ختيت الزيت في النار يسخن مسافة ما اقش الحوش ورشيت الاوض، رميت الزلابية وعملت الشاي، فرشت الملايات وولعت البخور، يمه لمن قامت لقتني خلصت ولميت العدة بغسل فيا،
الدهب: بت المنى انا مش حدثتك مية مرة ما تسوي شيتن ما قلت ليك سوي؟
- يمه صحيت بدري الحوش كان وسخان والجيران بجو من الصباح عايزام يلقو بي وسخو قشيتو سرعة ولا اتاخرت، وانت عارفه يابا لمن يقوم بدور الشاي وانا كنت جيعانه رميت الزلابية وسويت الشاي والعدة كانت كتيرة غسلتا عشان انقصى ليك لكن قربت اتم.
+ احيي يابتي ما بتسمعي الكلام كل يوم بتقولي كلامط ده وانا ما عايزة اتعبك.
- ما تعبت والله، هسي اللمليم ده بتعب.
+ بكرة يقولو مشغلاك زي الحمارة وانا راقده في السرير ومرتاحه.
- ما تشتغلي بيم جنم سواطة ونقيل كلام.
+ سمح امشي المدرسة بعد ده وكفاك شغل.
- حاضر، دخلت استحميت لبست هدومي وطلعت مع بنات فريقنا مشينا المدرسة، هي بعيدة من البيت قريب للترعة الكان في ود ناس الصافيات غرق فيها يحليلو، ولي يوم الليله ما بخلو زول يقعد جمبها عشان ما يموت فيها تاني، الناس بتحدثو وقالو في زول بطلع منها بليل بجر البشوفو قدامو وانا بخاف منو لكن ما شفتو ولا بمشي جمبها عشان ما يمسكني ويدخلني معاو البحر، تاني ما برجع لي يمه ولا بمشي المدرسة ولا بشوف صحباتي، ما بحضر تلفزيون في بيت ناس السرة ولا برسلوني الحواشة بررري ما بجي جمبها.
"مكان آخر"
"الخرطوم"
هالة: انت يعني يا ناصر مصر على كلامك ده؟
ناصر: انا قلت ليك من البداية ما محتاج اكرر الموضوع كل يومين وانت ما تفتحي لي السيرة دي تاني.
- بفتحها الولد ده ولدي زي ما هو ولدك، ما على كيفك تقول عايز تعرس ليو انا قاعدة بعمل في شنو يعني؟
= ماف زول قال ليك اعملي حاجه و ولدك ما شافع انا سألتو وهو وافق.
- ما سألتو انت اجبرتو ما عشان بت اخوك الا يعرسها خلي يشوف وحده غيرها وتكون على مزاجو ما مزاجك انت.
= عايزاني اقول لي اخوي انا ما عايز بتك لي ولدي؟!
- اي فيها شنو يعني انا ما زمان قالو ما عايزني.
= انت كنت غريبة لكن دي بت اخوي يعني لحمي ودمي.
- وعشان بت اخوك القالت مرتو ما عايزاني لاني ما لحمكم ودمكم انا زاتي ما عايزة بتها تبقى مرت ولدي.
= انا البقرر الكلام ده ما انت.
- نشوف رأي منو البمشي في البيت ده.
ناصر: وين انت يا ابني بتضرب ليك من قبيل؟
محمد: مشغول والله في الشركة يا حاج، في حاجه؟
