غفرانك

33

#غفرانك33
و الآخيره
بقلم : مها حولي الزاكي

والله يا لينا بِتي بُهيثه و بناتها شمتانين فْيَگ شمته و عاملنك ونسه ليهم في كل لمه و قعدة جبنه، قالوا نشوف تاني البعرسها منو لأنو حسب عقلية السودانيين المره المطلقه أو الأرمله دي اكعب انسانه مع إنو بُهيثه عندها بت مطلقه بس لعبة على الناس و سوت الغلط غلط ولدي و قالت بتها دي ملاك و نزل على الأرض

لينا : اصلاََ هم م̷ـــِْن يومهم كدا و عاملين فيها الشريف الرضى و حسبي الله و ڼـعمًـْ الوكيل فيهم ، و أصلي ما مستغربه يا عمتو لأنو حتى اقرب الناس لينا بقوا يتكلموا فينا و في طلاقي كلهم شمتوا فيني إلا انتي الوحيده الوقفتي معاي حتى أبوي عاتبني يا عمتو ولامني عشانهم

فضيله : يا بت ها انتي زي بتي سناء و واحد لْـۆ ما وقفت معاك ح اقيف مع منو يعني؟ انا أكتر وحده عارفه قدر شنو انتي اتظلمتي و كل العملتيهو كان عشان تحافظي على زوجك و زواجك و دا ما غلط لَـگِنْ بيني و بينك عُدى دا ذاتو ما بستاهلك اصلاََ م̷ـــِْن قام كدا محارب عماتو ديل كلهم و مباري لـ خالتو بُهيثه يشهد الله لْـۆ جا بيتي دقيقتين ما بتمها و طوالي بطلع و دا حالو في باقي بيوت عماتو عاد نحنا ديل التقول كاتلين ليهو زول، ما بطيق أهل ابوه ديل كلهم

لينا: ايوه كان واضح بالنسبه لي لما سكنا في بيت خالتو قدر شنو هو بريدها و ما برفض ليها طلب، مرات كتيره كنت بتغاظ منو و م̷ـــِْن طيبتو الزايده معاهم أي حاجه بتحتاجها خالتو أو بناتها طوالي و م̷ـــِْن غير ما يتردد بجيبها ليهم و قروشو دي كلها كان مضيعها فيهم ...ح يستفيد منهم شنو في النهايه؟ ما عارفه ليه هو متعلق فيهم كدا، صحي العواليق بتحب العواليق
فضيله: ههههههاااااي العواليق بتحب العواليق؟! ههههههاي انتي شكلك بطنك طمت م̷ـــِْن الناس ديل عشان عرفتيهم على حقيقتهم، والله انا م̷ـــِْن زمااان ما بطيقهم و ياما قلت عليهم ناس انانيه و وسخه بس ماف زول اشتغل بي أو قال لي بتقولي في شنو خاصة منصور أخوي وهسي كمان شايفه ناصر أبوك بتضايق لمن نقعد و نتكلم عنهم
لينا: اصلا أبوي و كل اعمامي ديل كدا بتعاملوا مع الناس بحسن نيه و ما كل الناس بتستاهل اننا نعاملها معامله كويسه و زي ما قلتي عشان عرفتهم على حقيقتهم عشان كدا بطني طمت منهم و مها الفرحان بيها دي و الكان عايز ليهو مشڱلھِ معاي عشانها خليها تضوي ليهو و ما عافيه ليهم الإتنين و إن شاء الله ما يشوفوا يوم سعيد في حياتهم و ربنا يقفلها في وشهم محل ما يقبلوا و يعذبهم في الدنيا قبل الآخره ، و خالتو القالت تاني ح يعرسها منو قووولي ليها بكرا بجيب سيد ولدك و بجيب الأحسن منو بـ100 مَـرّھٌ و بكرا القريبه دي ح افاجأهم بعرسي بس خلي العده بتاعتي تنتهي باقي لي شهرين و كم اسبوع كدا
فضيله: امممم بمناسبة الكلام دا عندي ليك عريس بس لي فتره متردده و خايفه اقول ليك تقومي ترفضي و تحرجيني عشان كدا ما گلّمّتگُ بس هسي ح اقول ليك لَـگِنْ ما ح أغصبك على حاجه في النهايه انتي زي بتي و ما بريد ليك إلا السمح و سعادتك عندي في المرتبه الأولى
لينا: قووولي يا عمتو سامعاك انا