فصلية الشيخ فهد

البارت الثالث عشر

.محمد : بس بابا انتي راح تروحين فصلية
( وبقى يبجي)

( التفتت لعقيل استفسر)

غالية بخوف : يعني شنو فصلية، وليش بابا يبجي

عقيل : حبيبتي، يعني تتزوجين بس عقد سيد، وما الج حقوق

غالية بأستغراب: ليش

عقيل : لان بابا دعم ابوهم وهو شيخ جبير
لذلك رادو فصلية لازم، وترة هم ما عايشين ببغداد

غالية : ليش وين

عقيل : عايشين بالكوت ومنطقة ريفية

غالية : زين اني ما الي رأي عدكم لو شنو؟!

محمد بدموع: غصباً علينة بابا غصب

( حضني وبقى يبجي واني اباوع بوجوهم
مليانة دموع واني احس راسي افتر
شنو جاي يصير وياية وشنو يعني
اتزوج بدون حقوق، هاي شنو جاي يصير وياية
دخت دخت، لحد ما
دفت ايد بابا بهدوء وتركت الغرفة بدون كلام
وصعدت لغرفتي وسديت الباب
واني اسمعهم اجو وراية يردون يعرفون شنو بية
واني اريد بس يروح الصوت
لان عقلي افتر ومجاي اركز لحد ما محسيت على
نفسي واني واكعة بلكاع)

كعدت الصبح على صوت باب غرفتي يندك قوي
وصوت اخوية عقيل يكول خلي نكسر الباب خاف صار بيها شي
كمت بالكوه وفتحت لهم الباب
وامي حضنتني حيل ونوره حضنتني
ساهره : خوفتيني يوم عليج ليش هيج تسوين بينة
( واني ولا نطقت حرف طلعت من الغرفه ورحت للحمام وكعدت جوة المي بملابسي واباوع على نفسي هيج اني رخيصه ومالي قيمه؟!
زين معقوله اهلي ما يحبوني وهذا حبهم الي كذب
زين شنو مصيري اكيد مجهول وحتى زوجي مجهول
اصلا محد طلب موافقتي اكيد ما يطلبوهة لان ما يحبوني واهم شي عدهم يخلصون من هاي المشكله اللي سووها زين ليش ما انطوهم  فلوس؟!
يعني اني ارخص من فلوسهم؟!
الف سؤال براسي وما لكيت جواب
وعدت الليالي والليالي وانا ما احجي ويا اي احد وتركت الاكل والشرب
بلكوة مرات نورة تخليني اكل بس بدون نفس
ونحلت هواية من التفكير

اشترولي امي وامنية ملابس ونورة خطية انطتني منهة ملابس نوم ومكياج هواية واكسسوارات
وكعدت تعلمني الي راح يصير وياية بعدين
ما انكر هي طمنتني، بس اني بوقتهة حيل جنت خايفة ومتوترة بشكل فضيع

                        (( الكوت ))

رحت لأمير المؤمنين '' ع''
اطلب حاجتي وهزيت شباجة، اريدن حاجتي منك يبو الحسنين
حاير وحيرني زماني وحسيت انغشى علية
واجاني بلطيف زلمة كال كافي تظلم بنات العالم
وتكسر ركابهن، ماكافي ضليمتك لمناهل وغيرهة وغيرهة، ما تجل ولا تمل، عوف بنات العالم بحالهن
ومناهل من كون ماجابتلك فرخ
خلهة تروح لحال سبيلهة تراهة مبخوتة وانت ضالمهة
وخلهة امك ترضى بعدين

فزيت وآنا مخنوك اكثر
طلعت اكلتلي لكمة وشربتلي استكين جاي
اريدن راسي يصفى، ورديت لبيتي
لجن كلت اروحن لغزالتي عبنهة هاي ايامهة وتجيب
وآنا من ساعة الصار وآنا ما سائل عليهة
اضنهة جابت وانا مالي خبر، عبن فات موعد جيابهة هواي
رحت اعليهة ولكيتهة هساع كاعدة من نومتهة
وخدامتهة حذاهة كاعدة وتخدمهة

العنود : يمة هلة بشيخ الزلم، هلة بلجاي لينة

الشيخ فهد : هلة بيج يبعد هلي، اشتاكيتلج

العنود : اشوفنك مكطع الجيات

الشيخ فهد : تعرفين حالي، يبعد حالي ومالي

العنود : آنا شلون وي حجيك الحلو ههههههه

الشيخ فهد : اروحن فدوة لهاي الضحكة الترد الروح

--------------

وللحكاية بقية
مع تحياتي الكاتبة (*حور العين *)