تزوجت_رجلا_ميت💙
الغيبوبة هي حالة من فقدان الوعي وعدم القدرة على التجاوب مع المحفزات الخارجية أي هي نوع من السُبات العميق .
تحدث الغيبوبة بسبب حدوث ضرر في المناطق الدماغية المسؤولة عن اليقظة والتنبه قد ينجم هذا الضرر عن ارتجاج دماغي .
إحدى الحالات النادرة في الغيبوبة تسمى "الوعي المشلول" أين يكون المريض بكامل قواه الشعورية والتفكيرية و قادر على إدراك ماحوله لكنه غير قادر على الاستجابة تعد هذه الحالة من أسرار الغيبوبة وتسمى ايضا ب "الروح بلا جسد أو الروح المحتجزة داخل الجسد" ذلك أن صاحب الجسد لا يمكنه التحكم فيه بأي طريقة .
تزوجت رجلا ميت💙
الكاتبةSohila:
مقتطف البداية:
عيات من هدرتهم وتمسخيرهم عليها هي مش عمية ولا طرشة لأنو تسمع وتشوف واش قاعدة مرت عمها وبنتها يتهامسو بيناتهم "البنت الأمية الجاهلة عادت كنة في هذا البيت ههه لازم تدعيلنا .... لابسة فستان غالي ونسات الفولارة على راسها والحوايج تع العجايز الي كانت تلبسهم أما حتى لو يلبس الفكرون الحرير يبقى فكرون فلخر " سمعت وسمعت حتى وذنها قريب تنقط دم ياريت مجاوش يقرعجو عليها ياريت متبعوهاش واش يحوسو منها ؟ هي رضات بلهم جات هنا وتزوجت رجل على فراش الموت أما الهم مارضى بيها هاهم تبعوها
قامت من الطاولة تبسمتلها عجوزتها : وين رايحة يابنتي ؟
لينا : نشوف آدم
هزت عجوزتها راسها بتفهم غمضت عينيها لأمها بإطمئنان انها حاترجع ومشات مخليه البقية في نميمتهم مشات ناحية غرفتو وهي تخمم في هدرتهم بلاك عندهم الصح ؟ بلاك لو مكانش فغيبوبة عمرها مادوس عتبة هذا الباب الدنيا كسرتلها شوكتها ووطاتلها سورها بزااف لدرجة عادت حتى رجل شبه ميت مستكثراتو فروحها أوهموها انو هي ماتسوى والو وهي صدقت معليش كلش يهون دوك توصل ليه وتفرغلو قلبها هو الشخص الوحيد الي تحكيلو كلش هو الوحيد الي يسمعها لأنو ميت لو كان حي كان نفر منها كما لوخرين
فتحت الباب ودخلت لكن الي قابلها أبدا ميسرش يعني ملحقتش تتهنى من أمو وختو لحقها هو هنا بلعت ريقها : عماد أخرج لو سمحت هذي غرفة زوجية خاصة مجاياش تدخلها
كان قاعد على طرف السرير يشوف لهذاك الي يبان راقد ضحك : ههههه غرفة زوجية !؟ وواش ممكن يصرى اذا دخلت يقوم ليا راجلك الجبار ويضربني لأنو اقتحمت غرفتو ؟
اتجاهلاتو وراحت للجهة لوخرا تع السرير تعدل فلمخدة تحت راس راجلها : أخرج برا عماد آدم ميحبش الحس
زاد فضحكتو الإستفزازية : هههههه هو قلك ميحبش الحس ؟ علابالك نستعرف تخضيت لما سمعت يقولو صحتو تحسنت أما دوك جيت وشفت بلي الفرق الوحيد انهم نحاولو الاجهزة بعدما كان كما جاجة التريسيتي اذا انقطع التيار يموت
تجاهلاتو ترفع فلغطا على راجلها كز على سنانو تتجاهلو؟؟ هو كان محور حياتها دوك حاطة كل اهتمامها لهذي الجثة ومتجاهلاتو كأنو مش شايفاتو قام وشدها بقسوة ودورها ليه جات تبعد فيه عنق خصرها بكل وقاحة تملصت بتقزز : بعد عليا بعد عليا عماد انا مرا متزوجة ونت زادة راجل متزوج
مرر لسانو على شفافو متشهيها : لمن تزينتي اه؟ على جالي صح ؟ اذا قصدك تغويني نقلك نجحتي
لينا بعينين يلمعو بالدموع من القهر من الذل و الحڨرة : بعد ولا نعيط ونلم العايلة عليك
جا يبوس فيها عيطت : أميييي
قفز مبعد عليها يشوف ليها بغش شوي وانفتح الباب عجوزتها لاهفة : خير يابنتي ؟
لينا تمسح في دموعها : لااا والو غير كي شفت ولد عمي هنا خفت يكون كاشما صرى لآدم
حطت العجوز يدها على صدرها وتنهدت براحة : متخافيش وتخوفيني معاك على والو يابنتي
شافت لوليدها تقدمت مخلوعة شافت لينا لوين تشوف عجوزتها لقات آدم يرعف انخلعت سلت المناديل وقعدتلو راسو تمسحلو كانت خايفة هذي اول مرة يرعف شافت موراها فعماد الي داهش بحقد كما الللبوة الي قربولها من صغيرها كاين رابط غريب تكوّن بينها وبين آدم هي أساسا تميل للرعاية والأمومة حنونة بفطرتها لما كانت فلمزرعة القطط والخرفان يستانسو بيها ، وهنا آدم كان يحتاج بزاف رعاية وجعوها عضامها وهي تعملو فلماساج وتقلب فيه اتقعدو حتى تلبسو وهو غايب عن الوعي أما مشتكاتش أبدا كأنها فصميمها من خلال اهتمامها بيه تبرهن انها تعمل شي عندو قيمة فلحياة وانها مش أمية جاهلة متعرف والو كما يقولو عليها
خزرهم عماد بتوتر وخرج قعدت عجوزتها تراقب فيها وهي تمسح فنيف آدم من الدم : خايفة يابنتي ؟
هزت لينا راسها بصدق بإيه بلا مترفع عينها عليه : أممم هذي أول مرة يرعف
حطت عجوزتها يدها على كتفها : هذي بشارة خير يابنتي
طلعت لوخرا نظرها للعجوزة بفضول : بشارة خير ؟
تبسمت العجوز : حاساتو كأنو يستجيب علابالك بلي هو كان يرعف لما يتقلق برك ؟ نظن دوك رعف لأنو عيطتي ممكن هذي دلالة أنو بدى يتحسن وممكن يفطن
وقفت العجوز وكملت : كل حد ربي يطيه قد نيتو خلي ايمانك فربي كبير ورح ياطيك قد تعبك
خرجت وخلاتها معاه رمات لينا المناديل على جمب وعاودت طلعت حدو على ركايبها قعدت تشوف ليه ثواني مسحت على خدو بظهر صوابعها : زعما نت صح تستجيب ؟ راك تسمع فيا ؟
فجأة تعمرو عينيها بالدموع رفعت يدها وسقلاتو حتى وجعها كفها انفجرت بلبكا : قوم .. قوم بزااف عليك نوم مش نت كنت أكبر مهرب فلمنطقة مش كل الي فلقرية يخافوك وكلهم كانو تحت امرتك (شهقة) قوم مرتك تتعرض للتحرش قدامك في غرفة نومك (سحب ما نيفها ) قوم وجيبلي حقي منهم كلهم .
حطت جبينها على صدرو وبكات بكات بحرقة ومحستش على أطراف صوابعو الي كانو يرجفو
