هي فرحانة وهو فرحان بفرحتها قاعد فكرسيه المتحرك يشوف لإنعكاسها فلمراية كفاه مركزة تحط المناڨش فوذنيها هو وصالها على طقمها اليوم من الصباط للفستان للذهب خلاها خيرت اونلين ووصلها كلش دارت ليه متبسمة شعرها لكحل مرفوع والظل فوق عينيها مخلي زرقة عينيها رصاصة فقلبو المكياج الخفيف الي حطاتولها نهال مواتيها و الفستان الغوز كأنو تخيط ليها كان عندها عود يخلي أي شي تلبسو يطيح عليه مرتو كانت جميلة من الداخل للبرا وهو محظوظ بيها ، نعمّت القمامش عليها وتبسمت : واش رايك ؟
آدم : رايي ؟ منيتك تسقسي فيا على رايي عينيا مخبروكش ؟
تبسمت بحشمة هو بلفعل يشوف ليها كأنها أجمل مرا فلكون نظرتو تقولها أنا مفتون بيك كمل عليها : طالعة تهبلي لدرجة حاب نحاوزهم ونلغي العشا ونبقى أنا وياك برك هنا فغرفتنا و ....
قطعت كلامو لما قربت فجأة وحطت يدها على شفافو : عيب متحكيش هكا متحكيش على واش صرى
حكم يدها الي على فمو وباس كفها تبسملها بخبث : كنت حنقلك نبقاو فغرفتنا ونرتاحو مفهمتش عقلك وين راح عيب عليك نتي يامرتي واش قاعدة تخممي
سحبت يدها : خلينا نهبطو مبقاش ويجو دارنا مش مصدقة أنهم قبلو يجو
آدم : لا متبدليش الهدرة قوليلي فواش كنتي تخمي
دارت موراه طبع بكرسيه متلبكة : قتلك لازم نهبطو قبل ميوصلو دارنا
آدم : أما قلتي عيب ال ....
غلقتلو فمو ومدت يدها الثانية من موراه تفتح فلباص قدامو تع الباب تبسم تحت كفها وقرر يعتقها هي حشامة ومش حاب حد التحت يشوف حمرة خدودها يكفي انها بكات لما لقات رقبتها بلأثار لأنو حشمانة تقابل الناس بيهم قالتلو بكل برائة انو الكل رح يعرف واش كانو يعملو على أساس مش عارفين !! معليش على الاقل فلأخير حلو الموضوع بلمكياج وتغطات الأثار لما دخلو الاسونسير الي يهبط الطابق التحتاني تع القصر قابلتهم المرايا الداخل كانت واقف موراه ويشوفو لبعض مزال شاد يدها على كتفو من الدقيقة الي سيات تغلقلو فمو حتى انو خلاها طبع بيه بيد وحدة
لينا بحشمة : يزي ماتشوف ليا هكا
آدم يفرك فيدها ويشوف لإنعكاسها بعشق : واش نعمل؟ مش قادر نرفع عيني عليك
فنفس الثانية انفتح المصعد نحات يدها منو وطبعت كرسيه للصالة لبرا شافت الخدامات متفاوتين يملاو فالطاولة وزهرة واقفة على راسهم تأشرلهم وتدقق عليهم نهال مع مروان يلعبو بالطموبيل الي مزال مروان معجب بيها إعجاب الأطفال!! مراد يحاول يذوق وزهرة تسقل فيه على يدو كان مراد رجل أكول حرفيا كان اول واحد يقعد على الطاولة وآخر واحد يقوم وياكل بمنتهى الشهية ، واقفة متوترة ترقب فلأجواء اليوم عايلتها رح يجو جية رسمية حتى يقطعو الشرط تع العرس اليوم رح يتناسبو رسميا ويقررو شروط الزواج كان المفروض انو لينا ترجع لدارهم لكن خلال هذا الأسبوع قدر آدم من التواصل مع عادل وقنعو أنو من الأحسن يجو هوما وأساسا العار عليهم لأنو معملوش قيمة لبنتهم ومجاوش قطعو الشرط رح يتعدو رماو بنتهم هو حابهم يجو ومعندوش مشكلة مع مطالبهم لأنو رح ياطيهم صنادق الذهب إذا اضطر مرتو تستاهل : أرواحي قدامي لينا
دارت من موراه وقفت قدامو وهنا شهقت كي سحبها لحجرو هذي حشومة كبيرة هي عاشت عمرها كلو مشافتش حد فلعايلة حاط مرتو فحجرو مش متعودة أنو الرجل يحب مرتو علنآٓ لسقتلها الكلمة : ه .. هنا ... الكل هنا
عنق خصرها : واش دخلهم ؟
عينيها شردو من واحد لواحد فالصالة من عمتو لولاد عمتو للخدامين ولا واحد يشوف معاهم أما علابالها شايفينهم : عيب
آدم : حاب نريح مرتي هي قايمة معايا طول الليالي الي فاتو ت ....
تلبكت : آدم آدم آدم ...
ضحك : أكي تنوضي فيا من النوم ؟ ، هبطت راسها مستسلمة كمل هو : متتوتريش رح يكون عشا عادي مناه خايفة وانا معاك؟
تملك وجها الحزن : جدي صعيب رح يتعمد يضيق عليك بشروطو
آدم : مش حانغالبو فذي عندو الحق لازم يتشرط لأنك غالية وتستاهلي
سمعت صوت أحذية وفد كامل فالمدخل على أرضية الرخام وخدامة ترحب : مرحبا بيكم اتفضلو من هنا ...
ثواني برك وملى المدخل الفخم تع الصالة بأفراد عايلتها كلهم جدها جداها ومرت عمها وعمومها للزوج كلهم واقفين يشوفو ليها بصدمة حتى امها وختها ورؤيا ونظرة عماد وختو كانت موت أكثر منها صدمة مفهمتش سبب دهشتهم حتى اتفكرت ثقل ذراعتيه على وسطها قامت مفزوعة عايلتها بعد هذا المشهد حيطولها وسام قلة التربية وقلة الحيا عن جدارة واستحقاق
