*#قصة_ريدنا《14》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*
قال لي خاطفك...
طبعاً إتوترت و قلت ليهو أهلي ح يقلقوا علي ، قال لي لا ما ح يقلقوا ....بعدين انتي خايفه مني ولا شنو يعني ؟؟
م م ما خايفه ...قال لي طيب متوتره ليه ؟؟
غمضت عيوني شديد و قلت ليهو انت أروى قالت ليك !....قال لي قالت لي شنو ؟؟
طبعاً حيرني..
فتحت عيوني و قلت ليهو أكيد حكت ليك ، قال لي ما فاهمك أنا ، قولي لي أروى مفروض تقول لي شنو ؟؟
قلت ليهو طيب عرفت كيف اني في الجامعه دي ؟؟
قال لي قلبي هو القال لي ..
طبعاً سكته و الكلام غلبني و قلبي اشتغل زي الدلوكه...بعد مسافه ابتسم و قال لي لسه بتتوتري بنفس الطريقه لمن أقول ليك كلام حلو ، طبعاً الكلام غلبني و القعده ذاتها بقت صعبه علي و حسيت نفسي ما قادره اتنفس كويس و اتصرف على راحتي ، فجأه خت يدو فوق يدي و ضغط عليها شديد و قال لي انتي ما راكبه مع زول غريب ، القدامك دا راجلك و انتي مرتي ف اتصرفي على الأساس دا و انفضي قلقك و توترك ....قلت ليهو ما قلت أروى ما كلمتك !! قال لي كنت عايز اسمع الكلام دا منك ، سكته بس و عاينت ليهو ، قال لي عارف في اسئله كتيره في بالك ما لاقيه ليها أجوبه ، أنا ما جايبك هسي عشان أرد عليك على كل سؤال ، تفاصيلنا و ذكرياتنا الكتيره صدقيني ما ح تتحكي كلها في يوم أو يومين أو غيرها عشان كدا خليها على الزمن و كل ما ألاقيك ح أحكي ليك جزو من حياتنا بس حالياً خلينا كدا حلوين و انتي خليك مطمنه ، قلت ليهو انت الجبت لي هدايا في ذكرى ميلادي صح ؟؟
قال لي ايوه ...لقيتي الدفتر داك ؟؟
قلت ليهو أيوه لقيتو و قريتو ، قال لي خلاص معناها فهمت العايز اوصلو ليك و عرفت انو الروايه الفي الدفتر دي بداية قصتنا الكتبناها الإتنين سوا ، خلصتيها كلها ؟؟
قلت ليهو لا لسه .... طبعاً ما ح اقول ليهو في زول من أهلي دساها مني...
المهم بقى يتكلم معاي و أنا ساكته لحد ما وصلنا كافيه كدا في الرياض ، نزل و جا فتح لي الباب ، طبعاً خجلني و حسسني كأني شخصيه مشهوره كدا ، المهم لمن دخلنا الكافيه قال لي دا واحد من الأماكن الكنا بنجيها أنا و انتي على طول ، و اليوم جايبك عشان نحضر فلم ، قلت ليهو في سينما هنا ؟؟ قال لي ايوه في سينما بيكاسو ، المهم قعدنا و هو طلب على ذوقو ، أنا بس بهز ليهو في راسي ، مسك يدي و طلع خاتم من جيبي و لبسني ليهو ...الخاتم كان رهييييب و رفيع ! قال لي قولي حاجه ياخ حتى لو الخاتم ما عاجبك 😂
قلت ليهو و انا متردده : م ما عارفه اقول شنو والله ، قال لي تمام ما مشكله المهم انك تكوني مبسوطه معاي ، المهم قعدنا زي نص ساعه كدا و طول المده دي هو البتكلم و أنا ساكته بس حقيقة ما بنكر إني كنت مبسوطه و مطمئنه و انا قاعده معاهو ، اتمنيتو ما يسكت و يفضل يتكلم كدا ، بعد شويه عاين لساعتو و قال لي كنت ناوي نحضر فلم سوا بس ما عارف إذا الزمن ح يكفي ولا لا ، انتي متأكدة انو محاضرتك بعد ساعه ؟؟
طبعاً كنت سرحانه فيهو مع اني سامعه كلامو بس زي الإتهبلت و بقيت ما قادره اشيل عيوني عنو ، حك لحيتو و قال لي خلاص عارف نفسي سمح ما تعايني لي كدا بتسحريني ، بالجد لمن قال كدا ضحكني ضحك ، كان ماسك تلفونو فأول ما قعدت اضحك صورني طوالي من دون ما يكلمني ، قلت ليهو منيييب ياخ ، أمسح الصوره سرعه ! قال لي امسحها ليه ؟؟ قلت ليهو ما حلوه ، قال لي متين شفتيها انتي ؟؟ قلت ليهو طيب خليني اشوفا ، قال لي لا يا زوله ، قلت ليهو ياااااخيي ، حاكاني و قال ياااااخيي ، قلت ليهو ما تحاكيني ، تاني حاكاني و قعد يضحك ، قال لي هااا ما قلتي لي محاضرتك الساعه كم ؟؟
قلت ليهو أساساً ما عايزا أمشي ، قال لي من البدايه كدا؟؟!! قلت ليهو أصلا أنا ما عندي رغبه امشي الجامعه بس أهلي مصرين ، ياخ أنا بكره الجامعه دي شديد و ما بحب القرايه ، السنه الفاتت خلوني امتحن تالته و بعدها قدموا ل للجامعه ، قريت شهرين بس و خليتها لأني ما قدرت ، قال اممم أهلك معاهم حق انتي بتكرهي الجامعه ليه ؟؟
قلت ليهو بتحسسني اني متأخره و عاجزه و باديه من الصفر ، ايوه صح أنا ما متذكره ايام الجامعه و أول يوم لي فيها بس الحقيقه انا مريت بالمرحله دي زمان ف اتخيل تاااااني أرجع و ابدا من جديد ! حتى لو ما كنت متذكره تجربتي الأولى في الجامعه بس الحاجه دي مرهقه شديد ، قال لي هسي بتقري شنو ؟؟ قلت ليهو IT ، قال لي حلووو أساساً دا كان مجالك قبل ما يحصل ليك الحادث و كنتي بتحبيهو شديد ، قلت ليهو بس حالياً ما حاسه نفسي بحبو ، يعني ح أقراهو غصب عني ، قال لي هسي انتي بإعتبارك برلومه و معظم البرالمه بحسوا كدا في البدايه بس بكرا بتتعودي ، قلت ليهو ما أظن ، قال لي أنا معاك و خطوه بخطوه كل شي ح يكون تمام ...قلت ليهو أن شاء الله ، قال لي المهم بما انك عايزا تمشي تحضري المحاضره ف تمام ما ح أغصبك بس ما تتعودي ، اليوم بس ....المهم قال لي ثواني ...مشى و جاني راجع و قال لي تعالي ، لمن مشيت معاهو لقيتو حاجز لينا سينما منفصله VIP , قال لي ح نحضر واحد من أفلامك المفضله ، جاب الفشار و جا و فعلاً استمتعت شديد و أنا بحضر في الفلم و أبدا ما حسيت انو منيب زول غريب ، ايوه في البدايه كنت قابضه نفسي و متوتره منو بس هسي بقيت عاديه بعد ما إتكلمت معاهو كتير ، المهم بعد ما طلعنا من السينما تلفوني رن ، أبوي هو كان المتصل ، إتخلعت بالجد و قلت الليله اعمل شنو ، منيب قال لي دا منو ؟؟ قلت ليهو دا أبوي و طوالي رديت عليهو ، بعد سلم علي قال لي اهاا المحاضرات كانت كيف خلصتي ولا لسه ؟؟.
قلت ليهو تمام ، ايوه خلصت ، قال لي تمام اتصلي على ماهر عشان يجيك ، قلت ليهو لا لا بجي بالمواصلات ، ماهر حيكون مشغول و ما عايزا أديهو مشوار ساي ، قال لي تمام يلا انتبهي على نفسك و تلفونك دخليهو جوه الشنطه و امسكيها قوي عشان ما تتسرق منك ، قلت ليهو حاضر يا أبوي ، المهم بعد ما قفلنا منيب قال لي شكلك اتأخرتي مع اني كنت مخطط أوديك مكان تاني بس ما مشكله الجايات أكتر من الرايحات ، المهم ركبت معاهو و قلت ليهو وصلني مكان المواصلات بس و تاني بمشي براي ، ما رد علي ، و لمن جينا تقاطع المشتل كان في مواصلات هناك بس هو ما وقف لي ، قلت ليهو منيب نزلني هنا !! قال لي أكيد انتي ما جاده صح ؟؟
المهم وصلني لحد قريب البيت ، قلت ليهو اقيف هنا عشان أهلي ما يسألوني ، أول ما نزلت قلت ليهو شكراً ، قال لي : شكراً لي أنا ؟؟
قلت ليهو خلاص ما شكراً ، و أول ما قفلت باب العربيه و كنت ح أمشي قال لي مها !! إتلفت عليهو و قلت ليهو أيوه !! قال لي ممكن ما تكلمي أهلك انك عرفتي الحقيقه و ما تجيبي ليهم سيرتي ؟؟! قلت ليهو ليه ! قال لي في الوقت الراهن ما تجيبي ليهم سيره لحد ما أحاول أحسن الوضع بيناتنا ، هزيت ليهو راسي بس و مشيت دخلت البيت و أنا مبسوطه على الآخر و مزاجي عال العال لمن ناس البيت علقوا على الحاجه دي ، أمي قالت لي البشوفك مبسوطه و انتي جايه من الجامعه ما يشوفك و انتي رافضه تمشي ليها ، قلت ليها تعامل الدفعه كان لطيف و المحاضرات كانت سمحه شديد بالذات آخر محاضره دي ، مياسم قالت لي دا كلام والله ، المهم موفقه يا زوله ، مشيت دخلت غرفتي و رقدت على السرير و قعدت أعاين للسقف و أنا بضحك زي المجنونه ، لمن تلفوني رن قلت اكيد دا هو و فعلاً لمن طلعت التلفون من الشنطه لقيتو منيب ، ما رديت عليهو طوالي ، انتظرت كم ثانيه كدا و بعدها رديت ، قال لي من هسي مشتاق ليك... طبعاً لساني إتربط ، قال لي عبريني على الأقل بضحكه ....برضو ما قدرت أقول حاجه بس حسيت حركة سكوتي المستمر بايخه مع اني ما عاملاها قاصده بس أكيد ما حلوه كونو من قبيل بتكلم معاي و بحاول يسعدني و أنا ما قادره اقول ليهو حاجه.....قلت ليهو منيب أنا بالجد ما عارفه اقول ليك شنو و ساكته لأني حرفياً ما قادره ألقى كلمات مناسبه عشان أقولها ليك و غير كدا عشان أنا ياداب بتعود عليك بس ما عايزاك تفهم سكوتي انو رفض ليك أو عدم إهتمام بالبتقدمو لي ، أنا اليوم انبسطت شديد ما عشان مشيت السينما و حضرت فلم بحبو مبسوطه عشان كنت معاك .....قال لي فاهمك أنا كويس يا حبيبي و إحساسك واصلني و انتي مني و فيني و أنا بفهمك أكتر من نفسك ، كلام الهسي دا براهو كفايه ، سعادتك بتهمني و مستعد أعمل اي شي مقابل انك تكوني معاي ، قلت ليهو دائماً بتربط لساني بكلامك و الرد بغلبني ، قالت لي معناها ح تتعودي على الكلام دا 💜
المهم إتكلمت معاهو شويه و قفلنا على كدا ، حضنت التلفون و قعدت أضحك ، المساء كدا أروى جاتني و قالت لي اررررح ارررح أحكي لي سرعه الحصل شنو ! منيب وداك وين ، قلت ليها كنتوا متفقين صح ؟؟
قالت لي اي و هو كان قاعد لمن كنت بتكلم معاك ، كان قايلاك حتجي المشتل بس انا وريتو انك نزلتي جامعه و عشان عارفه انك وحده عويره ساي و ما حتقولي ليهو انك عرفتي الحقيقه اختصرت عليك و كلمتو ، قال لي طيب ردة فعلها كانت شنو ، قلت ليهو جاتها حمى عديل ، المهم قال لي انو عايز يطلع معاك و قال لي لمن اصلها اقفلي تلفونك و وراني عايز يعمل شنو ، المهم احكي لي الحصل بالتفصيل ....المهم قعدت أحكي ليها و هي كل دقيقه تقول لي وااااي مبالغه ما بصدق والله ..حيييا أنا كرفستو لي مشاعري ، يا بختك يا مرة زوجة الضابط منيب العسل ، قلت ليها احترمي نفسك يا بت ، قالت لي اششششي على الغيره ...قلت ليها لازم لأنو راجلي ، قالت لي احساس انك ياداب صدقتي إنو راجلك ، حيييا أنا بس الله يديني راجل زيو ، قال ليها ماف زي منيب ، واحد و أخدتو أنا ، قالت لي والله دا كلام 😂 طلعه وحده معاهو خلتك تغرقي في حبو و تردي بكل ثقه ....المهم إتونست معاها مسافه و لمن قامت ماشه قدمتها لحد الباب ، لمن وصلنا الباب قالت لي بعد دا ما ح تنومي بدري و ما ح تساهري براك ، قلت ليها بطلي يا تافه ، ضحكت و مشت ، دخلت جوه و انا بغني ساي ، لمن دخلت المطبخ لقيت مرام واقفه بتطبخ ، قلت ليها عندك شنو أساعدك فيهو ، قالت لي ولا شي ... طبعاً قالتها بنبرة زعل كدا !! قلت ليها شكلك متشاكله مع ماهر ، ما ردت علي ، قلت ما مشكله بعدين ماهر بجي و براضيها ، مشيت الصالون و قعدت مع مياسم ، كانت بتسرح ل بتها رفيف و هي تبكي و تقول تسرح براها ، قلت ليها ل مياسم طيب خليها تسرح براها ، قالت لي بتعولق شعرها ساي ، لمن رفيف بقت تبكي و تصارع في امها مياسم ضربتها و رمت المشط و قالت ليها سريحهو و تاني أبقى كلبه لو مسكت شعرك ، مياسم قالت كدا و مشت المطبخ ، قلت ل رفيف عيب العملتيهو هسي زعلتي أمك !! قالت لي هي تسريحها شين ، قلت ليها انتي عايزا تسرحي كيف ؟؟ قالت لي عايزا أخت فيهو طوق و أفكو ، قلت ليها كلام والله ، طيب تعالي أعملو ليك ، قالت لي ما بتعرفي ، قلت ليها ما عايز ليهو عرفه ، بعمل ليك و لو ما عجبك اعملي البريحك ، المهم رقدتو ليها و أصلا هي شعرها ناعم ما يحتاج فرشه زاتو المهم لمن خلصت عملت ليها الطوق ، بقت تلف بشعرها يمين و شمال و هي بتضحك ، قلت ليها يلا امشي راضي أمك و صالحيها قالت لي طيب ، إتحركت كدا و جات باستني و مشت لأمها ، بعد شويه كدا جا عمر يبكي و هو مليان تراب ، قلت ليهو مالك كمان ؟؟
قال لي دقاني الولد و هسي بشاكل في حمودي ، أقرب توب لقيتو لبستو و طوالي طلعت الشارع و فعلاً لقيت الولد خانق حمودي بيد و بيضربو في بطنو باليد التانيه ، طبعاً هو ولد جيرانا ، مشيت عليهم بإستعجال و فكيتو منو حمودي و قلت ليهو ليه تخنقو ، طبعاً هو أكبر من حمودي بشويه ، الولد قال لي براهو ضربني بالحجر ، قلت ليهو صح يا حمودي ؟؟ قال لي اي لأنو ضرب عمر ، قلت ليهم ماف داعي تتشاكلوا انتوا أولاد جيران و زي الأخوان فما مفروض تتشاكلوا ، حمودي قال لي والله ما أخليهو مش خنقني و كان عايز يضرب الولد بس مسكتو منو و نهرتو ، قلت ليهم هسي دي تتصالحوا ، الولد قال ل حمودي معليش و مد ليهو يدو ، طبعاً حمودي أبى يمد ليهو يدو بس لمن حنستو مد ليهو يدو ، قلت ليهم حلووو يلا ألعبوا سوا و ما اسمع انكم اتشكلتوا تاني قالوا لي طيب ....فجأه جاني صوت بقول لو سمحتي......لمن إتلفت لقيتو ولد شاب كدا مرتب و مهندم ، قلت ليهو أيوه !! قال لي أنا جديد هنا و عايز اسأل عن بيت عم متوكل الرشيد..... طبعاً استغربت ! قلت دا منو و جاي بيتنا ليه !!؟...قلت ليهو دا بيتنا و هنداك ليهو ، قال لي بالجد ، انتي بتو ولا شنو ؟؟
قلت ليهو أيوه بتو ، مد لي يدو و قال لي انا قصي ، مديت ليهو يدي و قلت ليهو اتشرفنا ، قال لي ما ح تقولي لي اسمك ...سحبت يدي منو بس ، ضحك و قال لي ما مشكله ، الحاج موجود ؟؟ قلت لا بس بجي بعد شويه ، قال لي طيب و ماهر ؟؟ قلت ليهو برضو ما موجود ، قال لي تمام أنا ح آخد لفه في المنطقه دي لحد ما هم يجوا ، قلت ليهو طيب ، قال لي إتشرفنا و طوالي مشى ركب عربيتو و دورها ، المهم رجعت البيت ، لقيت مياسم و مرام جنب الباب و كانوا طالعين ، مرام قالت لي حمودي دا اتشكل مع منو ؟!! الدقاهو منو و وينو هو هسي ؟؟! قلت ليها حال الشفع ، اتشكل مع ولد أميره و هسي اتصالحوا قالت لي أصلا ولد أميره دا جنو مشاكل ، مياسم قالت لي دقيقه وينو ليهو داقي لي ولدي مالو و طوالي طلعت ليهو ...غلبني أمشي ألحقهم تاني ف خليتهم و دخلت البيت و قعدت في الصاله ، طبعاً أمي كانت ماف ، بعد شويه مرام و مياسم جوا يجوطوا ساي ، مياسم قالت ليها كمان أمو الحيوانه فوق ما ولدها غلطان جايه تتكلم و تتلائم كمان !! مرام قالت ليها لو ما الناس مسكونا منها كنا بقيناها فطيس ، قلت ليهم مالكم في شنو !!؟؟ اتشاكلتو مع أميره !! مرام قالت أي و ما شفتيها إتلائمت كيف ، قلت ليهم انتوا بتحبوا تكبروا المواضيع اتعلموا انكم ما تجروا ورا مشاكل الشفع ، حمودي و ولد أميره ديل هسي أنا خليتهم يتصالحوا و كان حلوين قمتوا انتوا مشيتوا و ولعت النار !! بكرا حمودي و الولد ح يتصالحوا و انتوا ح تشيلوا وش القباحه ، مياسم قالت ليها يا زوله هي ذاتا غلطانه ، قلت ليها أنا بتكلم عنكم كلكم ، مرام قالت لي المزعلني منكم انك شفتي الولد و هو بضرب في حمودي بدل ما تشاكليهو تخليهم يتصالحوا !! على الأقل كنتي تخلي حمودي ياخد حقو بعدها تخليهم يتصالحو.... طبعاً واضح إنو حمودي هو الحكى ليها .... طبعاً زعلت شديد و ساقت حمودي و مشت مننا ، مياسم قالت لي بتعامل الغريب زي القريب حتى و هو غلطان !! بتبالغي والله ، هسي أقرب ليك أولاد أخوانك ولا ولد الجيران ؟؟
المهم هم الإتنين زعلوا مني و ما رضوا إلا لمن مشيت إعتذرت منهم بس مرام دي لسه حاساها زعلانه ، المهم بعد شويه كدا أمي جات داخله و طوالي ختينا الأكل و إتغدينا ، بعدها أبوي اتصل على أمها و قال ليها جهزوا أكل مرتب لأنو جاييني ضيف ، أمي قالت ليهو كلو جاهز ، لمن ورتنا قلت ليها يمكن دا الضيف ، قال لي قال لي لقيتيهو وين ؟؟ جا هنا هو ؟؟
قلت ليها لا لا و طوالي حكيت ليها ، المهم بعد مسافه أبوي و ماهر جوا راجعين ، بعد حكاية 10 دقايق كدا سمعنا صوت سلام ، بعدها ماهر جا داخل و هو شايل معاهو أكياس كتيره ، قال لينا تعالوا سلموا على الضيف دا ، أمي قالت ليهو جاب ديل كلهم ، مالو متعب نفسو كدا ،، طبعاً أنا عشان لاقيتو قبيل ما مشيت معاهم ، بس ناس أمي مشوا حتى الشفع مشوا سلموا معاهو ، مشيت غرفتي و شلت تلفوني و دخلت الفيس ، كان في زي 5 طلبات صداقه منهم منيب ، طوالي حذفت ديلك و وافقت على طلب صداقتو هو ، لقيتو متفاعل مع بوستات قديمه لي ب أغضبني ، طبعاً تفاعلوا دا كان قبل ربع ساعه كدا و لقيت مكالمات منو ....لمن دخلت الواتس لقيت رسائل منو ، كاتب لي سرررعه أحذفي صورك المنزلاها في الفيس و الإنستا!!
طبعاً رجعت الفيس تاني و شفت البوستات المتفاعل معاها بإغضبني لقيتها صورنا أنا و أروى الكنا بننزلها في الفيس و الإنستغرام ، من ضمنهم الصوره الكان اتصورناها يوم جات مطره يوم مشينا المطعم داك ....رجعت الواتس و قلت ليهو ما فيها حاجه يا منيب....بعد دقائق كدا دخل الواتس و طوالي رد علي ، قال لي أنا بالنسبه لي فيها حاجه و لو كان من زمان لقيت صفحتك دي و شفت الصوره البتنزليها والله ما كنت ح أسمح ليك تنزلي صورك.....قلت ليهو منيييب الله يرضى عليك ما تخليني احذفهم ، الصور حلوين بالجد و ما فيهم حاجه ، قال لي بس الموضوع مضايقني شديد و خانقني بس اذا ما حابه تحذفيهم ما ح أضغط عليك ☺️
قال كدا و طوالي طلع من الواتس و لمن رسلت ليهو ما استلم رسالتي .....قلت أففف ياخ !! ما عرفت اعمل شنو ، ما عايزاهو يكون متضايق مني و في نفس الوقت ما عايزا أحذف الصور ، بعد مسافه كدا دخلت الفيس و حذفت كل الصور و مشيت الإنستا و برضو حذفت الصور ....بعدها رسلت ليهو في الواتس و قلت ليهو حذفتهم ☺️
ما كان خاشي ، انتظرتو مسافه بس برضو ما دخل ، إترددت اتصل عليهو ولا لا ، تاني قلت انا ما بتصل على زول غريب ، مفروض ما اتوتري ساي و أخاف من فكرة إني أتصل عليهو ، دخلت جهة الإتصال و أول حاجه عملتها سجلت إسمو و ختيت جنبو قلب ، طوالي اتصلت عليهو ، في البدايه ما رد بس لمن كترت الإتصال فتح الخط و ما إتكلم معاي ، قلت ليهو منيييب حذفتهم والله ، قال لي لو حتزعلي فالأحسن كان ما تحذفيهم ، قلت ليهو حذفتهم و انتهيت ، قال لي طيب زعلانه مني ؟؟
قلت ليهو ما عارفه ...قال لي بالجد لو ما الموضوع بالنسبه لي خط أحمر و بتضايق شديد ما كنت غضبتك على حاجه ، انتي ما شفتي تعليقات الأولاد على صوركم ؟؟! ما اظن في أي راجل بقبل إنو يشوف ناس بتتغزل في مرتو و يقولوا ليها كلام خارم بارم..... طبعاً لمن قال لي كدا قعدت اتبسم ، بذات كلمة "مرتو" دي خلتني أفصل على الآخر بس كنت عامله فيها زعلانه....قلت ليهو المهم عملت ليك الحاجه البتريحك ، قال لي دا كلام زعل صح ؟؟
قلت ليهو ما مهم ، قال لي لا مهم و شديد كمان ....ما رديت عليهو....قال لي تمام لو زعلانه شديد ف خلاص ليك الحريه و نزلي صورك وين ما عايزا ما ح أسألك تاني و ما ح أتدخل فيك..... طبعاً قلب الطاوله طوالي و أنا عارفاهو مستهبل ساي ، قلت ليهو بالجد !! خلاص هسي ماشه أنزل اجمممل صوره لي ، بس احسن انزلها في الفيس ولا الإنستا؟!؛ احسن في الإتنين بالجد شكراً ليك كتييير يا منييب لأنك خلي.....قاطعني و قال لي هوي انتي صدقتي ولا شنو ؟!! ماف حاجه اسمها تنزلي صورك ...قلت ليهو أساساً عارفاك مستهبل ، قال لي ما مستهبل والله بس كنت عايزك تحسي بي و تفهميني ...قبل ما أقول حاجه حمودي و عمر و رفيف جوا جارين و قالوا لي عمتوووو بنادوك ، قلت ليهم منو ؟؟
قالوا لي جدو ، قال ليك تعالي سلمي على الضيف ، قلت ليهم طيب هسي جايه طوالي جروا ، منيب قال لي دا منو كمان ؟؟
كذبت عليهو و قلت ليهو ما عارفه يمكن صاحب أبوي ، قال لي و ضروري تسلمي عليهو ، ضحكت و قلت ليهو الراجل قدر أبوي ، قال لي المهم أمشي و تعالي ، قلت ليهو لا أكيد ما ح أقعد الزمن كلو اتكلم معاك ، هسي مفروض أساعد مرام في المطبخ ، اغسل العده أو اعمل ليهم الشاي و أرتب المطبخ و و و يعني ما ح أقعد ساي ، قال لي أمري لله ، قلت ليهو يلا مع السلامه و طوالي قفلت منو ، قلت ياخ الضيف دا انا قبيل سلمت عليهو تااااني عايزني أمشي و أسلم عليهو !! المهم لبست لي عبايه و مشيت ليهم في صالون الرجال ، لقيت أمي قاعده معاهم ، طبعاً طلع نفسو الولد القبيل ، أبوي قال ليهو دي مها بتي ، قال لي تعالي سلمي ، الولد قال ليهو لقيتها قبيل و سألتها عن البيت وصفتو لي هي ذاتها ، أبوي قال ليهو كنت تدخل طوالي ، قال ليهو والله قلت ماف زول منكم لا انت لا ماهر في البيت فما أبيت ادخل ساي ، أبوي قال ليهو لا لا عادي والله انت ما غريب و أبوك زي أخوي والله ، الولد قال ليهو تسلم يا عم ، المهم ما عرفت تاني المطلوب مني شنو ....يعني تاني أسلم عليهو ولا أمشي !!؟
أمي قالت لي أقعدي مالك واقفه ، قلت ليها ماشه اعمل الشاي و طوالي طلعت و مشيت المطبخ لقيت مياسم و مرام هناك ، مياسم كانت بتقول ليها غيتو الولد سمح سماحه ، دخلت و قلت ليها حقو الواحد يسجل ليك ريكورد و يرسلو ل راجلك ، ضحكت و قالت لي أحسن ذاتو عشان يطلقني و أجي أعرس الولد دا ، قلت ليها غيتو انتي !! المهم اعمل الشاي ولا ح تعمليهو قالت لي عملتو ، طبعاً مرام ما إتكلمت معاي و أنا ما بحب اشوف زول زعلان مني و ما اسألو ، قلت ليها يا مرام لو انا غلط في حقك قولي لي عادي زي ما بتعملي في كل مره ، قالت لي هسي أنا مالي ؟؟ قلت ليها واضح انك زعلانه مني ، لو عملت شي ضايقك قولي لي أحسن من سكوتك دا ، قالت لي ماف شي ، مياسم قالت ليها أنا ذاتي ملاحظه ليك من قبيل ما بتتكلمي معاها ، يعني دا كلو بسبب شكلة ناس حمودي !؟؟ قالت ليها لا و ماف شي و كانت ح تطلع من المطبخ ، مسكتها من يدها و قلت ليها ما ح تمشي إلا تقولي لي ، قالت لي اقول ليك شنو ما عندي شي أقولو و أساساً ما زعلانه منك !! قلت ليها طيب قولي لي المضايقك ! مش أنا لمن أكون زعلانه أو متضايقه بجي بحكي ليك ؟؟؟
قالت لي لا ما بتجي تحكي لي ، بتمشي تحكي لأروى الشلابه ، مياسم ، قالت لي طلعت زعلانه عشان قبيل انتي و أروى دخلتو غرفتك و قفلتوا الباب عليكم ، مرام قالت ليها طبيعي أزعل ، اتخيلي انك تكوني متشاكله مع وحده و في نفس الوقت أختك أو صحبتك مصاحباها و بتحبها شديد !...قلت ليها والله يا مرام الموضوع ما خطير و نفس البقولو لأروى بجي بقولو ليك و انتوا الإتنين بالنسبه لي زي بعض ، قالت لي المشكله هنا ، أنا و هي ولا يمكن نتساوى ، يا أنا يا هي ! قلت ليها مرام بتبالغي !! ما للدرجه دي كمان ! بعدين انتي مش مشكلتك مع أروى كانت كلها بتدور حولين ماهر !؟معناها ماف شي يخليك تدخليني في الموضوع دا و تخيريني بيناتكم ! ما رد علي و طوالي طلعت من المطبخ ، مياسم قالت لي بتحب الزعل زي عيونها بس ما تشتغلي بيها ، مرات كتيره بحس انو ماف فرق بينها و بين حمودي ....غيتو ماهر أخوي دا معرس ليهو شافعه ، قلت ليها المهم إنها وفيه ليهو و مستعده تضحي بحياتها عشانو ، نحنا عايزين شنو غير وحده تقدر أخونا و تحبو و تكون ما شايفه غيرو و مستعده تضحكي بكل شي عشانو ، نحنا عايزين شنو غير راحة أخونا !؟ قالت لي فعلاً مع اني مرات بحس تصرفاتها أوڤر شويه بس دامو ماهر مبسوط معاها ف ماف مشكله ، قلت ليها ما ح تقدري تتخيلي مرام دي بتريدو قدر شنو ، قالت لي عارفه عارفه.....
المهم في اليوم البعدو قمت من النوم كسلانه و أنا ما عندي رغبه أمشي الجامعه ، ماهر مع إنو أتأخر على شغلو بسببي بس مع ذلك ما مشى خلاني انتظرني رغم إني اتأخرت شديد ، و أنا راكبه مع ماهر منيب اتصل علي ، طوالي فصلت المكالمه ، لمن تاني إتصل ماهر قال لي ليه ما عايزا تردي ؟؟
في البدايه اتوترت و ما عرفت اقول ليهو شنو بس في الآخر إتصرفت و قلت ليهو دي أروى و أنا عشان عارفه مواضيعها ما بتخلص ما عايزا أرد عليها هسي ، برجع ليها بعدين ...المهم منيب تاني ما إتصل ، لمن وصلت الجامعه اتصلت عليهو ، رد علي طوالي و قال لي آسف شكلي اتصلت في وقت ما مناسب، قلت ليهو ايوه لأنو كنت راكبه مع ماهر ، قال لي هو ح يوصلك كل يوم ؟؟.
قلت ليهو شبه كدا ، قال لي أخوك دا شايل حقوقي كلها ، ضحكت عليهو و قلت ليهو بعد دا ح أدخل المحاضره ، قال لي بتخلصي كم ؟؟
قلت ليهو يمكن 1 أو 12 قال لي تمام لمن تخلصي إتصلي علي ، قلت ليهو لمن أخلص عايزا أمشي المشتل 😁+انت خليت الشغل ولا شنو ؟؟
قال لي خلاص شميتيني؟؟
قلت ليهو بإستعجال لااا لاااا
ضحك و قال لي عايز أقضي الكم يوم ديل معاك لأني طالعه مأموره الأسبوع البعد الجاي ، قلت ليهو بالجد !! قال لي أيوه ، ها حددي تمشي معاي و لا تمشي المشتل ، قلت ليهو ما عارفه ، قال لي تمام واضح اني ما عندي ذرة قيمه عندك ، قلت ليهو لاااا لااااا والله ! قال لي اها !! قلت ليهو اها شنو !! قال لي تمام مع السلامه ...قلت ليهو بإستعجال ، بخلص 1 والله ، قال لي طيب أول ما تخلصي إتصلي علي تمام ؟؟
قلت ليهو تمام و قفلنا على كدا ....المهم مشيت حضرت المحاضره و طبعاً لمن جيت داخله كل القاعه تعاين لي لأنو اول مره يشوفوني و أشوفهم ، هم بعرفوا بعض لأنهم نزلوا قبليني ، المهم قعدت ورا و حضرت المحاضره و لمن خلصت الناس مشت تفطر و أنا ما مشيت لأني ما طايقه الجامعه ، شويه كدا أروى اتصلت علي ، قعدت اتونس معاها و سألتني اذا ح أجي المشتل اليوم أو لا ، قلت ليها طالعه مع منيب ، قالت لي اششششي ليه ، شكلو كل يوم طلعه جديده ، قلت ليها ايوه ، قالت لي ما قلت ليك ، أنا قدمت لشغل جديد في شركه كويسه و بكرا ح أمشي المقابله ، قلت ليها متأكده من الشركه دي إنتي و عارفه طبيعة الشغل ؟؟! قالت لي ايوه المره دي اطمني ، قلت ليها طيب موفقه يا رب و أن شاء الله تتوظفي ، قالت لي طيب الح يمسك المشتل منو ؟؟
قلت ليها ما عارفه والله لكن ح نشوف ليهو حل ، قالت لي طيب تمام مع السلامه ، قلت ليها الله يسلمك و قفلت الخط ، المهم بعد نص ساعه كدا بدت المحاضره التانيه ، ما صدقت متين خلصت ، أول ما خلصت اتصلت على منيب و فعلاً جاني و طلعنا سوا و اتكررت طلعاتنا دي طول الأسبوع ، بقى يومي ما بمر من دون ما هو يتصل علي أو اتصل عليهو ، اتعودت عليهو بسرعه و أساساً أنا قبل ما أعرف إنو معرسني كنت معجبه بيهو مع إني ما قلت الحاجه دي لأروى عشان ما تفضحني قدامو ، فإتخيلي الشخص المعجبه بيهو أو كراشك يطلع راجلك !! 💜
المهم يوم منيب اتصل علي و أنا في الجامعه و قال لي المره دي عايز أوديك لأجمل مكان بالنسبه لي ، قلت ليهو ماشين وين المره دي ؟؟!!
قال لي مفاجأه ، قلت قووولي ياخ أنا شفقانه ، قال لي لا خليها مفاجأه و لمن تخلصي اتصلي علي ، قلت ليهو طيب 💜
*لا أعرف طريقة أخرى سوى أن أكون بجوارك ليتوقف الحزن عن أكل قلبي 💜*
