قصص الأنبياء بالعاميه

ذى القرنين 2

يأجوج ومأجوج

في حديث لرسول الله ﷺ  بيقول:
"أَلا أُخْبِركم بِخيَارِكم ؟ الصحابة قالوا : بلى يا رسول الله.
قال: الذين إذا رُؤُوا ذُكرَ الله"

= ساعات بنشوف واحد ولّا واحدة نحس إنه شخص صالح وإنه شخص قريب من ربنا!
مع إن دي حاجة قلبية ، غيبية ، منعرفهاش ولا يعلمها يقينا إلا الله، بس شكله بيقول كده سبحان الله..
تصرفاته وكلامه بيقولوا كده ..

ماهو اصل الناس الصالحين دول بيبان عليهم..
بيبان على شكلهم وعلى تصرفاتهم😊 "" ومش قاعدة ثابته مع الكل طبعاً ""..

زي ذو القرنين كدة 😉
اول ما دخل علي الناس إللي مكنوش عارفين ولا لغة غير لغتهم وكانوا مصممين إنهم يوصلوا رسالتهم لذي القرنين

رغم انهم أول مرة يقابلوه و ميعرفهوش..
لكن شافوا فيه الرجل الصالح 😍

طب إيه رسالتهم بقى !؟

= قالوا:
يا ذا القرنين إن يأجوج ومأجوج قوم مفسدون في الأرض ..
بيقتلوا ويظلموا ويخرّبوا كل حاجة يشوفوها..

فاحنا عايزين منك خدمة، وهي:
إنك تجعل بينا وبينهم سد عشان ميخرجوش علينا ويفسدوا علينا معيشتنا...ومتخفش إحنا هنديك أجر كبير مقابل مساعدتك لنا..

"قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا "

طبعا ذو القرنين مش محتاج أي أموال، ده مَلَك شرق الأرض ومغربها!
فقال لهم:
مش عايز أجر ولا فلوس، أنا ربنا عطاني نِعم أعظم من أي أموال..

"قَالَ مَا مَكَّنِّي فِيهِ رَبِّي خَيْرٌ ..

أنا مش عايز فلوسكم، أنا عايزكم انتم نفسكم.. عايزكم تشتغلوا معايا في بناء السد المنيع ده..

"فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْمًا "

الموقف دة عامل  زي :
لما يكون حد فينا عايز يلتزم وعنده مشاكل كثيرة ومش عارف يبدأ منين،
فندوّر على حد يحل لنا مشاكلنا من غير ما نكون احنا نفسنا طرف في الحل،
مثلا حد يقول مش عارف أصحى أصلي الفجر 😔
فنقول طيب نام بدري واظبط المنبه وقول الأذكار وادعي ربنا،
فهو يسيب كل ده ويقول لأ أنا عايز حد يرن عليّ ويصحيني!!

طيب فين معالجتك انت للموضوع من طرفك..
فين اجتهادك بجانب طلبك لمساعدة الآخرين؟..

مهما الناس ساعدوك، في مرحلة هيبقى مطلوب منك انت الحسم فيها بنفسك ،، بالاستعانة بالله وحده،، محدش هيقدر يسقيهالك بالمعلقة،،

الدكتور بيوصف الدواء، لكن إللي بيشرب الدواء هو المريض!

فلازم يكون عندنا ذاتية ونعتمد على نفسنا👌

ابدأ بنفسك وهتلاقي ربنا بعت لك إللي يساعدك وإللي يوجهك..

"إن الله لا يغير ما بقوم حتى يغيروا ما بأنفسهم"..

فذو القرنين قالهم أيوة أنا هبني السد لكن مش هبنيه أنا وجيشي لوحدنا،، قوموا اشتغلوا معايا..
اتعبوا عشان تلاقوا النتيجة👌

بدأ يوجههم..
هاتوا قطع الحديد..
وعشان هو عارف شغله وعارف إزاي هيبني السد بدأ هو إللي يحط الحديد ويرتبه،
فبعد ما رص الحديد في الفراغ إللي بين السدين قال لهم:

انفخوا النار في الحديد عشان يسخن..
فلما سخن قال لهم ؛
هاتوا النحاس المذاب عشان أسد الفجوات بين الحديد ويمسك كله في بعضه ويبقى حتة واحدة،،

"آتُونِي زُبَرَ الْحَدِيدِ حَتَّى إِذَا سَاوَى بَيْنَ الصَّدَفَيْنِ قَالَ انْفُخُوا حَتَّى إِذَا جَعَلَهُ نَارًا قَالَ آتُونِي أُفْرِغْ عَلَيْهِ قِطْرًا"

بعد ما السد اتعمل خلاص ومسك في بعضه بقوة، اتحبس يأجوج ومأجوج ورا منه، ومعرفوش يطلعوا من فوقه ويعدّوا، ومعرفوش حتى يخرموا حتة من السد ويطلعوا منها على أهل البلد..

"فَمَا اسْطَاعُوا أَنْ يَظْهَرُوهُ وَمَا اسْتَطَاعُوا لَهُ نَقْبًا "

طبعا ده إنجاز جديد كبير وعظيم..
لكن ذو القرنين ماوقفش وبص للسد كده وقال بتكبّر:
إيه الجمال والعظمة دي!
ده شغل مش أي حد يعمله..
لأ، ذو القرنين وبكل تواضع وعبودية لله عز وجل قال لما بص للسد والناس المؤذية محبوسين وراه والغلابة عايشين في أمان

"قَالَ هَذَا رَحْمَةٌ مِنْ رَبِّي فَإِذَا جَاءَ وَعْدُ رَبِّي جَعَلَهُ دَكَّاءَ وَكَانَ وَعْدُ رَبِّي حَقًّا"

يعني ده رحمة من ربنا،،
أنا كنت مجرد سبب من أسباب رحمته، سخرني ليكم عشان أمنع عنكم الأذى..
إوعوا تفكروا إن أنا إللي عملت كده.. دي من رحمته بيكم عز وجل❤️

لكن السد ده مش هيستمر منيع وحصين وقوي وشديد بالشكل ده إلى ما لا نهاية.. لأ.. ده في وقت معين هييجي والسد ده هيتفتح ويأجوج ومأجوج هيخرجوا تاني..

طب مين همّ يأجوج ومأجوج دول إللي ذو القرنين قفل عليهم السد !؟
وياتري هيخرجوا على الناس تاني في يوم من الأيام فعلاً !؟
ولو خرجوا هيخرجوا امتي !؟

عيد مبارك وكل عام وانتم بخير