الندى على الحشيش تقدر تشمو مخلط مع ريحة شجر التشينة الهضبة هذي جنة الصباح البرد تشوف النسا هنا ولهيك ينحو فتشينة ويعمرو في الكازيات منهم الي تغنى ومنهم الي يثرثرو فيما بينهم تسمع صوت هدرتهم يتردد في هدوء الصباح أغلبهم ربات بيوت ، البنات هذو الأيام معادوش يقعدو في القرية الحال تبدل عادو الاهالي يحبو يبعتو بناتهم للبلاد ومنهم يبعتوهم للعاصمة حتى يقراو ويتخرجو ويتزوجو براجل مناسب ومتعلم وحتى لولاد إما يقعدو هنا ويخدمو في الأرض ومعامل الأغوات أو يخدمو التهريب على الحدود القريبة أو الخيار الثاني يروحو للبلاد وين كاين فرص أوفر ، القرية هنا نائية وناقصة تنمية ومتناسبش طموح الشباب بينما الامهات تلقاهم هنا يخدمو في الجنانات و كل فصل وخدمتو مرة تشينة ومرة تفاح ومرة زيتون ، الأرض هذي كريمة على قد ما تحبها وتاطيها تاطيك ، ربات البيوت هذو ميحبسوش ثرثرة كلامهم وهمومهم يضحكو وهي خدمتها تضحك على كلامهم واقفة عند كازيات التشينة وشادة الدفتر في يدها تسجل ، كنا قلنا مقبل انو الخدامات هنا كلهم أمهات وربات بيوت ؟ ملا نحوها هي ملحساب لأنو هي كيف النوارة الي اتفتحت البارح لا الفولار الي على راسها ولا البوط الي لابساتو وغارقة بيه فالطين ولا فاست الصوف الي مخبية ملامح جسمها وواصلة لركبتها ولا اي شي من الي سبق وذكرتو يخبي زينها وجها وتبسيمتو ينسو الوجع شعراتها الي هربو من تحت الفولار متمردين فوق وجها ولون عينيها لزرق يخلوك تتأمل وتسمي بالله قربت الخالة فاطمة الي دايما في المشادات مع بنتها البنت عندها افكار المدينة والأم عندها أفكار القرية الي بينهم صراع ثقافي
الخالة فاطمة مرا سمينة ومن كثرة لبس الصوف عادت تبان سمينة كثر تحط فلكازي معمر تشينة مع خاوتو : الله الله جبتها من كرشي رجعتلي عدوة جبتلها الڨوداس لاباس عليه من دلالات سوق لاربعا البسيه يابنت البسيه حلفت عليا مش لاباساتو قال واش ؟ لما نروح لليسي يضحكو عليا صاحباتي تع المدينة يا أمي
لينا تضحك بينما تزيد فرقم فالدفتر قدامها : هههه خليها خالتي ممكن راهي تعاني من التنمر بسبة لبستها راكي تعرفي كفاه يشوفو لينا احنا الريفيات
فاطمة ترشق فمرافقها : التنمر ؟ واشمن تنمر هذا ؟ حنا خرج فينا النمر فحد ذاتو وماقلنا والو
ضحكت لينا حتى طاحو دموعها : ههههه أما نمر ؟ هههههههه
جات لوخرا وحطت كازي وخدوخر : شفتو المسلسل البارح ؟
ردتلها الي مزالت تنحي من الشجرة : شفت وغاضتني عمري كي شفت عرسها واتفكرت عرسي أنا اذا كملت نشوف هذو المسلسلات حانموت بحسرتي
كلهم بداو يحكو على أعراسهم الي ماملاتش عينهم ويتحسرو عل رجل كما هذا البطل الطويل الي عرس البارح بالبطلة فعرس ضخم فردت هي يدها قدامها وتبسمت بحشمة هدو اليامات يجي عماد إبن عمها الرجل الموعودة بيه ملي كانو صغار هي مش كما هوما هي حاتتزوج برجل تحبو صح متلاقاتش بيه ملي كانو ولاد أما العايلة كلها مقررة وقرار لارجعة فيه انو هذو الزوج لبعض ياحسراه داك الوقت كان عماد مريض بشدة كانت تبان أكبر منو وهي تلعبو وترفدو وتحطو و جداها تمسح على راسها وتقلها حاتكوني مرا صالحة لولد عمك عماد الي مكانش يطلق طرف ثوبها أبدا ويبكي كون يرقد بعيد عليها زاد مرضو واضطرو والديه يبعدوه عليها سافرو بيه العاصمة بعدها برات لبلاد حتى يكملولو علاجو سمعت بلي تعالج وبرا بعد طول عناء لكن أمو محبتش ترجعو ولقات بزااف سبايب قالت حابة ولدها يتعلم ويبقى يداوي وهكا عام مور عام ومرجعش لكن الوعد باقي قائم ودايما أمو تمدد وتمدد الرجعة والزواج حتى بعتولها العايلة هذي المرة أمر مباشر ترجع هي وياه فبعتو خبر بلي حيرجعو دو اليامات كل ليلة قبل ماترقد تلقى روحها تخمم كفاه راه عامل دوك زيان ؟طوال ؟ يخمم فيها كما هي تخمم فيه ؟ مزال متفكر ياماتهم وهوما ولاد؟
خرجها من تخمامها يدها الي حراشت من البرد لااا هي حالفة تلقى حل حتى لما يحطلها الخاتم يلقى يديها ناعمين علا الكلاكسون في الطريق لازم ترجع حتى توصي ختها على البوماد ليديها قبل ماتروح
لينا : خالتي جميلة شدي دفتر وسجلي فبلاصتي عندي شي مهم لازم نرجع البيت
علاه هوما يرفضولها طلب؟ هي حبيبة قلبهم قربت جميلة : روحي يابنتي اني هنا
جرات من ثم تعافر فالطين تجري وتنهج حتى لما وصلت طموبيل الهامر الي هي والكاميوات المركبات الوحيدة الي ممكن تشوفها فلقرية الكل هنا يكسب ما يناسب الطرقات المحفرة والصعبة انحنت تنهج هبط الزجاج نطقت البخار يخرج من فمها : طولت عليك عادل ؟
عادل هو عمها لكنو رجل في ال33 بارد ساكت جامد مستحيل يقلك كلمة حنينة أما هو حنين هي علابالها برك خاطرو مكسور من واش صرالو بكري عمها عادل واحد من أوسم الرجال هنا وحلم بنات القرية لكن كما قلنا هو بارد ودايما عندو الهالة تع مقلق
أشرلها بيدو : اطلعي برك
راحت اللور فتحت الطموبيل جبدت صباط نقي لبساتو وخلات بوطها تم وطلعت نقية حتى متوسخلوش الطموبيل
