إجتمع فيك كل الحسن وخربه حُبي

٣

في الصباح كان نواف يقومهم
سند بإنزعاج: ابتلشنا قلهم مايبون تكاليف وعزايم مشكورين
رائد: استحى ياابن الحلال عازمينك
تأفف سند وهو يناظره بوعيد
اما نواف قالهم يتجهزون وفعلاً قامو يغسلون ويتجهزون

عند يُسرى الي تلبس عبايتها وتكلم رنا
يُسرى: يعني ذبيحتين لهم بس؟
رنا: اي يقولون خويا نواف ومن حايل
يُسرى: اووف حايل للقصيم شعندهم
رنا: ياكثر اسألتك جايين لخويهم مسيار انتي شدخلك
بوزت يُسرى بغيض: ماقلت شيء بس سألت
شالت رنا بنتها معها وقالت: لاعاد تسألين اسأله بلا فايده
وطلعت
ضربت يُسرى الارض برجلها بعصبيه وطلعت وراها تردد: غبيه!

كانو جالسين بمجلس شيخ الديره الي هو جد نواف و يسلمون على الموجودين
سند بهمس لرائد: شف هذاك
رائد: وين؟
سند: الي على يسار ابو نواف
رائد: اي وش فيه؟؟
سند: مو هذا اخو البنت الي بالمول؟
ركز رائد ثم لف له يقول: ايوالله هو ليكون هذيك من ديرة نواف؟
رفع سند كتوفه بمعنى مدري ورجع يناظر المجلس

عند يُسرى الي كانت مع اهلها في بيت جدتهم بالديره
جالسه بالصاله تسمع سوالفهم و تعلق مرات لين جلست جنبها ميثاء بنت خالتها و صديقتها
ميثاء: شفيك هاديه؟
يُسرى: بقولك سالفه بس لاتضحكين
هزت ميثاء راسها وكملت يُسرى كلامها وقالتها له عن موقفها بالسوق وميثاء ماسكه نفسها لاتنهار عليها
يُسرى: ماقصدي اني مااشكره بس اسلوبه يقهر
ميثاء: ماعليك منه ولاحتى تشكرينه خليه يولي
زمت يُسرى شفايفها بتفكير وسكتت

خلصو الرجال من الغداء و صار كل واحد يرجع لبيته و بين ما سند و رائد طالعين مع نواف والشباب إنتبه سند لبنات يركضن بشويش للبيت الي جنب المجلس.. اتجهو هم لنفس البيت هذا بس القسم الثاني و دخلو وقبل يدخل سند سمع صوت جنبه ولف بدون محد ينتبه
وكانت البنت الي لابسه كعب ترابي مسنده يديه على ركبها و تتنفس بقوه وهي تكلم الي قدامها بضحك
'اخ تعبت'
'تتعبين من الركض ولاتتعبين من الرقص تكفين وش ذا التناقض؟؟'
ضحكت البنت الي كعبها بيج وقالت بصوت عميق شوي: 'خلي عنك كثر الكلام و ركزي قدامك لاتطيحين'

عقد سند حواجبه وبسرعه دخل وراهم بينما ماكانو يلعبون بلوت كان سند يحاول يتذكر
'خلي عنك كثر الكلام و ركزي قدامك لاتطيحين'
'غبي'
رمش بسرعه وقال: معقوله هي؟؟
رائد: منهي؟
سند: ولاشيء

عند يُسرى كانت بمجلس عمتها حق الحريم و البنات بجهه والحريم بجهه
العمه فايزه: هذي الساعه المباركه الي جمعتنا اليوم
ام انس: لو ماجت العزيمه كان ماشفنا بعض الا بالعرس
ضحكن و لفت يُسرى للشباك و كان وقت بعد الظهر والشمس يعني مو ذيك الخفيفه
ناظرت بالمجلس وزفرت بالملل مو جوها الجمعات ذي
وقفت وهي تقول لبنت العمه فايزه: اريج معليش بس تعبانه وودي ارجع البيت لاتشيلين بخاطرك
اريج: لايقلبي عادي روحي ارتاحي
إبتسمت لها يُسرى و طلعت

يتبع..