6️⃣2️⃣
يعني هي الناس دي كلللللها غلط !
وانت بس إللي هتبقي صح😒
= عادي اة ،، فين المشكلة !!!
المشكلة إن لو كان كلامك دة صح فعلاً ،، كان ناس كتير عملوه ومشوا وراه 😒
= لأ مش شرط علي فكرة 😏
يعني معلش بقي في أنبياء مأمنش معاهم أصلا غير راجل واحد أو رجلين بس ،،
وفي محدش آمن بيهم خالص!!!
يبقى علي كدة بقي النبي هو إللي كان غلط!!! عشان محدش اتبع كلامه !!؟
= أكيد لأ طبعا..
لية بقي ؟؟
لأن الحق عمره ما بيتقاس بالكثرة..
ولو ركزت شوية ،، هتلاقي دايماً أتباع الحق ناس قليلة ،،
وهتلاقي أتْباع الرسل برضو ناس قليلة ،،
و ابن القيم رحمه الله قال:
"عليك بطريق الحق ولا تستوحش لقِلة السّالكين،، وإياك وطريق الباطل ولا تغتر بكثرة الهالكين"
وربنا عز وجل قالنا :
كَم مِّن فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّهِ ۗ وَاللَّهُ مَعَ الصَّابِرِينَ
فلو انت لوحدك وبتعمل الصح ، ومعاك الدليل خصوصا لو في الدين والدليل من القرآن والسنة ،،
اثبت 💪 أثبت ومتتهزش بكلام الناس ولا تتهز بقلة العدد 💪
وبعدين دة حتي سيدنا عيسي بعد كل المعجزات اللي ربنا وهبهاله عشان بني إسرائيل يأمنوا بيه ،، تخيل كدة كام واحد آمن بيه 🤔!؟
= كام !؟
12 راجل بس ..!!
= نعم !!!!!!!!!
أيوة هما ال12 راجل بس إللي قالوا لسيدنا عيسي احنا هننصرك ونؤيدك ونؤمن بك..
ودول اسمهم ايييييه بقي ..
" الحواريين"
أيوة الكلمة دى انا قريتها كتير ،، يعني أية بقي حواريين 🤔 !؟
يعني الناصرين لسيدنا عيسى ..
الحواري دةّ اللي هو آمن بالله و قلبه مُخلص ونقي وصافي ..
"قَالَ الْحَوَارِيُّونَ نَحْنُ أَنصَارُ اللَّهِ آمَنَّا بِاللَّهِ وَاشْهَدْ بِأَنَّا مُسْلِمُونَ"
وفي يوم من الأيام الحواريين كانوا قاعدين مع سيدنا عيسي وسألوه سؤال غريب جداااااا !!!
قالوله :
ياعيسى هو ربك يقدر إنه ينزل علينا ترابيزة عليها أكل من السماء😱
"إذْ قَالَ الْحَوَارِيُّونَ يَا عِيسَى ابْنَ مَرْيَمَ هَلْ يَسْتَطِيعُ رَبُّكَ أَن يُنَزِّلَ عَلَيْنَا مَائِدَةً مِّنَ السَّمَاء "
فسيدنا عيسي اندهش جداااااا و قالهم :
اتقوا الله😳
انتوا ازاي تطلبوا حاجة زي كده والمفروض إنكم مؤمنين..!!!
"قَالَ اتَّقُواْ اللَّهَ إِن كُنتُم مُّؤْمِنِينَ"
:قالوله :
احنا جعانين وعايزين ناكل فدي فرصة مناسبة لكده،،،
وكمان بالمرة نطمن بآية جديدة تخص استجابة ربنا لدعائك وإنك فعلا رسول من عنده ومش بتكذب علينا،،
وهنكون مطمنيين أكتر إنك صادق بإنك نبي مقرب منه عز وجل!!
كمان الناس بتكذّبك ياعيسى فاحنا هنشهد عندهم ونقولهم إنك حققت لنا معجزة جديدة زي ما طلبنا بالضبط،،
"قَالُواْ نُرِيدُ أَن نَّأْكُلَ مِنْهَا وَتَطْمَئِنَّ قُلُوبُنَا وَنَعْلَمَ أَن قَدْ صَدَقْتَنَا وَنَكُونَ عَلَيْهَا مِنَ الشَّاهِدِينَ"
= لا ثواني معلش عشان دماغي لفت !!
هما مش دول آمنوا بيه وهما أصلا مؤمنين ،، إزاي يعني يقولوا كدة ،،!؟ ويشكوا في قدرة ربنا !؟
ماهو كدة بقي معناها إنهم مش مؤمنين ولا حاجة ولا آمنوا بسيدنا عيسي ولا بربنا ،،
صح ولا اية ..!
لأ هي ولا أية 😊
لأن كان الغرض من كلامهم إنهم يزدادوا إيمانا،،
و سؤالهم بالطريقة دي ،، كان من باب التأدب مع الله مش الشك في قدرته خالص ..
= إزاي معلش يعني !!!
هما قالوا هل ربك يستطيع ،، يبقي فين كدة التأدب .. ماهو طبعا ربنا يقدر !!!
المقصود من هل ربك يستطيع ،، ان دة كان اسلوب عرض يا إما ربنا يُقبل وينزل عليهم من كرمه مائدة آكل يا اما ميقبلش ..
= طب وليه مقالوش بالطريقة دى من الآخر مادام دة المقصود 🤔!؟
عشان كانوا بيبعدوا عن اسلوب الأمر مع الله ..
= إزاي يعني !؟
ابسطهالك ..!
لو انا عزمتك في بيتي علي الغداء لأول مرة ،، مش هتكون مكسوف !؟
= طبعا..
طيب لو محتاج ضروري فنجان قهوة عشان مصدع ،، هتقولي لو سمحتي قومي اعمليلي فنجان قهوة ؟؟
ولا هتقولي معلش تقدري تعمليلي فنجان قهوة لو مش هتعبك يعني ؟؟!
= أكيد هقولك تقدري تعمليلي فنجان قهوة ،، اصل انا ابقي بارد يعني قاعد في بيتك وبتأمر كمان !!!!
اهو دى بقي اللي حصل مع الحواريين بالظبط ،، اتعاملوا بأدب واستسماح من الله ❤
الحواريين بقي لما وضحوا وجهه نظرهم لسيدنا عيسى ..
تفهم أوي كلامهم وبدأ يدعي ربنا فعلاً..
يارب أنزل علينا مائدة من السماء تكون لينا يوم عيد يوم مشهود و عظيم..
واحنا يارب منستغناش عن رزقك ومحدش بيرزقنا غيرك،،
فارزقنا يارب وأنت خير الرازقين❤
قال عيسى بنُ مريم اللَّهُمَّ رَبَّنَا أَنزِلْ عَلَيْنَا مَائِدَةً مِّنَ السَّمَاء تَكُونُ لَنَا عِيداً لِّأَوَّلِنَا وَآخِرِنَا وَآيَةً مِّنكَ وَارْزُقْنَا وَأَنتَ خَيْرُ الرَّازِقِينَ
أنا سمعت بقي إن ربنا مش هيستجاب ،، هو فعلا ممكن ربنا ميستجابش دعاء نبي !!!؟
.......... يتبع إن شاء الله ❤️
كل عام وانتم بخير
رمضان مبارك
أنت تقرأ
قصص الأنبياء بالعاميه
Spiritüelكتير مننا ميعرفش قصص الأنبياء او يسمع عنها وينساها.. دلوقتي هنستعرض مع بعض يوميا قصص الأنبياء من البدايه مع سيدنا وأبونا آدم.. ونستمر بالترتيب ان شاء الله.. القصص هتكون باللغه العاميه السهله اللي تناسب الجميع وتفهم بسهوله ان شاء الله.. اعداد أ/هبة...
