بعد مرور شهر
عندها شهر كامل ملي جابوه غرفتها فلأول كانت تخاف تتمد حدو كانت تفكيرها طفولي تتخيلو يقوملها كما الزومبي أما تعودت عليه وكما وكلوها بهذيك المهمة التزمت بيها عادت تعتني بيه ، صح نحاولو كل الأجهزة أما مزال معلقينلو خيط السيروم فتحت هذاك الصندوق تع العُدة حدها بعدها نحات عليه الغطا فلأول جسمها كان يوجعها كانت تتعصر بمجهود عضلي كبير باش تقدر تقلبو لكن دوك تعودت على جهامتو هي لمست كل إنش فيه عادو يديها يعرفوه اول شي شمخت قطنة وحطتها على شفافو حتى ميتشقوش مررت إبهامها بهدوء على قطرات الما الي هربو من و من المميز في لينا انها تقوم بعملها بإخلاص هوما رجعوها ممرضة ليه بلا حتى مايدو رايها أما هي متتاحايلش هي تقوم بكل الخطوات بلاما تتخطى شي يوميا ، حطت القطن وهزت مشطة ، حطت يدها تحت راسو رفعتلو راسو شوي مشطتلو شعرو بيدها الثانية برفق وعاودت حطاتو على المخدة بعدها قلباتو على جمب وفكت عقدات الروب الطبي عاودت رجعاتو لوضعيتو وسلت الروب حتى لوسطو لأنو حتى وهو راقد مزالت تحشم تعريه تماما قدامها هي حرفيا تغمض عينيها بحشمة لما تضطر تمسو ثم كأنو شايفها بقى صدرو كلو مكشوف قدامها عمتو زهرة دايما تقلها أنو طاح نصو من وقت دخل الغيبوبة على هذي تلقى روحها حايرة لأنو هو مزال ببنية ممتازة ملا كفاه كان مقبل ؟
حطت زيت اللافندر على كفافها وانحنت مقربة ليه وجها قريب من وجهو لدرجة انفاسها تضرب فيه حطت كفافها على كتافو و بدان تمسد برفق كما علموها : بواش تستمتع كثر ؟ بحمام التنظيف الي نعملولك كل صباح ؟ ولا بلمساج الي نعملولك كل ظهر ؟ ولا بالرياضة العضلية الي نعملهالك كل عشية ؟
سقساتو كأنو سامعها هي تحكي معاه وتحكيلو كلش هبطت كفافها لذراعتيه ومزالت تمسد : هذاك اليوم لما نحيتلك أظافرك وجرحتلك صبعك بلغلط التأم الجرح متاخفش أما متجرأت نقول لحتى واحد خفتهم يقيسوني برا ونت لو قمت ولقيتني جرحت صبعك كنت حاتقيسني برا ؟
زادت قطرات الزيت وبدات تمسد فعضلات كرشو صعودا نزولا : أكيد حاتقيسني انت فكل الأحوال حتقيسني حتى ممكن تزعف أنهم تهورو وخلاو جسمك بين يدين وحدة جاهلة أمية كيفي ..... تعرف ؟ لما كان عماد صغير كان ديما مريض وكان نحيف وانا الي نهزو ونبات عند راسو نبدلو الكمادات ونحطلو مزهر حتى تهبطلو الحمة أحيانا كان يمرض لدرجة ميقدرش يهز المغرف لفمو وانا كنت نوكلو كان يحبني كنت نحس انو انا كل عالمو " لينا متخلينيش لينا بنت عمي أجمل بنت فالدنيا ... لينا لما نكبر رح نتزوجك " هكا كان يقلي لكنو كبر وتغير وانا تغيرت اما الفرق هو تغير للأحسن وانا تغيرت للأسوء وانا بقيت عايشة على حلم الطفولة وهو كبر ونسى الطفولة كلها
بلعت غصتها وضحكت : ههه خلينا من هذا كلو مش يقولو البعيد على العين بعيد على القلب
دخلت يديها تحت الروب الطبي عند الحوض تعو قريب من رجولتو حشمت الموضوع كان يحشم دلكت المنطقة ثم ميلة راسها على جمب متهربة بعينيها : انا مش متحرشة خليها فبالك هذي يسموها الضرورة الطبية والصحية
كملت خدمتها تعتني بيه من شعرو حتى أخمس قدميه لكنها متقدرش تعمل هذا كلو اذا محكاتش وثرثرت وريحت قلبها هي بحاجة تفضفض لكنها متوثق فحتى واحد غير فيه لأنو مش سامع ولا شايف ولا حيحكم عليها
★★★
نعيمة مش عاجبتها العيشة فهذي المزرعة أما مضطرة تساير أحمد آغا حتى تخليه يورّث وليدها ويرضى عليه ، كل ما رضى على عماد كان أحسن وعلى سيرة عماد هاهو داخل يحرث فلرض مفهمتش وليدها واش بيه خرجت قامت من على الفوتاي متبعاتو فتحت باب غرفتو بعدما دخل هو وخبط الباب موراه دخلت هي بعدو مليح انو مرتو اللكاكة مهيش هنا ضرب لاتابل برجلو كسرها حطت يدها على قلبها مخلوعة : خير ياعمري ؟ خير السبع تاعي شبيه؟ واش مقلق ولدي
نحى الفاست تعو رماها على جمب بفى بقمجة بيضة وسروال جينز كان عماد يتأنق بشكل مبالغ كأنو مودل حتى صباطو يسوى أجر عشر عمال فمعمل عمو وهذا الشي ميتوالمش مع هذا المكان حكى معاه عادل بصريح العبارة ينقص من هذا التبجح والترف لأنو السكان هنا بسيطين مكنلاه المبالغة لكن لوخر راكب راسو و مقنعاتو أمو بقناعتها أنو أحسن من الكل ولازم يبين هذا الشي فكل فرصة قعد على طرف السرير مسح على وجهو بتقلاق جمع يديه بين عينيه 🙏 يشوف قدامو بحقد
قعدت حدو تمسح على ظهرو تموت على وليدها هو صنعة يدها وأملها فدنيا تعبت عليه وطبّعاتو بطبعها هو فخرها و أملها :خير عماد؟ قلي واش مضايقك ياماما ؟
عماد : كذبتي عليا .... نتي كذبتي عليا
