ابوي حمدالنيل كان شايل طبنجه في يدو ضربا في الضرا مع الرجال وجه داخل بارك لي وانا ما فاهمة عقدو لي انا يعني ولا هو ملخبط، لكن ماف وحده في اخواتي ما عرست الا انا، امي مسكتني وقعدت تبكي واخواتي بكو معاي، وانا بعاين ليم هم ببكو لي يمه ساقتني معا ودخلنا الاوضة قالت لي قبل البارح ابوك اتكلم معاي وقال لي ود عمك بدورك ليو مرا ولمن كلم ابوك حمدالنيل وافق وهم جو عشان يعقدو ليكم، ما كلمتك لانو اعمامك حموني والا وحات الله يابتي بدور احدثك لكن اسوي شنو ما بقدر اكسر كلامم، قلت ليا لي ما قلتو لي انا ما عايزة اعرس ما عايزة امشي اللمارات، سمعتكم يوم داك وقلت ما بتخليم يسوقوني، انا عايزة اقعد هنا معاك في بلدنا امشي المدرسة مع صحباتي واشتغل في الحواشه، قولي لي ابوي يطلقني ما عايزة العرس ده، ما بمشي معاو البندر ولا بخليك انت ويابا قولي ليو يطلقني هسي، قالت لي هشش وطي صوتك ما زول يسمعك يودي الكلام لي ابوك عارفه كويس لو سمعك بتقولي طلاق بكسر رقبتك، وانا زاتي بلحقوني ليك قلت ليا بكلم ابوي حامد هو ما بخليم يسوقوني منك، بقت تبكي وقالت لي انا والله ما كنت عايزاك تعرسي لكن نعمل شنو ابوك واعمامك موافقين الا نسكت ونرضى، انت لسه صغيرة ما كنت عايزاك تعرسي هسي العرس ما هين وانت يادابك فريع اخضر لين عودك ما قوى، لكن لو اتكلمت معام بقولو قليلة ادب وبتدخل في كلام الرجال، قلت ليا طيب ارح نتكلم مع يابا نقول ليو انا لسه صغيرة خليني بعد كم سنة ويعرس لي، قالت لي ابوك حامد هين لكن انت عارفه أبوك حمدالنيل لو كسرتي رقبتك ما بطلقك من راجل غريب خلي يكون ولد اخو شقيقو، شايفه اختك الاكبر منك مية مرة جات راجعة البيت ده وهي متشاكلا مع راجلها يوم واحد ما قال ليا الزعلك شنو، وكل مرة بشاكلا ويرجعا بيتا غصبا عنا، لمن اتذكرت اختي وقت تجي وراجلا دقاه وابوي ما بدافع عنا والتانية العرسو فيا وجابو ليا ضرة، والتالته البقت هي ضرة لمن الاولى ماتت مسكت الاولاد بقيت ابكي وما عارفه اعمل شنو، انا ما عايزة اعرس ما عايزة راجل بضربني ما عايزة يكون في مرة تاني ما عايزة اربي اولاد ما اولادي، البكى قرب يشقني ويمه بتحنس فيني وقالت لي اسكت عشان جات بت داخلة ادتني تلفون وقالت لي ده محمد قلت ليها محمد منو بقت تعاين لي ومنططه عيونا زي القرد، يمه قالت ليا البت مخلوعة عشان كده وادتني التلفون اتكلم معاو،
محمد: يا هلا.
- وعليك السلام.
= كيف انت كويسة؟
- الحمدلله بخير وعافيه اهلنا كلم طيبين ما عندنا عوجة غنيماتنا وبقيراتنا بمشو المرعى وما ناقصنا علف وعندنا قمح للعواسة ودخن للمديدة.
= "ضحك شديد" اها طيب مبروك.
- الله يبارك فيك وفي اهلك الحيين والميتين القاعدين والمسافرين الجو والما جو.
= "ضحك تاني" طيب الحمدلله، عايزة حاجه اجيبها ليك معاي من هنا؟
- من اللمارات؟
