قصة ريدنا

5

*#قصة_ريدنا《05》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
المهم حماده بعد ما عملنا ليهو الفحوصات طلع عندو ملاريا ، أبوي شال الروشته و مشى بيها الصيدليه ، حماده قال لينا عايز عصير ماذا ، قلت ليهو طيب هسي بتصل اكلم أبوي يجيبو ليك معاهو ، مرام قالت لي لا ماف داعي براي بمشي و بشتري ليهو ....ما إشتغلت بيها إتصلت على أبوي و كلمتو و لمن إتلفت لقيت حماده بس !!
قلت ليهو أمك مشت وين ؟؟
قال لي يمكن مشت تجيب لي ماذا ، طبعاً زعلت شديد من حركتها دي ، دائماً لمن تكون زعلانه من ماهر أخوي بتخرب وش معانا كلنا ، شويه كدا تلفوني رن ، لقيتو دا ماهر ، لمن فتحت الخط اتكلم معاي و هو مقلق و خايف على محمد ، قال لي تلفوني كان صامت و بعيد مني والله و ما عرفت إلا لمن رجعت البيت و أمي كلمتني ، انتوا وين هسي و حماده كيف ؟تعبان شديد و.....قاطعتو و قلت ليهو ماهر هدي ، حمودي كويس ، طلع عندو ملاريا ، قال لي لا ياخ !💔
قلت ليهو هاك اتكلم معاهو و طوالي أديت التلفون ل حماده و خليتو يتكلم مع أبوهو بعدها رجع لي التلفون ، ماهر قال لي هسي بجيكم مسافة الطريق بس ، قلت ليهو لا لا ما تجي نحنا خلصنا يا ماهر و راجعين ، قال لي لا ح أجي ، قلت ليهو والله انا ما قاعده أكذب عليك ، خلصنا والله و هسي منتظرين أبوي يجيب الأدويه بس عشان نرجع البيت ....المهم أبوي جا راجع مع الأدوية و 3 بارد ، قال لي مرام وين ؟؟
قلت ليهو أظنها مشت تشتري بارد ل محمد ، قال لي هي ما عارفه انك كلمتيني أجيبو معاي ولا شنو ؟؟
قلت ليهو عارفه يا أبوي و مرام دي كلنا عارفين حركاتها كويس ، فجأه هي جات و أدت حمودي البارد ، قال ليها كدا بقوا لي إتنين لأنو جدو اشترى لي واحد طبعاً أبوي ما سألها خالص .....المهم رجعنا البيت و ماهر كان واقف لينا جنب الباب و منتظرنا و هو خايف شديد و مقلق ، لمن نزلنا من الركشه ، حاسب بتاع الركشه و شال حماده و بقى يبوس فيهو ، أبوي قال ليهو قبيل اتصلنا عليك بس ما كنت بترد ! قال ليهو اي لأنو تلفوني كان بعيد عني بس لمن عرفت اتصلت على مها ، ماهر بقى يسألنا أنا و أبوي بس و خالص ما إتكلم مع مرام عشان كدا هي زعلت و دخلت طوالي ، المهم 4 أيام و أنا ما مشيت المشتل بسبب حماده ، دائماً لمن يكون عيان ما بقدر أمشي و اخليهو رغم إني عارفه إنو مرام و أمي ما ح يقصروا منو بس مع ذلك ما بكون مطمنه عليهو إلا لمن أكون جنبو ، المهم في اليوم الخامس مشيت المشتل ، طبعاً بعد ما وصلت المشتل حتى اتذكرت الروايه ، اخخخ انشغلت مع حماده و نسيتها رغم اني أمبارح كنت مخططه أجيبها معاي و أقراها هنا بس ما مشكله لمن أرجع ح أقراها بمزاج ، متشوقه شديد أعرف الحصل شنو معاهم و عرسهم كان كيف ، المهم مرت زي نص ساعه كدا و أروى لسه ما جات ، في الأيام الفاتت حصل و اتصلت عليها بس ما ردت و تاني ما رجعت ليها و ما عارفه اذا كانت بتجي المشتل في الأيام الفاتت دي ولا لا ، المهم فتحت تلفوني و إتصلت عليها ، ردت علي بعد مسافه ، قلت ليها شنووو ياخ مشتاقين شديد والله ! ما بتسألي عني مالك ؟؟
قالت لي أهلين مها
قلت ليها أهلين دي شنو كمان ؟!! يا بت مالك ؟؟!
قالت لي ولا حاجه
قلت ليها الكلام دا ما علي أنا ، ايوه صح أنا في الأيام الفاتت دي إنشغلت و السبب مرض حماده و انتي عارفه كويس إنو لمن يمرض بقلق بي و بعيشني في لحظات رعب على طول ، قالت لي سلامتو حماده مالو ؟!
قلت ليها عندو ملاريا ، قالت لي طيب هسي بقى كيف ؟؟ قلت ليها أحسن الحمدلله ، المهم ما تتهربي يا زوله ، قولي لي الحاصل !!
إتنهدت و بعدها قالت لي لمن اجيك بحكي ليك ، قلت ليها طيب ما تتأخري و قفلنا على كدا ، بقيت لافه في المشتل بسقي في الشتلات لحد ما سمعت زول قال السلام عليكم ، أول ما إتلفت لقيتو دا الضابط الإسمو منيب ولا منو داك ، قلت ليهو و عليكم السلام ، طوالي جا داخل ، قال لي كيف الحال ، قلت ليها تمام و سكتنا الإتنين و أنا منتظراهو يقول عايز شنو ، لمن ما إتكلم قلت ليهو عايز حاجه ؟؟
قال لي ايوه ، عايز شتلة ليمون ، قلت ليهو طيب ، طوالي مشيت و جبتها ليهو ، قال لي بالسرعه دي !!... طبعاً استغربت فيهو ! قلت ليهو ايوه ! قال لي طيب في غيرها ؟؟
قلت ليهو أيوه في عايز كم انت ؟؟
قال لي 2 غير دي ، مشيت جبتهم ليهو ، طبعاً بعاين لي بنفس نظراتو الغياظه ديك و هو مبتسم ! ، قلت ليهو انت متأكد إنو الشتلات دي قاعد توديها بيتك ؟؟
قال لي أكيد ح أوديها وين مثلاً ؟!!
غاظني شديد ، قال لي ما فهمت بتسألي ليه ؟؟ قلت ليهو عشان كل مره بتجي تشتري من هنا !! يعني انت أكتر واحد بشتري مننا !!
قال لي طيب عندك مشكله ؟؟
سكته و أنا بقول في نفسي دي فرصتك يا مها ، اتشجعي و قولي ليهو المضايقك فيهو ..
قلت ليهو ما عندي مشكله إلا في نظراتك الما مفهومه دي ! معليش على الح أقولو بس نظراتك دي ما مريحه بالنسبه لي ! يعني انا ما قادره افهم انت ليه بتعاين لي بالطريقه دي !؟
قال لي أنا ؟؟
متين عاينت ليك ؟؟
طبعاً عرفتو واحد مستهبل و نكار ، عشان كدا سكته خليتو ، قال لي عموماً آسف لو حسيتي اني بنظر ليك نظره ما كويسه ، هزيت ليهو راسي بس ، ف المفروض بعد دا يحاسبني و يمشي بس لسه كان واقف ! قلت ليهو عايز حاجه تاني ؟؟
قال لي افهم انك بتطرديني؟؟
قلت ليهو ما طردتك! سألتك إذا عايز حاجه عشان كدا لسه واقف لأنو ماف سبب تاني غير كدا !
خت الشتلات و قعد في أقرب كرسي و قال لي أنا منتظر أروى صحبتي ، عندك مانع  ؟؟
في سري قلت ليهو أجي! أروى من متين بقت صحبتك كمان !!....المهم ما قدرت أقول ليهو حاجه بس طلعت من المشتل و خليتو ، مشيت ل خالتو إخلاص سلمت عليها و طلبت منها شاي ، الجبنه بتاعتها كلها كانت أولاد و ريحة السجاير كانت مزعجه شديد ، قلت أول ما تكب لي الشاي حقي ح اشيلو و امشي بيهو المشتل و ان شاء الله الإنسان داك يكون مشى ، المهم أول ما كبتو لي طوالي شلتو و وقفت على حيلي ، لمن جيت طالعه حسيت نفسي زي عارضة الأزياء و أنا ماشه قدام الخلق ديل ، أول ما حصلت المشتل و دخلت ، حسيت بزول دخل وراي ، لمن إتلفت لقيتهم ولدين من الكانوا قاعدين في الجبنه ، صراحة خفت ، قلت ليهم ايوه ؟!!
جوا ماشين علي و أنا بحاول أكون عاديه و أظهر ليهم إني ما خايفه ، لمن وصلوني قالوا لي عايزين نشتري ، قلت ليهم عايزين أي شتله ؟؟
عاينوا لبعض و إبتسموا ، واحد قال لي ما مستعجلين خلينا نتونس اول شي و نتعرف على بعض ما معروف يمكن نبقى ليك زباين....قال كدا و عاين لصحبو و ضحك معاهو ، قلت ليهم لو سمحتوا لو ما عايزين حاجه أطلعوا من هنا ، التاني قال لي شكلك فهمتينا غلط ، نحنا حابين نتعرف عليك بس ، قبل ما أرد جاني صوت من وراي بقول ليهم و أنا كمان عايز أتعرف عليكم ....لمن إتلفت لقيتو دا منيب ، جا وقف قدامهم ، إبتتسم و طلع ليهم البطاقه البتثبت انو ضابط و ليهو هيبه و مكانه ، قال ليهم كدا عرفتو أنا منو ف عرفوني عليكم ! طبعاً اتكبكبوا و خافوا و قبل ما يقولوا كلمه قال ليهم بنبره حاده امشوا من هنا و تاني ما اشوفكم في المنطقه دي و إلا ما ح يحصل خير والله ، بكل هدوء طلعوا من المشتل ، إتلفت علي و قال لي انتي أساساً عامله مشتل في الحته دي ليه ؟؟! ضروري تشتغلي يعني ؟؟ ما شايفه كمية العواليق القاعدين حولين المشتل ديل !!؟
طبعاً قال لي الكلام دا بزعل و حده شديده  و نبره عاليه !! لمن استغربت فيهو و ما فهمت شنو المزعلو للدرجه دي ! قبل ما أقول حاجه أروى جات داخله ، طبعاً هي سمعتو لمن رفع صوتو علي ، جات وقفت قدامو و قالت ليهو هييي هيييي في شنو ؟ بترفع صوتك عليها ليه ؟
ما رد عليها ، قلت ليهو ساكت ليه ؟؟ عرفت نفسك غلطان صح ؟؟
يعني انا ما فاهمه انت حاشر نفسك ليه !!... طبعاً لمينا فيهو أنا و أروى و صراحة أروى في الإشتباكات أكعب مني ، انا يمكن أسكت لمن اشوف انو الزول القدامي سكت و بقى ما عندو حاجه يقولو بس أروى لا حتى لو ما فاهمه الحاصل بتشتبك ...خالص ما بتسكت ، في نهاية كلامها قالت ليهو انت قايل نفسك منو عشان تجي و ترفع صوتك عليها ، يعني شنو إذا كنت ضابط أو غيرو ، قايلنا ح نخاف منك و نسكت ليك ! بتحلم والله ، يعني عشان أديناك وش و أنا بقيت آخد و أدي معاك في الكلام عايز تقل أدبك علينا و و و...سمعتو كلام كتير و هو كأنو ما سامعها كان بعاين لي بنظره حاده لمن خوفني عشان كدا بقيت بحاول أسكت في أروى ، لمن هي كترة الكلام مدا ليها اصبعو و قاليها بصوت عالي : حسك دا ما أسمعو تاني . .
طبعاً الإتنين نططنا عيونا من شدة الخلعه و الخوف ، أروى بلعت لسانها و ما قدرت تنطق حرف تاني ، قال لي قدامك يومين تمشي فيهم من هنا ، بعد يومين بالظبط لو جيت و لقيت المشتل دا لسه في مكانو ما ح يحصل خير ..
قلت ليهو ما على كيفك والله ! أديني سبب واحد بس يخليك تفرض علي قرارك دا و يخليني انفذ كلامك ! ....متأكد انك طبيعي و عقلك دا ما فيهو شي !!
قال لي كلامي واضح ....أروى قالت لي طوالي اتصلي على أبوك و ماهر خليهم يجوا يتفاهموا معاهو لأنو شكلو قايلك مقطوعه من شجره و ما عندك زول ، قلت ليها ولا ح أتعب أهلي ساي ! و أساساً كلامو دا كلو ما هاميني و ما ح أركز معاهو أو أديهو أهميه ، عاين لي كويس و مشى و خلى مية إستفهام في بالي !!
أروى قالت لي دا مالو !!؟ الحصل شنو من البدايه أحكي لي !طوالي حكيت ليها ، قالت لي الما فهمتو ليه هو انفعل كدا ! يعني طبيعي يدافع عنك و يطرد العواليق ديلك من هنا بس الما طبيعي ردة فعلو و زعلو المفرط دا ! يعني حتى لو افترضنا انو معجب بيك بس برضو ردة فعلو مبالغ فيها ! خاصة انو لا هو بعرفك لا انتي بتعرفيهو....قلت ليها ما تركزي معاهو دا واحد عديم موضوع ساي و أكيد ما ح أهتم بتهديدو دا ، قالت لي شكلو جادي ! اقسم بالله خوفني جنس خوف لمن مد اصبعو علي ! والله ما كنت قايلاهو كعب كدا ،  اسمعي مني و كلمي أهلك ، قلت ليها ما عايزا اشغل بال أهلي ساي خلي الموضوع دا و أحكي لي الحاصل معاك شنو !!
قالت لي لكن هو.....قاطعتها و قلت ليها أروى دا واحد متنفخ ساي و عايز يخوفنا بس ، عشان كدا ما تركزي مع كلامو و أحكي لي الحاصل معاك .....اتنهدت و قالت لي : جاني عريس و أهلي ضاغطين علي عشان أوافق بحجة انو زول كويس و الأهم وضعو المادي ، قلت ليها بالجد !!
طيب منو الزول دا ، بتعرفيهو !
قالت لي ايوه هو قريبنا من بعيد ، قلت ليها طيب انتي رافضاهو ليه ؟؟
قالت لي بزهج : ساي كدا ما عايزاهو!
قلت ليها خلاص روقي روقي ! قالت لي أهلي ما قادرين يفهموني ! بس انا فاهماهم كويس ، أبوي شايف إنو مصعبها علي و حاسس اني ح أتعب و أشقى كتير في سبيل اني أوفر ليهو حق العلاج و أساعدو في الإيجار ، عشان كدا كان مصر إني أوافق على مصطفى و أمي كذلك و هم ما عارفين انو لا عرس لا غيرو ح يقدر يمحي من جواحي إحساس المسؤوليه تجاهم.....
طبعاً بكلامها دا إتذكرت إنو ماهر أخوي قال لي إنو ح يشوف ليها شغل ف طوالي قلت ليها طيب ما تشيلي هم و كلو ح يتحل و أنا كلمت ماهر أخوي يشوف ليك شغل ، عشان ترتاحي شويه و تحسي انك قدمتي حاجه لأهلك ، قالت لي بزعل ليه كلمتيهو؟؟
هل أنا طلبت منك تكلمي لي أخوك يا مها ؟
بالجد حيرتني !! قلت ليها المشكله وين ؟
قالت لي تاني مره قبل ما تطلبي لي مساعده من زول ارجعي لي و شاوريني !!
قلت ليها أنا ما طلبت ليك مساعده من غريب ! ماهر دا اخوي و هو بعرفك كويس و انتي بتعرفيهو ف ليه متحسسه من الحته دي ؟!
ما ردت علي بس الزعل كان باين عليها و انا ما قادره افهم شنو المزعلها قدر دا !؟؟
المهم باقي اليوم كلو قضتو مره سرحانه و مره بتتصفح في تلفونها ، مشيت ليها و قلت ليها : مع إني بالجد مستغربه فيك و متحيره و ما قادره افهم شنو البزعل في قصة اني حكيت لماهر و طلبت منو يلقى ليك شغل بس بما انك اتضايقتي فعلاً ، فأنا آسفه يا زوله و تاني مره ح أحاول إني ما أحشر نفسي في حاجه بتخصك لا أنا لا واحد من أهلي ، قلت كدا و كنت ح أمشي بس هي وقفتني و قالت لي ما تفهميني غلط يا مها ، قلت ليها متأكده اني ما فاهماك غلط لأنو ماف تفسير لردة فعلك دي غير كدا ، قالت لي انتي ما بس صحبتي ، انتي في مقام أختي والله و البخصني بخصك و العكس ، قلت ليها طيب فسري لي كلامك و زعلك و ضيقك دا.....بعد مسافه قالت لي أنا ما عايزا أي مساعده من ماهر .....قلت ليها شنو !!؟؟
من ماهر تحديداً ولا من أي زول ؟!
سكتت
قلت ليها ما تسكتي يا أروى ، نحنا ما متعودين نكذب أو ندس من بعض حتى لو كان البتتكلمي عنو دا أخوي ، قالت لي من ماهر تحديداً..
قلت ليها يعني هو زعجك بكلمه أو تصرف ؟؟
قالت لي لا ....قلت ليها طيب ؟!!
أروى بتكلم معاك أنا ردي و فهميني الحكايه !!
قالت لي عشان مرتو ما تتحسس
قلت ليها دا عذر ليك ؟! أولاً دي ما حاجه تخلي مرام تتحسس و تاني حاجه هي أساساً من وين حتعرف انو ماهر لقى ليك شغل مع إنو ما فيها حاجه !؟
قالت لي قاعده معاكم في البيت أكيد ح تعرف ، و واضح ليك و لكل الناس إنها ما بتطيقني ، قلت ليها دا ما مبرر ليك ولا سبب يمنع ماهر من إنو يلقى ليك شغل ، ح اعتبر نفسي ما سمعت حاجه و ماهر ح يفتش ليك شغل ، قالت لي لا يا مها عليك الله أنا ما عايزا !....مش الشغل دا ذاتو خليتو !
مشيت قعدت جنبها و قلت ليها في شنو يا أروى ! حاسه انو في شي تاني ، قالت لي اتطمني ماف شي....
أصريت عليها شديد عشان تحكي لي بس كانت بتقول لي : بأكد ليك انو ماف شي تاني !!..
المهم اليوم عدا و رجعنا سوا ، لمن وصلت البيت ماهر ما كان موجود ، صليت العصر و مشيت اتغديت و شربت شاي بالنعناع و قعدت إتونست شويه مع أمي بس أول ما جابت لي سيرة الجامعه طوالي قلت ليها أنا تعبانه ماشه أنوم ، قالت لي قولي عايزا تتهربي مني بس ! يا بتي أنا بتكلم معاك عشان مصلحتك بس والله ! يعني عايزا تقعدي كدا لمتين ؟؟
قلت ليها مالي أنا هسي يا أمي ! شغاله و ماكله و شاربه و صحتي تمام و أموري ظابطه ! قالت لي هسي دا شغل ليك !؟
قلت ليها هو الشغل دا عندو مواصفات معينه على أساسها بنطلق عليهو اسم شغل ؟!....بالنسبه لي الشغل ما قروش بس ، راحتي في شغلي و رضاي عن نفسي بالنسبه لي أهم ، قالت لي طيب و نحنا ؟؟
قلت ليها مالكم ؟
قالت لي عايزين نشوف بتنا متخرجه و موظفه و ناجحه في حياتها ، قلت ليها يعني النجاح دا إلا يكون بشهاده جامعيه ؟؟
قالت لي يا بت هوي ما تقعدي تتفلسفي لي ! قلت ليها يا أمي  دي الحقيقه ، النجاح دا ما شرط إلا يكون بشهاده ! أي حاجه انت اتمنيتها و سعيت عشان تحققها و حققتها ف دا نجاح ، كان نفسي افتح مشتل و اجيب فيهو كل انواع الشتلات و الورود البحبها و فعلاً دا الحصل و دا يعتبر نجاح ....زعلت من كلامي و مشت مني !
أنا متفهماهم والله بس هم ما قادرين يفهموا انو الموضوع صعب علي ، أنا ما حاسه انو نفسي ادخل الجامعه ، ما حاسه انو عندي شغف اقرا الشيتات أو أعافر و اجتهد عشان الشهاده الجامعيه ، أنا كدا مرتاحه والله و ما عايزا أي ضغط و الموضوع دا نحنا اتناقشنا فيهو كتير بس لسه هم مصرين مع اني السنه الفاتت خضعت لأوامرهم و وافقت اني امتحن تالت بس بشرط اقرا في البيت و المدرسه امشي ليها يوم الإمتحانات فقط ، رغم انو أمي و أبوي و ماهر ما قصروا مني و دائماً كانوا بشجعوني و بذاكروا لي إلا أنها مع ذلك  كانت تجربه صعبه علي و نفسياتي في الفتره ديك اتدمرت ، بالحاله نجحت و قدموا لي للجامعه رغم اعتراضي ، في الآخر قبلت أدخل الجامعه بس خليتها ، قريت يمكن شهرين و حاجه بعدها ما قدرت اتحمل الضغوطات و القرايه ، كنت لمن اجي راجعه برجع مصدعه و متضايقه و بنسى معظم المحاضره و معظم الحاجات البقراها ، ما إرتحت إلا لمن خليت الجامعه ، بس تاني رجعوا و فتحوا معاي الموضوع دا !!
المهم في النهايه رجعت غرفتي و قلت على بال ما ماهر يجي أقرا الروايه ديك ....فتحت دولابي و شلتها ، قعدت في السرير و فتحت الدفتر و قريت من محل ما وقفت :
✨____________💜🌼