كارمن

الفصل الثاني والعشرون

ابتسمت كارمن بسعادة وهي تستمع الي حديث عمتها وتحدثت بشغف:
- بجد رشيد مطلقنيش!!

استغربت وداد من رد فعلها الذي يؤكد انها حقآ ساذجة.. صمتت كارمن قليلاً ثم استرسل لها عقلها ما سيفعله بها رشيد بعد خروجها من المشفي! بالطبع سيعاقبها علي كل ما فعلته به في الماضي. ارتجف جسدها بخوف وهي تنظر إلى وداد.

تحدثت اليها وداد بتحذير:
- اسمعيني كويس يا بنت صادق.. انا عملت اللي عليا وساعدتك وانتي اللي معرفتيش تهربي! يعني اتفاقنا زي ما هو ومش عايزة ابويا او جوزك حد فيهم يعرف انك اتنازلتي عن ارضك ليا.

أومأت كارمن برأسها بالايجاب قائلة:
- انا قولت لحضرتك قبل كده انا مش عايزة ارض ولا فلوس.. والارض دي اقل تعويض ممكن تاخديه من بابا علي ظلمه لكي وحياتك اللي ضاعت بسببه.

حدقت بها وداد بصدمة. لا تصدق ان هذه الفتاة تحمل بداخلها كل هذه الطيبه والسلام النفسي. اضافة كارمن وهي تنظر اليها بحزن:
- انا بس عايزاكي تعرفي ان مش حضرتك لوحدك اللي اتعذبتي بسبب رفض بابا ليكي واختياره الجواز من ماما.. بابا هو كمان اتعذب بسبب اختياره وعمره ما كان سعيد مع ماما ابدا.

حدقت بها وداد بذهول، صمتت كارمن لحظات قليلة ثم اضافة:
- وانا كمان اتعذبت بسبب اختيار بابا.. صدقيني لو كان بإيدي اختار الست اللي تكون امي كنت اختارتك انتي.

لمعت اعين وداد بالدموع وهي تستمع الي حديث كارمن الصادق والذي خرج من قلبها واخترق قلب وداد. ادمعت اعين كارمن وهي تضيف بحزن:
- لما شوفت الفرق بينك وبين ماما كنت حقيقي حزينه.. انا كنت مقدره ان حضرتك موجوعه من بابا بس في نفس الوقت عايزة تساعدي بنتك ومش عايزة تشوفيها حزينه والمهم انك مش عايزة تخربي بيتها وبتحاولي تنقذي علاقتها مع جوزها بأي طريقه.

بكت بحزن واضافة:
- ماما بقى عملت عكس كل اللي حضرتك بتعمليه عشان بنتك!

بكت وداد من اجلها واقتربت منها وعانقتها بقوة واردفت بثقة:
- وجعتي قلبي عليكي يا بنت صادق.

لاول مرة تشعر كارمن بحنان الام وعطفها.. اكتشفت بعد عناق وداد لها ان والدتها لم تعانقها بحياتها منذو طفولتها! بكت في حضن وداد وهي تربت على ظهرها بحنان وتتحدث اليها بثقة:
- من اللحظة دي انا امك ومش هفرق بينك وبين ازهار بنتي لحد ما اموت.

لم تستطيع كارمن الحديث وهي تبكي بداخل حضنها، ابتعدت عنها وداد قليلا وتحدثت اليها بقوة:
- متعيطيش يا كارمن.. بنتي متعيطش ابدا طول ما انا عايشه.

نظرت اليها كارمن واردفت ببكاء:
- انا تعبت اوي من كل حاجة بتحصلي.. انا مش عايزة حاجة من الدنيا غير ان اعيش مرتاحة مع الإنسان اللي انا بحبه.. صدقيني انا مش عايزة ارض ولا فلوس ولا قصر اعيش فيه.. انا بس عايزة اعيش من غير ما حد يأذيني!