6️⃣1️⃣
أنت عارف إن مهما كانت مكانتك ،، ومهما بلغت من التَّقوى والعَفاف وحُسن الخلق فمش هتسلَم من كلام الناس! 😟
هتلاقي إللي مستني الفرصة عشان يؤذيك !!
واللي مستني غلطة عشان يشوّه صورتك قدام الناس !!
هتلاقي إللي يستفزك عشان يثبت لنفسه وللناس انك شخص وحش وخلاص !!
هتلاقي إللي بيقول كلام مش فيك !!
هتلاقي إللي مش بيحبلك الخير وبيدعي عليك مش بيدعي ليك !!
هتلاقي إللي طول الوقت بينتقدك وعايز يحطم قدراتك عشان مش عارف يبقي زيك !!
وهتلاقي كتير وكتير ،، وهتلاقي من الشخصيات دى كتير !!
= حتي الشيوخ والدعاة الإسلامية بيحصل معاهم كدة !!؟
دة حتى السيده مريم رضي الله عنها على قدر مكانتها وقدرها عند ربنا ،، بني إسرائيل ماسبوهاش في حالها واتعرضت منهم للإهانة والقذف !! وماسلمتش من كلامهم !
يبقي إحنا اللي ولا حاجة جنبها هنسلم من كلام الناس !!؟🤔
= أكيد لأ..!
وأية اللي حصل مع سيدنا عيسي وأمه 🤔 !؟
بني إسرائيل طبعااااااا مكنوش سايبين السيده مريم وسيدنا عيسى في حالهم😑
لدرجة إنهم كانوا عايزين يقتلوا سيدنا عيسى 😒
فالسيده مريم أخدته وهربت ..!
وربنا أوحي لهم بمكان بتتوفر فيه مقومات الحياة كلها عشان يعيشوا فيه،،
"وَجَعَلْنَا ابْنَ مَرْيَمَ وَأُمَّهُ آيَةً وَآوَيْنَاهُمَا إِلَىٰ رَبْوَةٍ ذَاتِ قَرَارٍ وَمَعِينٍ "
وراحوا عاشوا فين 🤔!؟..
يقال عاشت في مصر ،،
ويقال عاشت في دمشق ،،
ويقال في بيت المقدس ،،
واختفت السيده مريم وسيدنا عيسي 30 سنة !!
وأية اللي حصل في ال30 سنة دول !؟
= انتشر الكفر والفجور بين بني إسرائيل!!
وتجاوزوا حدود ربنا ،،
لدرجة إن ناس منهم أنكرت البعث والحساب والعقاب، وبقوا عايشين لشهواتهم وملذاتهم وبس!!😏
فبعد 30 سنة!! ربنا بعتلهم رسول ،، وأنزل عليه الإنجيل..
عشان يدعوهم ويوعظهم ويشرح لهم الحاجات إللي كفروا وفجروا بيها و اختلفوا عليها،،
ودي اللي كانت موجوده في الإنجيل،،
أية دة !!!! هما مش كانوا بيتعلموا كل حاجة من التوراة ،،
لية بقي سيدنا عيسي ربنا انزل علية الإنجيل !!؟
لإن التوراة اتحرّفت بعد سيدنا موسى،، وبعد كده اتحرقت!
فربنا نزّل عليهم كتاب جديد،، وهو الإنجيل 😊
"وَلَمَّا جَاءَ عِيسَىٰ بِالْبَيِّنَاتِ قَالَ قَدْ جِئْتُكُم بِالْحِكْمَةِ وَلِأُبَيِّنَ لَكُم بَعْضَ الَّذِي تَخْتَلِفُونَ فِيهِ ۖ فَاتَّقُوا اللَّهَ وَأَطِيعُون
طيب والإنجيل دة زي التوراة كدة !؟🤔
الإنجيل اللي انزل علي سيدنا عيسي كان امتداد لشريعة سيدنا موسي ،، لكن مع شوية تخفيف كدة !
إزاي!!
يعني بني إسرائيل كان مُحرّم عليهم حاجات في شريعة سيدنا موسي ..
فلما جه بقي سيدنا عيسي ،، ربنا أوحي له إن بعض المحرمات دي ،، تحل لهم عادي !!
"وَمُصَدِّقًا لِّمَا بَيْنَ يَدَيَّ مِنَ التَّوْرَاةِ وَلِأُحِلَّ لَكُم بَعْضَ الَّذِي حُرِّمَ عَلَيْكُمْ وَجِئْتُكُم بِآيَةٍ مِّن رَّبِّكُمْ فَاتَّقُواْ اللَّهَ وَأَطِيعُونِ"
فربنا أجرى على إيد سيدنا عيسي معجزات كتيرة جداااااا!!
زي أية !؟🤔
يعني ربنا وهبه ميزة الشفاء ،،
فكان بيشفي الطفل إللي مولود أعمى ،،
وكان بيشفي الأبرص إللي عنده مرض البرص المعروف،،
وكان بيُحيِي الموتى،،
وكان بيصنع من الطين شكل الطيور ،،
وكان ينفخ في فم التمثال ده فيتحول لطير حقيقي بيطير في السماء !!
"أَنِّي أَخْلُقُ لَكُم مِّنَ الطِّينِ كَهَيْئَةِ الطَّيْرِ فَأَنفُخُ فِيهِ فَيَكُونُ طَيْرًا بِإِذْنِ اللَّهِ.. وَأُبْرِئُ الأَكْمَهَ وَالأَبْرَصَ وَأُحْيِي الْمَوْتَى بِإِذْنِ اللَّهِ "
وكالعادة بني إسرائيل مالهم !!!،
=مأمنوش بيه طبعا 😏
لأ وكمان كانوا بيحاولوا يختبروه 😏
يختبروه إزاي 🤔!؟
كانوا بيسألوه : احنا عندنا أكل إيه في بيتنا؟
فسيدنا عيسي
يقولهم عندكم آكل كذا كذا في بيوتكم !!
لعل وعسي يعني يؤمنوا بيه ويعرفوا إن كل دة معجزات من ربنا !!
"وَأُنَبِّئُكُم بِمَا تَأْكُلُونَ وَمَا تَدَّخِرُونَ فِي بُيُوتِكُمْ إِنَّ فِي ذَلِكَ لآيَةً لَّكُمْ إِن كُنتُم مُّؤْمِنِينَ"
وبالرغم من كل دة !! برضو بني إسرائيل مأمنوش بيه !!
فلما سيدنا عيسي خلاص شاف منهم الكفر الواضح وإنهم معندهمش أي استعداد للإيمان،،
وقف يسألهم بشكل واضح وصريح :
مين ينصرني ويؤمن بيا وبرسالة رب العالمين ويبقى معايا على الحق ؟💪
"فَلَمَّا أَحَسَّ عِيسَى مِنْهُمُ الْكُفْرَ قَالَ مَنْ أَنصَارِي إِلَى اللَّهِ "
بعد كلللللل المعجزات دي بقي ،،
تفتكروا في حد من بني إسرائيل هيؤمن بربنا وبسيدنا عيسي !!؟
.......... يتبع إن شاء الله ❤️
كل عام وانتم بخير
رمضان مبارك
أنت تقرأ
قصص الأنبياء بالعاميه
Spiritualكتير مننا ميعرفش قصص الأنبياء او يسمع عنها وينساها.. دلوقتي هنستعرض مع بعض يوميا قصص الأنبياء من البدايه مع سيدنا وأبونا آدم.. ونستمر بالترتيب ان شاء الله.. القصص هتكون باللغه العاميه السهله اللي تناسب الجميع وتفهم بسهوله ان شاء الله.. اعداد أ/هبة...
