عماد : علاه خيرو جدي بالذات حتى يناسبوه ؟
صالح : لو تهبط دوك تقصد اي إنسان هنا وتقلو انك من طرف أحمد آغا رح يمدلك مفتاح دارو وهو يضحك يبيتك ويعشيك ويغديك اسم عايلتك الله يبارك يسوى يعني نسوبية كما هذي ترفعهم
عماد : شكون هو آدم زكاري قصدي شكون كان قبل مايطيح في الغيبوبة ؟
صالح : كان الشخص الي اذا فات فالطريق الكل يقطع حسو خايف يعني اذا كانت عايلة تاج الدين كاسبة الناس بلمودة هو كاسبهم بالسوط مكانش لي عندو الجرأة يوقف فطريقو او يناقشو
عماد : كان طاغية ؟
صالح : هكاك وكثر هو كتب اسمو بالدم أما مكان حتى واحد موراه لو معملش هكا كان الطالع و الهابط يعفس عليه
عماد : علاه وين بقية عايلتو عمومو جدود وخوال وغيرو ؟
صالح : هذي حاجة صعيب نتفكرها صرات قبل وقت طويل
ميل عماد عينيه فيه وجبد حزمة تع دراهم وخدوخرة وقاسهالو شدها لوخر وحشاها فجيبو : دوك تفكرت ... ، اتكى على الكرسي يشوف قدامو بينما يحك في لحيتو : على حد علمي أهل بوه هوما زاكاري وأهل أمو هوما آل ماضي وفزوج يكرهو بعضهم كره شديد ومسيحين دم بعض وفقطيعة تامة أما نقدر نقلك أنو الماضي طلعو ماضيين وقاسحين على زكاري وغلبوهم ههه
بقى لوخر يشوف ليه كمل صالح : ههه نضحك سامحني يا آاغا المهم فعلا كما قتلك للي خرج رابح نسبيا هو آل ماضي خوال آدم داك الوقت الي بقى حي من عايلة زكاري هوما زوج إخوة وولد عمهم كرهو من الدم والثار وهوما أب آدم وعمو سمحو فكلش هنا ومشاو للعاصمة كبرو الرزق وعاد عندهم كلش يعني مش معتازين يناڨرو هنا ال الماضي عادت عندهم حياة جديدة
عماد : يعني هنا انتهت المشكلة ؟
صالح : لا طبعا سلسال الدم بينهم كأنو مقري عليه محبش ينقطع دارت ليام ويحي أب آدم اشتد عودو وكبر من مراهق لراجل كامل المشكل من بين كل بنات الخلق عشق بنت من ال ماضي وطبيعي ميمدوهالوش قام خطفها وهرب
عماد : البنت هي أمو ؟
هز راسو بإيه : تماما هرب معاها وخلفو آدم لكن مش معروف شكون وصلهم وقتلهم للزوج لليوم العايلتين تقيس اللوم على بعضهم كل حد يمسح دم الزوجين فالثاني
عماد : و هو ؟
صالح : شكون هو ؟
عماد : هذا الكلب آدم
صالح : آااا هذا تقدر تسميه المغضوب عليه لا خوالو تقبلوه ولا عمو الكل شافو بذرة فاسدة خلطت دم ملازمش يتخلط
عماد : فزوج تبراو من الولد ؟
صالح : تماما ما عدا عمتو زهرة كانت متزوجة مع ولد عمها الي سبق وقتلك راح معاهم وقت قررو يخلو كلش هنا ضمت آدم لولادها وبعدما قالها خوها يا إما هو يا إما هي تخرج خيراتو هو وجابتو وجات مع راجلها وولادها هنا للقرية ورباتو بإعتبارو واحد من ولادها
عماد : طبيعي يكبر الولد حاقد على عايلتو الي تبرات منو صح ؟
ضحك صالح : حاقد هههه ؟ حاقد كلمة قليلة البذرة الفاسدة طلعت فاسدة عن حق وحقيق هو ورالهم الويل خاصة خوالو لأنو عمو عاملو وجه على جال عمتو أما خوالو عصرلهم الخل وكل أنواع المُخلالات زاحمهم في كلش وبداها حرب من أول شعرات بلوغ نبتت فوجهو سرق منهم كل مصلحة تجيبلهم المال وقسم معاهم كأنو يدي في حق أمو وبزيادة ركعهم حتى قبلو يتقاسمو معاه مصلحة التهريب وعملو هدنة بمقاييسو هو المهم يكفي عليهم شرو لأنو تعبهم معاه مقدرولوش
عماد : لذي الدرجة هو قادر ؟
صالح : كان قادر أما دوك الي عندو حق راه يحاول يقصو يقولو كي يطيح الثور لكحل يكثرو ذباحينو أما مراد مزال واقف هو العقبة الوحيدة وصدقني مش حايصمد لوقت طويل بلا آدم رح يتعب ويفلت الأمور فلخر ميقدرش يلحق على كلش وحدو
عماد : آل ماضي هذو خوالو وولاد خوالو لأي درجة يكرهوه ؟
صالح : اتهنى الواحد فيهم مستعد يمدلك @$&$ اذا مديتلو راس آدم زكاري
حط عماد ظهر يدو على فمو يخمم ويدو الثانية طبطب على الفولون تمتم : علاه جدي قبل يناسب هكا انسان من واش خايف ؟
صالح : خايف عايلتو تفنى في حرب ثار كما فناو هذو العايلتين بعض
تلفت ليه : لهذي الدرجة ؟
صالح : اني نقلك الدم بينهم وصل للركب يا آغا صدقني سقسي الأهالي اذا مش مصدقني الثعلب مينقلش خبر كاذب
هز راسو بتفهم : من اليوم رح تخدم عندي ومتسقسيش على نوعية الخدمة المهم رح تدي المقابل
