قصة ريدنا

13

*#قصة_ريدنا《13》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
المهم بعد ما ناس أروى مشوا لملمنا الحاجات و دخلناهم جوه ، بعدها صلينا المغرب ، مرام قالت لي حمودي دا مشى وين ؟؟ قلت ليها ما عارفاهو لكن يمكن يكون مشى بيت ناس أروى للحلاوه القالتها ليهو ، قالت لي بتغشو ساي و هو زي الأهبل جاري وراها ، ضحكت و قلت ليها انتي قصدك حمودي ولا ماهر ، قال لي هيييي ما تجيبي لي مشاكل مع الراجل ، قصدي حمودي أنا 😂
المهم و نحنا بنحضر ، ماهر جا داخل و قال انتوا حمودي دا مشى وين ؟؟ أمي قالت ليهو في بيت ناس أروى ، قال ليها مشى ليه !؟معقوله يقعد للزمن دا ! قال كدا و طوالي طلع ، تاني جا راجع و قال لي تعالي يا مها ، طوالي مشيت ليهو ، قال لي ألبسي توبك و أرح معاي نجيب الولد دا ، قلت ليهو واااي يا ماهر ما قايلاك بتخاف بليل!! ضربني ضربه خفيفه على راسي و قال لي بطلي خفه ، سايقك معاي عشان تكوني شاهده اني لا اتكلمت مع أروى لا عاينت ليها ...عشان مرام دي ما تقعد تزعل و ترجع تاني للضيق و الإنزعاج ، قلت ليهو يا سلاااام يعني ح تتعبني بالمشى عشان مرتك ما تزعل ، قال لي اي ، قلت ليهو كويس كويس ، ضحكت عليهو و دخلت جوه مشيت جبت توب ل مرام و قلت ليها هاك ألبسيهو ماهر واقف ليك برا ، قالت لي ليه في شنو ؟؟
قلت ليها ما عارفه بس أمشي ليهو ، لبست توبها و مشت ليهو ، أمي قالت لي في شنو ؟؟
قلت ليها خليهم ساي على راحتهم ، قالت لي ما فهمت يعني في شنو ؟؟ مياسم قالت ليها ما ح تفهمينا ، قلت ليها المهم هم ماشين يجيبوا ولدهم ، قالت لينا قايلني أم جيقه يعني و ما بفهم حركات عصافير الحب دي يعني 🙂
طبعاً ضحكتنا ضحك ، قلت ليها مباااالغه يا أمي و انا أقول حمودي جايب التفتيحه دي من وين ، قالت لي من بوتيك قمرنا ، قلت ليها لا انتي الليله خطيره يا أمي عديييل ، مياسم قالت لي بكون أبوي غازلها أو سمعها كلام حلو كدا عشان كدا النفسيه عال العال ، أمي قالت لينا غايتو انتوا الواحد ما يفتح معاكم خشمو ، شويه كدا جات رفيف و قالت ل مياسم أنا نعسانه يا ماما ، مياسم قالت ليها خلاص أمشي نومي ، قالت ليها لا عايزاك تنومي معاي يا ماما ، مياسم قالت ليها طيب أرح قدامي ، أمي قالت ليها يعني إلا تنوميها !! مياسم قالت ليها شفعي ديل ما بتعرفيهم يا أمي ، بتاعين غلبه شديده و لو ما نمت معاهم ما بنوموا ، أمي قالت ليها عشان دلعتوهم شديد ، بجنس الطريقه دي ما ح يخلوك تاخدي راحتك و وين ما مشيتي إلا تنومي معاهم في نفس الوقت ، قلت ليها طيب خليني اجرب انومهم لحد ما يتعودوا علينا تاني ، قالت لي ما بنوموا ليك ، قلت ليها ما مشكله بجرب ، قالت لي خلاص أول ما تدخلي الغرفه في شنطه يمين الباب فيها قصص اطفال اقريها ليهم ، ضحكت و قلت ليها ديل ياهم ذاتهم للشفع البجيبوهم في التلفزيون ، المهم مسكت رفيف من يدها و مشيت بيها الغرفه ، لقيت عمر و رنيم قاعدين في نص السرير و منتظرين أمهم تجيهم ، قلت ليهم امكم عايزه تتونس مع أمها شويه عشان كدا ح أنومكم أنا ، قالوا لي و ماما ح تنوم وين ؟؟ قلت ليهم ح تجي تنوم معاكم هنا ! انا بس ح أنومكم و امشي أنوم في غرفتي ، المهم طلعت قصص الأطفال من الشنطه و رقدتهم التلاته و بقيت أحكي ليهم ....صراحه القصص عجبتني في بقيت مركزه معاها شديد و بقرا ليهم بصوت عادي عشان ينوموا.....بعد مسافه كدا رفعت راسي و انا قايلاهم ح يكونوا في سابع نومه لقيتهم لسه مفتحين عيونهم!!
قلت ليهم لسه ما نمتوا انتوا ؟؟ عمر قال لي عايزين ماما نحنا !! قلت ليهو القصه ما عجبتكم صح ؟؟ ثواني اقرا ليكم غيرها ، رقدت بالطرف التاني و بقيت اقرا ليهم في القصه ،....قريت و قريت لحد ما نمت من دون ما أحس ، بعد مسافه كدا حسيت بحاجه ماشه في يدي ، حركت يدي من دون ما أفتح ...تاني الحركه اتكررت و المره دي حسيت بالحاجه دي ماشه في رقبتي و أنا مغمضه ختيت يدي على رقبتي و لمست حاجه غريبه كدا كانت لسه بتتحرك  ، أول ما إكتشفت إنو ضب فتحت عيوني و قمت مخلوعه و بقيت أصرخ و انفض في جسمي ، صرخت بأعلى حس عندي و انا جسمي كلو برجف ....ناس أمي جوا جارين مخلوعين ، ماهر قال لي مالك في شنو ....قلت ليهو ض...ض ..ضب و يديني بدوا يرجفوا ، أبوي قال لي وينو هسي قلت ليهو هداك ليهو و الضب طوالي جر ، مرام مشت جابت لي مويه و جات ، أمي قالت لي خلعتينا والله ، قلت ليها أنا بكره الضببه دي شديد و بترعب منها ، المهم كلنا طلعنا من الغرفه ، مياسم قالت لي بدل ما تنومي أولادي نمتي انتي و هم جوني في الصالون و ناموا على الكنب ، قلت ليها اعمل ليهم شنو أبوا ينوموا ، قالت لي مش قلت ليك ، المهم ماهر شال ليها رفيف و عمر و هي شالت رنيم و مشت بيهم غرفتها ، طبعاً كانوا نايمين ، قعدت في الصالون و مسحت وشي ، مرام قالت لي خلاص ما حصل شي ، قلت ليها قطع قلبي والله ، قالت لي معليش معليش ..... طبعاً طوااالي اتذكرت ، قلت ليها مرام أنا عايزا أ......فجأه كدا ماهر ناداها ، قالت لي دقيقه ح أمشي أشوفو و أجي ، قلت ليها خلاص خليهو ل بكرا الزمن أتأخر.....المهم مشيت غرفتي عشان أنوم ....قفلت الباب و الإضاءة و رقدت طوالي ، بعد ما مسافه  جا زول داخل ، فتح الباب و بقى ماشي علي و لمن وصلني خت فيني ضب كبير و ثعابين و أول ما هم بقوا ماشين في جسمي قعدت أصرخ و انفضهم من جسمي و هو فجأه اختفى ، ف بقيت أصرخ و أصرخ لحد ما جاني صوت أمي و هي شغاله تقول بسم الله الرحمن الرحيم ، بسم الله الرحمن الرحيم ، فتحت عيوني و أنا جبيني معرق ، لقيتهم كلهم محاوطين سريري ، أبوي قال لي قولي بسم الله يا بتي ...قلت بسم الله و قمت قعدت في السرير و أنا قلبي شغال يدق بسرعه و بتنفس بصعوبه ، مرام قالت لي شكلو كان كابوس ، مياسم قالت لي اتحصني قبل ما تنومي ، ماهر قال لي عارفه دا كلو بسبب الضب ، يمكن عشان بتخافي منو كوبس بيك ، قلت ليهو فعلاً لأني شفتو في الكابوس دا و وريتهم الحصل ، أمي قالت لي خلاص اتحصني و نومي ، قلت ليها والله انا خايفه شديد و حاسه اني لو نمت ح أشوف كابوس أسوأ من دا ، قالت لي خلاص انا ح أنوم معاك هنا الليله ، المهم هم كلهم مشوا بعد ما إتطمنوا علي إلا أمي نامت معاي زي ما قالت ، اتحصنت و نمت جنبها و هي ما نامت إلا بعد ما انا نمت بمسافه.....
المهم في اليوم البعدو أبوي قال لي الليله ح أمشي و أقدم ليك ، عايزا تقري شنو انتي ؟؟ قلت ليهو لو علي ما عايزا اقرا حاجه بس بما انكم مصرين تقروني ف خلاص اختاروا لي الجامعه و المجال البعجبكم ، قال لي دا كلو لمصلحتك والله ، المهم أبوي مشى براهو عشان يقدم لي في الجامعه ، بقينا في البيت أنا و مرام بس لأنو أمي و مياسم و أولادها مشوا ل نسابتها في بحري و حمودي في الروضه ، قلت بس دي فرصتي ،  طوالي ناديت مرام و قلت ليها أخيراً لقيت فرصه عشان أتكلم معاك ، قالت لي قلقتيني ، قعدت و قالت لي أحكي !!
قلت ليها عايزاك تكوني صريحه معاي يا مرام ، أنا ما عايزا أكون زي الأطرش في الزفه ، من حقي أعرف كل تفصيل مهم كان في حياتي انا ما متذكراهو ، قالت لي طيب عايزا تعرفي شنو ، قلت ليها أحكي لي كل البتعرفيهو عني ، قالت والله البعرفو عنك ياهو القالوا ليك أهلك ، مثلاً زي كلنا كنا ساكنين في أمدرمان بس أنا ما كنت بعرفكم شديد و ناس أروى ديل كانوا جيرانكم بالحيطه و....قاطعتها و قلت ليها دا بعرفو ، قالت طيب كنتي بتقري تقنية معلومات في جامعة السودان للعلوم والتكنولوجيا ، قلت ليها طيب الحادث الحصل لي !!؟
قالت لي مالو !! ما زي ما عارفه انتي كنت سايقه عربية ماهر القديمه و عملتي بيها حادث و للأسف الضرر الأكبر كان في الرأس في منطقه معينه سببت الفقدان التراجعي الذاكره ، يلي بسببو المريض ما بتزكر أي حاجه قبل الحادث ، قلت ليها ايوه بس انا في حاجات بتذكرها من لمن كنت في الأساس ، حتى مرات بتذكر لمن كنت في الروضه ! قالت لي انتي ما سمعتي الدكتور قال ليك شنو في آخر مره مشيتوا ليهو ، دا تاني على حسب موقع الإصابه و حدتها ، لو ملاحظه انك ما متذكره حاجات كتيره في الثانوي ، حتى الأساس دا ذكرياتك الفيهو بتتحسب ، يعني ممكن نقول انك مصابه جزو من فقدان الذاكره التراجعي أو الرجعي ....قلت ليها طيب أحكي لي لسه عن نفسي.....المهم قعدت تحكي و تحكي و أنا معظم الكلام البتقولو لي ناس أمي حصل و حكوهو لي ، عشان أختصر و أصل لغايتي ، قلت ليها كنت بعرف واحد إسمو منيب ؟؟
طبعاً كانت بتشرب في مويه عشان حلقها نشف من الكلام الكتير زي ما قالت بس أول ما قلت اسم منيب هي إتشرقت و ختت الكبايه و قالت لي و هي بتكحه منو ؟؟
قلت ليها منيب ، ..منيب عباس ...
قالت لي دا منو كمان ، بري أول مره أسمع بيهو ، عاينت ليها جوه عيونها و هي إتوترت شديد ، قالت لي نسيت الحله في النار و قامت بإستعجال ، مسكتها من يدها و قعدتها ، قلت ليها متأكده انك بتعرفيهو كويس ، قالت لي بالجد ما بعرفو يا مها ، قلت ليها بتكذبي علي ليه ؟؟
على فكره حمودي ولدك بعرفو ، أنا اليوم ما ح أخليك إلا تقولي لي هو منو..... طبعاً حاولت تتهرب مني بس ما خليتها و محاولات هروبها من اسئلتي حسستني انو بالجد في حاجات كتيره شديد أنا ما عارفاها و لازم أعرفها....
بعد إلحاحي مني قالت لي انتي لاقتيهو وين ؟؟
طوالي قعدت أحكي ليها و وريتها انو على طول بجينا في المشتل و كيف إنو بقعد يعاين لي و و و المهم حكيت ليها كل مواقفو ...قلت ليها عشان كدا أنا متأكدة انو بعرفني و لمن حمودي قال عمو منيب اتأكدت تماماً من الحاجه دي ، ف رجاء يا مرام ما تكذبي علي في حاجه ....
اتنهدت و قالت لي عمتي سلافه لو عرفتي اني قلت ليك ح تزعل مني والله ، و يمكن ماهر و عمي يزعلوا مني كمان ، قلت ليها يزعلوا من شنو ؟؟؟ قولي لي يا مرام و أنا بوعدك اني ما اجيب ليهم سيرتك !!....قولي ياخ وترتيني !!
بعد مسافه نطقت و قالت لي منيب راجلك
طبعاً صدى الجمله دي بقى يتردد في مسامعي ، حسيت نفسي بحلم و إنو الإنقال ما حقيقه !!
قلت ليها شنو ؟؟؟
كيف يعني ؟؟
بتقولي في شنو انتي يا مرام !!
ختت يدها على يدي و قالت لي روقي يا مها ...دي الحقيقه والله ، منيب كان معرسك قبل سنتين و بعدها حصلت مشاكل بينك و بين أهلو ، في البدايه قلنا إنها مشاكل عاديه بتحصل بين الوحده و نسابتها بس هم حقدهم عليك عشان مشكلتك حقت الإنجاب خلاهم يصلوا لدرجة انهم يعملوا ليك عمل عشان يكرهوا منيب فيك و فعلاً دا الحصل و بسبب عملتهم حصلت مشاكل كتيره بينك و بين منيب و هم ما بس إكتفوا ب دا ، طول مدة قعادك جنبهم عذبوك عذاب بالعمل الدفنوهو ليك وصلوك لدرجة انك كنتي بتطلعي الشارع حفيانه و بجلباب بس و الله إلا الناس كانت بتمسك و ترجعك ، دا كلو نحنا ما كنا جايبين ليهو خبر إلا الناس كلمونا و قالوا لينا ألحقوا بتكم ، انتي رفضتي ترجعي بيت أهلك و هم استمروا في عذابهم ليك
و التفاصيل و الحصل معاك في بيت نسابتك انتي أدرى بيهو مننا بس الحاله الوصلتي ليها وجعت كلنا الناس البعرفوك و الما بعرفوك.....المهم في الآخر أهلك قالوا ح يطلقوك منو بس هو رفض و انتي كمان كنتي رافضه شديد و لمن عمتي سلافه مشت عشان تجيبك غصب عنك انتي ما رضيتي و قلت ما ماشه ، المهم عمتي سلافه مشت اشتكتهم و جابت أمر القبض و الشرطه ساقت نمارق و تنزيل و عمتهم و بت خالتهم ، منيب طلعهم في نفس اليوم بس العلاقه بيناتكم إتوترت ، و  أهلا زادوا سوء و طلعوك مجنونه قدام الناس ، المهم ما عارفه ليه انتي سقتي عربية منيب أو كنتي ماشه وين بس ياهو عملتي بيها حادث و بعدها حصل الحصل ، و المره دي طوالي جبناك البيت بعد كمية العمليات الإتعملت ليك و للأمانه الحاله الكنت فيها فقدتنا الأمل بإنك تعيشي عشان كدا أول ما بقيتي كويسه من المستشفى طوالي جبناك معانا البيت و تاني أهلك ما خلوا منيب يشوفك و أساساً الدكتور قال نخليك بعيده عن الضغط و الأفضل ذاكرتك ترجع بالتدريج بعيداً عن الضغط و أساساً عمتي سلافه نبهتنا انو ما نجيب ليك سيرة منيب و قالت تاني ما ح ترجعك ليهو لو اتذكرتي أو لا و شبه طوينا صفحة منيب دي ، بس بعد سنه جا و قال إلا يشوفك و حصل اشتباك بينو و بين ماهر ، عمي قال ليهو لا تشوفها لا تشوفك ، نحنا ما عايزين معاك مشاكل كتيره عشان كدا طلقها و ريحنا كلنا ، بس منيب رفض و كان مصر إنو ما يطلقك و بعدها إختفى و تاني ما عرفنا حاجه لا عنو لا عن أهلو....
طبعاً بقيت منططه عيوني بس !! قلت ليها ما قادره أصدق والله ، قالت فعلاً صعب عليك تصدقي بس دي الحقيقه الكنتي حتعرفيها لو اليوم و لو بعد مية سنه و أصلا أهلك كان مصيرهم يقولوا ليك الحقيقه لأنو منيب لحد اللحظه ما طلقك و بكدا انتي لسه مربوطه بيهو ، و دا البخلي أهلك يرفضوا أي زول بجيك بس قبل كم اسبوع كدا في واحد اتقدم ليك ، ابوهو صاحب أبوك ، أهلك رفضوا طوالي بس الولد كان مصر ف حكوا ليهو انك معرسه و راجلك ما ناوي يطلقك ، الولد قال ليهم ما مشكله بنتظرو لحد ما يطلقها و حالياً أبوك و ماهر كل مره بتلاقوا معاهو و بحاولوا يقنعوا فيهو عشان يطلقك ....
ختيت يدي على خشمي و قلت ليها ما قادره استوعب الكلام دا كلو !!....قالت لي أنا زعلانه شديد و ممغوصه من تنزيل الكانت صحبتك الروح بالروح ، بس دا بثبت انو الصداقه ما بتصمد قدام النسب ، هي أول ما عرستي اخوها قلبت طوالي و كل يوم مشكله ورا مشكله بس ربنا انتقم منها لأنو اول ما عرست سنه ما تمتهم راجلها و نسابتها أكلو لحمها أكل و قالوا ليها انتي السبب لأنك منحوسه و و و ...و بعد فتره جناها مات في بطنها و تاني ما عارفه الحصل ليها شنو....
ختيت يدي على راسي و غمضت عيوني ، قلت ليها صدعت عديل ، قالت لي عشان كدا كنت متخوفه من حتة إني اقول ليك كل الحقائق دي دفعه وحده.....قمت من مكاني و مشيت غرفتي ، رقدت على السرير و بقيت أعاين في السقف و كل كلمه قالتها لي مرام كانت بتتردد على مسامعي !!
اتكرفست في السرير و بقيت اقول يعني منيب معرسني !؟؟
بقيت اتذكر في كل مواقفو و جملتو لمن قال لي صدقيني أنا ما غريب ... حسيت إنو عقلي ح يطق من شدة التفكير و عدم الإستيعاب ، مرام جات جابت لي مويه و عصير و أدويتي ، شلت منها الحبوب و بلعتها ، قالت لي حاسه انو ما كان اقول ليك ، قلت ليها بالعكس ياريتك لو قلتي لي من زمان ....قالت لي هسي ناويه تعملي شنو ؟؟
قلت ليها ما عارفه ، خليني أول استوعب السمعتو دا كلو ....فجأه كدا سمعنا صوت حمودي و بقول ماااامااا ، ماااامااا أنا جيت ، قالت ليهو أنا هنا يا حمودي ، طوالي جانا في غرفتي ، حضن أمو و باسها و جا عمل لي نفس الشي ، مرام قالت ليهو امشي بدل ملابسك و إياك تجدعهم لي في السرير ، بعد ما هو طلع من الغرفه اتذكرت حاجه و قلت ليها طيب حمودي ليه ما حصل جاب لي سيرة منيب !؟؟
قالت لي أصلا حمودي الوقت داك ال4 سنوات دي ما كان تاميها ايوه هو بعرف منيب و شافو بس عشان تاني ماف زول جاب سيرة منيب و عشان منيب تاني ما ظهر هو شبه نساهو بس يمكن لمن شافوا معاك في المستشفى استحضر شكلو بس نسى الإسم....المهم اتكلمت معاي مسافه و مشت....أن رقدت و حاولت أنوم بس غلبني النوم..
طول اليوم بقيت ما طبيعيه و ناس أمي لمن جوا راجعين لاحظوا الحاجه دي و قالوا لي مالك عيانه ولا شنو !؟؟ قلت ليهم لا لا ، بس ما كنت قادره أثبت ليهم إني كويسه ، أمي قالت لي من ما وقع فيك الضب امبارح و انتي ما كويسه ، قلت ليها لا لا بس حاسه نفسي نعسانه ...
المهم قضيت يومين بالحاله دي و ما مشيت المشتل تاني ، أروى قالت لي منيب شكلو قنع منك لأنو بقى ما بجي المشتل ، قلت ليها عايزا أحكي ليك حاجه يا أروى ، قالت لي قولي طوالي ....
أخدت نفس و حكيت ليها كل الكلام القالتو لي مرام .... طبعاً نططت عيونها و ختت يدينها على خشمها و قالت لي واااي ما بصدق يا مها !! وووبعلي منيب طلع راجلك عديييل ! قلت ليها اتخيلي ، قالت لي بختك والله 😭😭😭💜
قلت ليها للآن شايفه الكلام دا زي الحلم...
قالت لي ما اتكلمتي مع منيب ؟؟
قلت ليها اتكلم معاهو اقول ليهو شنو ؟؟
قالت لي يا بت دا طلع راجلك قولي ليهو اي حاجه و لو عايزا أحضنيهو عديل 🙈
قلت ليها بطلي تفاهه
قالت لي يا بت المحظوظه ، معناها هو الجاب ليك الهدايا ديك...
طبعاً أول ما جابت لي سيرة الهدايا أخدت لي صنه و طوالي إتذكرت الدفتر !!
قلت ليها يعني الروايه الكانت مكتوبه فيهو ديك معقوله تكون قصتنا !! طوالي إتذكرت اسم تنزيل الذكرتو لي مرام و قلت معناها الأسامي الكانت مشطوبه هي اسمي أنا و اسم ماهر و اسم منيب و M&M كان مقصود بيها مها و منيب !!؟
أروى قالت لي بتقولي في شنو انتي ؟؟
قلت ليها متذكره الدفتر القديم الكان من ضمن الهدايا الجاتني ؟؟ قالت لي اي مالو ؟؟
طوالي حكيت ليها...
قالت لي وااااي مبالغه ، عليك الله أديني أقراها ، قلت ليها الروايه ضاعت مني في البيت دا بس انا هسي متأكده انو في واحد من أهلي دساها مني قاصد...
قالت لي طيب ح تواجهي أهلك ؟؟
قلت ليها ما عارفه والله يا أروى ، ما عارفه
المهم قعدت معاي لحد العصر و مشت ، بعدها أبوي جا و قال لي أنا جاهزه ؟؟ عشان حتنزلي جامعه بكرا طوالي ...
طبعاً أبوي مشى قدم لي IT في جامعه خاصه عشان أخلص بسرعه و جاب لي الجدول حقهم ، طبعاً هم سابقني بشهر عديل ، المهم قلت ليهو جاهزه و فعلاً في اليوم البعدو ماهر وصلني لحد الجامعه و قال لي لمن تخلصي اتصلي علي ، المهم سألت عن اسم القاعه لحد ما لقيتها ، المحاضره كانت باديه ف ما عرفت ادخل ولا لا ، أصلا أنا ما لي نفس ف دا كلو ف بس إتراجعت و قعدت جنب القاعه ، بعد مسافه أمي اتصلت علي و قالت لي هاااا محاضرتكم بدت ولا لسه ؟؟
قلت ليها لسه ، قالت لي طيب بالتوفيق ، بعد ما قفلت منها فجأه تلفوني رن و ظهر لي رقم منيب ، من شفتو التلفون وقع من يدي و قلبي عمل شحححح ، بلعت ريقي و إتوترت ، بعد مسافه رفعت التلفون و فتحت الخط ، قال لي كيفك ؟؟
طبعاً غلبني الرد لمن اتذكرت انو معرسني 🥲
قال لي عموماً اتصلت عشان أطمن عليك لأنو ليك أيام غايبه عن المشتل ، برضو ما رديت عليهو ف طوالي قفل الخط ، بعدها طوالي إتصلت على أروى و كلمتها ، قالت لي يا حيوانه حتى بعد ما عرفتي هو شنو عايزا تتجاهليهو ؟! بترفسي النعمه ليه انتي؟!!
قلت ليها ما عارفه يا أروى ، إتلخبطت و ما عرفت اقول ليهو شنو ، قالت لي في الجامعه انتي ؟؟
قلت ليها ايوه مشيت و من أول يوم المحاضره فاتتني ، قالت لي ما مشكله بقرا منيب يحبك زياده و يحتويك و يقعد يقريك 🙈
قلت ليها قر ينفخك ياخ !! انتي مالك الأيام دي ؟؟ قالت لي دي البوره يا بت ....قلت ليها ايوه واضح ، المهم بعد ساعه كدا الدكتور طلع من القاعه و بعدو الطلاب طلعوا ، فتحت تلفوني و شفت الجدول ، لقيت إنو في محاضره تاني بعد ساعه و نص ، ما عرفت أمشي وين ، حسيت نفسي براي في مكان مهجور ، بعد حكاية ربع ساعه كدا تلفون رن ، برضو كان منيب ، ما رديت عليهو بس لمن كتر اتصالاتو رديت ، أول ما فتحت الخط قال لي أنا برا الجامعه تعالي ضروري ، قلت ليهو ليه و في شنو ؟؟
قال لي ما بقدر أقول ليك ، الموضوع ليهو علاقه بأروى صحبتك ، طبعاً قلقت و هو طوالي قفل الخط ....يمكن لو كان ما عرفت انو معرسني كنت ح أتردد و احتمال ما أمشي ليهو بس ما عارفه أول ما عرفت اننا معرسين شبه اتلاشى خوفي منو و بقى في شوية اطمئنان ناحيتو بدليل اني طوالي طلعت و مشيت ليهو من دون ما اخاف أو اقول هسي لو شافني زول من أهلي معاهو أو أخاف من نظرة الناس لينا مع انهم ما عارفين علاقتي بيهو شنو بس انا عارفه هو شنو و دا المطمني و المخليني أمشي ليهو عادي قدام كل الناس....
المهم لمن طلعت برا الجامعه لمحتو و مشيت عليهو و كل ما أقرب منو خطوه دقات قلبي بالزيد و الموترني أكتر إنو كان بعاين لي ، ايوه كان لابس نظاره سوداء بس انا حاسه بعيونو علي ، لمن وصلتو قلع النظاره و قال لي : برلومتنا ، منوره والله !!
طبعاً بقيت بكماء عديل ....قلت ليهو بتردد ، أروى مالا ، إبتسم و قال لي ليه متوتره للدرجه دي ؟؟
قلت ليهو قول لي مالا أروى !؟ قال لي أرح ليها و هي بتوريك مالا ، قلت ليهو ثواني و طوالي فتحت تلفوني و إتصلت عليها بس تلفونها كان مغلق ، هنا بالجد خفت ، قلت ليهو قبل شويه كنت بتكلم معاها شنو الحصل ليها فجأه !!
قال لي ما عارف بس يمكن تحكي ليك ، المهم طوالي ركبت معاهو ، أول ما هو دور العربيتو أنا ياداب فهمت !! قلت معقوله أروى تكون ورتو اني عرفت الحقيقه عشان كدا هو جاني طوالي ؟؟؟
ايوه أكيد و لو ما كدا كيف هو ح يعرف اني هنا في الجامعه دي !!
طوالي عاينت ليهو و هو من دون ما يعاين لي قعد يضحك ، قال لي ما تعايني لي بالطريقه دي ، قلت ليهو انت كذبت علي صح ؟؟....شكلك متفق مع أروى و دي حركات منكم ساي ، ما رد علي بس كان بضحك ، قلت ليهو منيييب ياخ لو بتهظروا قولوا لي عندي محاضره انا !!...قال لي محاضرتك متين هي ؟؟
قلت ليهو بعد ساعه و.....قلت ليهو هسي
عاين لي و قال لي يا كذااابه , بعد ساعه صح ؟؟! حلو مع انو الزمن ما كافي بس يلا على الأقل الواحد يبل شوقو شويه....لمن قال لي كدا قلبي عمل شححح ، قلت ليهو سايقني وين انت ؟؟!
قال لي خاطفك...

*سأحبك دوماً و في كل حالاتي ، سأحبك بعصبيتي ، بضيقي ، بغيرتي ، بجنوني ، بعنادي ، بإنزعاجي ، بفرحي ، بحزني ، و في عز إنشغالي ،  سأحبك إلى آخر نفس ، ف أنا أعشقك بقلب لا يمل منك النبض لأجلك و بعقل لا يؤمن بالنهايات 💜*

#مها_حولي