يا بعيد عني وشاغل تفكيري
إمتى هنتقابل أنا وأنت يجميل
نتجمع ونشّبِك الإيد ف الإيد
نتمايل ونغني ونتعاهد بوعود
نتصارح بحاجات كانت ع البال
يا سكر داب في شراييني
يا نبضة قلب تحييني
فقلي من غيرك أعيش إزاي
فلو تسمحلي بس أطلب
متطولش في الغيبة
ونتلاقى ف أقرب فرصة
يا باب مقفول ب١٠٠ ترباس
يا قلبي ياللي بابه صده
ولا كان ع البال ولا ع الخاطر
الاقيك تيجي وبخبطه رقيقة يدوب منك
ترابيس الباب تفتح فجأة
ويفرح قلبي انه لقاك.
يا غروب الشمس في عيني طول الوقت
واقصد بالتشبيه إنك راحتي
وهدوئي وشئ بيفرحني
أنا أول مرة إدعي في سجدة
من يوم ما بقيت ف رحاب الله
بشخص يكون
فيوم م الايام ملكي
ومحدش غيري يكون عايزه
ولا حابب أشوف حد مكاني
لابس الكرفتة والبدلة السينييه
وواقف جنبك والإيد ف الإيد
دا مجرد ما تخيل ناري بتقيد
وبخاف معرفش احكيلك عن حبي
وعن خوفي عليكي لياخدك غيري
أنا بدعي وبخلص في دعائي
يتحقق حلمي وتصبحي ملكي
وأفوق م الاحلام للواقع
والواقع يتلخص فيكي.
انا شوفت الكون جوه عيونك
ولقيتني فيه نجمة وعايمة
فبقيت النجمة الطمعانة
انها تحتل الكون كله
أو حتى يدوب تلفت نظرك
انها بتدور جوه ف فلكك
فتموت وتهز الكون كله
وشُهبها تنور ف عينيكي
فتحسي بيا إن انا موجود
وبضحي بأغلى ما عندي
علشان أثبتلك إخلاصي.
