حلت عينيها في بلاصتها مزالت الحالة ظلمة حاسة بخدر في طرافها وثقل فراسها يشبه ثقل الأرق ريقها شايح وكي بلعت لقات حلقها وجعها وكفاه ميوجعهاش وهي باتت تعيط تلفتت لقات روحها راقدة في جيهة زياد لا كفاه صرى هكا طلعت الغطا وطلت تحت لقات روحها عارية حطت يدها على فمها بكشفة تتفكر في ليلة البارح دقيقة برك علاه راهي الظلمة مزال الحال ؟ اتقعدت تتوجع كأنو حوضها مكسور ؟ الهمجي نزل عليها بقوة نيزك مكانتش تجربة لطيفة ومش حابة تعاودها أبدا شدت الغطى عند صدرها : زيااد
مجاهاش رد سما مهوش فلحمام زحفت بألم على ركايبها وهزت التلفون من على لاتابل غي شعلاتو ولقات الساعة انخلعت راهي الثمنية ونص ؟؟؟ ملا علاه الظلمة وقفت برجلين يرجفو مشات مع الحيط وحلت الستائر الثقيلة تع الشرفة ضرب جسمها ضو النهار معناتو هو غلق الستائر ومشى هرب من حدها قبل ماتحس عليه عاودت رجعت تعرج بعُريها وقعدت على الطرف فتحت لي ميساج
_ وينك لازم ترجع دوك
_ ياااا تتمسخر بيا واش هذا الانسحاب التكتيكي ؟؟؟؟
_ زيااااد
بقات تشوف للشاشة تترقب أما لارد موصلها حتى حرف وهنا فهمت خسارتها رمات التلفون على السرير ضحكت على روحها بعدها شبكت صوابع يديها مع بعض صانعة قبضة مالت عليها بجبينها تخمم حست روحها غبية هو طبق عليها أسلوب الكر والفر كأنها عاهرة لاا فلحق حتى العاهرة تلقى زبونها يستنى فيها حتى يخلصها مش يظلم الحالة بالستائر ويهرب بهدوء معقول يدي عذريتها هكا ببساطة ويخليها تفيق وهو مش حدها يتسلل لبرا بطريقة خبيثة وميردش على ميساجاتها ؟هذا هو الإستقرار الي كان يحكي عليه؟ نزلت يديها تشوف قدامها بغضب لمعة دموع فعينيها : استغلالي رخيص
طلعت عينيها للسقف وروحت على وجها سحبت ماء أنفها حتى متبكيش وقفت تتحامل على وجعها : خرج كأنو مصرى والو ؟ اوكي حتى أنا نكمل حياتي كأنو مصرى والو مش حانطيك متعة الشعور بالنصر بأنك ديت حاجة عزيزة عليا او انك ربحتني
كي دارت موراها بانلها بقعة الدم تحت الضو الي كانت مخبية بسبة الضلمة عضت شفتها بحسرة هو متواناش أبدا فتدمير جدران عذريتها : متبكيش متبكيش
عاتبت روحها ومشات للحمام داخلت تحت المرش الما سخون ينزل عليها كمدلها عظامها كي حطت يدها على سيراميك قدامها لقات قبضتو على معصمها مزالت مرسومة صبحت بنفسجية واضحة شافت معصمها لوخر تان نفس الشي مقدرتش تشد كثر وبكات تحت الما مالت بجبينها على الحيط وبكات بمرارة دايما كان الحنين للعايلة ينهش فيها أما دوك غلبت عليها الحاجة والوحدة وتخيلت برك كون الموضوع مختلف كون باباها مأصرش يزوجها برجل تعدو خوها وكون مرفضش طموحها فلخدمة كون راها صبحيتها كعروس اختلفت راهي تعرفت بطبيب محترم تتغازل معاه بلمصطلحات الطبية وخدمت معاه فكلينيك القرية وعالجت الأهالي راهم ضربولها الطبل فلقرية وخرجوها على ظهر حصان من المزرعة ممكن ؟ راهم حناولها وصبحت بدوائر حمرة فيدها مش أثار الشد على معصميها مكنتش صبحت في فراشها وحدها كما الخزنة المنهوبة والمتروكة كانت فاقت على دقديق العجايز وفضول الأمهات كانت صبحت على ذراع راجلها وازعاجها ليه انو يقوم لأنو أهلها جايين ليها فصباحها هي مكرهتش القرية وأجوائها التقليديه هي كرهت الأمر الواقع الي حطوها تحتو غلقت المرش وخرجت يعني فلخر مش حتبقى تبكي طول اليوم صح ؟ مش قلنا حتكمل كأنو مصرى والو لقات وجها حمر من الما سخون وعينيها تان حمر من البكا سقلت وجها بخفة : هذا مش وجه وحدة قوية
انطلقت تحارب فوجعها وواش فيها اذا الوجع بين رجليها وظهرها قوي ؟ مفيها والو لأنو وجع قلبها أقوى مغلطش الي قال وجع ينسي في وجع أما تستاهل هي الي حلمت انو لما تستسلم الأجساد تستسلم الأرواح
جبدت حوايجها هيأت روحها كإمرأة ناضجة تعرف تعتني بنفسها منساتش تلبس فوطة حاسبة حساب نزيف لبست سروال جينز مقطع على الركبة وبيل أبيض دخلاتو في السروال مبينة عودها المثالي باسكات بيضة لبست مونتوها النوغ عند الركبة دخلت الساك فرقبتها وميلاتو على جمب قربت من مراية البلاكاغ وجبدت من جيبها شريط ساتان مكتوب عليه شانال كانت مداتولها وحدة من المرضى كهدية دات نص من شعرها وربطاتو بالشريط البنفسجي بلعت حبتين مسكن آلام هاهي دوك واجدة لمواجهة العالم مزال ميعرفهاش اذا حاسب بهذا الجاست كسرها خرجت من تم بخطى ثابتة رامية ألمها الجسدي والنفسي في آخر بقعة من تفكيرها
