آدم سمح للكل يكون سعيد يعني مش على جالهم حتى برك تحس مرتو بالراحة شكون يصدق أنو خلى الحراس يدخلو البيت وياكلو الحلوى ويباركو ويعملو جو طبعا مش كل الحرس مثلا حراس البوابة وتع الصور برا مدخلوش لازم دايما يبقى فطِن لكن الي داخل الصور من الخدامين والخدامات كلهم ياكلو ويشربو وماليين الصالة نهال لاصقة فمراد تطلب منو يراقصها زهرة على الكرسي تضحك عليهم
لينا قاعدة على الفوتاي وتتفرج فكل الأجواء هذا عرسها هو لاباس بيه أما متوقعاتوش هكا وكأنو عرفها فواش تخمم زير على يدها هو مطلقش يدها ملي قعدو هنا تلفتت ليه حرك ابهامو يمسح على ظهر يدها : هذا مش العرس هذا عقد قانوني أما رح نعملك عرس كما متمنياتو رح يكون عرسنا كما تحلمي بيه وأحسن
لينا : تعملي عرس؟
آدم : إيه تلبسي فيه فستان عروس أبيض أضخم وافخم ونعرضو كل الناس الي حابتهم
لينا : كل الي حابتهم ؟
آدم : إيه قوليلي شكون حابة يحضر العرس ؟
لينا : أمي و نسمة ختي ورؤيا وعمي عادل وجدة
آدم : هذا مكان ؟
لينا : نقدر نزيد نعرض أسما وبنات المزرعة ؟
آدم : أكي متأكدة برك ؟ لأنو هكا رح نعرسو وحدنا حاب معاريض بزااف زيدي خممي
لينا : نعرضو النسا الي خدمت معاهم فلج ...
انتبهت لروحها وقطعت كلامها قريب قاتلو كانت تخدم فلجنان قريب فضحت روحها
آدم : أما نسا ؟
لينا : آااا نسا نعرفهم من القرية
آدم : ملا رح نعرض القرية كلها خلي الكل يسمع انو تزوجتك
قرب عندها براسو : مش ناوية تباركيلي؟ انا باركتلك ونتي مزال
تلبكت : م ... مبروك
آدم : مش هكا
زاد شدلها يدها الثانية وهكا هو شادلها يديها فالزوج : سلمي عليا
شافت من ومن مكنش الي لاهي بيهم أو خلينا نقولو مكنش الي متجرأ يلهى أما مازالت حشمانة : الكل هنا
آدم بنبرة حنونة : خلي عقلك معايا أنتي وأنا برك متحطيش معاهم
عضت شفتها من التوتر انحنى مقرب لوجها : متعمليش هذي الحركة حبيبتي
رئتها سخنت من ضربات قلبها : أما ... حركة
آدم يشوف لشفافها : متعضيهمش هذي خدمتي
شهقت مهبطة راسها معندها وين تهرب هو شاد يديها رح تموت الي قالو كبيير بالنسبة لقلبها وعقلها الأعذر هذي أول مرة ليها مع عاطفة رجل : عيب
تبسم : لاا صدقيني مزال موصلتش العيب ... المهم لاعلينا قتلك باركيلي العيب انك تخلي راجلك يسنى يالله
بلعت ريقها : كفاه نباركلك ؟
آدم : كما باركتلك أنا سلمي عليا أما نتي حرة وين أنا كلي ملكك
لينا : ملكي ؟
آدم : ايه كما انا ملكك نتي ملكي
غمضت عينيها كوراجات روحها وقربت عندو حتى تبوسو على خدو أما لما فتحت عينيها لقات البوسة حد فمو تماما رجعت للور بسرعة وكون مش شاد يديها كانت هربت منو : أنا آسفة
آدم : علاه تتأسف حبيبتي ؟
حبيبتي منو تخلي أمعائها تدغدغ هو فجأة قفز من مرتي لحبيبتي : كنت رح نسلم على جبينك معرفتش كفاه جات ال ... تم
آدم : واش ال ...؟
هبطت راسها حشمانة : البوسة
ضحك عندها حياء مش طبيعي هي حتى تحشم تقول بوسة لالا وتزيد تتأسف أنو البوسة جات جمب شفافو هو أساسا يحوس عليها فوق شفافو : هه مرتي البريئة
لينا تجول بعينيها الزرق من ومن وتحاول تحرر يديها : اجبد يعيشك اجبد شوي أمك وأخوك هنا عيب
ميل راسو على جمب : أنتي وين كنتي عايشة مقبل ؟ واش من دنيا ؟
لينا : هاه؟
هز راسو بلا : ولا شي أما مهما تكون نوع العزلة الي عشتيها فأنا محظوظ انك كنتي ثم وأنو غفلو عليك حتى لقيتك أنا
لقاها زادت حشمت كلشي تعرف تعملو أنها تحشم خصها فت خبز بزااف باش تتعلم تتجاوب معاه ، لما كان فغيبوبة كانت تحكي معاه كل وقت ولما فطن قطعت كلش فهم أنها خجولة ومش واثقة فروحها ممكن هذا بسبة انو الي حولها كانو ينتقصوها يعاملوها كأنها ناقصة بينما هي أكمل منهم كلهم أغبياء هوما فعلا أغبياء وغبائهم نعمة لأنو لولا غبائهم مكانش وصللها لينا بالنسبة لآدم كما الحجر الثمين أما مش مين ماكان يعرف قيمتو لازم طيح فيد خبير يصقلها ويلمعها ويصفيها بعدها تظهر روعتها وتعود تعقيم بصري للي يشوفها : آدم !
فاق من سرحتو على صوتها الناعم أشرتلو موراه براسها لقى أمان قرب وانحنى عندو : عادل وعماد تاج الدين هنا ندخلهم ؟
