Meant To Be

Chapter 3 - Crush

Mag-a-alas sais na yata ng umaga ako nakatulog. Pagkatapos kasi ng maaksyong ganap na iyon sa pagitan nina Kieran at Kylie, mga ilang minuto lang yata ang pinahinga nila at nag-another round na sila ulit.

Wala pa akong karanasan sa mga gano'ng bagay pero hindi naman ako gano'n kainosente. Pero jusko naman! Unang araw ko ngayon sa trabaho at pagod ako! Magpatulog naman sila!

Bandang alas onse ng umaga ng ako'y magising. Naramdaman ko kasi 'yong pagkalam ng sikmura ko. Kumain muna ako ng Skyflakes at tubig, pagkaraan ay nag-shower na. Ayon kay Hannah ay alas diyes daw nagbubukas 'yong karinderya na malapit dito. Nagsuot na lang ako ng simpleng maong shorts at asul na t-shirt bago lumabas.

Pagkalabas ko ng unit ko ay naabutan ko si Kylie na naninigarilyo sa labas ng unit niya. Nakasuot pa siya ng kulay violet na nighties. Nakakailang hakbang pa lang ako nang marinig ko ang pagtawag niya.

"Miss, bagong boarder ka d'yan?" kuryoso niyang tanong. She crinkled her forehead.

Napahinto ako sa paglalakad at marahan siyang nilingon. Payak na ngiti ang iginanti ko sa kanya bago ko siya tugunin.

"Oo, kakalipat ko lang kahapon," sagot ko.

Pagkabuga niya ng usok ay ibinaba niya muna saglit iyong hawak niyang sigarilyo sa barandilya.

"Talaga? May tao na pala d'yan kahapon?" tila takang-taka niyang tanong. Lumapit ako nang bahagya sa kinatatayuan niya. Mas naaninag ko tuloy 'yong makinis at maputi niyang kutis. Mamula-mula pa nga ito pag natatamaan ng sikat ng araw.

"Akala ko wala pang boarder d'yan," dugtong pa niya pagkaraan ay nagpakawala ng isang pilyang ngisi. Mas naging prominente 'yong malalim na dimples niya sa kaliwang pisngi. Napalunok ako.

"Maingay ba kami kagabi?" Napahalakhak pa si Kylie dahil sa sinabi. Napaawang ang bibig ko. Tantya ko rin ay pinamulahan ako ng magkabilang pinsgi. Nag-init kasi bigla ang aking pakiramdam. Parang ako pa 'yong nahihiya ngayon sa kanya.

"Pasensya ka na. Akala ko kasi wala pang tao d'yan. Nag-sleep over kasi kagabi 'yong boyfriend ko. Ako nga pala si Kylie," pagpapakilala niya. Inabot niya ang kanang kamay niya sa akin.

I immediately responded to her gesture. Tinanggap ko 'yong kamay niya at nagpakilala rin.

"I'm Scarlet. Actually, kaka-start ko lang kagabi sa Club DC."

"May regular gig ang banda namin doon. Laking pasalamat ko nga din kay Sir Christopher kasi pinayagan niya rin akong tumira rito sa staff house."

"Napanood ko nga ang gig n'yo noong isang araw," tipid kong sabi.

Nawala kami sa usapan nang biglang lumabas ng unit niya si Kieran. Wala siyang suot na damit pang-itaas. Nakasuot lang siya ng itim na jersey shorts. Mapungay ang mga mata niya at magulo 'yong buhok. Halatang kakagising lang.

Bigla tuloy akong napatitig sa maskuladong abs niya. Grabe! Naalala ko tuloy 'yong mga nababasa ko noon sa mga pocketbooks. Ganito pala ang itsura ng burning abs sa malapitan! Mabilis kong iniwas ang mga mata ko sa katawan niya dahil nasa tabi lang namin ang girlfriend niya.

"Baby, scrambled eggs, bacon and fried rice?" masuyong tanong ni Kieran sa katabi ko. Medyo may pagka-husky 'yong boses niya. Isang matamis na ngiti ang kaagad na iginawad sa kanya ni Kylie.

"Yes, Baby!" mabilis niyang saad.

Pumasok na si Kieran sa loob ng unit ni Kylie.

"Mauna na ako Kylie. Nice meeting you!" pamamalam ko sa katabi. Naramdaman ko na naman kasi 'yong pagkalam ng sikmura ko.

"Nice meeting you rin Scarlet!" tugon niya.

***

Miyerkules ngayon, nakapaskil sa labas ng Club DC na 'yong The Velvet ang banda ang naka-schedule na mag-perform ngayong gabi. Sa pagkakaalam ko ito 'yong pangalan ng banda nina Kieran at Kylie. Alas siyete pa lang ay halos mapuno na 'yong ibabang bahagi ng Club DC.