قصص الأنبياء بالعاميه

52 سيدنا سليمان عليه السلام 4

5️⃣2️⃣
ألا صحيح هو المسجد الأقصى هو هو هيكل سليمان إللي اليهود بيقولوا عليه🤔!؟

= نعم !!!!!!!
أية اللي جاب القلعة جنب البحر !😒

ما هما اللي بيقولوا ..!

= هما مين دول اللي بيقولوا !!!!  وبعدين اساسا أنت عارف يعني هيكل اصلا !! ؟

الصراحة لأ..!

أقولك ..
الهيكل دة اللي هو المعبد ..
يعني " بيت الإله " ..
يعني مكان للعبادة ،،

طيب أية علاقته برضو بالمسجد الأقصى !!؟

اليهود فاكرين إن سيدنا سليمان بني ليهم الهيكل " المعبد " دة عشان هما اللي يتعبدوا فيه بقي لديانتهم قال 😒
وبيقولوا إنه موجود تحت المسجد الأقصى، عشان كده  عايزين يوقعوه😑

اة يعني هما بيكدبوا اصلا !!

= بالظبط ..!

طيب مش المسجد الأقصى اصلا كان موجود ،، إزاي سيدنا سليمان هو اللي بناه 🤔 !؟

المسجد الأقصى هو ثاني مسجد بُني في الأرض وإللي بناه كان سيدنا يعقوب ..

بعد ما فاتت سنييين كان المسجد اتخرّب،،
فسيدنا داود كان بدأ يجدده،،
بس للأسف مات قبل ما يكمّل تجديده،!!

وقبل ما يموت كان وصي سيدنا سليمان إنه يكمل من بعده تجديده وترميمه،،

سيدنا سليمان أمر الجن والإنس بإنهم يساعدوه في مهمة البناء والترميم دي،،

فربنا كان مسخّر الجن لخدمة سيدنا سليمان سواء الكافر أو المؤمن ..

"وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ ۖ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ"

كان مجموعة منهم بيبنوا له القصور والتماثيل وأحواض كبيرة عشان يجمع فيها مية ،،
ومجموعة تانية كانوا بيغوصوا في البحار عشان يطلعوا له منها الجواهر واللآلئ،،

"يَعْمَلُونَ لَهُ مَا يَشَاءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ"

وبيعملوا كمان أعمال مختلفة،،
و مكنش حد يقدر يخرج عن أمر سيدنا سليمان ..

"وَمِنَ الشَّيَاطِينِ مَن يَغُوصُونَ لَهُ وَيَعْمَلُونَ عَمَلًا دُونَ ذَٰلِكَ وَكُنَّا لَهُمْ حَافِظِينَ"

الشياطين كانوا بيقولوا للناس بقي إنهم كانوا بيعلموا الغيب،،
وكانت الناس مصدقاهم لأنهم كانوا بيشوفوا قوة الجن وقدرتهم الخارقة، 😒

وكان سيدنا سليمان بيقول لهم إن ده مش صح،،
فمحدش يعلم الغيب إلا الله،،
لكن الناس مكنوش مقتنعين،😒

سيدنا سليمان دعي ربنا إنه يُخفِي عن الجن موته عشان يثبت للناس إن الجن كدابين في معرفتهم بالغيب..

وفي يوم من الايام
كان سيدنا سليمان بيتابع شغل الجن وبيشرف عليهم بنفسه عشان مايكسلوش عن الشغل👌

فكان واقف وساند دقنه على العصاية بتاعته بيراقبهم وهمّ شايفينه باصص عليهم ..

و هو في الوضع ده ربنا قبض روحه ومات🙊

الجن كانوا شايفينه مفتح وباصص عليهم..
لكن هو في الحقيقة ميت😁
وطبعا ماكنوش يعرفوا وعمالين يشتغلوا بدون راحة،.!

واستمر الوضع كده فترة ..

أد إيه بالضبط؟
الله اعلم ،، يقال أسبوع ..
يقال شهر..
ويقال برضو سنة..!

فربنا أرسل دودة الأرض تأكل عصا.سيدنا سليمان إللي هو كان ساند عليها،،

فضلت الدودة تاكل العصا من تحت لحد ما العصا ضعفت وبقت هشة فوقعت،،😱
ووقع سليمان عليه السلام على الأرض..!

"فَلَمَّا قَضَيْنَا عَلَيْهِ الْمَوْتَ مَا دَلَّهُمْ عَلَىٰ مَوْتِهِ إِلَّا دَابَّةُ الْأَرْضِ تَأْكُلُ مِنسَأَتَهُ"

و عرفت الجن وقتها إن سيدنا سليمان كان ميت بقاله فترة وهماّ ميعرفوش حتى هي أد إيه ولا من إمتى،،

واعترفوا إنهم فعلا لو كانوا يعرفوا الغيب مكنوش استمروا في التعب والذل والمشقة المستمرين كل ده 😒

"فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ"

وطبعا الناس عرفت إن الجن كانوا بيكذبوا عليهم وإنهم مايعرفوش الغيب ولا حاجة😏

لأن محدش يعلم الغيب إلا الله سبحانه وتعالى ❤

.......... يتبع إن شاء الله ❤️

كل عام وانتم بخير
رمضان مبارك