قصص الأنبياء بالعاميه

5 سيدنا إدريس عليه السلام

5️⃣
هو النبي اللي بعد شيث دة هيبقي تالت نبي ولا تاني نبي ؟🤔

زمااااان أوي كانوا بيقولوا عنه أنه أول نبي بعد سيدنا آدم وشيث..

طيب ولية مقالوش إن سيدنا شيث هو النبي التاني ؟!
= لأن سيدنا آدم وصي سيدنا شيث أنه يعلم الناس أوامر ربنا بعد ما يموت ،، ولما سيدنا شيث بقي نبي ماقعدش فترة كبيرة ومات ،، ومعملش اي حاجه غير اللي سيدنا آدم علمهاله يعلمها للناس وبس ..!
ولما جه النبي اللي بعده برضو عمل اللي سيدنا آدم وسيدنا شيث علمهوله وبس ..!
بس زمااااااان زماااااان كان اسم سيدنا شيث والنبي اللي هنتكلم عنه ..كانوا بيقولوا اسمائهم في قصه واحدة ،،
كانوا بيقولوا شيث و .......... ف الناس افتكروا أنه أول نبي بعد سيدنا آدم ،،

يعني كدة هيبقي النبي رقم كام ؟؟
__ 3

ومين بقي ؟؟؟ النبي دة ؟؟

بعد ما مات سيدنا آدم وسيدنا شيث إبتدا الناس ينسوا ربنا وينسوا اللي اتعلموه من سيدنا شيث وابنه أنوش وبدأت تنتشر المعاصي في الأرض ..

أنوش ابن سيدنا شيث كان عنده ولد اسمه إدريس ..

إدريس كان ولد صالح جدا ومؤمن وبيسمع كلام ربنا ❤ وكان بيعمل بوصيه أبوه أنوش وسيدنا شيث وادم ..
كان بيعلم الناس الخير والشر ،، والحلال والحرام ..

بعد ما سيدنا شيث مات مكنش في نبي غيره ،،

ولما الناس بدأت تبعد عن ربنا ،، فربنا بعتلهم سيدنا إدريس يبقي نبي ❤
عشان يفكرهم بدينهم ،، ويخليهم يرجعوا تاني يسمعوا كلام ربنا ويبعدوا عن المعاصي ..

( واذكر في الكتاب إدريس إنه كان صِدّّيقاً نبيا) ..

سيدنا إدريس كان بيصدق كل حاجة بتيجي من عند ربنا ❤
فكان صادق أوي في إسلامه ❤ وكان بيقول للناس كل حاجة عرفها عن ربنا بصدق ❤

ولية كان اسمه إدريس ؟؟
= عشان كان بيحب التعليم وبيحب يقرأ ويحفظ صحف سيدنا آدم وشيث ،، وكان أول واحد يكتب بالقلم وبيكتب بالرمل ،، بس كان ليه حاجات كتير تانية عملها وكان هو اول واحد يعملها وكان متميز فيها جدا ❤

زي اية ؟؟
=كان اول واحد يكتشف الخياطة ..

امال الناس قبله كانت بتلبس أية ؟؟
= كانوا بيلبسوا الجلود ..

وكمان كان اول واحد فهم علم الحساب والفلك والنجوم ،،
وكمان هو اللي صنع الآلات والأدوات ..
وكمان كان شاطر أوي في الهندسة المعمارية ..
وكان هو الأصل في علوم كتير أوي احنا اتعلمناها دلوقتي منه ❤❤

سيدنا إدريس كان من أنشط الانبياء ،، كان مجتهد أوي في أنه يفكر الناس بربنا دايما❤❤
وكان دايما يفكرهم بالصح والغلط ❤
مكنش بيسيب اى حد خالص غير و يعمله أنه يعمل الخير ❤

في.يوم من الايام ،، ربنا أوحي لادريس وقاله :؛
"يا إدريس إني أرفع لك كل يوم من العمل كمثل أعمال أهل الأرض كلهم"

سيدنا إدريس من كتر الفرحة بقى نفسه ربنا يطول ف عمره اكتر عشان ياخد ثواب أكبر ❤
لانه كان بيعلم الناس الخير ،، والدال علي الخير كفاعله❤

في يوم جاله ملك من السما .. ❤
سيدنا إدريس قال له ::؛ ربنا قال لي انه يكتبلي كل يوم مثل أعمال أهل الارض كلهم ,،

في يوم من الأيام سيدنا إدريس طلب من الملاك ده إنه يكلم ملاك الموت بالنيابة عنه ويوصّيه يتأخر عليه شوية عشان ياخد ثواب أكبر بالإجتهاد في العمل والشكر والعبادة أكتر وأكتر..❤
الملاك رد عليه قاله؛
إن الأعمار مكتوبة عند ربنا ومفيش حد هيتأخر عن معاده اللي مكتوب ..

سيدنا إدريس كان عارف الحقيقة دي ومكنش عنده إعتراض على أمر ربنا ،، 
فوافق الملاك وقاله يروح معاه ويكلم ملك الموت بنفسه..

وفعلاً أخد الملك سيدنا إدريس وابتدا يطلع بيه من السماء الدنيا إلى السماء التانية ❤ إلى التالتة ❤ لحد ماوصل للسما الرابعة ❤ فقابلوا ملك الموت هناك..

ابتدا الملك الي مع سيدنا إدريس يكلم ملك الموت ويقوله الطلب الي طلبه سيدنا إدريس..

فملك الموت سأل الملاك وقاله فين سيدنا إدريس  ؟
قال له في السماء الرابعة

ملك الموت قاله سبحــان الله!
ربنا قالي إني أقبض روحه دلوقتي ف السما الرابعة!
ومكنتش عارف إزاي هاخد روح سيدنا إدريس في السماء الرابعة وهو اصلا في الأرض ❤

الملاك سأله هو فاضل اد ايه وسيدنا إدريس يموت ،،
ملك الموت اقاله إنه مافاضلش ولا حتى طرفة عين..

فقبض ملك الموت روح سيدنا إدريس وهو ف السما الرابعة ..

وكان سيدنا إدريس في مكان جميل اوي عند ربنا ❤
{وَرَفَعْنَاهُ مَكَانًا عَلِيًّا } ..
وكل عام وانتم بخير
رمضان مبارك 🌙