رواية : رهفة قلب
للكاتبه : نونا السبهاوي
الحلقة 14"
وعد خشت للدار فتحت الدرج ادور ع مفتاح المخزن شافت خاتم الالماس اللي هداهولها يوسف خداته وتفكرت لما فاجأها بيه وكيف يبوس فيها ويضحك قعدت تبكي ولبست الخاتم ورقدت حاضنه روحها
خشت ورده شافتها غطتها وطلعت
ورده : بنات وعد كانت تبكي لين رقدت
وسن : اكيد تفكرت يوسف
ورود : مسكينه
ورده : كيف يوسف يتجرأ ويهرب
ورود : ماهرب ياورده اسكتي بلا دوه فارغه
........
مرو الايام وامل عايشه فالعسل وزارت هلها ووعد ع نفس الحال مكتئبه وخلاص ويوسف اختفى واهل يوسف تفكيرهم فولدهم
بعد مرور سنة 🔥
ايي سننة ونفس الروتين بس فيه يوم كسر الروتين هدا
الساعه 5:00
ترن
ترن
ترن
امل : وعد تعالي اليوم لحوش هلي ليك ابصر كم شهر ماجيتي 💔
انا : به حاضر
امل : اندزلك يونس
انا : تمام
امل : تباتي معاي اليوم قلت لمحمد متوحمه ع وعد وبيجيبني عند هلي بالسيف عليه
انا : هههه به انشالله يطلع البيبي يشبهلي
امل : قمر
انا : زيك المهم انوض اندوش عسلت حسني
امل : شن متبزع عليك
انا : لا درت حلوه لجسمي ونضفت وجهي وبندوش
امل : الله يبارك به هي نوضي دوشي ساعه تانيه انكلم يونس ايجيبك
انا : تم هي سلام
وطلعت دوشت ولبست بدلة واسعه ورديه وطلعت اسبيدرو ووشاح عالابيض وقعمزت درت مكياج خفيف ودرت البرفان وخديت شنطه طلعت توته وقفطان وعطر ومنشف وحطيتهم ونزلت
رن تلفوني وطلعت ركبت فالسياره
يونس : يااااامرحبااا
انا : مبتسمه : اهلا
يونس : يسوق : شنجووو
انا : ههههه ماشيه ولله
يونس : دوم دوم
انا : تعرف عيني ترف وخلاص ابصر من بنشوف
يونس : زعم بالك انا
انا : نضحك ...
يونس : انشالله خير وتلفونه رن سكر
ويرن ويرن ويرن
يونس : نعممم نعمم ..باهي تو نعاودلك ...رافع مرت خوي ازح تو نفضا انرن عليك وسكر ..
انا : ساكته
يونس : اسألي اموري طيبه
انا : هههه منو هادي
يونس : لكبيدا
انا : اشييه اشيه
يونس : يضحك : صقع عليك يحنه
انا : ههههه لنقنه صقع عليا
يونس : اصلا نبي تفتحي الموضوع مع امي بيش توافق تخطبلي ريقي جف وانا انقوللها بنخطب
انا : تي حاضر ولااا يهمك
يونس : ونبي تتعرفي عليها اصلا
انا : هههههه تمم ولااا يهمك تو نتعرف عليها سلفتي
يونس : اييييوه
مهم هدرزنا فالطريق ووصلت سلمت ع عمتي وعمي وامل وقعمزنا هدرزنا وشربنا القهوة وغيرنا جونا لعند بعد المغرب
امل : وعد كان انقول شن خاطري
انا: قولي وعيوني ليك
امل : حوشك انتي ويوسف 💔
انا : المفتاح عند عمي خودي وامشي عادي
امل : امشي معاي وراس اوخيتي
انا : تعرفي من لما طحت ومرضت ماخشيتله 💔حت دبشي جابوه اخواتي وامال
امل : به اليوم امشي معايا
انا : به نوضي
طلعت انا وامل وخدينا ادن وقالت امل تبي اتبات فيه وعتمان سمحلها وطلعنا ومشينا ووصلنا خشيت قلبي قعد يخبط بقوة وتفكرت كل شي ودموعي ينزلو نار ع اخدودي وانا انفصل فالحوش مغببر ركبت لدار النوم اللي دولابها مكسور والادراج مهناش والكومندينو واضح مكسر كل شي ومكنوس قعمزت مستغربه ونبكي جت امل قعمزت جنبي
انا : امل خيرها الدار?
امل : نبي نحكيلك كل شي صار بعد كنتي ف غيبوبه
انا : شن صار! !!
امل حكتلي كلللل شي صار حتى عن يوسف
انا انهرت بكا وانلوم فيهم كلهم عليش ماحكولي شي ويوسف بعد خشلها عالواتس
امل : تحضن فيا : ووعد خلااص بكاا قطعتيلي قلبيي
انا : حرااام عليكم خليتوني نكره راجلي خليتوني نفكر انه هرب وسيبني تعببتت تعبببت ياااملل مازلت اصغييره عاللي صار فيااا
امل وقفت نفضت السرير وعطتني بخاخ الاكسجين شويه واغفيت غالسرير نزلت كلمت اسامه يجيب خمس عاملين نضفو الحوش ومسحوه وكملو دفعولهم وطلعو
اسامه : ليش هدا كله
امل : بيني وبينك
اسامه : شنو
امل : يوسف كلمني وجاي
اسامه انصدم ويشوفلها مش مصدق
امل : نزلو دموعها : ولله كلمنيي قالي جاي ماتحكي لحد وانا جيت ب حجة اني متوحمه ع الحوش وماحد يدري غيري انا وياك
اسامه : بعد سنه
امل : افررح لخووك جاايي
اسامه : مصدوم شعور متلخبط
امل : وصلتها رساله : ووووواااك قرييب يووصلل لشاارععع
اسامه : بيطلع ..
امل : ارجاني شويه ..وركبتلي لقتني راقده ف نوم عمييييق ماحبت اتنوضني سكرت الضي ونزلت مشت مع اسامه بسرعه
اسامه : وينها وعد
امل : خليها راقده تو يجيها هو
ووصلو للحوش خشو دق الباب طلع اسامه فتحه قابله يوسف لحيته فيها خصلات الشيب ومبتسم
اسامه : يييااافاااسسسد وحضنه
يوسف : حضن خوه بقوة : هههه خوك الكبير انا
اسامه : نزلت دمعته مسحها ووخر : لييك وحشه ولله العظيم
يوسف : حط يده ع كتف اسامه وخشو
تقابلهم نجاة طالعه من المطبخ
يوسف : امي
نجاة : رفعت راسها مصدومه
يوسف : قرب حضنها ويبوس ف راسها ونزل باس كرعيها
نجاة : و وووللدييييي
يوسف : ولدك يما ولدك
نجاة :تبكي: ياانهاار سعييد لولولوللوولولييييي
وجو انصدمو ويحضنو فيه ويبوسو فيه ودموع وفرح وشعور ملخبط
يوسف : باس راس باته : سامحني يابوي
عتمان: مسامح ياولدي دنيا واخره
وومررت ساعه وهم يسألو ف يوسف ومش مصدقين انه رجعلهم
نجاة : ويين وعد
يوسف : وعد هناا?
امل : خليتها راقده ف حوشها
نجاة : نوض لمرتك سلم وليدي
يوسف شبح لأمل
امل وقفت: تعال نبيك
يوسف لحقها لبرا : نعم
امل :اليوم حكيت لوعد كل شي را
يوسف : مستاحشها: به بنمشيلها انا
امل : وزعلانه منك علشان سكرت يومتها وقبل بنقولك ع عرسي معاش فتحت وعرست وانت مش قاعد
يوسف : ولله نادم يوخيتي حقك عليا
امل : ابتسمت: امشي لمرتك وعشاكم طيبته را
يوسف : باس راسها وطلع يجريي
.......
وصل فتح الباب وسكره وركب لدار النوم فتح الضي شاف انسانه اللي حبها وسيبها بروحها راقده زي الملاك
انا : حسيت بحد يمشي بجنبي : امل
يوسف : حبيبي
انا : كإنه من صب عليا اميه مصقعه صوت ماهوش غريب عليا
يوسف دموعه ينزلو : بنتي
انا : قعمزت بسرعه شبحت فيه : ي يي يووسفف
يوسف : قرب مني : حبيبتي
انا : مصدومه كأنه حلم حطيت يدي ع قلبي وانشوفله
يوسف : حضني : اااااه ياعمري انتييي
انا : بعدت عنه : متللمسنييش
يوسف : اسف ياروحي
انا : مصدومه وانوخر
يوسف : خانقته العبره : ارجوك افهمي عليااا وليش سافرت نحكيلك كل شي
انا : اطلععع عنييي
يوسف : بكسره خاطر ونبرة تشق القلب : كرهتيني وعد كرهتي راجلك ..وخر ووقف هز راسه وشبح لعيوني : اكيد بتكرهي شخص سيبك بروحك وعدا وبعد سنه رجع لشنوو? 💔 سكت شويه ونزلت دمعته مسحها وابتسم نبيك تعرفي اني حبيتك ونحبك بجنون لتوا ياوعد وطلع
انا للحظه تفكرت كلام امل وحرت بين نمشيله او نقعد بعدها نزلت نجري بنلحق عليه بسس طلع قعمزت نبكي بالعبره لعند جتني امل للحوش
امل : تشهق :ههييي خييرك شنصااار مالااا
انا حكيتلها ونبكي
امل : ااووه وععد لييش هكي
انا : نبكي : متزيديهاش عليا امل
امل : به نوضي
انا : وين
امل : لحوش هلي
انا : نبي نروح
امل : سايري هلي بالله عليك
انا : تنهدت : به هي
امل مسحتلي دموعي وطلعنا وحضنتني عمتي وتبكي وردت قعمزت بجنب يوسف اللي يشوفلي بحزن وانا سايرتهم شويه وخشيت هربت للمطبخ بحجة اني بنطيب وجت امال وامل يساعدن فيا ودرنا رز بالخلطه وعصبان وطلعنا جميع تعشينا وهدرزو وغيرو جو وكل واحد خش لداره
امل : بنكلم راجلي
انا : نوضي يحنه كلميه راجلك
امل : ههههههه ايواا ..وطلعت
انا طلعت توته النوم غيرت وفتحت شعري وطفيت الضي وتسطحت وغمضت عيوني
شويه نحس ب حد فتح الباب ويقرب بشوي انا مغمضه عيوني ومادرت رده فعل
يوسف : قرب مني : استاححشتك ياعمري
انا : .....
يوسف : نزل باس خدي : محلاك راقده كيف الملاك..وباسني بوسه تانيه وطلع
انا نزلو دموعي مسحتهم ورقدت
بعد يومين
اسامه : ياااعييله
عتمان: ماتقوليش عليش ديما صوتك عالي وتنبح
اسامه : توجع شويه لكن ميه ميه
امل : اختصر
محمد ضحك
اسامه : بنمشو للبحر يومين حجزتلكم شاليه اطلع طول نوضو وتو روحكم
يونس : اول مره ادير حاجه كويسه بكل
اسامه : توو نرخي بيكم ونرفع اصحابي رااا
يوسف : ضحك : لا تو اينوضو هني روحك بلا اعصاب
انا : امل ماعندي نيه نمشي
امل : نوووضي تعالي
مهم نضنا وتينا كل شي وروحو امل ومحمد يوتو دبشهم وكلمو امال اللي راجلها مسافر بيمرو عليها وانا خشيت رقدت
........
أنت تقرأ
رهفة قلب(روايات ليبيه)
Ficção Geralرواية : رهفة قلب للكاتبة : Nona Alsebhawy رواية واقعية حقيقية نعرفكــم ؛ انا وعد عمري 18 سنة ، مواصفاتي ؛ بيضة ونقشي ع الاشقر ، ملامحي حادة جدآ ، طولي متوسط ، كذلك شعري متوسط الطول بس كثيف وناعم ، وشخصيتي عفويه وحساسة ، وقفت قرايتي في تانية إعد...
