فاتت البارح وهاهو أخيرا مراد مش مصدق روحو انو قاعد مع خوه على نفس الطاولة صح هوما مش من نفس الرحم ولا من نفس الصلب أما هوما خوات بالروح آدم قاعد على صدر الطاولة في كرسيه المتحرك شاد الورق يطالع فيهم
آدم : ملقيتش حد تدي عليه الدين غير زياد ؟ انت فعلا حيوان وزيد مشعر
مراد : ولد عمك خير من حد غريب
رمالو الورق على وجهو : بما أنو رجعت دوك ملا كل حساباتي المجمدة انفك عليها الحجز رجعلو زبلو ومرة وخدوخرة حتى لو نموت روح تدين من سمسار يهودي ومتدينش من واحد من العايلة فهمت ؟ دوك بقالي زياد يمنن عليا
سب مراد تحت نيفو على اساس هو كان فلحنة والعيد والكبير ؟ الله غالب تزير وحاجة باينة مش رح يروح لعايلة الماضي ويقلهم عاونوني نمشي الخدمة : خلاص حقك عليا المرة الجاية نروح ولاد خوالك نقلهم عاونو ولد خالتكم خاصة مهدي الماضي راك تعرف قداه يعزك
ميل آدم عينيه فيه : معزتو في @#$&
مراد : لاا علينا الجماعة الي دارت علينا كفاه؟
آدم : صفيهم كلهم .... ونحي عليا هذا الشعر بقى يبان فيك غي العينين ...، مد راسو يشوف للمدخل الفاخر تع القاعة : وين البنات مش ناويين يتغداو ؟
مراد بنظرة خبث : لبنات ولا لينا ؟
شاف ليه لوخر : ايه وين لينا ؟ وين مرتي؟
مراد : هي فلكوزينة مع نهال وعمتك دوك يكملو ويجو
هز آدم راسو بتفهم كمل مراد : واش حاب من البنت ؟ ومتقليش مرتي مابناتكم عقد وحتى فاتحة مكاش واش راك تخمم؟
آدم : ملا نعقدو ونفتحو وين المشكل ؟
كان مراد رح يعلق أما دخلت زهرة هازة بلا كبير ، اليوم طيبت بيدها من الفرحة ونهال بعدها هازة تاني صحن وآخر وحدة كانت لينا داخلة تتماوت كأنو جارينها المسلخ
قعدت عمتو حدو تتبسم : كلشي خاطرك فيه طيبتو باغياتك تاكل حتى ترفد صحتك
نهال تقعد حد أمها : رح تعمل منك خروف
جات لينا تقعد أما جاها صوتو : ارواحي هنا حدي ، تلفت لمراد : قوم خليها تقعد
مراد بدهشة : نقوم ؟
آدم :ايه قوم شفت مرا تقعد بعيد على راجلها؟
ناض مراد مسلم أمرو لرب العالمين جات هي وقعدت بينهم حشمانة
آدم : هذا كلو نتي طيبتيه عمتي؟
زهرة : لاا ، أشرت بيدها : هذا وهذا وذاك لينا طيبتهم
شاف ليها : ياطيك الصحة أما علاه تعبتي روحك ؟
زهرة ونهال هبطو روسهم يتبسمو هذا بالنسبة ليهم مش آدم الي يعرفوه أبدا راه خالعهم بالتربية والأدب كأنو دخل تكوين خلال فترة الغيبوبة خلاتو حنين
نهال بغباء : الأزرق 👀 مع الأزرق 👀 جيتو آسوختي بلاك هذا هو سر الكيمياء هههه
هوما ضحكو غير لينا تمنات لرض تنشق وتبلعها هي مترباتش هكا ، فالمزرعة كان الكل مزير وجهو والسكات على الطاولة كان فرض فمبالك تكون هي محور الحديث هي متوترة عكس آدم ماخذ راحتو علخر قدملها الصحن : كولي
مراد : ايه كولي كولي كفاه تقعدي فبلاصتي ومجيكش الماكلة عيب
جاتو التقحيرة من حيث لا يعلم : قوم
مراد : هاه؟
آدم : قوم كي تتعلم تحكي اقعد معانا .. امشي
تدخلت لينا : لاا خليه لو سمحت
أشرلو آدم يرجع لبلاصتو رجع مراد بإحساس الكلب امشي يامراد اقعد يامراد
بداو كلهم ياكلو ماعدا آدم يشوف ليهم وزهرة علابالها وين حاب يوصل على هذي ضربت النح بينما لينا مقدرتش تاكل وتتهنى و الي معمولة الطاولة على شرفو مهوش ياكل : ت .. تحب نعاونك ؟
آدم : مش حاب نضايقك اتهناي فلقمتك
لينا : لا عادي ...
آدم : قربي هنا ملا
شافت للبقية كل واحد فصحنو عاملين نفسهم أموات قامت وحركت كورسيها شوي وصنعت مكان لروحها حدو جابت صحنو قدامها وهزت الفرشيطة والموس بيدين يرجفو : من واش نحطلك ؟
آدم : معنديش ذوق محدد حطي على ذوقك؟
هزت راسها بتفهم تهز من ومن حسب ذوقها : الخضرة خفيفة أحسن شي نبعدو على التوابل وغيرو و فتيتة صغيرة لحم ينفع هكا؟
آدم : ينفع
ياربي ولا واحد فيهم نطق كانت تسمع غي صوت صحون هزت اللقمة وقربت الفرشيطة لفمو كلى من يدها لمشكل مش انو كلى المشكل انو قاعد يتأمل فوجها ، الرجل هذا عينيه يتحركو معاها كأنو شايفها ومش مأمن كأنو طفل صغير يتبع فللاهية بعينيه قربت اللقمة من فمو وهذي المرة جبد : كولي نتي هذي المرة مش رح ناكل ونتي تشوفي
لينا : أما هذا صحنك
آدم : رح نتشاركوه عادي أساسا فالمستقبل رح نتشاركو كلش مش الصحن برك
خلاص حاتموت أساسا قدرت تسمعهم يضحكو من تحت لتحت دوك هدا ميحشمش؟ لااا أكيد ميحشمش مش باين على وجهو انو شايف غيرها أصلا
