*#قصة_ريدنا《07》*
*#بقلم_مها_حولي_الزاكي*
*♡ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــــ♡*
قالت لي ما تشغلي بالك ، قلت ليها مش قلتي لي أي حاجه راحت علي أو ما متذكره تفاصيلها كويس ح تحكيها لي !!؟
قالت لي أروى دي زمان كنت عايزاها ل ماهر أخوك بس هو مشى و عرس فلانه دي ...
قلت ليها دا كيف يا أمي !!
ناس أروى ديل مش رحلوا هنا ليهم ياداب سنتين و حاجه ؟؟
قالت لي قبل 6 ، 7 سنوات كدا كنا ساكنين جنبهم في أمدرمان بس رحلنا و جينا سكنا هنا و هم قبل سنتين جوا و سكنوا جنبنا ، قلت ليها طيب في ال6 سنوات دي كنا متواصلين معاهم ؟؟
قالت لي لا والله ..
قلت ليها طيب حصل مره ماهر قال ليك عايز أروى أو لمح ليك ؟؟
قالت لي هو مرتو دي مدياهو نفس عشان يقول أو يلمح !؟...قلت ليها : ليها حق يا أمي ، ماف مرا بتقبل الضر ، حاره والله !
قالت لي عرفتيها حاره كيف !؟
قلت ليها حسيت كدا ! المهم يا أمي عليك الله تاني ما تفتحي سيرة أروى و ما تخربي البيناتهم و ما تنسى انو عندهم طفل و التاني جاي في الطريق ، سكتت ما إتكلمت معاي ، المهم قمت من مكاني و مشيت غرفتي ، أول ما دخلت كدا مرام جاتني داخله ، عيونها كانت مليانه دموع ، قلت ليها مرام خير في شنو ؟!!! مالك يا بت !!؟
جات قعدت جنبي و قالت لي انتي الوحيده البتفهميني حتى ماهر ما قادر يستحملني و يحس بي ، قلت ليها ما مشكله أعذريهو زي ما هو مرات كتيره بعذرك ، قالت لي أنا سمعت كلامك انتي و عمتي ، ما عارفه اقول ليك شنو يا مها بس انتي ماف منك اتنين ، قلت ليها ما عملت حاجه أنا و ما قلت إلا الحق ، بس دا ما معناهو انك صح يا مرام و إنو أي تصرف منك لازم يتبرر ، لأنك مرات كتيره بتتمادي و بتعملي حركات ماف داعي ليها زي انك لمن تكوني متشاكله مع ماهر بتخربي وش معانا كلنا مع اننا ما قاعدين نتدخل بيناتكم و كمان ما بتراعي ل مشاعر ولدك الواقع في نص مشاكلكم دي .. ....المهم وسط دا كلو أنا كل البهمني انو حماده ما يعيش مجهجه بين أمو و أبوهو لو انتوا ما مركزين مع الحاجه دي و ما بتهمكم أنا بتهمني لأنو حمودي ما ليهو ذنب و من حقو يعيش حياة طبيعيه خاليه من المشاكل اليوميه دي ، ف إنتي بس حاولي ما تعصبي نفسك كتير ، أولا لأنك حامل و تاني حاجه عشان حمودي و علاقتك ب ماهر ، قالت لي طيب تمام و طوالي طلعت و مشت ، بعد حكاية ساعه كدا جاتني أروى ، قلت ليها جيتي بدري ! قالت لي المشتل بدونك ما حلو ، و ما أنا بس الفرق معاي غيابك ، في زول تاني كان حايم جنب المشتل و لمن اتأكد انك ما موجوده مشى 🌚
قلت ليها بطلي ياخ !...معقوله بعد العملو لسه بتجيبي سيرتو ! و بعدين أنا ما فاهمه الإنسان دا عايز مني شنو !!
قالت لي صراحة انا ذاتي محتاره فيهو بس الأكيد إنو غيابك بفرق معاهو و حاجه تانيه أنا عندي إحساس كبير انو دا هو الجاب ليك الهدايا ديك يوم ميلادك !!....لمن قالت كدا رفعت راسي و عاينت ليها بخلعه كدا!! قلت ليها لا لا ما أظن ، قالت لي لو ما هو منو طيب !؟ قلت ليها ما للدرجه دي هو من وين بعرف تاريخ ميلادي ؟؟ قالت لي بالجد عرف من وين ! قلت ليها و دا معناهو إنو دا ما هو لأننا ما بنعرف بعض ، قالت لي بس غيرو ماف !...سكته مسافه بعدها قلت ليها الجاب الهدايا دا شكلو بعرفني شديد ! يمكن كان زول قريب مني قبل ما أفقد جزو من الذاكره !بس ليه ما جاني عديل و فضل انو يرسل لي الهدايا !!؟ قالت لي برضو الإحتمال دا وارد لكن الضابط داك .....قاطعتها و قلت ليها أروى عليك الله ما تجيبي لي سيرتو ، قالت لي هسي بيني و بينك كدا هو ما عاجبك !! و إياك تنكري حقيقة إنك ما مركزه معاهو !
قلت ليها ايييوه ما عاجبني و أساساً ما مركزه معاهو ، قالت لي أقنعيني !
قلت ليها انتي ليه مصره على نقطة اني لازم أعجب بيهو و أحبو ! يعني هي حاجه واجبه !!!؟
قالت لي ما كدا بس الأنثى بطبعها بتميل للزول البحسسها انها مميزه و انو هو حابيها أو معجب بيها ، يعني حتى لو نكرت و عملت نفسها ما شغاله بيهو و ما مركزه معاهو بس من جواها بتكون عكس كدا و أنا عايزاك تكلميني بالجواك دا !🥲
قلت ليها بالجد عايزا تعرفي الجواي ؟!
نططت عيونها و قالت لي أكييييد أكيييد
قلت ليها تمام في شنو بينك و بين ماهر أخوي ؟!
طبعاً ملامح وشها كلها اتغيرت! قالت لي بإستغراب كيف يعني ما فهمت !؟
قلت ليها أروى ما تدسي مني و سؤالي واضح...
قالت لي سؤالك واضح لكن دا شنو السؤال الغريب دا ! يعني حيكون في شنو مثلاً بيني و بين أخوك !
قلت ليها لو هسي ما حكيتي لي ح أفهم إني ما صديقه مقربه ليك عشان كدا ما حبيتي تحكي لي و صدقيني تاني حيكون في أكتر من حاجز بيني و بينك .....سكتت ما قالت حاجه و أنا بقيت أضغط عليها عشان تتكلم ، عيونها إتملت دموع مسحتهم و قالت لي اقول ليك شنو يعني؟
اقول ليك اني كنت حابه أخوك و هو كان شايفني زي أختو ولا اقول ليك اني حتى لمن إعترفت ليهو اتجاهلني !!؟
