مشت ، قلت ل أروى ماف زول غيرك شايل هم ، هسي هدي أمك عاديه و مبتسمه و بالها مرتاح لأنها عارفه انو بعد الضيق فرج و إنو ربنا كريم ....قالت لي و نعم بالله بس انتي ما عارفه إحساس انك تكوني كبيرة البيت و مفروض بعد دا تشيلي الحمل عن أمك و أبوك و تلبي كل احتياجات أخوانك الأصغر منك ....قلت ليها زي ما قلت ليك ما تشيلي هم ، أنا معاك 💜

*في كل مرة هزمني فيها الخوف و الإحباط كنت اليد التي تمد و تساند و تربت ، في كل مرة كنت أهرب فيها من شبح الإستسلام و اليأس كنت الحضن الدافئ الذى يحتضن مخاوفي و يجعلها تتلاشى ، في كل مرة كانت تصفعني فيها الحياة كنت ملجئي الآمن الذى أجد فيه المواساة و الركن الحنون الذى يسكن آلامي و يشد أزري 💜*

#مها_حولي