قصص الأنبياء بالعاميه

40 موسي عليه السلام 15

4️⃣0️⃣
وبدأ زمن " التية " ..

زمن أية 🤔!!؟
= التية ،، اللي ربنا حكم فيه علي بني إسرائيل ب40 سنة  يتحرموا فيهم من دخول الارض المقدسة ..

اة ،، أية الحكمة بقي في ال40 سنة دول مفهمتش 😕

حكم ال40 سنة دول عقاب ليهم ،، ممكن يكونوا ماتوا أو جاتلهم الشيخوخة مثلا..
فلما يتولد بعدهم جيل جديد ماداقش الذل..
هيتربي وقتها على الشريعة والدعوة وعبادة ربنا بس  فيقدر ساعتها يقاتل وينتصر ويحارب عشان يحكم بيت المقدس ..

طيب والتيه 🤔
التيه بقي ،، أنهم يفضلوا في الصحراء من غير أي استقرار ..
هيفضلوا ماشييين ماشيين ماشييين من غير ما يعرفوا هيعملوا أية ولا يروحوا فين !!
هياكلوا منين ولا يشربوا منين !!
كل اللي هيعملوه أنهم هيسافروا صبح وليل ،، ليل وصبح!!
حتي من غير ما يعرفوا هما فين ولا رايحين على فين ولا هيوصلوا إمتى!!

وليه مامتوش احسن !!؟🤔
عشان هما اختاروا الضلال ،،
اختاروا ميدافعوش عن أرضهم ويحموها ويرجعوها ،،
اختاروا بعد كل اللي ربنا بينه من معجزات ليهم أنهم برضو ميأمنوش بيه ،،
اختاروا مايقفوش مع سيدنا موسي ويحاربوا علي دينهم ،،
عشان كدة ربنا حكم عليهم بالضلال وهما عايشين متعذبين ..!

وسيدنا موسي راح فين 🤔
سيدنا موسى وهارون كانوا معاهم في التيه لكن ربنا خفف عنهم المعاناة طبعا ❤❤

بني إسرائيل فضلوا ماشين ماشين لحد ما تاهوا في الصحراء  ..
مشيوا كتير جداااااااااا من غير أكل ولا مية ..
مشيوا في الحر والشمس والتوهان  ،، مش عارفين طريق للخروج..

جاعوا !! مش قادرين يكملوا ،، تعبوا من كتر المشي !!

فقالوا لسيدنا موسي إنهم جعانين والدنيا حر وخلاص مش قادرين،!!😒

فسيدنا موسي دعا ربنا ..

وبالرغم إن التيه دي كان عقوبة ليهم ومفروض كل المُعاناة اللي يواجهوها يكون من ضمن العقوبة ..
بس  رحمة ربنا دايما بتكون فوق كل حاجة ❤❤

فربنا استجاب ❤
ونزل عليهم السحاب يغطي عليهم من حر الشمس❤ وأنزل عليهم المنّ والسلوى..❤

يعني أية المن 🤔
المنّ هو يشبه الصّمغ في ملمسه،
وطعمه أحلى من العسل،، بينزل من الأشجار ..
لو اُتاكل لوحده يبقي آكل طعمه حلو..
ولو اتخلط بالمية  يبقي مشروب طعمه حلو ،،

طيب والسلوي 🤔
السلوى بقي فده نوع من أنواع الطيور شبه السمان كدة بس أكبر شوية 🐤

ربنا أمرهم إنهم ياخدوا من المن والسلوى اللي يكفيهم في يومهم ومايزودوش ومايطمعوش ومايخزّنوش أي حاجة..
ومايقلقوش لإن ربنا هيبعتلهم كل يوم منّ وسلوى ..

وَظَلَّلْنَا عَلَيْهِمُ الْغَمَامَ وَأَنزَلْنَا عَلَيْهِمُ الْمَنَّ وَالسَّلْوَىٰ كُلُوا مِن طَيِّبَاتِ مَا رَزَقْنَاكُمْ

هيفضلوا على الحال ده طول الأسبوع معدا يوم السبت ..
يوم السبت هو اليوم الوحيد اللي مش هيبقى فيه نزول للمن أو السلوى  ..
ويوم الجمعة هيكون المنّ والسلوى مضاعف ..
يعني هيجيلهم نصيب يومين و مسموحلهم يخزّنوا منه عشان ياكلوه يوم السبت!!

اشمعني يوم السبت 🤔!!
عشان يبقى السبت هو يوم للعبادة ..
يوم يسعوا فيه لعبادة ربنا وبس ..

ربنا وفر لهم كل حاجة،،
يعني أكلين شاربين نايمين ومتظللين و مش تعبانين في أي حاجة،،
وكانوا قبل كده مُستعبدين ومقهورين ومكنوش بيتكلموا،،
لكن رغم الكرم الربّاني ده كله هما زهقوا من المن والسلوى 😒
مش يشكروا النعمة والعافية بقى ..

لااااأ ...ده قالوا لسيدنا موسي :
يا موسى احنا مش بناكل غير صنف واحد بس واحنا مش مستحملين بصراحة.😒

أيوة يعني عايزين إيه!!

اطلب من ربك إنه يطلع لنا من الأرض البصل والعدس والقمح😒

"وَإِذْ قُلْتُمْ يَا مُوسَى لَن نَّصْبِرَ عَلَىَ طَعَامٍ وَاحِدٍ فَادْعُ لَنَا رَبَّكَ يُخْرِجْ لَنَا مِمَّا تُنبِتُ الأَرْضُ مِن بَقْلِهَا وَقِثَّآئِهَا وَفُومِهَا وَعَدَسِهَا وَبَصَلِهَا"

سيدنا موسي اتصدم !!!!
يعني بتقولوا ادعوا لنا ربك ..أنا فكرت انكم هتطلبوا مائدة من السماء مثلا أو حاجة كده عظيمة بما إنكم طالبين إني أشفع لكم عند ربنا في استجابة الدعاء..

بقى عاوزين تسيبوا المن والسلوى الأطعمة الشهية النادرة بالنسبة لكم دي عشان تاكلوا بصل وعدس إللي كل الناس بتاكله عادي😳

"أَتَسْتَبْدِلُونَ الذي هُوَ أدنى بالذي هُوَ خَيْرٌ"

لو كنتوا عايزين البصل والعدس تقدروا تروحوا اى دولة  وأي قري هتلاقوه فيها !!

اهْبِطُوا مِصْرًا فَإِنَّ لَكُم مَّا سَأَلْتُمْ ۗ

من سوء أدبهم  مع ربنا عز وجل،،
وكأنهم كل شوية بيسجلوا مثلا إن احنا مش معترفين إنه ربنا احنا كمان ده ربك انت بس لحد ما نقرر .

وشوية يؤمنوا وشوية يكفروا وينتكسوا،،
وحتى وهمّ مؤمنين بيكونوا مذبذبين ومتشككين.!!!

فربنا غضب عليهم وكانت عقوبتهم المرة دي :
بالذل والهوان في الدنيا , وغضب ربنا وسَخَطه في الآخرة!!

وَضُرِبَتْ عَلَيْهِمُ الذِّلَّةُ وَالْمَسْكَنَةُ وَبَاءُوا بِغَضَبٍ مِّنَ اللَّهِ ۗ
ذَٰلِكَ بِمَا عَصَوا وَّكَانُوا يَعْتَدُونَ

بس طبعا كان فيه من بني إسرائيل .. اللي آمنوا بسيدنا موسي وبربنا ..
فالعقاب مش هيكون علي الكل ،،

ومن عدل ربنا ورحمته ان زي ما كان جزاء الإساءة عذاب , فجزاء الإحسان ليهم بإحسان ❤
..
(إِنَّ الَّذِينَ آمَنُوا وَالَّذِينَ هَادُوا وَالنَّصَارَىٰ وَالصَّابِئِينَ مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَهُمْ أَجْرُهُمْ عِندَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ)

........... يتبع ان شاء الله ❤️

كل عام وانتم بخير
رمضان مبارك