فصلية الشيخ فهد

البارت الثلاثون

دخلت لغرفتي اريد ارتاح شوية لان ضهري أذاني
المواعين عبالك قبيلة متريكين مو عائلة ههههه
اندكت الباب عليه

كمت فتحت الباب لكيت بنت الشيخ الصغيرة عمرهة تقريبا سنتين

درة : خالة اريد اكعد يمج

غاليه بابتسامة واسعة : تعالي ادخلي حبيبتي

( طبعا هاي بنت الشيخ ما اشوفهة ابد
الشيخ ميحب تطلع من غرفة امهة
يكول تشوف النسوان وكلامهم وتتعلم
وحتى بنته الثانية هم ميطلعهة
يكول يبقون بغرفتهم احسن
بس وقت الي يتجمعون الكل يطلعن وية البنات الصغار)

جانت حيل هادئة وحبابة
شافت الميز وعليه المكياج والعطور
راحت يمه

درة : خالة هاي شني

( رحت يمهة وابتسمتلهة)

غاليه : هذا مكياج مال كبار

درة : وهذا

غاليه : هذا عطر، تردين اخليلج؟!

درة : لا ابوي ما يرضى

غاليه : لا هذا عطر، يعني ريحته طيبة مبي شي

درة بخجل: بكيفج

( خليتلهة منه، وفعلا من يكولون العطر من جسم لجسم يختلف، جان العطر عليهة يجنن
وبقت كل الي تشوفهم تخلي منهم
واني اباوعلهة فرحانة، شكد اتمنيت تصير عندي بنية مثلهة، بس كلت انشالله اول ما احبل يطلع ولد
حتى يصيرلي مكان قوي، مو ابقى طول عمري على الهامش، بس هاي البنية حيل دخلت بكلبي
نعومتهة وحبابة ومؤدبة، فعلاً ونعم التربية
بقت يمي تقريبا ساعتين لحد ما دكو الباب يسألون عنهة، وكتلهم يمي، كالو امهة تريدهة
وهي بوستني وراحت)

بقيت كاعدة وحدي ضوجة ما اعرف شسوي
اتمددت وبقيت اباوع للسكف
شيصير لو اني بعدي يم اهلي
زين هم شلونهم بدون
اخواتي، امي، اخواني وابوية
معقولة مفتقديني؟
يمكن اكثر وحدة تحبني وتفكر بية هي نورة
حيل تحبني ومتأكدة من حبهة
معقولة هم تنقهر علية، هيج اني صرت بعيدة عنهم
ومو بكيفي اشوفهم؟!

مرت تقريبا ٣ ايام وجان اليوم هو يومي
واني عادة اذا يكون يومي احضر ملابس وكلشي من الصبح، لان الشيخ بأي وقت يجيني
كملت ملابسي وعطوري وخليتهم على الميز ودخلت
سبحت سمعت بابا غرفتي انفتح وانسد
يعني الشيخ دخل، كملت بسرعة وطلعت ولكيته فعلا بلغرفة

الشيخ فهد : حمام الهنة

غاليه : على كلبك حبيبي

الشيخ فهد : شني ما اشتاكيتيلي

غاليه : شلون ممشتاقتلك، غير انت حبيبي وروحي

الشيخ فهد : ااخ بوية، شني هلحجي هاذ، مو تعرفين كلبي رجيج

غاليه : تعيش وادللك يا عمري

( كعدت بحضنه واخذت الجكارة منه وذبيتهة)

الشيخ فهد باستغراب : شني هاي ليش

غاليه : اخاف على صحتك

الشيخ فهد : اروحن فدوة ونذر لليخاف

( حضني حيل واخذني لغير عالم
فعلاً جانت احضانه بلنسبة الية
الامان والدفو، رغم زواجنة ضروفة صعبة
وحسيته راح يأذيني بسبب اهلي بس الي شفته منه
جان انسان متواضع ويخاف ربه
ومن بعد موت ابنه، صار حيل حذر بلتعامل
يمكن يخاف على نفسة وعلى الي حواليه
خاف يندار بيهم الزمن)

صار العصر والشيخ يمي
واني كلساع البس شكل
اليوم الشيخ عاجبه يشوف ملابسي
يكول اول مرة يشوف هيج، يمكن مو صح بس الي شفته، هنا ما عدهم هيج ملابس حلوة

الشيخ فهد : راح عن بالي اكلج

غاليه : كول حبيبي

الشيخ فهد : اليوم يوصل جلال النة

غاليه : اني هم مسيت اكولك منو هذا جلال

الشيخ فهد : اوووف هذا اخوي وعضيدي الماجابته امي

غاليه : يعني اخوك؟

الشيخ فهد : اكلهة ما جابته امي تكلي اخوك

غاليه بضحكة: لا يعني خاف ابن ابوك

الشيخ فهد بضحكة : لاله، هذا ابن عمي وحزام ضهري

غاليه : وين عايش

الشيخ فهد : عايش بالسويد

غاليه : الله شكد حلوة

الشيخ فهد : لجن موش احلة من بلادنة

غاليه : ما اعرف بس احس احلى

الشيخ فهد : دكومي وحضرو العشة
خافن يجي جوعان، كال الساعة ب ٧ يوصل
وعلما يجي لهنا صايرة ب ٨

غاليه : تدلل يا عيوني انت

( كمت بدلت وطلعت وكلت للبنات حتى نحضر
اجة الشيخ كال راح اجيب كم كيلو لحم نشوي
كتلة اذا يحب اني اشوي بس كال لا احنة كلنة نكعد بلبستان ويشوون الولد
سويت كباب عروك وكبة ونواشف
وكالو يحب البتيته مسلوكة هم سويتهة
والبنات سون الخضرة والزلاطات
والخس والفجل
وكملنة كلشي تقريبا الساعة ب ٦ ونص
وبقى بين ميجي بس نكليهم

دخلت سبحت وبدلت لان ملابسي اتدمرت من الشغل
وكلت عيب يشوفوني هيج
عبالي يجون وياه اهلة وخاف عدهم بنات)

وصارت الساعة ب ٨ وربع وكالو اجة جلال

---------------

وللحكاية بقية
مع تحياتي الكاتبة
(*حور العين *)