오직 너 [ONLY U] • binhao

I will find you

အဲ့နေ့က ငါ့ကို တွေ့အောင်ရှာခဲ့လို့
ကာကွယ်ပေးခဲ့လို့ ကျေးဇူးပါ ဟန်ဘင်းနီး

-오직 너 [ONLY U]-

ကျန်းဟောင့်တစ်ယောက် ကျောင်းအသစ်မှာ အဆင်ပြေပြေ အချောမွေ့မွေ့နဲ့ ဖြတ်သန်းလာခဲ့တာ အခုဆိုရင် သုံးလကျော်လောက် ရှိနေပြီဖြစ်တယ်။

သုံးလအတွင်း ဟန်ဘင်းနဲ့လည်း အရင်ကထက် ပိုပြီး ရင်းနှီးလာပြီး ကျောင်းသွား ကျောင်းပြန်ကိုလည်း ဟန်ဘင်းနဲ့သာ တူတူသွားဖြစ်သည်။ ရစ်ခီတို့သူငယ်ချင်းအုပ်စုနဲ့ အတူ ဟန်ဘင်းကပါ သူ့ရဲ့ အခင်ဆုံးသူငယ်ချင်းထဲ စာရင်းထဲမှာ ရှိနေနှင့်ပြီ ဖြစ်တယ်။

မကောင်းတဲ့ အချက်တစ်ခုကတော့ ဟန်ဘင်းနဲ့ ရင်းနှီးလာတာနဲ့ အမျှ ဟန်ဘင်းကို ရန်ငြိုးရှိနေတဲ့ ထိုလူကပါ ကျန်းဟောင့်ကို အနိုင်ကျင့်ချင်လာသည်။ ဟန်ဘင်းကိုလုပ်သလို ပေါ်တင်ကြီး ရန်မရှာပေမယ့် ကျန်းဟောင့်နဲ့ ပတ်သက်တဲ့ သတင်းအမှားတွေကို လျှောက်ဖြန့်လေ့ရှိတယ်။ ရစ်ခီတို့ အကူအညီနဲ့ သတင်းအမှားပြန့်ရတဲ့ အရင်းအမြစ်ကို ရှာကြည့်တိုင်း အဆုံးတွင် ထိုလူကရှိနေတတ်သည်။ အဲ့လို သတင်းအမှားတွေကို ဖြေရှင်းရတာ အခုဆိုရင် သုံးလအတွင်း နှစ်ခါသုံးခါလောက်ရှိနေပြီ။

ဟန်ဘင်းကို ထိုသတင်းအမှားဖြန့်တဲ့ကိစ္စတွေပြောပြတိုင်း ဟန်ဘင်းရဲ့ မျက်ခုံးတွေက သိသိသာသာကိုတွန့်ချိုးသွားပြီး ဒေါသထွက်နေတဲ့ပုံ အမြဲပေါက်နေတတ်သည်မလို့ သုံးကြိမ်မြောက်မှာတော့ ကျန်းဟောင့်က ဟန်ဘင်းဆီ ထိုကိစ္စကို ပြောမပြတော့ပါ။

"ဟာအို ဒီနေ့မနက်စာ ဘာစားကြမလဲ"

ကျန်းဟောင့်ရဲ့အိမ်ရှေ့မှာ ကျောင်းတူတူသွားဖို့ စောင့်နေတဲ့ ဟန်ဘင်း ကျန်းဟောင့်ကို တွေ့တော့ ပြုံးပြရင်း မေးလာခဲ့တယ်။

သူတို့နှစ်ယောက်က အမြဲတမ်း အိမ်ကနေစောထွက်လေ့ရှိပြီး ဆိုင်တစ်ခုခုမှာ မနက်စာဝင်စားတတ်တယ်။

"ဒီနေ့ ကျောင်းထိပ်က ဆိုင်ကနေ ဖက်ထုပ်ပြုတ်စားရအောင် ဟန်ဘင်းနီး"