*#قصة_ريدنا《03》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*
فعلاً بديت أفتش ليها شغل من النت ، 3 أيام و نحنا بنشوف في عروض الشغل البتنزل في القروبات و للأسف كلها ما كانت مناسبه ليها ، في اليوم الرابع كنا أنا و هي في المشتل و بنفتش في القروبات و طبعاً كان في رشة مطره خفيفه كدا و الجو رهيب ، شويه كدا جا زبون مشيت ليهو و خليتها ماسكه التلفون ، لمن جيتها راجعه قالت لي في شركه قالت عايزا موظفة إستقبال ، قلت ليها اسمها شنو الشركه دي و موقعها وين و نوعها شنو ؟؟
قالت لي صاحب البوست ما كاتب التفاصيل دي بس منزل رقمو نهاية البوست ، قلت ليها ناس زي ديل أنا ما بثق فيهم خليها ساي و شوفي غيرها ، قالت لي لكن الراتب مغري والله و ح يقضي حوائجنا ، صدقيني الشغل ما بتلقي بالساهل حتى لو عندك شهاده ، قلت ليها غيتو ما مقتنعه والله ، قالت لي دقيقه اتصل في الرقم ، قلت ليها اتصلي و أفتحي الإسبيكر ، قالت لي طيب و فعلاً اتصلت و فتحتو ، قالت ليهو السلام عليكم ، قال ليها و عليكم السلام ، مرحب بيك ، قالت ليهو الرقم دا كان منزل مع بوست بتاع توظيف في قروب () قال ليها فعلاً و أنا صاحب البوست ، قالت ليهو أنا عندي نيه اشتغل بس متخوفه من حتة انو الشركه ما معروفه و نوعها شنو و غيرها من التفاصيل الكتيره الإنت ما ذاكرها في البوست ، قال ليها فعلاً الكلام عن الشركه كتير فأنا بس نزلت طلب التوظيف و العايز يتوظف حيتصل علينا و يستفسر زي ما عملتي انتي هسي ، قالت ليهو طيب نوع الشركه دي شنو و موقعها وين ؟؟
قال ليها شركتنا تجاريه اسمها SGM و هي شركه حديثه يعني ياداب عملناها بشراكه تركيه عندنا فرعين واحد في تركيا و التاني هنا في السودان و تم إفتتاحها قبل شهرين ، هي في بحري المزاد جوار () قالت ليهو اهااا طيب المعاينات متين ؟؟
قال ليها يوم الأحد بإذن الله من الساعه 10 لحد 2 ، قالت ليهو تمام بجي عليكم ، قال ليها أهلا بيك ....المهم بعد ما قفلت قالت لي ها رأيك شنو ؟؟
قلت ليها ما عارفه والله لأنو الراجل دا من صوتو و كلامو باين عليهو محترم و كلامو حقيقه ، قالت لي أمشي يعني ؟؟ قلت ليها قولي نمشي لأني ما ح أخليك تمشي براك ، المهم إتكلمنا شويه في الموضوع دا بعدها طلعنا و مشينا قعدنا عند خالتو إخلاص و عملت لينا أجمل جنبه و قعدت تونسنا ، بعد شويه كدا خالتو إخلاص قالت : الليله مالك قاعد بعيد هناك ؟؟
لمن إتلفتنا اكتشفنا انها بتتكلم مع الضابط داك الإسمو منيب ، قال ليها زهجان بس ، ضحكت و قالت ليهو تعال تعال ، قام من كرسيهو البعيد و جا قعد قصادنا بس ما سلم علينا و بالجد الضيق كان باين عليهو لأنو ما معودنا انو ما يسلم علينا رغم اننا ما بنعرف بعض شديد ، خالتو إخلاص قالت ليهو اصبر هسي بظبط ليك جبنه تعدل مزاجك ، أروى قالت ليهو شنو يا حضرة الضابط منيب ما شايفنا ولا شنو ؟!
قال ليها مصدع بس ، قالت ليهو مصدع ولا متشاكل مع زولتك ... طبعاً أنا نططت عيوني و إتلفت عليها ! ما معقوله تقول ليهو كدا و نحنا يادوب بنعرفو !! خالتو إخلاص ضحكت و قالت ليها يمكن ، طبعاً شكلو اتضايق زياده من كلامها و المشكله انو الغبيه لسه شغاله تتكلم معاهو و تقول ليهو يلاااا اعترف اعترف ، متشاكل معاها صح ؟؟
من دون ما زول يشوفني قرصتها في يدها و هي الفضيحه صرخت و قالت لي مالك ياخ ! أديتها عين كدا عشان تفهم بس هي عملت نفسها غبيه ، جنابو قال ليها لا لا ماف كلام زي دا ، قالت ليهو يعني أمورك معاها تمام التمام ؟؟
قال ليها انتي ليه مصره إنو عندي حبيبه ؟؟ قالت ليهو لأنو دا بقى الطبيعي ! بعدين مستحيل واحد زيك ما يكون عندو حبيبه ، قال ليها زيي كيف يعني ؟مالي أنا هسي ؟؟
حسيتها حتقول ليهو انت سمح و شنو ما بعرف و تقعد تتغزل فيهو عشان كدا استعجلت و قلت ليها أروى نسينا المشتل ، يلااا أرح سرعه ! مالت شويه كدا و عاينت للمشتل و قالت لي ما جاهو زول يا بت و بعدين هو قريب مننا لو جا زول حنشوفو ، قلت ليها طيب ثواني عايزاك تشوفي حاجه مهمه ، قالت لي شنو هي ؟؟ قلت ليها دقيقه بس ، فتحت تلفوني و دخلت في النوته و كتبت ليها عليك الله يا أروى اسكتي و ما تفضحينا قدام الراجل ، ناولتها التلفون و الغبيه مسكت التلفون و قالت : عليك الله يا أروى اسكتي و ما تفضحينا قدام الراجل !!
طبعاً قرت الكلام بصوت عالي و بسرعه عشان كدا ما قدرت أوقفها 😭😭المشكله انها ما فهمت إلا بعد ما انتهت من قراية الكلام و استيعابو !! خالتو إخلاص دي ماتت من الضحك حتى الناس القاعدين جنبنا ضحكوا ، شكلهم كانوا مركزين معانا ، طبعاً ختيت يدي على خدي و بقيت أعاين ل أروى بس و هي شغاله لي معليش معليش ما ركزت ، قلت ليها بصوت واطي خلاص اسكتي ياخ ، قالت لي طيب ، لمن إتلفت منها لقيت الإسمو منيب داك بعاين لي ، أروى طبعاً ما بتفوت حاجات زي دي و بقت تعاين لينا الإتنين و تضحك لحد ما هو انتبه على نفسو ، قالت ليهو انت مشبها على زول ولا شنو ؟؟
قال ليها منو ؟؟
قالت ليهو و هي بتضحك : الكنت بتعاين ليها من قبيل دي ، حسيتو اتحرج ، قال ليها لا ما كدا و أساساً ما كنت بعاين ليها ، كنت بعاين للشفع الوراكم ديلك ، قالت ليهو اهاااا شكلك بتحب الشفع .....قمت على حيلي و قلت ليها أروى خلينا نمشي بعد دا !! جرتني من يدي و قعدتني و قالت لي خلاص والله بسكت مدام انتي متضايقه و ما عايزاني أزعجو عشان قال مصدع..... طبعاً أروى دي أنا وااااي منها !!
قعدت و بالجد زعلت منها لأنها قالت كدا قدامو و اتجاهلت فكرة اني من قبيل بحاول أسكتها و أوقف البتعمل فيهو دا ، خالتو إخلاص قالت لي شكلك زعلتي يا بتي ، قلت ليها لا ما زعلت مع إنو الزعل كان باين علي ، أروى قالت لي صحي ؟؟ ما رديت عليها و طول القعده ما إتكلمت ، الزاد ضيقي زياده إنو الإسمو منيب داك كل مره كنت بلمحو بعاين لي ، لمن نظراتو ضايقتني طوالي قمت و مشيت المشتل و أنا بالجد ما قادره افهم هو ليه بعاين لي بالنظرات الخاليه من أي تفسير دي !؟ يعني نظراتو ما نظرات إعجاب ولا نظرات خباثه ! بحس بيهو ساي كدا بحب يعاين لي من دون سبب !!
بعد شويه كدا أروى جاتني داخله لقتني ببيع لزبون ، بعد ما مشى قالت لي إنتي زعلانه ؟؟
ما رديت عليها إتحركت من جنبها وبقيت أسقي في الشتلات ، تاني لحقتني و قالت لي والله ما قصدي أزعلك ! آسفه والله بالرغم من إني ما عارفاك زعلانه من شنو بالظبط !!
قلت ليها ما عارفه !؟ يا أروى جنابو داك من جا قعد قصادنا و أنا بحاول أسكت فيك و انتي فاهماني كويس بس متجاهلاني و عامله نفسك رايحه ، ما كدا و بس انتي كنتي قاصده توصلي ليهو معلومه لمن قلتي لي :"خلاص والله بسكت مدام انتي متضايقه و ما عايزاني أزعجو عشان قال مصدع".... عارفاك ناويه توصلي ليهو شنو و أنا ما حبيت الحركه دي يا أروى و هو أكيد بكون فكر فينا بطريقه ما كويسه و مؤكد حيكون شايفك بت خفيفه ، أنا عارفاك كويس و عارفه انتي شنو و عارفه انو البتفكري فيهو طوالي بتقوليهو بتلقائيه و سذاجه بس ما كل الناس بتعرفك و ما كل الناس حتشوفك زي ما أنا شايفاك ، قالت لي طيب معليش شديييييد شديييد يا قلبي ، قلت ليها طيب حصل خير بس ما تعملي كدا قدامو تاني ، قالت لي بحاول ، قلت ليها أرررروى !! قالت لي خلاص خلاص ! المهم عدينا يومنا و قفلنا المشتل و طلعنا و نحنا في المواصلات قلت لأروى انا ما عارفه ليه هو دائماً بعاين لي كدا !! قالت لي يختي شكلو وقع في غرامك ، قلت ليها على فكره جاده أنا ، قالت لي اممم ممكن يكون مشبهك مثلاً على وحده كان بحبها زمان و يمكن هي ماتت أو انفصلو و انتهت قصتهم بس لمن شافك ذكرتيهو بيها و عاودو الحنين ....عاينت ليها و سكته ، قالت لي لكن احتمال انو حباك دا أكتر احتمال منطقي و وارد ، قلت ليها ماف زول بحب زول من اول نظره أو موقف ، قالت لي لا في ، في ناس اول ما تشوفهم أو تتكلم معاهم بتحبهم ، قلت ليها دا ما حب ، دا إعجاب ، يمكن طريقة الكلام أو الجمال الخارجي أو أسلوب التعامل أو الذكاء يكون سبب في إعجاب شخص بشخص بس ما حيكون حب والله ، لأنو الحب ما بجي بسهوله ولا يمكن يكون من أول نظره أو اول لقاء ، الحب بحتاج فتره طويله تكون فيها شفت محاسن و عيوب الزول دا ، تكون شفتو في كل الحالات البكون فيها ما منتبه على شكلو الخارجي زي مثلاً لمن يكون ببكي أو زعلان أو بصرخ أو لابس لبس بيت أو أو أو...يعني في كل الحالات البكون فيها على طبيعتو من غير أي إضافات تجميليه أو تصنع ببساطه لأنو الحب هو حب الروح و الطبيعه و غير كدا إعجاب ساي....
متذكره سارا الكانت ساكنه جنبنا صح ؟!كانت جميله جمال مبالغ و حتى الجا خطبها كان وسيم و مناسب ليها بس مع ذلك ما كملوا مع بعض و هو خلاها في النهايه رغم إنو جمالها كان فاتن و فايت الحد بس دا كلو ما شفع ليها و ما كان سبب كافي يخلي خطيبها يكمل معاها ، هو ما كان بحبها كان معجب بجمالها و يمكن في فترة الخطوبه اكتشف فيها صفات و حاجات كتيره أقنعتو أنها ما حتنفع تكون زوجتو و شريكة حياتو ، لأنو في حاجات رئيسيه مهمه في كل علاقه ، الجمال مطلوب بس هو براهو ما كفايه ، قالت لي بس ماف تفسير لنظراتو غير كدا ، قلت ليها يحب فيني شنو !؟ و نظراتو ذاتا ما نظرات إعجاب عشان كدا أنا محتاره فيهو !! بس المره الجايه طوالي ح اسألو عشان ما يقعد يوترني بنظراتو دي ، ضحكت و قالت لي كذابه والله ، قلت ليها بتشوفي ...المهم مرو 3 أيام و هو تاني ما ظهر ، في اليوم الرابع يلي هو يوم الأحد جهزت نفسي عشان أمشي مع أروى ل الشركه الح تشتغل فيها ، المهم هي إتصلت عليهو و تاني وصف لينا موقع الشركه ، لمن وصلنا بحري و المنطقه الفيها الشركه قعدنا نسأل عنها و كلهم قالوا ما بعرفوا شركه بالإسم دا ، صراحة خفت و قلت لأروى خلينا نرجع أنا ما مرتاحه للشركه دي ، قالت لي بعد ما وصلنا ! خلينا نمشي و نتأكد ، قلت ليها نمشي شنو انتي ما سامعه الناس بتقول في شنو ؟! قالوا ما بعرفوا شركه بالإسم دا !! قالت لي عادي هي شركه جديده طبيعي ما تكون معروفه ....المهم مشينا و لفينا كدا و دخلنا بالشوارع الداخليه لحد ما وصلنا المكان الوصفو الراجل لينا ! وقفت و قلت لأروى معقوله دي شركه ؟؟! دي ما شركه دي شقه !؟
بلعت ريقها و قالت لي بس معظم الشركات في السودان بتكون كدا ، يعني ذاتو ماف شركات ضخمه كدا و بناها المعماري ممتاز و بشبه الشركات ، قلت ليها لا لا أرح نرجع بس و طوالي جريتها من يدها ، هي ذاتا خافت عشان كدا مشت معاي من دون ما تقاوم و نحنا ماشين كدا تلفونها رن ، قالت لي دا الراجل ذاتو ، قلت ليها ردي و أفتحي الإسبيكر ، فعلاً عملت كدا بعد ما قال ليها السلام عليكم سألها انتي وين و اذا جايه ، عاينت لي و قالت ليهو بتردد ا ا أنا...قاطعها و قال ليها يا أخت سألتك جاوبيني عشان لو ما جايه نقبل غيرك ، شلت منها التلفون و قلت ليهو هي ما جايه ، خلينا الشغل ، قال لي تمام و قفل الخط ، أروى كل ملامح اليأس و الإحباط اجتمعت في وشها ، قلت ليها حنلقى الأحسن منو ، بعدين الشغل دا ذاتو ما مضمون ، و الله أعلم كان ح يحصل شنو لو دخلنا ، المهم مشينا ركبنا المواصلات و أروى طول الطريق ساكته و أنا ماسكه التلفون و بفتش ليها في شغل ، طبعاً هي خريجة إدارة أعمال ، لفتها علي و قلت ليها بقيتي تحبي الدراما زي عيونك ! يا بت يا أروى هسي شنو البزعل قدر دا !!؟ من متين انتي بتشيلي هم كدا و بتضيقيها على نفسك ! قالت لي براك عارفه وضع البلد و عارفه انو الشغل ما بتلقي بالساهل حتى لو عندك شهاده ، الشغل بقى واسطات بس غير كدا لا ، قلت ليها ربنا كريم ، المهم وصلنا إفريقيا ، نزلت إشتريت كذا حاجه من فواكه و خضروات ، لمن وصلنا الحي ، مديت ليها نص الأكياس ، قالت لي دا شنو دا ؟؟ قلت ليها انتي شايفاهم شنو ؟! قالت لي يا بت هيييي نحنا ما شحادين ، ضحكت و قلت ليها خلي العواره ، و بعدين ديل ما ليك انتي ، ديل ل عمو الطاهر لأنو مريض ، يعني انتي مااااف ليك ، قالت لي مها.....قاطعتها و قلت ليها من متين نحنا بنتعامل برسميه ؟! مش بيتنا ياهو بيتكم و بيتكم بيتنا ؟!! من متين بس يا أروى نحنا ما بنرضى نشيل حاجه من بعض !!؟ ناسيه اني بجي آكل معاكم عادي لمن ناس البيت يكونوا عاملين حاجه ما عاجباني ؟!حصل اتحسست أو اتعقدت منكم ؟!
قالت لي ما حصل يا مها لكن ....قلتها ليها يا زوله لا تتأثري لا تضايقي نفسك و الظروف الصعبه دي ماره بينا كلنا و انتي عارفه كدا كويس ، حصلت فتره أبوي شغلو وقف و ماهر أخوي كان انفصل من شغلو القديم بسبب نقاش و وضعنا كان صعب مع ذلك اتصرفنا عادي و مشينا حالنا بالشويه الموجود و حالياً برضو بعد مرات بتحصل لينا ظروف بس خالص ما بنشيل هم و أصلاً دا حال الدنيا يوم ليك و يوم عليك ، حضنتني و قالت لي حبييييبتي والله ربنا يحفظك لي ، قلت ليها خلاص خلاص فكيني ياخ نحنا في نص الشارع 😂
المهم رجعت البيت و أنا شايله هم أروى لأني عارفاها كويس كيف بتخاف على صحة أبوها و أخوانها ، هي رغم أنها بت فرفوشه و نقناعه و بتحب تضحك و تضحك الناس إلا أنها قدام وضع أهلها بتكون ضعيفه شديد و بتشيل نفسها هم لأنها حاسه انها لازم تقدم ليهم أكتر من كدا بحكم انها كبيرة البيت ، طبعاً هم 4 بنات و ولد واحد ، أروى هي الكبيره بعدها أريج يلي حالياً في تانيه جامعه ، بعدها آمنه في تالته ثانوي ، بعدها أميره في تامن و آخر واحد أمير في سادس ، طبعاً أختها أريج الفي الجامعه دي برضو حاولت تشتغل بس أبوها و أروى ما سمحوا ليها لأنها ما حتقدر تقرا و تشتغل في نفس الوقت خاصة أنها شغاله جامعه في معظم أيام الأسبوع ، المهم مع المغرب كدا كنت قاعده مع أبوي و بنتابع في الآخبار و بنتناقش فيها ، شويه كدا ماهر جا داخل ، سلم علينا و قعد ، مشيت أجيب ليهو مويه و لمن جيت راجعه لقيت أبوي مشى يصلي ، أديتو مويه و قعدت ، بقيت أعاين للشاشه لكن بالي مشى حته تانيه ، ماهر كب مويه شويه في يدو و رشاني بيها في وشي ، انتبهت و قلت ليهو مااااهر ياااخ !!! قال لي سرحانه وين ؟؟؟!
قلت ليهو بفكر في أروى ، قال لي ليه مالا أروى ؟؟
قلت ليهو قالت عايزا تشتغل و لحد الآن ما لقينا ليها شغل و الحاجه دي مضايقاها خاصة أنها شايله هم ناس البيت ، قال لي بشوف ليها شغل ، قلت ليهو آي عليك الله ، فجأه مرام جات داخله و قالت ليهو دي منو دي العايز تشوف ليها شغل ؟؟
قال ليها وحده و بس ، قالت ليهو اسمها منو الوحده دي ! خت كباية المويه و قال ليها بزهج و بعدين معاك يا مرام !! ياخ مالك انتي قاعده لي زي شوكة الحوت ، الواحد تاني أحسن ما يرجع البيت دا عديل و طوالي وقف على حيلو و طلع و هي رجعت غرفتها ، أبوي جا داخل و قال لي ماهر دا مالو طالع زهجان كدا ! قلت ليهو ياهو البحصل كل يوم ، أمي جات و قالت البت دي ذاتا حيرتنا معاها ، مالا بقت عدوانيه كدا و مكره الولد و معدماهو العافيه !! قلت ليها بكون الحمل متعبها شديد ، المهم خليهم يحلوا مشاكلهم براهم ، أبوي قال لي إلا كدا نعمل شنو غير كدا !! أمي قالت لينا نشوفها بعد تولد جنها الجاها دا ح يختفي ولا ح يقعد عشان أعرف اتصرف ، أبوي قال ليها لا خليها ، راجل و مرتو ، يتشاكلوا و يحلوا مشاكلهم براهم و لاحظي ماهر لحد اللحظه ما شكى لينا منها و ما لمح انو عايز يطلقها أو يتخلص منها ف بس اعملوا نفسكم طرش و عميانين ، أمي قالت ليهو ماهر ح ينجبر يسكت لأنو هو الإختارها و أصر عليها ، ناسي عمل شنو و زعل مننا كم مره عشان يعرسها ؟!! و بعدين يشكي لينا شنو و نحنا برانا شايفين و سامعين ؟!!
طبعاً أنا دا كلو ما متذكراهو ، و ما عارفه بداية مرام و ماهر أخوي كانت كيف ، البسمعو من أمي و الناس ياهو البعرفو ، المهم خليتهم بتكلموا و مشيت صليت المغرب و قعدت في غرفتي ، شويه كدا حماده جاني داخل ، قلت ليهو ما عندي ليك أي حلاوه ، قال لي جاي أقعد هنا ساي و فعلاً جا و قعد في طرف السرير و كان زعلان ، قلت ليهو أمك ضربتك ولا شنو ؟
هز لي راسو بمعنى لا بس عيونو كانت مليانه دموع ، مشيت حضنتو و بستو و قلت ليهو معقوله ما توري عمتو المزعلك شنو ؟؟
قال لي ماما دي ليه دائماً بتنبذ بابا و بتشاكلوا !؟ قلت ليهو عادي ، أمك حالياً عيانه و الحمل متعبها عشان كدا مرات بتزعل و بتنفعل بس انت ما تزعل ! قال لي هم ليه دائماً بتشاكلوا ....لمن قال كدا دموعو نزلت ، فهمت إنو مرام أكيد جوه غرفتها بتكون نبذت ماهر أخوي قدام حماده و بقت تشتم فيهو عشان كدا حماده زعل ، حضنتو زياده و مسحت ليهو دموعو و قلت ليهو هسي أنا و انت مش بنتشاكل برضو ؟ و كمان أنا و ماهر أخوي مش برضو بنتشاكل ؟؟
قال لي انتوا لمن تتشاكلوا بتضحكوا مع بعض بس ماما و بابا بصرخوا بصوت عالي و ما بطيقوا بعض ..... طبعاً كلامو حنني عليهو والله ، بقيت أحنس فيهو و اتكلم معاهو مسافه لحد ما نعس ، رقدتو في سريري و بعدها طلعت عشان اشوف ماهر رجع ولا لسه بس لقيتو ما جا ، صليت العشا و رجعت غرفتي و نمت جنب حماده.....
*رائعة هي و سارقة قلبي من أول نظرة و دقة قلب ، جميلة للحد الذي جعلني أفكر بها حتى و أنا غارق في إنشغالي 💜*
#مها_حولي ط
