قصة ريدنا

16

*#قصة_ريدنا《16》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
طبعاً كلهم بقوا مخلوعين ! بقيت ببكي بس و بقول ليهم ليه تكذبوا علي المده دي كلها ...
ماهر بعد مسافه قال لي القال ليك منو ؟؟
قلت ليهو ما ضروري تعرف المهم إني عرفت و خلاص ، طوالي هو و أبوي عاينوا لأمي ، قالت ليهم واحة الخلقني ما حصل جبت ليها سيرة الموضوع دا ، مياسم قالت ليهو ولا أنا .... طبعاً استعجلت و قلت ليهو ماف زول منهم حكى لي ، براي عرفت.... طبعاً قلت كدا عشان ما يسألوا مرام ، أبوي قال لي هو القال ليك كدا ؟؟!
قلت ليهو المهم اني عرفت ، أبوي قال لينا تعالوا جوه ، أول ما دخلنا الصالون ، أبوي قال لي بس عايز أعرف هو قال ليك شنو و بعدين انتي أساساً لقيتيهو وين ؟؟
قلت ليهو قال لي الحقيقه الكنتوا مجتهدين عشان تدسوها مني ، كلهم سكتوا ، ماهر مسح وشو بيدينو و قال لي تمام دي الحقيقه ، بس سؤال ، هو قال لي انو كان معرسك بس ما قال ليك شنو الوصلكم ل هنا ؟؟؟
طبعاً أنا الحاجات دي راحت مني رغم انو مرام حكت لي كل شي بس ما سألتو عن حاجه ، يمكن عشان من البدايه قال لي حالياً ما تسألي عن حاجه و كل شي ح يوضح مع الزمن ، هديت نفسي شويه و مسحت دموعي و قلت ليهو قال لي ...
أمي قالت لي : قال لي إنو أمو و أختو و خالتو و مرة أخوهو قربوا يجننوك ؟؟ قال ليك أنهم خلوك تطلعي الشارع حفيانه و انتي ما واعيه لنفسك ؟؟
طيب حكى ليك عن الكوابيس و الرعب العشتي فيهو ؟! قال ليك انهم كانوا بربطوك و قالوا للناس إنك مجنونه و طلعوا فيك إشاعات ؟؟
طبعاً كلهم بدوا يتكلموا و يحكوا لي عن العشتو و أنا ببكي بس ، حكوا لي تفاصيل مؤلمه شديد لدرجة إنو أمي و مياسم قعدوا يبكوا معاي و ماهر و أبوي بالعافيه ماسكين دموعهم ، في النهايه أبوي قال لي بعد دا كلو عايزانا نرجعك ليهو ؟؟! أمي قالت لي عشان تعرفيهو اناني و ظالم كيف ، لحد اللحظه دي ما ناوي يطلقك ، معلقك كدا و هو بهناك عايز يخطب ، دمروا حياتك الله يدمرهم ، لا فشلوا ليك عرسك و دراستك ، كان باقي ليك سنه و تتخرجي بس شوفي هسي انتي وين و كيف ، حسبي الله ونعم والوكيل فيهم محل ما يقبلوا و ربنا ينتقم منهم و يحرق قلوبهم أكتر و أكتر ، شاحده ربي لو عاشوا ما يرتاحوا و لو ماتوا ما يرتاحوا ، في كل صلاة بدعي عليهم ، في سنتين بس دمروا حياتك كلها ، الله يدمرهم ، مياسم قالت لي الزول دا فقر خلاص و مهوس بحاجه اسمها تملك و مغرور كمان و حتى لو قنعان من حاجه ما بفكها عشان كدا ما راضي يطلقك عشان تشوفي حياتك مع غيرو.......
طبعاً قعدت أبكي ساي و بعد الكلام القالوهو لي صورة منيب بهتت قدامي و بالجد حسيت انسان ظالم و اناني و بحب يفرض سيطرتو و إتذكرت كيف انو كان بحاول يسيطر علي بحكم إنو بخاف علي و بغير و كيف زعل مني لمن ما رديت على مكالماتو عشان يحسسني بالذنب و يتم سيطرتو علي و يمشيني كيف ما عايز...
البكى البكيتو في اليوم داك ما أظن بكيتو في حياتي كلها ، قلبي كان واجعني شديد و حسيت نفسي ضاق ، حسيت زي ما عيوني بتنزل دموع ، قلبي بنزف دم ، في اليوم داك بكيت لمن دموعي خلصت ...أهلي كان واقفين معاي و يشيلوا و يضموا فيني و يطبطبوا لحد ما دموعي خلصت و البكى غلبني ، أمي و مياسم و مرام قعدوا معاي في غرفتي لحد الساعه 10 م ، كنت راقده في رجلين أمي و بقول ليهم أحكوا لي لسه ، عايزا أعرف أكتر ، و هم مع كل كلمه منهم قلبي بتقطع بس مع ذلك كنت مصره أسمع اكتر و أخلي قلبي يوجعني زياده ، لأنو الحار بداوي الحار 💔
وسط الوجع دا كلو نمت بعد مسافه ما صحيت إلا تاني يوم ، لقيت شنطتي في السرير و تلفوني برن ، لمن طلعتو زي ما إتوقعت دا هو ، ما رديت عليهو و طوالي قفلت تلفوني ، مشيت اتسوكت و صليت و مشيت لناس أمي عشان أشرب معاهم الشاي ، طبعاً أبوي و ماهر مشوا الشغل ، لمن قعدت أمي قالت لي الغلط غلطي مفروض من يوم لقيت الدفتر داك في غرفتك و عرفت الفيهو كان أجي و أحكي ليك و أنبهك منو...
طبعاً لمن قالت كدا رفعت راسي و قلت ليها يعني انتي الشلتيهو ؟؟!
قالت لي اي شلتو و لمن قريت بدايتو قايلاها روايه عاديه رغم اسم الكريها صحبة تنزيل كان مذكور لكن ما ركزت ماهو و قلبت الصفحات قلة شغله مني ساي ، و قريت الصفحات النهائيه و لقيتها مشابهه للحصل ليك ! معظم المواقف الحصل ليك كانت مكتوبه في الدفتر ! الخلاني اشك في الموضوع انو منيب الفتره ديك ظهر تاني و كان متواجد حولينا و كل مره أبوك لمن يلاقيهو يتناقش معاهو في موضوع الطلاق ، المهم فهمت إنو هو الجاب ليك الدفتر دا بس ما كنت متأكدة جابو ليك كيف ، رسلو مع زول ولا جاك بنفسو ! قلت لو جاك بنفسو و سلمك ليهو ح يحكي ليك و انتي ذاتك ح تسأليهو دا شنو و لو حكى ليك كنتي جيتي و كلمتينا ، عشان كدا احترت و بقيت أسألك الشغال معاكم في المشتل منو و كانت محاوله مني عشان اسأل إذا في زول قاعد يجيكم ....المهم كلمت أبوك و قلت ليهو منيب دا شكلو لافي حولينها ، أبوك طوالي اتصل عليهو و قال ليهو خليك بعيد عن بتي و تاني ما عايز منك شي غير ورقتها....مياسم قالت ليها يا أمي انتوا ما تمشوا المحكمه و تنهوا القصه دي كلها ....قالت ليها أنا ذاتي قلت كدا لأنك المحكمه ما ح تطلقهم بسهوله خاصة انو ما موافق و غير كدا ح يسألونا عن سبب الطلاق و امو و اخواتو مستحيل يعترفوا أنهم عملوا ليها حاجه و غير كدا اساسا المحكمه ح تسأل إذا في ضرر واقع عليها من الزوج تحديداً و صراحة هو ما حصل غلط عليها بس اهلو كعبين و هو ما قدر يوقفهم عن حدهم و غير كدا ما تنسي إنو ضابط و قدر ما شكيناهو و دخلنا معاهو محاكم ح يطلع منها عادي و عنادو ح يزيد ، مياسم قالت ياخ هو مالو كريه كدا.؟!!....
المهم قعدوا يتكلموا عنو و أنا من خلال كلامهم دا اتأكد انو بالجد انسان بحب يسيطر و بس و هو ما بحبني ولا شي بس عشان شايفني حاجه ملكو ما عايز يطلقني و الواجعني انو ما حاول يعمل أي شي لمن أهلو غلطوا في حقي و عيشوني في جحيم حسب كلام أهلي ، مياسم قالت لي طيب انتي لمن عرفتي ليه ما جيتي سألتينا ؟؟ قلت ليها لأنو طلب مني ما أحكي ليكم ، مرام قالت لي عشان عارف اننا ح نعترض و ح نقول ليك الحقيقه و نفضح أهلو قدامك و دا الما كان عايزو هو ، شكلو كان ناوي يعلقك فيهو عشان بعدين تقيفي معاهو ضد أهلك و تصري عليهو ، مياسم قالت ليها فعلاً شكلو كدا...
في اليوم دا كان عندي جامعه بس ما مشيت ، هو كان بتصل علي بس حلفت ما أرد ، لمن دخلت الواتس لقيت مرسل لي كميه من الرسائل برضو ما قريتهم ، لمن لاحظ اني متصله الآن ، رسل لي : ليه ما بتردي علي ؟؟
برضو شفت الرساله من برا بس ما دخلت الدردشه ، تاني رسل لي و قال لي ما تبوظي لي أعصابي ، قولي في شنو ؟؟؟!
برضو ما رديت عليهو ، اتصل علي بس كمان ما رديت و في الآخر قفلت التلفون ....
في اليوم البعدو ماهر وصلني الجامعه و قال لي اول ما تخلصي تتصلي عليك و إياك تدي فرصه للحيوان داك عشان يتكلم معاك و يلعب بعقلك ، نحنا ما عايزين شي غير مصلحتك ، و العملوهو فيك عمرنا ما ح ننساهو ليهم ، قلت ليهو طيب و طوالي مشيت دخلت الجامعه و بديت المحاضره ، بعد ما خلصت ، فتحت تلفوني ، لقيت مكالمات من أروى و كميه من منيب....رجعت لأروى ، بعد ما سلمت علي قالت لي في شنو يا مها مالك مع منيب ؟؟ قلت ليها جا شكى ليك ولا شنو ؟؟ قالت لي في شنو ؟؟ لحد أمبارح كنتوا كويسين ؟؟
قلت ليها ماف شي بس انا خلقتو دي ما عايزا أشوفها ، جاني صوتو و بقول لي ممكن تفهميني في شنو ؟؟
طبعاً إتخلعت !!..
بلعت ريقي و قلت ليهو بس كدا ، ما حابه أشوفك تاني و ياريت ياريت ما تتصل علي ، قال لي بزهج : فهميني انتي في شنو ؟؟
قلت ليهو أنا بكرهك و خلاص و أساساً إنسان اناني و مغرور و ظالم زيك ما بنفع معاي و الأيام الفاتت دي اعتبر اني كنت عايزا اتسلى بس و أطلع مشاوير و بس و ما أنسى ، ياريت ترسل لي ورقة طلاقي.....قال لي شنو ؟؟
قلت ليهو زي ما سمعت ، عايزا أتطلق أنا ، قال لي مها براحه براحه ممكن تفهميني الحاصل عليك شنو ؟؟ أمبارح مش كنا كويسين ؟؟
سكته ما رديت بس عيوني إتملت دموع...
قال لي بتكلم معاك أنا ردي !...قلت ليها انت ما بتفهم ؟؟ قلت ليك بكرررهك و انت بالنسبه لي ما كنت ولا شي و زي ما قلت ليك كنت عايزا اتسلى بس و خلاص قنعت و عايزاك تطلقني....
قال لي : طلاق ما بطلق ، سمعتيني !!
قعدت أبكي و قلت ليهو حرام عليك ياخ ، عايز مني شنو انت ، عملت ليك شنو أنا عشان تعلقني كدا و ما ترضى تديني حريتي عشان اشوف حياتي.....قال لي حياتك معاي أنا ، أنا و بس و الطلاق دا شيليهو من بالك و تقريباً فهمت الحصل و كلامي دا وصليهو لأهلك : طلاق ماااا بطلق
قال كدا و طوالي قفل الخط في وشي ، بكيت زياده و من مكاني داك مشيت البيت و أنا ببكي ، ناس أمي اتهجموا طبعاً ، مياسم قالت لي مالك في شنو ؟؟
حضنت أمي و بكيت فيها و قلت ليها قال ما بطلقني ، قالت لي لاقاك وين كمان ، طوالي حكيت ليها ، مرام قالت لي و أروى دي حاشره نفسها ليه ؟؟ يعني هي عارفه قصتكم ؟؟؟!
قلت ليها آي عارفه ....قالت لي اهااا يعني مشيتي و حكيتي ليها الكلام القلتو ليك عن منيب و انو معرسك و كدا صح 😡
طبعاً مرام ما كانت منتبه على كلامها ، أمي قالت ليها يعني دي انتي الحكيتي ليها ؟؟!.
مياسم قالت ليها مش أمي منبه انو ماف زول يجيب ليها سيره لحد ما يلقوا حل لموضوع الطلاق دا !!
مرام قالت ليهم هي الأصرت علي عشان أحكي ليها ...أمي جاطت فيها و مرام قعدت تبكي بس ، قلت لأمي هي ما ليها ذنب أنا الخليتها تحكي لي...
المهم المساء لمن جا و ناس أبوي جوا راجعين ، مياسم كلمتهم بالحصل و ورت ماهر إنو مرام هي القالت لي ، قلت لي مياسم ما كان تجيبي سيرة مرام ، قالت لي هسي لو كان دي هي كان عملت لينا موضوع طويل ، لمن تغلط ما بتعيب نفسها لكن لو زول غيرها غلط بتكرهو حياتو ، المهم ماهر اتجادل مع مرام و هي رفعت صوتها عليهو و قالت ليهو أنا ما غلطانه مش براها قالت عايزا تعرف !! انا ناديتها و قلت ليها تعالي أحكي ليك ؟؟ و بعدين كدا كدا هي كانت ح تعرف بس المشكله انو عرفت مني عشان كدا كلكم جاين تتهجموا علي ، أبوي قال ل ماهر خلاص الحصل حصل و ما مهم عرفت من منو...
المهم في نفس اليوم دا منيب اتصل علي ، قلت ح أرد و اسمعو كلام زي السم و أكرهو فيني و أخليهو براهو يطلقني ، أول ما فتحت الخط ، قال لي هم جملتين و استوعبيهم كويس ، أول جمله إنو اليوم انا مسافر مأموريه ، تاني جمله إنو أول ما أجي راجع ما حيكون عندك قعده تاني في بيت أهلك و نشوف منو البقدر يمنعني ، ياهو كلمتك ....قلت ليهو بالجد أثبت لي انك انسان أناني و مريض ....قال لي ايوه انا اناني و مريض بالحاجات البحبها ، ما كنت عايز اتعامل كدا بس انتوا الجبرتوني ، قال كدا و طوالي قفل الخط في وشي 💔
رجعت أبكي تاني لأني تايهه وسط الجوطه دي كلها ، من جهه هو و حبي ليهو و من جهه تانيه أهلي و كلامهم عنو و عمايل أهلو ، ما عارفه الصح شنو و مفروض أعمل شنو ....شلت ليلي داك كلو بكى ...بس بعدها أخبارو إنقطعت و بقى لا برسل لا بتصل ، قلت عشان سافر ...
عدة فتره بتاعة شهر كدا و نحنا في البيت شبه اتناسيناهو و بقينا ما بنجيب سيرتو تاني ... أما الإمتحانات رغم اني بكره القرايه ، بس كل ما أتذكرو ، بضغط نفسي و بقرا و بقول أهلو دمروني مره و بسببهم ما كملت بس المره دي ح أكمل و لو ما عشاني ف عشان أهلي ، المهم الإمتحانات عدت في الشهر داك و كان فيها الصعب و الكويس ، بعد اسبوعين من مرور الشهر ، يوم بعد ما طلعت من الجامعه لقيت الزمن لسه بدري ، كنت زهجانه و مخنوقه ف قررت أمشي لأروى في الشركه ، طبعاً أروى ماهر أخوي اتكلم معاها و قال ليها خليك بعيده عن الحاصل دا كلو و إياك تحاولي تجيبي منيب ل مها ، شاكلها لمن بكت و طول الشهر داك بقت ما بتجي بيتنا بس علاقتي بيها زي ما هي و أنا اعتذرت ليها بالنيابه عن ماهر ، المهم مشيت ليها في الشركه ، كانت شغاله و جنبها كميه من الملفات ، قلت ليها ح أساعد فيهم ، بس قولي لي أعمل شنو ، قالت لي انتي براك مكتئبه و قافله معاك ، جايه تكتئبي زياده ؟؟ قلت ليها اي عشان الإكتئاب الجواي دا يكمل كلو ....قالت لي ما ح يكمل أو ينتهي إلا إذا رجعتي ل منيب ، قلت ليها أروى رجاء....قاطعتني و قالت لي انتي بتحبي منيب و هو كمان بحبك أضعاف حبك ليهو و مهوس بيك عديل و مستعد يحارب العالم دا كلو عشانك ، على الأقل لو ما قدرتي تقيفي ضد أهلك عشانو ما تحاربي ضدو ، قلت ليها أهلي ما عايزين شي غير مصلحتي و هم أدرى بالحصل لي في بيت نسابتي و هم عارفين تفاصيل الحصل كلو عشان كدا ليهم الحق يقرروا نيابة عني و كل شي يشوفوهو مناسب أنا موافقه عليهو ، قالت لي يعني منيب ذنبو الوحيد انو بحبك و متمسك بيك ؟؟
قلت ليها انتي ليه واقفه في صفو ؟؟بتعرفيهو يعني ؟؟
قالت لي ما بعرفو معرفه قديمه بس انا بقيف مع الحق ، لنفترض انو اهلو كعبين انتي بتقدري تشترطي عليهو إنو يسكنك بعيد عنهم و هو ذاتو ما اظنو تاني يخليهم يقربوا منك ، قلت ليها أروى انتي ما مستوعبه الحكيتو ليك ؟؟
عادي تأذي الزول من دون ما يكون قاعد جنبك حتى ، ايوه انا صح ما متذكره العملوهو لي بس قريت كل الأنا كتبتو في الدفتر داك ، كان فيهو جزو من الحصل لي في البيت داك ....يعني اتخيلي اني اول ما أغمض عيوني بس بزول جا واقف جنب راسي و مرات عديل في زول بخنقني و مرات بكون ماشه و ما واعيه على نفسي و مرات بصحى و بلقى كديس أسود نايم جنبي و أول ما الكديس ينزل من السرير ما بشوفو تاني و لمن كنت أحكي لمنيب كان بقول لي دي كوابس ساي ...أنا ما كاتبه حاجات تانيه في باقي الدفتر يمكن لأنو وضعي ساء و قربت أجن....
المهم و نحنا بنتكلم كدا قصي جا داخل ، أروى لمن شافتو لوت خشمها ، قلت ليها مالك معاهو ؟؟ قالت لي غياظ ياخ ! جا سلم علينا و قال لي ليه ما جيتي تسلمي علي ، قلت ليهو جيت قبل شويه ، قال لي اهااا تمام و سألني عن ناس البيت و كدا ، المهم طول وقفو دي أروى ما إتكلمت معاهو بعد ما مشى قلت ليها ياخ مالك معاهو الولد مؤدب و محترم و أسلوبو راقي ، قالت لي و بناتو كتار ....ضحكت و قلت ليها شنووو ؟؟
قالت لي لا لا ولا شي
قلت ليها أرررروى!! انتي بتغيري عليهو ؟؟
قالت لي مجنونه انتي ؟؟ أغير عليهو مالي مرتو ولا خطيبتو ولا حبيبتو ؟؟!
قلت ليها هييي هييي الحركات دي ما علي أنا ، اولا انتي من ما اتعينتي هنا بقيتي تجيبي سيرتو على الدوام و مواضيعنا كلها بقت يا عن منيب يا عن قصي و غير كدا عيونك فاضحاك و أنا لاحظت ليك بتعاين ليهو كيف....ختت الملف الشايلاهو و اتنهدت و قالت لي حتى لو كلامك صح دا من ناحيتي أنا فقط...
طبعاً من جواي فرحت ليها لأنها بالجد كانت واجعه قلبي عليها لأنها كانت بتحب ماهر من زمان و ماهر عرس و هسي بولودو و حبها ليهو ما نقص طول السنوات دي و اتعذبت كتير بسببو ، أخيراً هسي قدرت تتجاوزو و فكرت في غيرو .... شجعتها و قلت ليها انت بس ما تصري وشك لمن تشوفيهو كدا حتى لو هو معجب بيك أو بحبك أول ما يشوف ملامح الإنزعاج دي ح يطفش ، قالت لي يعني أعمل ليهو شنو عشان يركز معاي؟؟
قلت ليها حبيبه ! ناسيه انتي منو ؟؟ انتي أروى المفتحه ، الشفته الما بتتوصى ، إبتسمت و قالت لي فعلاً و ح أعرف اعمل شنو ، أنا أروى 😌😎💅
المهم قعدت معاها لحد ما خلصت شغلها و رجعنا البيت سوا ، بعد ما إرتحت شويه مشيت قعدت مع ناس أمي و بقيت اتونس معاهم عشان أوهمهم اني نسيت منيب دا ، قلت ليهم مشيت لأروى في شركتهم ، مياسم قالت لي انتوا الإتنين التقول مربوطين ببعض قدر ما إفترقتوا بتمشوا تلحقوا بعض ، مرام قالت لي ما عارفه العاجبك فيها شنو .... طبعاً أنا و مرام اتصالحنا بعد ما كانت زعلانه مني و خاصة بعد ما ماهر شاكلها لمن حكت لي عن منيب بس هسي كلو تمام حتى علاقتها بماهر ، يمكن الحلو اننا مهما اتناقشنا و اتشاكلنا بنرجع تاني و بنقيف مع بعض و الحاجه الكويسه انو مثلاً لو أنا و مرام أو مياسم و مرام اتناقشنا في حاجه لا أبوي لا ماهر لا أمي بتدخلوا ، ايوه صح أمي بعد مرات الموضوع بحرقها و بتدخل بس أبوي بمنعها و هي بنفسها بتجي تعتذر ، أبوي قال لي انتوا زي الأخوات ، اتشاكلوا قدرتكم بس يا مها لا انتي لا مياسم تجوا تشكوا لينا منها ولا مرام تمشي تشكي لأهلها ، جوه البيت دا اتناقشوا و اتشاكلوا قدرتكم بس ما تدخلوا زول بيناتكم لأنو مصيركم ترجعوا و تتصالحوا تاني و زي ما قلت ليكم مرام زي أختكم و الأخوات لا بزعلوا فترات طويله من بعض لا بحقدوا على بعض 💜
المهم قلت لناس أمي صحي ما كلمتكم ، شفتو الولد الإسمو قصي ولد صاحب أبوي داك ...التلاته قالوا لي بصوت واحد : مالو ؟؟
ضحكت و قلت ليهم مالكم مخلوعين كدا ، المهم انو أروى شغاله في نفس شركتو و لمن أمشي قاعده ألقاهو هناك ، مياسم قالت لي و بجي بسلم عليك ؟؟ قلت ليها آي بجي ، مرام قالت لي يعني بتمشي هناك عشانو 🙈
ضربتها في كتفها و قلت ليها يا بت حيوانه انتي ؟؟ أمي ضحكت و قالت لي مرام بتهاظر معاك لكن النصيحه الولد مؤدب و محترم ، قلت ليها فعلاً ...سكتنا كدا و فجأه مياسم قالت لي و هي بتضحك لو اتقدم ليك ح توافقي؟؟
قايلاها بتهاظر ، ضحكت و قلت ليها طوالي بس أنا للأسف مقيده و مربوطه بزول تاني ، قالت لي آي بعد ما يطلقك ، قلت ليها ما عندي مانع طواااالي عشان أكون معرسه مرتين 😂😂
المهم بعد ما مشيت غرفتي و كنت خاشه الواتس تحديداً بشوف في رسائل قروب الدفعه ، لأول مره بعد حكاية شهر و اسبوعين جاتني رساله من منيب ، كان كاتب لي : مشتاق ليك والله ...
ما قدرت أمنع نفسي ف طوالي دخلت قريت رسالتي و لمست الكيبورد و كنت ح أكتب ليهو أنا كمان بس إتراجعت ، تاني رسل لي و قال لي بس ما مشكله قريباً حنكون في بيت. واحد و نرجع زي زمان ..
قلت ليهو في أحلامك...
قال لي و أنا على طول بحقق أحلامي ، هسي سافه رسالتي الأولى ليه ؟؟🙂
قلت ليهو ببساطه لأني ما ببادلك الإحساس دا ، رسل لي : 😂😂😂
و بعدها كتب لي : مع انك ما قاعده قدامي بس الكذب واضح عليك يا عسل
قلت ليهو ما بكذب أنا دي الحقيقه
قال لي عموماً طمنيني اخبارك شنو و الإمتحانات كانت كيف ؟؟
قلت ليهو ما عارفه..
قال لي بتمنى انك تكوني ذاكرتي كويس ، إتمنيت لو كنت معاك بس ظروف...
قلت ليها الظروف ما بتساعد المنافقين ☺️
انت قلت لي انك مستحيل تخليني ادخل امتحان و أنا ما قاريه ليهو لأنك حتكون معاي خطوه بخطوه و تراجع معاي ، بس عشان الكلام ما من قلبك و ما حقيقه الظروف ما ساعدتك
قال لي دا عتاب ؟؟
قلت ليهو العتاب دا بكون للناس البنحبهم و أنا سبق و قلتها ليك : أنا بكرهك
قال لي من شدة حبي ليك ، كلمة بكرهك دي قريتها بحبك ☺️
على العموم كلامك ما ح يغير شي و أنا ح اعمل الفي بالي ، لأنك عارفك كويس عايزا شنو و أنا عايز شنو ، لا أهلي لا أهلك ليهم حق يتدخلوا فيني ، أنا و إنتي بس البحق لينا نقرر مصيرنا ، قلت ليهو عشان كدا أنا هسي بقول ليك طلقني بعيداً عن أهلي ☺️
قال لي لو ما عارفك كويس كنت ح اقول إنو دا كلامك انتي ، قلت ليهو ياهو كلامي و أنا جاده معاك يا منيب ، طلقني و بس و خلينا ننهي الحاصل دا كلو بالتي هي احسن و من دون ما نسئ أو نأذي بعض أكتر...
قال لي و عشان الأذيه دي أنا ما عايز نبعد من بعض ، كفايه علينا السنتين دي ، أو خليني اقول كفايه علي أنا لأنك ما متذكره شي ، و أنا بسبب المتذكرو عشت اسوأ سنتين في حياتي و ما ناوي العشتو في السنتين ديل يكون الح أعيشو باقي عمري..
انا ما بتمسك بسهوله في الناس و ما بركز معاهم و ماف زول بقدر يهزني أو يأثر علي ، بس الأنا البتمسك فيهو صعب إنو يتخلص مني و بكل ثقه بقول ليك أنا و انتي ماف شي ح يفرقنا إلا الموت
طبعاً كلامو خلعني ! حسيت بالجد انو منيب دا حيكون مصيري ، شكلو واثق شديد في نفسو و عارف ح يعمل شنو ؟؟!
طبعاً قلبي طول مدت كلامي معاهو كان شغال دق دق و عيوني إتملت دموع
المهم طلعت من الواتس و قفلت الشبكه ! بس طول اليوم كنت متوتره و بسأل نفسي الح يحصل شنو ، المهم في اليوم البعدو مشيت الجامعه ، بعد ما خلصت و مشيت الموقف جنبي كانوا واقفين بنتين ف بقوا يعاينوا لي لمن عقدوني ، لمن انتبهت كويس لقيت وحده منهم بت دفعتي اسمها دانه ، كانت بتعاين لي و بتتكلم مع الجنبها ، لمن لاحظوا اني انزعجت التانيه جات و مدت لي يدها و كانت بتعاين لي شديد جوه عيوني ، قالت لي معليش عشان وترناك بنظراتنا بس شبهناك على وحده بنعرفها ، مديت ليها يدي و ابتسمت و قلت ليها لا لا عادي ولا يهمك ، دانه قالت لي طبعاً كنت بقول ليها انك بتقري معانا ، قلت ليها اي بس ما حصل إتكلمنا مع بعض ،قالت لي فعلاً في القاعه اي زول مركز مع نفسو أو شكلتو و بس ، البت المعاها قالت لي طبعاً أنا عمة دانه ، قلت ليها بالجد!!!؟
ما باين عليك والله! صغيره انتي !!
ضحكت و قالت لي ايوه و اخوك عرس بدري ، قلت ليها اهااا ، قالت لي انا اسمي تالا ، قلت ليها إتشرفنا ، لمن جات المواصلات كنت ماشه اركب ، بس هم كانوا واقفين ، قلت ليهم ما ح تركبوا عشان بعد شويه يمكن ما تلقوا ، دانه قالت لي كنا جاين نركب مواصلات بس بابا اتصل و قال ح يجينا ، قلت ليها طيب تمام ، الإسمها تالا قالت انتظري نوصلك معانا ، قلت ليها لا لا بمشي بالمواصلات ، قالت لي طيب تمام مع السلامه ، المهم ركبت العربيه و قعدت جنب الشباك و هم لسه كانوا بعاينوا لي و بتكلموا !!...
المهم العربيه إتحركت و بعد مسافه كدا أروى إتصلت علي ، و سألتني وين أنا ف طوالي وريتها ، قالت لي طيب انزلي لي جنب () دايراك تمشي معاي مشوار ضروري ، قلت ليها تعبانه يا أروى ، مشوارك دا إلا يتم اليوم ؟؟؟
قالت لي ايوه و ضروري كمان يا مها ، قلت ليها طيب طيب ح أمشي معاك ، المهم نزلت في المكان القالتو لي ، لقيتها منتظراني هناك ، ركبنا مواصلات و مشينا الطائف ، من المحطه الهناك ركبنا ركشه و مشينا حته كدا ما عارفاها ، و طبعاً أنا طول الطريق بسأل فيها نحنا ماشين وين و هي شغاله لي أصبري لحد ما نصل ، فجأه قالت لبتاع الركشه نزلنا هنا هنا جنب البيت دا ....نزلنا و هي حاسبة بتاع الركشه و هو مشى ، كنا واقفين جنب بيت كدا مليان شجر و شكلو حلو و مرتب ، قلت ليها البيت السمح دا حق ناس منو ، قالت لي تعالي بس و هسي بتعرفي ، مشينا وقفنا جنب الباب و هي طوالي ضربت الجرس ، قلت ليها أروى فهميني حاجه !!.
قالت لي اصبري يا مها الموضوع طويل ياخ هسي ح تفهمي ! بقت تضرب في الجرس لحد ما سمعنا صوت رجلين جايه على الباب

*أدري انني سأستمر في حبك حتى آخر نفس*
*حتى لو اضطررت لمحاربة كل العالم من أجلك*
*حتى و لو لم تعيريني إنتباهك*
*حتى لو تلاشى ذلك الحب الذي كنت تكنيه لي يوماً*
*حتى لو كنت آخر شخص تفكرين به ...أو لا تفكرين*
*إني احمل حبك بين أضلعي و أراك في وجوه كل الحاضرين*
*أحياناً أصاب بخيبة أمل عندما أشعر و لو لمرة انك لن تكوني* *لي ،  أخشى أنا استسلم في* *نهاية المطاف ، أخشى أن أهزم أمام تلك العينين ، فإني أقوى على محاربة كل العالم إلا عيناك*
*، أخشى أن أترك المعركة* *لأجلك ، فكل أمر طلب بالنسبة لي إلا طلبك أمر و أمرك أمرين*
*ربما لن يأتي اليوم الذي تذكرين فيه حبنا و ربما تكفين عن حبي*
*لكن لا بأس ، لأنني سأحبك* *عوضاً عن كلينا*

#مها_حولي*