قصص الأنبياء بالعاميه

13 سيدنا ابراهيم عليه السلام

1️⃣3️⃣
هو ربنا هيختبر سيدنا إبراهيم فعلا !!!!؟
= اة

وهيمتحنه في حاجه كبيرة ولا صغيرة !؟
= حاجة كبيرة جدا ،،

وهيمتحنه ليه مش هو نبي ،، وربنا عارف انه بيحبه !!؟
= اة بس بيختبره عشان يشوف حب ربنا ف قلبه كبير أد أية ❤❤

طب يا تري إيه الإمتحان ده؟

سيدنا  إبراهيم بقى يشوف رؤية يعني زي حلم بيشوفه باستمرار  إنه بيدبح ابنه إسماعيل 😱

رؤيا الأنبياء مابتكونش مجرد حلم ،، دي بتكون أمر من ربنا..❤
سيدنا إسماعيل دلوقتي بقي ولد كبير طيب وصالح .😍

طيب سيدنا إبراهيم هيعمل إيه؟؟
سيدنا إبراهيم عارف إن ربنا هو اللي رزقه بابنه إسماعيل ،،
فلازم يسلم امره لله و يطيع أمر ربنا مهما كان صعب ❤

لكن ده بيحب ابنه الطيب الصالح اوي 😍 وربنا هيختبره في أكتر حاجة بيحبها ..

سيدنا إبراهيم راح لابنه إسماعيل وقاله :
"  يا بني إني أرى في المنام أني أذبحك.. فانظر ماذا ترى ؟ "

إسماعيل الابن الصالح رد بكل صبر واستسلام لأمر الله :❤
" يا أبت افعل ما تؤمر ستجدني إن شاء الله من الصابرين "

يعني يا أبي نفذ أمر ربنا وهتلاقيني صابر إن شاء الله ..

يعني سيدنا إسماعيل استعان بالله لأنه عارف ان اللي يستعين بالله ربنا هيثبته و يخليه أقوي ويستحمل أي حاجه صعبه ❤💪
عشان كده قال ستجدني (إن شاء الله ) من الصابرين .

ماقالش مثلا انا هستحمل واصبر عشان انا قوي و عشان أنا إنسان صالح ...لا ..
ده قال انا هكون صابر عشان انا مستعين بالله وهو اللي هيديني الصبر ويثبتني ويخليني استحمل الامتحان الصعب ده .❤

سيدنا إبراهيم و إسماعيل استسلموا لأمر ربنا ..

سيدنا إبراهيم خلي ابنه إسماعيل ينام وشه ناحية الارض عشان ما يكونش شايف وشه ويتأثر بيه..

وفعلا بدؤوا ينفذوا أمر ربنا ويستسلموا لربنا .
مسك سيدنا إبراهيم السكينة... سكينة حادة جدا... وبدأ يحركها بقوة علي رقبة إبنه سيدنا إسماعيل 😢لكن...
السكينة ما بتقطعش! ❤😍
... ورقبة سيدنا إسماعيل سليمة...! ❤😍

فجأة سمعوا صوت بينادي  :
" وَنَادَيْنَاهُ أَن يٰإِبْرَاهِيمُ * قَدْ صَدَّقْتَ ٱلرُّؤْيَآ إِنَّا كَذَلِكَ نَجْزِي ٱلْمُحْسِنِينَ "

يعني انت نفذت أمر ربنا ونجحت في الاختبار والابتلاء الشديد .❤
وسيدنا إبراهيم لقي خروف كبير عشان يدبحه فداءا لابنه إسماعيل .

"إِنَّ هَذَا لَهُوَ الْبَلاءُ الْمُبِينُ وَفَدَيْنَاهُ بِذِبْحٍ عَظِيمٍ" ..

ابتلاء أو امتحان الأنبياء بيكون من أشد الابتلاءات ..
لكن لما بيستسلموا لأمر ربنا وينفذوا ويطيعوا أوامر ربنا .. ربنا بيرفع درجاتهم ويجازيهم بكرمه وعطاءه ❤

يعني بعد ما سيدنا إبراهيم صبر وأطاع ربنا إيه اللي حصل؟
الله يحسن للمحسن ..ويكرم الكريم ويعطي بلا حساب ولا حدود .
فلما سيدنا إبراهيم أطاع  وسلم أمره لربنا ووفي وعده لربنا .
ربنا جعله خليل له .

يعني إيه خليل ؟ .
يعني أقرب مكانة لربنا .. زي الصاحب المقرب ❤(ولله المثل الأعلى)

عدي سنين كتيييير ..
وسيدنا إسماعيل كبر والناس بتحبّه وعلّموه اللغة العربية - وكان أول من نطق بالعربية ..

في السنين دي ستنا هاجر إتوفت واسماعيل إتجوز.

كان سيدنا إبراهيم بيطّمن على ابنه ويروح يزوره مرة وإتنين ومايلاقيهوش🤔
لكن في الزيارة التالتة لقاه قاعد تحت شجرة جنب زمزم ..

سيدنا إبراهيم قال لابنه إن ربنا أمره ببناء بيت لله في أرضه. وسأله إن كان هيقدر يساعده على تنفيذ أمر ربه ولالا ..

إسماعيل فورا وافق وفرح جداً بالمساعدة وإبتدوا سوا يبنوا الكعبة ❤

سيدنا إبراهيم لما كان عنده ابن واحد وجعله لربنا .،، ربنا جازاه بإيه؟
أية؟؟

ربنا بعت لسيدنا إبراهيم ملايكة مُبشّرين على شكل بشر يعني ،،
إستقبلهم سيدنا إبراهيم كضيوف وبعت يجبلهم أكل ويكرم ضيافتهم .. لكنهم مارضيوش ياكلوا🤔
فهو قِلق منهم
الملايكة طمنته أنهم جايين بأمر من ربنا عشان يبشروه بشرة حلوة اوي ❤

هيبشروه بأية ؟؟

(هَلْ أَتَاكَ حَدِيثُ ضَيْفِ إِبْرَاهِيمَ الْمُكْرَمِينَ (24) إِذْ دَخَلُوا عَلَيْهِ فَقَالُوا سَلَامًا قَالَ سَلَامٌ قَوْمٌ مُنْكَرُونَ (25) فَرَاغَ إِلَى أَهْلِهِ فَجَاءَ بِعِجْلٍ سَمِينٍ (26) فَقَرَّبَهُ إِلَيْهِمْ قَالَ أَلَا تَأْكُلُونَ (27) فَأَوْجَسَ مِنْهُمْ خِيفَةً قَالُوا لَا تَخَفْ وَبَشَّرُوهُ بِغُلَامٍ عَلِيمٍ (28) فَأَقْبَلَتِ امْرَأَتُهُ فِي صَرَّةٍ فَصَكَّتْ وَجْهَهَا وَقَالَتْ عَجُوزٌ عَقِيمٌ (29) قَالُوا كَذَلِكِ قَالَ رَبُّكِ إِنَّهُ هُوَ الْحَكِيمُ الْعَلِيمُ (..

ربنا بارك في ذرية سيدنا إبراهيم  ورزقه وبشره بابن تاني كمان ❤
واسمه اية ؟؟
إسحاق

ولدت ستنا ساره إسحاق وعاش في الشام وكبر وإتجوز وجاب ولدين :
يعقوب وعيص..

وربنا بارك في ذرية سيدنا إبراهيم ..
يعني بقي عنده أحفاد وأولاد وبقوا قبائل وعائلات كبيرة كلهم من أولاد سيدنا إبراهيم .

وربنا جعل النبوة في ذريته ..
يعني ناس كتير من نسل سيدنا إبراهيم ربنا اختارهم يكونوا أنبياء.
وربنا جعل سيدنا محمد عليه الصلاة والسلام من أحفاد سيدنا إبراهيم .❤

ربنا رفع ذكر سيدنا لإبراهيم في العالمين .
وفي كل صلاة بيصليها المسلمين ،، بنذكر سيدنا إبراهيم وندعي لسيدنا محمد ولكل إنسان مؤمن بالله اتبعهم .
وبنقول في التشهد ..

اللهم صل علي محمد وعلي آل محمد كما صليت علي إبراهيم وعلي آل إبراهيم ...
وبارك عي محمد وعل آل محمد ... كما باركت علي إبراهيم وعلي آل إبراهيم ....
في العالمين ... إنك حميد مجيد .❤❤

ملحوظة ::
• عيص ذريته الروم ..
• يعقوب هو إسرائيل .. و ذريته بنو إسرائيل
وهيجي بعد سنين سيدنا موسى , وبعديه سيدنا عيسى , وبينهم باقي الأنبياء المذكورين في القرآن أجمعين ..
وكلهم في الأصل من ذرية سيدنا يعقوب بن إسحاق بن إبراهيم..
وعشان كده سيدنا إبراهيم سُمي أبو الأنبياء , لأنه من ذريته باقي الأنبياء كلهم ❤

كل عام وانتم بخير
رمضان مبارك 🌓